Beginning
1 Naja ni Pawlo, itekitini Teut; ititanijtuk Yeshu Mawaltijtuk, iwan tayulmatilis ipal ne ijishpejpentuk ipal Teut wan taishmatilis ipal ne tejkia ipal ne yek, 2 iwan tejchialis ma tiyujyultuk senpa ken inak ne Teut, ká te keman tashijshikua, kwak intea pejtuya muchi; 3 taneshtijtuk kwak ajsik ne tunal ne ipalabraj iwan tanajnawatilis, wan nechmakaket pal niktajpia ika ne tutamakishtiani Teut ijkiuni tatuktij; 4 naja niktuktia ini tajkwilul itech Titus nukunew yekkaya ipal tutayulmatilis. Ma metzinmakakan ne Teut tuteku wan ne Mawaltijtuk Yeshu tutamakishtiani tetasujtalis wan nejmachnemilis.
5 Ipanpa uni nimetznaktij tik Creta pal tiktalia yek tay kinekiuk wan ma shiktali noymet pal tatuktiat tik muchi ne tejtechan ken naja nimetzilwij, 6 asu nemi se ká te kichijtuk tatka tay teyek, ishulejyu sanse isiwaw, kipia ipilawan tayulmatit, wan te aka kijilwijtuk ka muwika ken inte nemi yek o ka inte tetakamati.
7 Ika se tapachiwiani, ken ikalpiani Teut, muneki ma te kichijtuk tatka tay teyek: tesu se ká kichiwa muchi tay ipal yajasan ajwiak, tesu kwalanini, tesu tawanani, tesu tasumani, tesu tuminhishtemuani, 8 sute se ká muwika yek iwan ne ejkunimet, kineki tay yek, kipia itzuntekun yek, yulmelawak, yulchipawak, kipia itajpal, 9 ne tajpia ne yek palabraj ipal ne tamachtilis pal kiane weli kinpalewia sejseuk iwan ne yek tamachtilis wan nusan weli kinhajajwa ne techishtenewat.
10 Ika nemit miak ká taketzat te-tatka wan te tetakamatit, wan tashijshikuat wey, wan mas intzalan yejemet ipal ne tayawaltekilis. 11 Yejemet muneki ma mutentzakwat: kishkwepat iyulu muchi tik miak kal, ika kinmachtiat tay te muneki pal kishtiat tay kinekit.
12 Inak se yejemet, se intaketzani, ka ne Cretajchanejket senpa sankataketzat, tekwanimet teyek, gajgalgoj ne te kichiwat tatka. 13 Uni tay inat tejkia. Yajika, shikinhajwa iwan kwalan pal nemit yek tik ne tayulmatilis 14 wan pal te kitaliliat cuidadoj ne incuejcuentoj ne Yudayujmet wan ne tay tatuktiat takamet ne kiajkawtiwit ne tejkia.
15 Muchi nemi pupujtuk ipal ne mupupujtiwit. Ipal ne mususulwijtiwit wan ne te tayulmatit, te nemi pupujtuk tatka; ne inyulu wan ne intasenmatilis kipiat sujsusul. 16 Melka yejemet inat ka kishmatit Teut, tik ne tay kichiwat kinaktiat. Kichiwat ka tikinhijiat, te tetakamatit, wan te yejyek pal kichiwat tatka tay yek.
2 Shitanutza tay yawi yek iwan ne yek tamachtilis.
2 Ne chuletket ma te kiunikan wey; ma muwikakan yek; ma kipiakan itzuntekun yek; ma nemikan yek tik tayulmatilis, tik tetasujtalis wan tik tanejmachselilis.
3 Ne lamatket kenhaya, ma muwikakan ken yek ipal Teut; ma te tatejtenewakan; ma te ingustoj sujsul ne atata; ma tamachtikan tay yek, 4 pal ne sijsiwapipil kipiakan itzuntekun yek pal kiane yawit kitasujtat inshulejyu wan inpilawan; 5 ma kipiakan yek intzuntekun tel; ma chijchipawak; ma tekitikan tik ne kal; ma yejyek; ma kitakamatikan inshujshulejyu pal kiane te yawit kukujtaketzat ne ipalabraj ne Teut.
6 Ne takapiltzinmet kenhaya shiktajtani ma kipiakan itzuntekun yek. 7 Tik muchi, shimuishpanu ken se ejemploj ipal ne yejyek tekit. Shikinmachti ma te kwalukan; ma muwikakan yek; 8 ma taketzakan yek pal te aka weli kinhilwia tatka, pal kiane ne ká ipal ne seuk ladoj yawi ishpinawa wan te yawi kipia tatka teyek pal ina tupanpa.
9 Ne tekitinimet ma kitakamatikan intekuyu wan ma kichiwakan muchi tay yaja kineki; ma te najnankilikan; 10 ma te kikwikan tatka ichtaka sute ma kilwitikan muchi yek tayulmatis pal kiane yawit kichiwat ka muchi inat ka wey ne itamachtilis ne tutamakishtiani Teut.
11 Ika muneshtij ishpan muchi ne itetasujtalis ne Teut tamakishtiani 12 ne techmachtia ma tikajkawakan ne tay teyek wan ne tajtaelewilis ipal ini taltikpak; tik ne taltikpak pal ashan ma tinemikan iwan tutzuntekun yek, ken muneki wan ken nemi yek; 13 ma kichiakan ne wey tejchialis wan ne muneshtilis tzitzinaka ipal ne wey Teut wan tutamakishtiani Yeshu Mawaltijtuk 14 ne mutemakak ka tumaku pal techmakishtia itech muchi tay te yek, wan ma kipupu ipal se techan te ken muchi.
15 Shitanutza wan shitajtani wan shiteajajwa iwan muchi ne tatuktilis; ma te aka metzilwi tatka.
3 Shikinhelnamiktili ma mutalikan itan itatuktilis ne tatuktianimet wey ma kintakamatikan; ma nemikan pal kichiwat yejyek tekit senpa; 2 ma te kukujtaketzakan ipanpa aka; ma te musumakan; ma muchiwakan yujyulyamanik iwan muchi ne takamet.
3 Ika niakeman tejemet nusan timejmelemet katka, te titetakamatit katka, timushijshikuat katka; titekitit katka ipal ankakeski taelewilis wan muchi tay techajwiak, tipanut katka iwan inteyek wan kwalan, techishijiat katka wan titaishijiat katka.
4 Kwak muneshtij ne iyekyu wan ne itetasujtalis ne tutamakishtiani Teut,
5 yaja tesu ipanpa ne tutekiw yek ne tikchijtiwit tejemet
sute yajasan techmakishtijtuk ika yaja techpalewia:
yaja techawia pal timuyulkwepat
wan techyankwilia iwan ne Ijiutzin,
6 ne techtepewilij itech Yeshu Mawaltijtuk ne tutamakishtiani
7 pal kiane tiawit timuchiwat yejyek ipanpa uni tetasujtalis
wan tiawit tikpiat tay tupal
iwan tejchialis ma tiawit tiyujyultuk senpa.
8 Ini tejkia, wan muchi ini nina senpa pal kishkejketzat ne kiyulmatit Teut ma tajpiakan ne intekiw yejyek. Ini tay yektzin ipal ne takamet wan kinpalewia.
9 Intajtajtanilis melemet, wan ma kikejketzakan ká ne itatanoy se wan ne inoya seuk, wan tajtasumalis wan kwajkwalan ipanpa ne tajtuli, muchi uni shikelkawa, ika te techpalewiat wan te tatka inpatiw. 10 Se takat ká tetakutuntiani, kwak tami tiknawatia senpa wan ukpa, maka shikaki, 11 wan shikmati ka se ijkiuni muishkweptuka wan kichiwa tay teyek wan yajasan muchiwa juzgar.
12 Kwak niaw niktuktia Artemas mutech, o Tukikos, shimutatemuili pal tiajsi nutech tik Nikopolis, ika ninatuk ka niaw nipanu ne shupan ka ikuni. 13 Zenas ne tajtulmati wan Apolos shikintukti talul wan ma kipiakan muchi tay munekit. 14 Ma mumachtikan ne tukniwan nusan ma tajpiakan yejyek tekit pal ne tay muneki, pal ma tamakakan intakil.
15 Metztajpaluat muchi ne tukniwan nikan nuwan. Shiktajpalu muchi ne techtasujtat tik tayulmatilis. Ma nemi ne teutasujtalis iwan muchi anmejemet.
1 Naja, Pawlo, ilpituk ipal ne Mawaltijtuk Yeshu, wan ne tuiknew Timoteo, tiktuktiat ini tajkwilul itech Pilemon tutepalewiani yektasujtatuk, 2 wan tueltiw Apia, wan ne tukunpalej tasumani Arkipos, wan ne sennemit ijtik mukal. 3 Ma metzinmaka ne tuteku Teut, wan tutajtzin Yeshu Mawaltijtuk, itetasujtalis wan inejmachnemilis.
4 Nikmaka padiush wan senpa nimetzelnamiki kwak niteutajtani. 5 Nitakaki ken taja tiktasujta wan tikyulmati ne tajtzin Yeshu wan muchi ne tayulmatit, 6 wan ken ne tasentepewalis ipal ne mutayulmatilis tekiti iwan taishmatilis ipal muchi tay yek, tay ne nemi ijtik tejemet ipanpa ne Mawaltijtuk. 7 Ika sujsul nipakik wan nimupalewij ipanpa ne mutetasujtalis, ika taja tikchijtuk ka tea kikukua iyulu ne tayulmatit, nuiknew!
8 Ipanpa uni, melka niweliskia nimetztuktia melaknaj ipanpa ne Mawaltijtuk ne tay muneki, 9 mas yek nimutajtawelia ipanpa tetasujtalis naja, Pawlo, ká chuleta, wan ashan nusan ilpituk ipal ne Mawaltijtuk Yeshu.
10 Nimutajtawelia muwan pal tikpalewia ne nukunew ká nikpishtuk tik ijilpika: Onesimos. 11 Melka achtu yaja te metzpalewij, ashan yawi techpalewia taja wan naja. 12 Niktuktijtuk mutech, yaja ká sujsul nikneki.
13 Melka naja niknektuskia nikilwia ma naka nutech pal nechpalewia ka mupatka nikan tik ne ijilpika ipal ne yeknawatilis, 14 te niknekik nikchiwa tatka su te tinatuya ka yek, pal ma te shinechchiwili se tay yek ipanpa munekilis sute ipanpa taelewilis. 15 Ika ká kimati su yaja metzajkaw achi tunal sema pal kiane ma shikpiaya pal senpa, 16 tea ken tekitini, sute mas que se tekitini, ken se muikaw yektasujtatuk, ika su nupal ijkiuni, mupal keski mas, tik iweyka wan nusan tik ne Tajtzin!
17 Yajika, su tinechpia ken mukunpa, yaja shikwi ken naja tinechkwiskia. 18 Su metzchiwilijtuk se tay te yek o metzwikilia, shikpua ken nujaranaj. 19 Naja, Pawlo, nitajkwiluj iwan ne numey. Naja nimetzkwepilis, wan te niaw nimetzilwia ka taja nusan tinechwikilia. 20 Ijkiasan, nuiknew! Ma nimetztajtanili ini tik itukay ne Tajtzin; shiksewi nuyulu ipanpa ne Mawaltijtuk.
21 Nikmatiaya ka tiaw tinechtakamati, yajika nitajkwilujtuk mupal wan nina ka tiaw tikchiwa tay nimetzilwia.
22 Wan shinechajshitili se kan niweli ninaka, ika nitejchia ka su niktajtani ne Teut yawit nechtemakat anmuwan.
23 Metztajpalua Epapras ká iwan ninentuk ilpituk ipanpa ne Mawaltijtuk Yeshu, 24 Marcus, Aristarkos, Demas, Lukas, nutejtepalewiani.
25 Ma nemi ne teutasujtalis ipal Yeshu Mawaltijtuk iwan anmuijiu.
Ne Bibliaj Tik Nawat · © 2008, 2012 Jan Morrow