Beginning

यहोवा आपन लोगन क बीच रही

43 उ मनई मोका फाटक तलक लइ गवा, उ फाटक जउन पूरब क खुलत रहा। ² हुवाँ पूरब स इस्राएल क परमेस्सर क महिमा उतरी। परमेस्सर क अवाज क सोरमचावत भवा अधिक पानी आवाज़ क समान तेज रही। परमेस्सर क महिमा स भुइँया प्रकास स चमक उठी। ³ उ दर्सन वइसा ही रहा जउन मइँ उ समइ लखेउँ जब उ नगर विनास करइ बरे आवा रहा वइसा ही रहा। जइसा दर्सन मइँ कबार नदी क किनारे लखे रहेउँ। अउर मइँ मुहँ क बल धरती पइ गिर पड़इ गवा। ⁴ यहोवा क महिमा, मन्दिर मँ उ फाटक स आइ जउन पूरब क खुलत ह।

⁵ तब आतिमा मोका ऊपर उठाएस अउर भीतरी आँगन मँ लइ गइ। यहोवा क महिमा मन्दिर क भर दिहस। ⁶ मइँ मन्दिर क भीतर स कउनो क मोरे संग बातन करत सुनेउँ। मनई मोर बगल मँ खड़ा रहा। ⁷ मन्दिर मँ एक अवाज मोका कहेस, “मनई क पूत, इहइ ठउर मोरे सिंहासन अउ पदपीठ अहइ। मइँ इ ठउर पइ इस्राएल क लोगन मँ सदा रहब। इस्राएल क परिवार मोरे पवित्तर नाउँ क फिन अपमान नाहीं करी। राजा अउर ओनकर लोग मोरे पवित्तर नाउँ क बिभिचारी स अउर आपन-आपन उच्च ठउरे पइ राजा लोगन क ल्हासन दफनाइके लज्जित नाहीं करिहीं। ⁸ उ पचे मोरे नाउँ क, आपन डवेढ़ी क मोर डवेढ़ी क संग बनाइके अउर दुआर खम्भा क मोरे दुआर खम्भा क संग बनाइके लज्जित नाहीं करिहीं। पुराने जमाने मँ सिरिफ एक देवार मोरे घरे क ओनॅस अलग करत रही। एह बरे उ पचे हर समइ जब कबहुँ भी पाप अउर भयंकर कामन क किहेन तब मोरे पवित्तर नाउँ क लज्जित किहन। इहइ कारण रहा कि मइँ कोहाइ गएउँ अउर ओनका नस्ट किहेउँ। ⁹ अब ओनका बिभिचार क दूर करइ द्या अउर अपने राजा लोगन क ल्हासन क मोका बहोत दूर लइ जाइ द्या। तब मइँ ओनके बीच सदा रहब।

¹⁰ “अब मनई क पूत, इस्राएल क परिवार स मन्दिर क बारे मँ कहा। तब उ पचे आपन पापन पइ लज्जित होइहीं। उ पचे मन्दिर क जोजना क बारे मँ सिखिहीं। ¹¹ उ पचे ओन बुरे कामन बरे लज्जित होइहीं जउन उ पचे किहेन ह। ओनका मन्दिर क आकृति समुझइ द्या। ओनका इ सीखइ द्या कि उ कइसे बनी, ओकर प्रवेस दुआर, निकास दुआर अउर एह पइ क सारी रूपकृतियन कहाँ होइहीं। ओनका एकर सबहिं नेमन अउर विधियन क बारे मँ सिखावा अउर एनका लिखा जेहसे उ पचे सबहिं एनका लखि सकइँ। तब उ पचे मन्दिर क सबहिं नेमन अउर विधियन क पालन करिहीं। तब उ पचे इ सब कछू कइ सकत हीं। ¹² मन्दिर क नेम इ अहइ: पर्वत क चोटी पइ सारा छेत्र सब स जियादा पवित्तर अहइ। इ मन्दिर क नेम अहइ।

वेदी

¹³ “वेदी क नाप, लम्बा हाथ क नाप क अनुसार इ अहइ: हाथ का नाप साधारण हाथ स चार अंगुल बड़ा राह। वेदी क नेंव क चारिहुँ कइँती एक गन्दा नाला रहा। इ एक हाथ गहिर अउर एक हाथ चउड़ा रहा। किनारा क चारिहुँ कइँती एक बीत्ता ऊँचा पट्टी रहा। वेदी केतनी ऊँची रही, उ इ रही। ¹⁴ भुइँया स निचली किनारी तलक, नेवं क नाप दुइ हाथ अहइ। इ एक हाथ चउड़ी रही। छोटी किनारी स बड़ी किनारी तलक एकर नाप चार हाथ रही। इ दुइ हाथ चउड़ी रही। ¹⁵ वेदी पइ आगी क जगह चार हाथ ऊँच रही। वेदी क चारिहुँ कोने सीगंन क आकार क रहेन। ¹⁶ वेदी पइ आगी क जगह बारह हाथ लम्बी अउर बारह हाथ चउड़ी रही। इ पूरी तरह वर्गाकार रहा। ¹⁷ किनारा भी वर्गाकार रही अउर चौदह हाथ लम्बी अउर चउदह हाथ चउड़ी रही। एकरे चारिहुँ ओर आधा हाथ चउड़ी एक पट्टी रही। (नेंव क चारिहुँ कइँती गन्दी नाली एक हाथ चउड़ी रही।) वेदी तलक जाइवाली सीढ़ियन पूरब दिसा मँ रहिन।”

¹⁸ तब उ मनई मोहसे कहेस, “मनई क पूत, सुआमी यहोवा इ कहत ह: ‘वेदी बरे इ सबइ नेम अहइँ। जउने दिन इ होमबलि चढ़ावइ बरे अउर एह पइ खून बहावइ बरे तइयार होइ जाइ तउ, ¹⁹ तोहका लेवी कबीला क याजकन क जउन कि सदोक क सन्तानन अहइ एक ठु जवान साँड़ देइ चाही। उ पचे ओन लोग अहइ जउन कि मोर बरे भेंट क जराइके मोर सेवा किहेस।’” मोर सुआमी यहोवा इ कहेस। ²⁰ “तू बैल क कछू खून लेब्या अउर वेदी क चारिहुँ सींगन पइ, किनारे क चारिहुँ कोनन पइ अउर पट्टी क चारिहुँ ओर डउब्या। इ तरह तू वेदी क पवित्तर करब्या अउर एकरे बरे प्रायस्चित अदा करब्या। ²¹ तू बैल क पाप बलि क रूप मँ लेब्या। बैल, पवित्तर छेत्र क बाहेर, मन्दिर क खास जगह पइ जरावा जाइ।

²² “दूसर दिन तू बोकरा भेंट करब्या जेहमाँ कउनो दोख नाहीं होइ। इ पाप बलि होइ। याजक वेदी क उहइ तरह पवित्तर करी जउने तरह उ बैल स ओका पवित्तर किहस। ²³ जब तू वेदी क पवित्तर करब समाप्त कइ चुका तब तोहका चाही कि तू एक दोख रहित जवान बैल अउर एक दोख रहित भेड़ा बलि चड़ावा। ²⁴ तब याजक ओन पइ नून छिछकारिहीं। तब याजक बैल अउर भेड़ा क यहोवा क होमबलि क रूप मँ बलि चढ़इहीं। ²⁵ तू एक बोकरा हर रोज सात दिन तलक, पाप बलि क बरे तइयार करब्या। तू एक नवा बैल अउ झुण्ड स एक भेड़ा भी तइयार करब्या। बैल अउ भेड़न मँ कउनो दोख नाहीं होइ चाही। ²⁶ सात दिन तलक याजक वेदी क पवित्तर करत रहिहीं। तब याजक वेदी क समर्पित करिहीं। ²⁷ उ सबइ सात दिन पूरा होइ जइहीं। अठएँ दिन अउर ओकरे आगे याजक क तोहार होमबलि अउ मेलबलि वेदी पइ चढ़ाइ चाही। तब मइँ तोहका अंगीकार करब।” मोर सुआमी यहोवा इ कहेस।

बाहरी दुआर

44 तब उ मनई मोका मन्दिर क बाहरी फाटक, जेकर सामना पूरब क अहइ, वापस लिआवा। अउर बाहरी दुआर बन्द रहा। ² यहोवा मोहसे कहेस, “इ फाटक बन्द रही। इ खोला नाहीं जाई। कउनो भी एहसे होइके प्रवेस नाहीं करी। काहेकि इस्राएल क परमेस्सर यहोवा एहसे प्रवेस कइ चुका अहइ। एह बरे इ बंद रहइ चाही। ³ उ लोगन क सासक इ जगह पइ तब बइठी जब उ यहोवा क संग रोटी खाइ। उ फाटक क संग क प्रवेस कच्छ क दुआर स प्रवेस करी तथा उहइ रास्ते स बाहेर जाइ।”

मन्दिर क पवित्तरता

⁴ तब उ मनई मोका उत्तरी दुआर स मन्दिर क समन्वा लिआवा। मइँ निगाह डाएउँ। अउर यहोवा क महिमा क यहोवा क मन्दिर मँ भरत लखेउँ। मइँ मुँहे क बल धरती पइ गिरि गवा। ⁵ यहोवा मोहसे कहेस, “मनई क पूत, बहोत सावधानी स लखा। आपन आँखिन अउर कानन क उपयोग करा। एन चिजियन क लखा। मइँ तोहका मन्दिर क बारे मँ सबहिं नेम-विधि बतावत हउँ। सावधानी क साथ मन्दिर क प्रवेस-दुआर अउर पवित्तर ठउर स सबहिं निकासन क लखा। ⁶ तब इस्राएल क ओन लोगन क इ सँदेसा द्या जउन मोर आग्या क पालन करइ स इन्कार कइ दिहे रहेन। ओनसे कहा, मोर सुआमी यहोवा इ कहत ह, ‘इस्राएल क परिवार, मइँ तोहरे जरिये कीन्ह गइ भयंकर करमन क जरूरत स जियादा सहन किहेउँ ह। ⁷ तू बिदेसियन क मोरे मन्दिर मँ लिआया अउर ओन लोगन क फुरइ खतना नाहीं भवा रहा। उ पचे पूरी हिरदय स मोरे बरे समर्पित नाहीं रहेन। इ तरह तू मोरे मन्दिर क अपवित्तर किहे रह्या। तू हमार करार क तोड़या, भयंकर काम किहा अउ तब तू आपन देवमूरतियन क मोर रोटी, चर्बी अउ खून चढ़ाएस। किन्तु इ मोरे मन्दिर क गन्दा बनाएस। ⁸ तू मोर पवित्तर चिजियन क देखभाल नाहीं किहा। नाहीं, तू बिदेसियन क मोरे मन्दिर बरे उत्तरदायी बनाया।’”

⁹ मोर सुआमी यहोवा इ कहत ह, “एक बिदेसी क जेकर खतना न भवा होइ, मोरे मन्दिर मँ नाहीं आवइ चाही, ओन बिदेसियन क भी नाहीं, जउन इस्राएल क लोगन क बीच स्थायी रूप स रहत हीं। ओकर खतना जरूर होइ चाही अउर ओका मोरे बरे पूरी तरह समर्पित होइ चाही, एकरे पूरब कि उ मोरे मन्दिर मँ आवइ। ¹⁰ पुराने जमाने मँ, लेबीबंसियन मोका तब छोड़ दिहन, जब इस्राएल मोरे खिलाफ होइ गवा रहा। इस्राएल मोका आपन देवमूरतियन क अनुसरण करइ बरे छोड़ेस। लेवी बंसी आपन पाप बरे दण्डित होइहीं। ¹¹ लेवी बंसी मोरे पवित्तर ठउर मँ सेवा करइ बरे चुने ग रहेन। उ पचे मन्दिर क फाटक क चौकीदारी किहन। उ पचे मन्दिर मँ सेवा किहन। उ पचे बलियन तथा होमबलियन क जनावरन क लोगन बरे मारेन। उ पचे लोगन क मदद करइ अउर ओनकर सेवा बरे चुने गए रहेन। ¹² किन्तु ओन लेवी बंसियन मोरे विरूद्ध पाप करइ मँ लोगन क सहायता किहन। उ पचे लोगन क देवमूरतियन क पूजा करइ मँ सहायता किहन। एह बरे मइँ ओनके विरूद्ध प्रतिग्या करत हउँ, ‘उ पचे आपन पाप बरे दण्डित होइहीं।’” मोर सुआमी यहोवा इ बात कहेस ह।

¹³ “एह बरे लेवीबंसी याजकन क रूप मँ मोर लगे भेंट नाहीं लइहीं मोर सेवा करइहीं। उ पचे मोर कउनो भी पवित्तर चीज या सब स जियादा पवित्तर वस्तु क नाहीं चढ़ाइहीं। उ पचे आपन लज्जा क, जउन बुरे काम उ पचे किहन, ओकरे कारण ढोइहीं। ¹⁴ किन्तु मइँ ओनका मन्दिर क देखभाल करइ देब। उ पचे मन्दिर मँ काम करिहीं अउर उ सबइ काम करिहीं जउन एहमाँ कीन्ह जात हीं।

¹⁵ “सबहिं याजक लेवी क परिवार समूह स अहइँ। किन्तु जब इस्राएल क लोग मोरे विरूद्ध मोहसे दूर गएन तब केवल सादोक परिवार क याजकन मोरे पवित्तर ठउर क देखभाल किहेन। एह बरे केवल सादोक क बंसज ही मोका भेंट लइहीं। उ पचे मोरे समन्वा खड़े होइहीं अउर आपन बलि चढ़ाए गए जनावरन क चर्बी अउर खून मोका भेंट करिहीं।” मोर सुआमी यहोवा इ कहेस। ¹⁶ “उ पचे मोर पवित्तर ठउर मँ प्रवेस करिहीं। उ पचे मोर मेज क लगे मोर सेवा करइ अइहीं। उ पचे ओन चिजियन क देखभाल करिहीं जेनका मइँ ओनका दिहेउँ। ¹⁷ जब उ पचे भीतरी आँगन क फाटकन मँ प्रवेस करिहीं तब उ पचे सन क वस्त्र पहिरहीं। जब उ पचे भीतरी आँगन क फाटक अउर मन्दिर मँ सेवा करिहीं, तब उ पचे ऊनी वस्त्र निहचित ही नाहीं पहिरहीं। ¹⁸ उ पचे सन क पगड़ी अपने मूँड़े पइ धारण करिहीं, अउर उ पचे सन क जाँघिया पहिरहीं। उ पचे अइसा कछू नाहीं पहिरहीं जेहसे पसीना आवइ। ¹⁹ उ पचे मोर सेवा करत समइ क वस्त्र क, बाहरी आँगन मँ लोगन क लगे जाइ क पहिले, उतारिहीं। तब उ पचे दूसर वस्त्र पहिरहीं। इ तरह उ पचे लोगन क ओन पवित्तर वस्त्रन क छुअइ नाहीं देइहीं।

²⁰ “उ पचे याजकन क आपन मूँड़े क बाल मुड़वाइ नाहीं चाही अउर न ही आपन बालन क बहोत बढ़इ देइ चाही। याजक आपन मूँड़े क बालन क सिरिफ छँटाई कइ सकत हीं। ²¹ कउनो भी याजक उ समइ दाखरस नाहीं पी सकत जब उ पचे भीतरी आँगन मँ जात ह। ²² याजक क बिधवा स या तलाक मिली मेहरारू स बियाह नाहीं करइ चाही। नाहीं, उ पचे क सिरिफ इस्राएल क परिवार क कुँवारी कन्या स बियाह करइ चाही। या उ पचे कउनो याजकन क बिधवा स बियाह कइ सकत ह।

²³ “याजक मोरे लोगन क पवित्तर चिजियन अउर जउन चिजियन पवित्तर नाहीं अहइँ, क बीच अन्तर क बारे मँ भी सिच्छा देइहीं। उ पचे मोरे लोगन क, जउन सुद्ध अउर जउन सुद्ध नाहीं अहइ, क जानकारी करइ मँ मदद देइहीं। ²⁴ याजक कचहरी मँ निआउ क जज होइ। उ पचे लोगन क संग निआउ करत समइ मोरे नेम क अनुसरण करिहीं। उ पचे मोर बिसेस दावतन क समइ मोरे नेम-विधियन क पालन करिहीं। उ पचे मोर बिसेस विस्राम क दिनन क सम्मान करिहीं अउर ओनका पवित्तर रखिहीं। ²⁵ उ पचे मनई क ल्हास क लगे जाइके आपन क अपवित्तर करइ नाहीं जइहीं। किन्तु उ पचे तब अपने क अपवित्तर कइ सकत हीं जदि मरइवाला मनई पिता, माता, पूत, बिटिया, भाई या बिन ब्याही बहिन होइ। इ सबइ याजक क अपवित्तर बनाई। ²⁶ सुद्ध कीन्ह जाइ क पाछे याजक क सात दिन तलक प्रतीच्छा करइ चाही। ²⁷ तब इ पवित्तर ठउर क लउट सकत ह। किन्तु जउने दिन उ भीतरी आँगन क पवित्तर ठउर मँ सेवा करइ जाइ, ओका पाप बलि अपने बरे चढ़ावइ चाही” मोर सुआमी यहोवा इ कहेस।

²⁸ “लेवीबंसियन क आपन भुइँया क बारे मँ: मइँ ओनकर सम्पत्ति हउँ। तू लेवीबंसियन क कउनो सम्पत्ति इस्राएल मँ नाहीं देब्या। मइँ इस्राएल मँ ओनकर हीसंन मँ हउँ। ²⁹ उ पचे अन्नबलि, पापबलि, दोखबलि खाइ क बरे पइहीं। जउन कछू इस्राएल क लोग यहोवा क देइहीं, उ ओनकर होइ। ³⁰ हर तरह क तइयार फसल क पहिला भाग याजकन बरे होइ। तू आपन साने आटे क पहिला हींसा भी याजक क देब्या। इ तोहरे परिवार पइ आसीर्वाद क बर्खा करी। ³¹ याजक क उ पंछी या जनावर नाहीं खाइ चाही जेकर अपने आप मउत होइ या जउन जंगली जनावर क जरिये टूका टूका कइ दीन्ह ग होइ।

पवित्तर काम क उपयोग बरे भुइँया क बटवारा

45 “तू इस्राएल क परिवार समूह बरे भुइँया क विभाजन पाँसा लोकाइके करब्या। उ समइ तू भुइँया क एक हींसा अलग करब्या। इ यहोवा बरे पवित्तर हींसा होइ। भुइँया पच्चीस हजार हाथ लम्बी अउर दस हजार हाथ चउड़ी होइ। इ पूरी भुइँया पवित्तर होइ। ² पाँच सौ हाथ लम्बा अउर पाँस सौ हाथ चउड़ा वर्गाकार भुइँया मन्दिर बरे होइ। मन्दिर क चारिहुँ कइँती पचास हाथ चउड़ा क एक ठु खुला छेत्र होइ। ³ बहोत पवित्तर ठउर मँ तू पचीस हजार हाथ लम्बा अउर दस हजार हाथ चउड़ा नपब्या। मन्दिर इ छेत्र मँ होइ। मन्दिर क छेत्र सब स जियादा पवित्तर ठउर होइ।

⁴ “इ भुइँया क पवित्तर भाग मन्दिर क सेवक याजकन बरे होइ जहाँ उ पचे परमेस्सर क समीप सेवा करइ आवत हीं। इ याजकन क घरन अउर मन्दिर बरे होइ। ⁵ दूसर छेत्र पच्चीस हजार हाथ लम्बा अउर दस हजार हाथ चउड़ा ओन लेवीबंसियन क बरे होइ जउन मन्दिर मँ सेवा करत हीं। इ भुइँया भी लेवीबंसियन क, ओनके रहइ क नगरन बरे, होइ।

⁶ “तू नगर क पाँच हजार हाथ चउड़ा अउर पच्चीस हजार हाथ लम्बा छेत्र देब्या। इ पवित्तर छेत्र क सहारे होइ। इ इस्राएल क पूरे परिवार बरे होइ। ⁷ सासक पवित्तर ठउर अउ नगर क आपन भुइँया क दुइनउँ कइँती क भुइँया अपने लगे रखी। इ परित्र छेत्र अउ नगर क छेत्र क बीच मँ होइ। इ उहइ चउड़ाई क होइ जउन चउड़ाई परिवार समूह क भुइँया क अहइ। इ लगातार पच्छिमी सीमा स पूर्वी सीमा तलक जाइ। ⁸ इ भुइँया इस्राएल मँ सासक क सम्पत्ति होइ। इ तरह सासक क मोर लोगन क जीवन क भविस्स मँ कस्ट देइवाला बनावइ क जरूरत नाहीं होइ। किन्तु उ पचे भुइँया क इस्राएलियन क बरे ओनके परिवार समूहन क देइहीं।”

⁹ मोर सुआमी यहोवा इ कहेस, “इस्राएल क सासको, बहोत होइ चुका। क्रूर होब अउर लोगन स चिजियन चुराउब, छोड़ा। निआउवाला बना अउर अच्छे काम करा। हमरे लोगन क आपन घरन स बाहेर जाइ बरे बलपूर्वक मजबूर न करा।” मोर सुआमी यहोवा इ कहेस।

¹⁰ “लोगन क ठगब बन्द करा। सही बाटन अउ आपन क उपयोग करा। ¹¹ एपा (सूखी चिजियन क बाट) अउ बथ (दूत क मापक) एक ही तरह होइ चाही। एक बथ अउ एपा दुइनउँ एक क दसवाँ भाग होमर क बराबर होइ चाही। उ सबइ मापक होमर पइ आधारित होइहीं। ¹² एक सेकेल बीस गेरा क बराबर होइ चाही। एक मिना साठ सेकेल क बराबर होइ चाही। इ बीस सेकेल जमा पचीस सेकेल जमा पन्द्रह सेकेल क बराबर होइ चाही।

¹³ “इ खास भेंट अहइ जेका तोहका देइचाही।

“इ सबइ बिसेस भेंटन अन्नबलि, होमबलि अउर मेलबलि क बरे अहइँ। इ सबइ भेंटन लोगन क प्रायस्चित बरे अहइँ।” मोर सुआमी यहोवा इ कहेस।

¹⁶ “देस क हर एक मनई इस्राएल क सासक क बरे इ भेंट देइ। ¹⁷ किन्तु सासक क विसेस पवित्तर दिनन बरे जरूरी चिजियन देइ चाही। सासक क होमबलि, अन्नबलि अउर पेय भेंट क बियवस्था दावत क रिन, नवचन्द्र सबित अउ इस्राएल क परिवार क सबहिं बिसेस दावतन बरे करइ चाही। सासकन क सबहिं पापबलि, अन्नबलि, होमबलि, मेलबलि जउन इस्राएल क परिवार क पवित्तर करइ बरे उपयोग कीन्ह जात ह क समेत सबहिं बलियन देइ चाही।”

¹⁸ मोर सुआमी यहोवा इ सबइ बातन बताएस, “पहिले महीने मँ, महीने क पहिले दिन तू एक दोख रहित भवा जवान बैल लेब्या। तोहका उ बैल क उपयोग मन्दिर क पवित्तरीकरण करइ बरे करइ चाही। ¹⁹ याजक कछू खून पाप बरे भेंट स लेइ अउर एका मन्दिर क दुआर खम्भन अउर वेदी क किनारी क चारिहुँ कोनन अउ भीतरी आँगन क फाटक क खम्भन पइ डाइ। ²⁰ तू इहइ काम महीने क सतएँ दिन उ मनई बरे करब्या जउन गल्ती स या अनजाने मँ पाप कइ दिहे होइ। इ तरह तू मन्दिर बरे प्रायस्चित करब्या।”

फसह पर्व क दावत क समय भेंट

²¹ “पहिले महीने क चौदहवें दिन तोहका सात दिन तलक फसह पर्व मनावई चाही। उ समइ मँ बेखमीरी रोटी खाइ चाही। ²² उ समइ सासक एक बैल अपने बरे तथा इस्राएल क लोगन क बरे भेंट करी। बैल पापबलि बरे होइ। ²³ दावत क सात दिन तक सासक दोख रहित सात बैल अउ सात भेड़न भेंट करी। उ पचे यहोवा क होमबलि होइहीं। सासक उत्सव क सात दिन हर रोज एक बैल भेंट करी अउर उ पाप बलि बरे हर एक दिन एक बोकरा भेंट करी। ²⁴ सासक एक एपा जौ हर एक बैल क संग अन्नबलि क रूप मँ, अउर एक एपा जौ हर एक भेड़ा क साथ भेंट करी। सासक क एक हीन तेल हर एक एपा अन्न क बरे देइ चाही। ²⁵ सातवें महीनें के पन्द्रहवें दिन स सरण क उत्सव अहइ। किन्तु सासक क इहइ काम उत्सव क सात दिन तलक करइ चाही। इ सबइ भेंटन पापबलि, होमबलि, अन्नबलियन अउ तेल-भेंटन जरूर चढ़ावइ चाही।”