Chronological
Ang Hatol sa Egipto
46 Ito ang sinabi ni Yahweh kay Propeta Jeremias tungkol sa mga bansa. 2 Tungkol(A) sa Egipto, sa hukbo ni Faraon Neco na nilupig ni Haring Nebucadnezar ng Babilonia, samantalang sila'y nakahimpil sa may Ilog Eufrates sa Carquemis noong ika-4 na taon ng paghahari sa Juda ni Jehoiakim, anak ni Josias:
3 “Ihanda ninyo ang inyong mga kalasag,
at sumugod sa digmaan!
4 Lagyan ninyo ng sapin ang mga kabayo, at sakyan ng mga mangangabayo.
Humanay kayo at isuot ang inyong helmet,
ihasa ang inyong mga sibat,
at magbihis ng mga gamit pandigma!
5 Ngunit ano itong aking nakikita?
Sila'y takot na takot na nagbabalik.
Nalupig ang kanilang mga kawal,
at mabilis na tumakas;
hindi sila lumilingon, sapagkat may panganib sa magkabi-kabila!
6 Ngunit hindi makakatakas kahit ang maliliksi,
at hindi makalalayo ang mga kawal.
Sila'y nabuwal at namatay
sa may Ilog Eufrates sa gawing hilaga.
7 Sino itong bumabangon katulad ng Nilo,
gaya ng mga ilog na ang tubig ay malakas na umaalon?
8 Ang Egipto ang bumabangong tulad ng Nilo,
gaya ng ilog na umaalon.
Sabi niya, ‘Ako'y babangon, aapawan ko ang lupa,
wawasakin ang mga lunsod, at lilipulin ang mga naninirahan doon.
9 Lumusob kayo, mga mangangabayo!
Sumugod kayong nasa mga karwahe!
Sumalakay kayo, mga mandirigma,
mga lalaking taga-Etiopia[a] at Libya na bihasang humawak ng kalasag;
kayo ring taga-Lud na sanay sa pagpana.’”
10 Ang araw na iyon ay araw ni Yahweh,
ang Makapangyarihang Panginoon,
araw ng paghihiganti niya sa mga kaaway.
Ang tabak ay parang gutom na kakain at hindi hihinto hanggang hindi busog,
iinumin nito ang kanilang dugo.
At ihahandog ni Yahweh ang mga bangkay nila
sa lupain sa hilaga, sa may Ilog Eufrates.
11 Umakyat ka sa Gilead, kumuha ka roon ng panlunas.
Walang bisa ang maraming gamot na ginamit mo;
hindi ka na gagaling.
12 Nabalitaan ng mga bansa ang kahihiyan mo,
at umaalingawngaw sa sanlibutan ang iyong sigaw.
Natisod ang kawal sa kapwa kawal;
sila'y magkasabay na nabuwal.
Sumalakay sa Egipto si Nebucadnezar
13 Ito(B) ang sinabi ni Yahweh kay Propeta Jeremias tungkol sa pagdating ni Haring Nebucadnezar upang salakayin ang Egipto.
14 “Ipahayag ninyo sa Egipto,
sa Migdol, sa Memfis, at sa Tafnes:
‘Tumayo kayo at humanda,
sapagkat ang tabak ang lilipol sa inyong lahat.’
15 Bakit tumakas ang itinuturing na malakas na diyus-diyosang si Apis?
Bakit hindi siya makatayo?
Sapagkat siya'y ibinagsak ni Yahweh.
16 Nalugmok ang maraming kawal;
ang wika nila sa isa't isa,
‘Umurong na tayo sa ating bayan
upang tayo'y makaiwas sa tabak ng kaaway.’
17 “Ang Faraon ng Egipto ay tawagin ninyong
‘Ang maingay na ugong na nagsasayang ng panahon.’
18 Sinasabi ng Hari na ang pangala'y Yahweh, ang Makapangyarihan sa lahat.
Ako ang buháy na Diyos!
Gaya ng Tabor sa gitna ng mga bundok,
at ng Carmelo sa may tabing-dagat,
gayon ang lakas ng isang sasalakay sa inyo.
19 Mga taga-Egipto, ihanda ninyo ang inyong sarili sa pagkabihag!
Mawawasak at guguho ang Memfis,
at wala isa mang maninirahan doon.
20 Ang Egipto'y gaya ng isang magandang bakang dumalaga,
ngunit dumating sa kanya ang isang salot buhat sa hilaga.
21 Pati ang kanyang mga upahang kawal
ay parang mga guyang walang kayang magtanggol.
Nagbalik sila at magkakasamang tumakas,
sapagkat sila'y hindi nakatagal.
Dumating na ang araw ng kanilang kapahamakan;
oras na ng kanilang kaparusahan.
22 Siya'y dahan-dahang tumakas, gaya ng ahas na gumagapang na papalayo.
Sapagkat dumating ang makapangyarihang kaaway,
may dalang mga palakol,
tulad ng mamumutol ng mga punongkahoy.
23 Puputulin nito ang mga punongkahoy sa kanyang kagubatan, sabi ni Yahweh,
bagama't ito'y mahirap pasukin;
mas marami sila kaysa mga balang,
at halos hindi mabilang.
24 Mapapahiya ang mga taga-Egipto;
ibibigay sila sa mga taga-hilaga.”
25 Sinabi ni Yahweh na Makapangyarihan sa lahat, “Paparusahan ko si Ammon na taga-Tebes, ang Faraon, ang Egipto at ang kanyang mga diyos at mga hari, at ang mga nagtitiwala kay Faraon. 26 Sila'y ibibigay ko kay Haring Nebucadnezar ng Babilonia at sa mga pinuno nito. Pagkatapos, pananahanan ang Egipto gaya noong unang panahon.
Ililigtas ni Yahweh ang Kanyang Bayan
27 “Ngunit(C) huwag kang matakot, lingkod kong Jacob;
at huwag kang manlupaypay, Israel.
Ililigtas ko kayo, kahit saan kayo naroon;
kahit nasa lupain ng pagkabihag ang inyong mga anak.
Manunumbalik ang payapang pamumuhay ni Jacob,
at siya'y sasagana at wala nang katatakutan.
28 Inuulit ko, Jacob na aking lingkod, huwag kang matakot,
sapagkat ako'y sumasaiyo,” sabi ni Yahweh.
“Ganap na magwawakas ang lahat ng bansang pinagtapunan ko sa iyo,
subalit ikaw ay hindi ko wawasakin.
Paparusahan kita sapagkat iyon ang nararapat;
hindi maaaring hindi kita parusahan.”
Ang Pahayag ni Yahweh tungkol sa mga Filisteo
47 Ito(D) ang pahayag na tinanggap ni Jeremias kay Yahweh tungkol sa mga Filisteo bago sinalakay ni Faraon ang Gaza:
2 “Tumataas ang tubig sa hilaga,
at babaha, ito'y aapaw sa buong lupain;
magpapasaklolo ang mga tao,
maghihiyawan sa matinding takot.
3 Maririnig ang ingay ng yabag ng mga kabayo,
ang paghagibis ng mga karwahe!
Hindi na maaalala ng mga magulang ang kanilang mga anak;
manghihina ang kanilang mga kamay,
4 sapagkat dumating na ang araw ng pagkawasak ng mga Filisteo.
Ang pinakahuling magtatanggol sa Tiro at Sidon ay babagsak;
sapagkat lilipulin ni Yahweh ang mga Filisteo,
ang nalabi sa baybayin ng Caftor.
5 Parang kinalbo ang Gaza;
pinatahimik ang Ashkelon.
Hanggang kailan magluluksa ang mga Filisteo?
6 Kailan pa magpapahinga ang tabak ni Yahweh?
Lumigpit ka na sa kaluban, at doon manahimik!
7 Paano naman itong mapapahinga?
Hindi pa tapos ang gawaing itinakda sa kanya ni Yahweh
laban sa Ashkelon at sa kapatagang malapit sa dagat;
doon nakatakda ang gawain nito.”
Ang Pagwasak sa Moab
48 Tungkol(E) sa Moab, ganito ang sinasabi ni Yahweh na Makapangyarihan sa lahat, ang Diyos ng Israel:
“Kahabag-habag ang Nebo, sapagkat ito'y ganap na mawawasak.
Nalupig ang Kiryataim, nawasak ang kanyang pader,
at nalagay sa kahihiyan ang mga mamamayan.
2 Wala na ang katanyagan ng Moab;
ang Hesbon ay nasakop na ng kaaway.
Sinabi pa nila,
‘Halikayo, wasakin natin ang Moab hanggang hindi na ito matawag na isang bansa!’
At kayong nakatira sa Dibon, kayo'y patatahimikin;
hahabulin ng tabak ang inyong mamamayan.
3 Dinggin ninyo ang pagtangis sa Horonaim;
dahil sa karahasan at pagkawasak.
4 “Wasak na ang Moab.
Iyakan ng mga bata ang siyang maririnig.
5 Sa pag-akyat sa Luhit,
mapait na tumatangis ang mga mamamayan;
pagbaba sa Horonaim,
naririnig ang paghiyaw ng ‘Kapahamakan!’
6 Tumakas kayo, iligtas ninyo ang inyong buhay,
gaya ng mailap na asno sa disyerto.
7 “Mga taga-Moab, dahil nagtiwala kayo sa inyong lakas at kayamanan,
kayo'y malulupig din;
at dadalhing-bihag ang diyus-diyosan ninyong si Quemos,
pati ang kanyang mga pari at mga lingkod.
8 Papasukin ng tagawasak ang bawat lunsod;
at walang makakatakas.
Mawawasak ang kapatagan at ang libis ay guguho.
9 Lagyan ninyo ng puntod ang Moab,
sapagkat tiyak ang kanyang pagbagsak;
mawawasak ang kanyang mga lunsod,
at wala nang maninirahan doon.”
10 Sumpain siya na pabaya sa pagtupad sa gawain ni Yahweh!
Sumpain siya na ayaw gumamit ng kanyang tabak sa pagpatay.
Nawasak ang mga Lunsod ng Moab
11 “Namuhay na panatag ang Moab mula sa kanyang kabataan,” sabi ni Yahweh. “Siya'y gaya ng alak na hindi nagagalaw ang latak. Hindi siya isinasalin sa ibang sisidlan; hindi pa siya nadadalang-bihag. Kaya hindi pa nagbabago ang kanyang lasa, at ang kanyang amoy ay hindi pa nawawala.
12 “Kaya, tiyak na darating ang panahon na magsusugo ako ng mga lalaking magtutumba sa mga sisidlan; itatapon nila ang laman nito, at saka babasagin hanggang sa madurog. 13 At ikakahiya ng mga taga-Moab si Quemos, na kanilang diyus-diyosan, katulad ng Bethel, ang diyus-diyosang ikinahiya ng Israel matapos niyang pagtiwalaan.
14 “Kayong mga lalaki sa Moab, paano ninyo masasabing kayo'y mga bayani,
at mga matatapang na mandirigma?
15 Dumating na ang wawasak sa Moab at sa kanyang mga lunsod,
at ang magigiting niyang kabataan ay masasawi.”
Ito ang pahayag ng Hari na ang pangalan ay Yahweh na Makapangyarihan sa lahat:
16 “Nalalapit na ang pagbagsak ng Moab,
mabilis na dumarating ang kanyang pagkawasak.
17 Magdalamhati kayo dahil sa kanya, mga karatig-bayan,
at kayong lahat na nakakakilala sa kanya;
sabihin ninyo, ‘Nabali ang matibay na setro,
ang setro ng karangalan at kapangyarihan.’
18 Kayong mga taga-Dibon, bumabâ kayo mula sa inyong kataasan
at maupo kayo sa tigang na lupa,
sapagkat dumating na ang wawasak sa Moab
at iniwang wasak ang inyong mga tanggulan.
19 Kayong naninirahan sa Aroer,
tumayo kayo sa tabing-daan at magmasid,
tanungin ninyo ang mga lalaking tumatakbo, ang babaing tumatakas,
‘Ano ang nangyari?’
20 Ang Moab ay napahiya at nanlupaypay;
humiyaw kayo at tumangis,
ipahayag ninyo hanggang sa Ilog Arnon na winasak na ang Moab!
21 “At ang hatol ay dumating na sa mga lunsod sa mataas na kapatagan: sa Holon, sa Jaza, sa Mefaat, 22 sa Dibon, sa Nebo, sa Beth-diblataim, 23 sa Kiryataim, sa Bethgamul, sa Bethmeon, 24 sa Keriot, sa Bozra at sa lahat ng lunsod ng Moab, malayo man o malapit. 25 Bagsak na ang kapangyarihan ng Moab at siya'y mahina na ngayon, sabi ni Yahweh.”
Mapapahiya ang Moab
26 “Lasingin ninyo ang Moab,” sabi ni Yahweh, “sapagkat naghimagsik siya laban sa akin. Bayaan ninyong siya'y gumulong sa sariling suka, at maging tampulan ng katatawanan. 27 Hindi ba't pinagtawanan mo ang Israel? Itinuring mo sila na parang nahuling kasama ng mga magnanakaw at napapailing ka tuwing siya'y babanggitin mo.
28 “Iwan ninyo ang mga lunsod, at doon kayo manirahan sa kabatuhan, kayong taga-Moab! Tumulad kayo sa kalapating nagpupugad sa gilid ng bangin. 29 Nabalitaan na namin ang kapalaluan ng Moab. Napakayabang niya: mapangmata, palalo, hambog at mapagmataas. 30 Akong si Yahweh ay hindi mapaglilihiman ng kanyang kataasan; pawang kabulaanan ang kanyang sinasabi at ginagawa. 31 Kaya nga, tatangisan ko ang Moab; iiyakan ko ang lahat ng taga-Moab; magdadalamhati ako para sa mga taga-Kir-heres. 32 Tinangisan kita, O baging ng Sibma, nang higit sa pagtangis ko para sa Jazer. Ang mga sanga mo'y lumampas sa dagat, at umabot hanggang sa Jazer; dumaluhong ang maninira sa iyong mga bungangkahoy at ubasan nang panahon ng tag-araw. 33 Napawi na ang kagalakan at kasayahan sa mabungang lupain ng Moab. Pinahinto ko na ang pag-agos ng alak sa pisaan ng alak; wala nang pumipisa rito na may sigawan at katuwaan; ang sigawan ngayon ay hindi na dahil sa kagalakan.
34 “Sumisigaw ang Hesbon at Eleale at ito'y umaabot hanggang sa Jahaz; abot ang kanilang tinig mula sa Zoar hanggang Horonaim at Eglat-selisiya. Sapagkat matutuyo rin pati ang mga tubig sa Nimrim. 35 Papatigilin ko ang pag-aalay sa mga altar sa kaburulan, at ang pagsusunog ng handog sa kanilang mga diyos. Akong si Yahweh ang nagsabi nito.
36 “Kaya tumatangis ang aking puso dahil sa Moab, gaya ng tunog ng plauta; tumatangis din akong parang plauta dahil sa mga taga-Kir-heres. Wala na ang kayamanang pinagsumikapan nilang ipunin! 37 Inahit ng mga lalaki ang kanilang buhok; gayon din ang kanilang balbas; hiniwaan ang kanilang mga kamay, at nagdamit sila ng damit-panluksa, tanda ng pagdadalamhati. 38 Ang pagtangis ay maririnig mula sa mga bubungan ng bahay sa Moab, at sa malalapad na liwasan niya; sapagkat winasak ko ang Moab, tulad sa isang tapayang wala nang may gusto. 39 Wasak na wasak ang Moab. Sa laki ng kanyang kahihiyan, siya ay naging tampulan ng paghamak at panghihinayang ng lahat ng bansa.”
Hindi Makakatakas ang Moab
40 Ganito ang sabi ni Yahweh: “Darating ang isang bansang simbilis ng agila at lulukuban ng kanyang pakpak ang lupain ng Moab. 41 Sasakupin ang mga bayan, babagsak ang lahat ng pader; at sa araw na iyon, manghihina ang mga kawal ng Moab, gaya ng panghihina ng isang babaing malapit nang manganak. 42 Gayon mawawasak ang Moab, at hindi na siya kikilalaning isang bansa; sapagkat naghimagsik siya laban kay Yahweh. 43 Nakaamba na sa Moab ang kapahamakan, ang hukay, at ang bitag. 44 Pagtakbo ng isang tao palayo sa kapahamakan, mahuhulog siya sa hukay; kung siya'y umahon mula rito'y mahuhuli naman siya sa bitag. Lahat ng ito'y mangyayari sa Moab pagdating ng taon ng kanilang pagsusulit. Ito ang sinasabi ni Yahweh. 45 Magtatago sa Hesbon ang mga pagod na pagod na pugante; ito ang lunsod na dating pinamahalaan ni Haring Sihon. Subalit lumaganap ang apoy mula sa palasyo; nilamon ang bayan ng Moab at ang kabundukang pinagkukublihan ng mga taong mahilig sa pakikidigma. 46 Kahabag-habag ka, Moab! Wala na ang diyus-diyosan mong si Quemos, at dinalang-bihag ang iyong mga anak.
47 “Gayunman, pagdating ng araw, ibabalik ko sa dati ang kayamanan ng Moab. Ito ang hatol sa kanya,” ang sabi ni Yahweh.
Magandang Balita Biblia, Copyright © Philippine Bible Society 2012.