Beginning

¹ Naja, ne tatanoy, nimetztajpalua ne nantzin ishpejpentuk wan ne ikukunew, ne nikintasujta tetekia, wan tesu semaya naja, nusan muchi ká kishmatit ne tejkia, ² ipanpa ne tejkia ne naka ijtik tejemet wan tuwan nemis pal senpa. ³ Tuwan nemis tetasujtalis wan nejmachnemilis ne witz itech tuteku Teut wan itech Yeshu Mawaltijtuk ne ikunew ne teteku ijtik tejkia wan tetasujtalis.

⁴ Sujsul nipakik ika nikajsik ne mukukunew nejnemit ijtik tejkia, ken techtuktij ne tuteku, ⁵ wan ashan nimetztajtani, nantzin, intesu ken su nimetztuktiskia se tay yankwik asunte se tay tikpiatuyat kwak pejki muchi, ma anmejemet shimutasujtakan; ⁶ wan ini ne tetasujtalis pal tinejnemit ken yaja techtuktij. Ini ne tatuktilis kenha ken ankikakket kwak pejki pal annejnemit ijtik yaja.

⁷ Ika miak tashijshikuani kistiwit tik ne taltikpak ne inte inat ka Yeshu Mawaltijtuk walaj ijtik iweyka. Yajuni ne tashijshikuani wan ne sankamawaltijtuk. ⁸ Shimuishpelwikan ma inte shikpulukan tay titekittiwit asunte ma shikwikan muchi anmupatiw.

⁹ Muchi ká inte kichiwat ijkiuni wan inte nakat ijtik ne itamachtilis ne Mawaltijtuk, inte kipiat Teut. Ká ne naka ijtik ne tamachtilis, yajane kipia ne teteku wan ne kunet. ¹⁰ Asu se ajsi anmutech wan te kalwika ini tamachtilis, maka shikalaktikan ka anmuchan wan maka shiknutza, ¹¹ ika ne ká kinutza muchiwa ikunpa tik ne itekiw inte yek.

¹² Nikpia miak pal nimetzinhilwia, wan te niaw nikijkwilua muchi pak amat, mas yek niknekiskia niajsi anmutech nitachia wan nitanutza anmuwan pal tipajpakit sujsul.

¹³ Metztajpaluat ne ikukunew ne mueltiw ishpejpentuk.

¹ Naja, ne tatanoy, nimetztajpalua, yektasujtatuk Gaius, ne nimetztasujta tetekia.

² Yektasujtatuk, naja niktajtani ne Teut ma shiweli muchi wan ma shinemi yek ijtik muchi, ijkiunisan ken weli ne mualmaj. ³ Nipakik sujsul ipanpa ne tukniwan witzet wan inat ne tejkia kenha ken taja tinejnemi ijtik tejkia. ⁴ Nikpia ne mas wey pakilis kwak nitakaki ka ne nukukunew nejnemit tik ne tejkia.

⁵ Yektasujtatuk, tikchiwa melawak ne tay tikchiwa iwan ne tukniwan ne ejkunimet ⁶ ne inat ka tejkia ne mutetasujtalis ishpan ne sennemit. Yek tikchiwa su tikintuktia yawit ken muneki ipal ne Teut, ⁷ ika kistiwit ka imaku ne itukay wan te kishtiliat tatka ne tejtechan. ⁸ Yajika yek ma tikinkalaktikan ka tuchan ne takamet ijkiuni pal timuchiwat tepalewianimet ipal ne tejkia.

⁹ Melka niktuktij se amat ipal ne sennemit, inte techkwi yajuni ká igustoj ma achtu yajasan intzalan muchi; itukay Diotrepes. ¹⁰ Yajika asu niwitz, san nimetzinhilwis ma shikejketzakan tay yaja kichiwa; ka taketza tay inte muneki tupanpa, wan te kiajsi sema uni, nusan inte kinkwi yek ne tukniwan; wan ne tukniwan ká kinekit, yaja inte kinhajkawa wan kinhishtia tik ne sennemit.

¹¹ Tetasujtatuk, maka shikchiwa kenha ken ne tay teyek, asunte ken ne tay yek. Ká ne kichiwa tay yek kistuk itech ne Teut; ká ne kichiwa tay teyek inte kitztuk ne Teut.

¹² Muchi inatiwit ka yek Demetrios, wan ne tejkia ina kenha, wan tejemet nusan inat, wan tikmati ka tejkia tay tinat.

¹³ Melka nikpia miak pal nimetzilwia, te nikneki nikijkwilua muchi pak amat. ¹⁴ Niknekiskia niajsi nitachia wan nitanutza muwan.

¹⁵ Shinemi yek. Metztajpaluat ne mukunpawan. Shikintajpalu muchi ne tukunpawan ka né.

¹ Naja, Yuda, itekitini Yeshu Mawaltijtuk wan iechkaw Yakob, nimetzintajpalua muchi ká ne Teut kintasujta wan munutztiwit pal Yeshu Mawaltijtuk ma tajpia. ² Ma metzinpalewi ne Teut wan ma shikpiakan nejmachnemilis wan wey tetasujtalis.

³ Yejyektasujtatuk, nijisiwi nitajkwilua pal nimetzinhilwia ipanpa ne tutamakishtilis tupal muchi, wan muneki ma nimutajtaweli anmuwan ma shimutatejtemuilikan ipanpa ne tayulmatilis ne ikman mutemakak inwan ne tayulmatit, ⁴ ika kalaktiwit sejse ne ikman muijkwilujtuyat tik ne amat pal muchiwat juzgar, ne inte kitasujtat ne Teut, ne kipatat ne itetasujtalis ne Teut ipatka susultailwitilis, wan ne inte kikwit ne tutekuyu ne isel tikpiat, Yeshu Mawaltijtuk.

⁵ Nimetzinhelnamiktiliskia ne tay ankimatket, ka kwak seujti ne Tutajwan tamik kimakishtia ne techan tik Egipto, tipan kinwilej ne inte tayulmatit; ⁶ nusan ne tanawatianimet ne inte tajpishket tay ipal kwak pejki wan kinaktijket kan muchantiat katka, yaja tajpishtuk tik kunyua ijilpituk pal senpa hasta ne juicioj ipal ne wey tunal; ⁷ ken Sodom wan Gomora wan ne tejtechan innawak kenhaya ne kisket kitemuat tepal inakayu muishpanujket ken se ejemploj wan kiselijket tit pal senpa.

⁸ Melka uni, kenhaya ini temikinimet kisusulwiat innakayu, kielkawat tajtzinkayu wan kukujtaketzat ne tay wey. ⁹ Ne Mikael, ne weytanawatiani, kwak muijilwia nemi iwan ne Tamintuk wan tajtaketzat ipanpa ne iweyka ne Moshe, ipanpa mawi inte kinekik kitenewa ika kukujtaketzki, asunte inak: "Tutajwan ma metzajwa!"

¹⁰ Muchi tay inte kimatit yejemet kukujtaketzat, wan muchi tay kimatit insel ken ne takwalmet inte welit taketzat, iwan muchi uni wilewit. ¹¹ Ay pobrejchichin, ika nejnemit tik ne iuj Kain, wan mushijshikuat ken Balaam kan mukushiniat ipal inpatiw, wan puliwit iwan ne inajnankilis Koraj.

¹² Yejemet kwak sentakwat tik ne anmuyujyualu ipal tetasujtalis inte majmawit wan yejemet ken tejtet itan at; insel mutakwaltiat; mijmishti wajwaktuk ne kinhishpitzat ne ejejekat; kwajkwawit kwak inteuk wetztuk ne at ne inte kipiat intakil, miktiwit ume wipta wan mutzinwiwittiwit; ¹³ at kwalani sea, pupusuka iwan ishpinawalis; sijsital muyawaluat nujme, ne inpal naka ne tiltik kunyua pal senpa.

¹⁴ Hanok, ne chikume ipal ne ijishwiu Adam, kinhilwij tay yawi muchiwa, ina:

¹⁶ Yejemet kikinakanimet, tejteijilwiat, ne nejnemit ken kielewiat; suluni ne inten iwan pajpalabraj; inat tay yektzin pal kinhishtiliat miak tay kinekit.

¹⁷ Anmejemet, tajtasujtatuk, shikelnamikikan ne pajpalabraj ne metzinhilwijket ne itijtitanijtuk ne tutajtzin Yeshu Mawaltijtuk ¹⁸ ká inat katka ka tik ne tijtipan tunal yawit nemit ajkawetzkanimet muwikat ken kielewiat wan te kitasujtat ne Teut. ¹⁹ Yejemet tetakutuntianimet, ajalmaj inte kipiat iijiu.

²⁰ Anmejemet, tajtasujtatuk, shimuketzakan ijpak ne anmutayulmatilis wey wan shiktajtanikan ne Ijiutzin. ²¹ Shinemikan yek iwan itetasujtalis Teut, wan shikchiakan ma yawi techpalewia ne tutajtzin Yeshu Mawaltijtuk pal tiyujyultuk senpa. ²² Shikinpalewikan sejse ijishtemujtuk, ²³ shikinhishtikan sejse tik tit pal ankinpalewiat, wan sejse shikinpalewikan iwan mawi, melka ankijiat ne inwipil tilwijtuk itech ne innakayu.

²⁴ Wan ne weli metzintajpia pal te antatzunchaluat wan weli metzinhishpanua ken inte ankipiat nian se ipelech tik itachialis ne itzitzinakalis yajane, iwan pakilis, ²⁵ ne Teut wan tutamakishtiani isel tikpiat, ipanpa Yeshu Mawaltijtuk ne tutajtzin, ma inakan ka wey, iwan itajpal wan itatuktilis pal senpa, tik ne tujtunal pal ashan wan pal senpa, amen.