◀ All Reading Plans / Book of Common Prayer / Ps. 88; Ps. 91 92; Judges 9:1–16 19–21; Acts 4:13–31; John 2:1–12 (Awadhi Bible: Easy-to-Read Version)

Prev Day

August 9, 2024

Next Day

Use the calendar to view readings from this devotional.

August 2024
Su	Mo	Tu	We	Th	Fr	Sa
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 88

संगीत निर्देसक बरे। कोरह परिवारन एज्रा-बंसी हेमान क एक ठु कलात्मक। “माहलाथ लआन्नोथ” राग पइ।

¹हे परमेस्सर यहोवा, तू मोर उद्धारकर्त्ता अहा।
    मइँ तोहार रात-दिन विनती करत रहत हउँ।
²कृपा कइके मोर पराथना पइ धियान द्या।
    मोह पइ दाया कइके मोर पराथना सुना।
³मइँ आपन दुर्दसा स तंग होइ गवा हँउ।
    बस मइँ हाली ही मरि जाब।
⁴लोग मोरे संग मुर्दा जइसा बेउहार करइ लागेन ह।
    उ मनई क तरह जउन जिअत रहइ बरे बहोत कमजोर अहइँ।
⁵मोका मुर्दा लोगन क बीच मँ रखा गवा ह।
    मइँ कब्र क मुर्दन जइसा हउँ
जेका तू बिसर जाब्या।
    अउर जेका तोहरे उपस्थिति स हटाई दीन्ह गवा अहइ।
⁶हे यहोवा, तू मोका कब्र क सबसे गहरी खाईं मँ डाइ दिहा ह।
    तू मोका घोर अँधेरी जगह मँ रख दिहा ह।
⁷हे परमेस्सर, तोहका मोह पइ किरोध रहा,
    एह बरे तू मोका आपन किरोध क तरंगन स बर्बाद किहा ह।

⁸तू मोका मोरे मीत लोगन स अलगाइ दिहा।
    एह बरे उ पचे मोसे अलग रहइ क जतन करत अहइँ,
    काहेकि तू मोका अइसा मनई बनाए अहा जेका कउनो भी छुअइ नाहीं चाहत ह।
मइँ आपन घरे क ही भीतरे बंदी बनि गवा हउँ
    अउर मइँ बाहेर जाइ नाहीं सकत हउँ।
⁹    विपदा क कारण मोर आँखिन मँ पीड़ा अहइँ।
हे यहोवा, मइँ तोहसे निरन्तर पराथना करत हउँ
    अउर तोहार समर्थन मँ मइँ आपन हाथ उठावत हउँ।
¹⁰हे यहोवा, का तू मृतक लोगन बरे अचरज भरा काम करब्या?
    का इ सम्भव अहइ कि एक मरा भवा आतिमा तोहार उपासना करी? (सेला)

¹¹जउन मरा भए अहइँ उ पचे आपन कब्र मँ स ओकरे कइँती तोहरे पिरेम क बारे मँ बताइ सकतेन।
    मरे भए लोगन मृत्युलोक स ओकरे कइँती तोहरी बिस्सास क नाहीं बताइ सकतेन।
¹²मरे भए लोग अँधियारे मँ सोवत हीं उ पचे ओन अद्भुत बातन क जेनका तू करत अहा, नाहीं लखि सकतेन।
    उ पचे छोड़ा भवा भुइँया मँ तोहार कीन्ह भवा धार्मिकता क बारे मँ नाहीं बताइ सकतेन।
¹³मुला मइँ मदद बरे तोहका गोहराएउँ ह, हे यहोवा।
    हर भिन्सारे मइँ तोहार समन्वा पराथना करत हउँ।
¹⁴हे यहोवा, तू मोका काहे तजि दिहा ह?
    तू मोर सुनइ स काहे मना करत अहा?
¹⁵बचपन स ही मइँ सतावा गवा हउँ
    अउर मउत क धमकी दीन्ह गवा हउँ, मइँ असहाय हउँ।
¹⁶तोहार गुस्सा मोका ढाँपि लिहे अहइ
    अउर तोहार आतंक मोका मार डावत ह।
¹⁷उ मोका बाढ़ क पानी क समान चारिहुँ कइँती स घेरिके राखेस ह।
    उ मोका पूरी तरह स ढाँपिके राखेस ह।
¹⁸हे यहोवा, तू मोरे मीत अउ प्रिय मनइयन क मोका छोड़िके चला जाइ क मजबूर कइ दिहा।
    मोरे संग सिरिफ केवल अँधियारा ही रहत ह।

भजन संहिता 91-92

¹उ जउन कउनो सर्वोच्च परमेस्सर क सरण मँ रहत ह,
    तउ उ सर्वसक्तिमान परमेस्सर क सुरच्छा मँ रहत ह।
²मइँ यहोवा स कहत हउँ, “तू मोर सुरच्छा स्थल अहा मोर गढ़।
    हे परमेस्सर, मइँ तोहरे भरोसे हउँ।”
³यहोवा तोहका सबहिं छिपे भए खतरा स बचाइ।
    उ तोहका सब खउफनाक विपत्तियन स बचाइ।
⁴तू परमेस्सर क सरण मँ संरच्छण पावइ बरे जाइ सकत ह।
    उ तोहार अइसे रच्छा करी जइसे एक ठु पंछी आपन पखना फइलाइके आपन बच्चन क रच्छा करत ह।
    परमेस्सर क बिस्सास एक बिसाल ढाल क नाईं अहइ जउन चारिहुँ कइँती स रच्छा करत ह।
⁵राति मँ तोहका कउनो क भय नाहीं होइ,
    अउ दुस्मन क बाणन स तू दिन मँ डेराब्या नाहीं।
⁶तोहका अँधियारे मँ आवइवालन रोगन
    अउ उ खउफनाक रोग स जउन दुपहर मँ आवत हीं डर नाहीं होइ।
⁷तू हजार दुस्मनन क हराइ देब्या।
    तोहार खुद दाहिना हाथ दस हजार दुस्मनन क हराइ।
    अउर तोहार दुस्मन तोहका छुइ तलक नाहीं पइहीं।
⁸जरा लखा, अउर तोहका देखाँइ देइ कि
    उ पचे कुटिल मनई सजा पाइ चुका अहइँ।
⁹काहेकि तू यहोवा क भरोसे अहा।
    तू परम परमेस्सर क आपन सरणस्थल बनाया ह।
¹⁰तोहरे संग कउनो भी बुरी बात नाहीं घटी।
    कउनो भी रोग तोहरे घर क नजदीक नाहीं आइ।
¹¹काहेकि परमेस्सर आपन सरगदूतन क तू जहाँ भी जाब्या हुआँ तोहार रच्छा करइ बरे नियुक्त करी।
¹²ओकर सरगदूतन तोहका आपन हाथन पइ ऊपर उठइहीं,
    ताकि तोहार गोड़ चट्टान स न टकराइ।
¹³तू कोबरा अउर नाग पइ बगैर कउनो नोस्कान क चलब्या;
    तू सेर अउर अजगर क कुचरब्या।
¹⁴यहोवा कहत ह, “मइँ आपन सेवकन क रच्छा करब जउन मोहसे पिरेम करत ह।
    मइँ ओनॅ व्यक्ति क पालन-पोसन करब जउन मोर उपासना करत ह।”
¹⁵उ सहारा पावइ बरे मोका गोहरइहीं, मइँ ओनकर जवाब देब।
    उ पचे जब कस्ट मँ होइहीं मइँ ओनके संग रहब।
    मइँ ओनकर बचाव करब अउर ओनका आदर देब।
¹⁶मइँ आपन व्यक्तियन क एक लम्बी उमिर क आसीस देब।
    अउर मइँ ओका ओकर आपन बचान क सक्ति दिखाउब।

सबित क दिन बरे एक ठु स्तुति गीत।

¹यहोवा क महिमा क स्तुति करइ नीक अहइ।
    हे सर्वोच्च परमेस्सर, तोहरे नाउँ क गुणगान बरे नीक अहइ।
²भोर मँ तोहरे पिरेम क गीत गाउब
    अउ राति मँ तोहरे बिस्सास क गीत गाउब नीक अहइ,
³हे यहोवा तोहरे बरे दस तार वाद्य यंत्रन, सारंगियन
    अउ वीणन पइ संगीत बजाउब नीक बाटइ।
⁴हे यहोवा, तू फुरइ हमका आपन कीन्ह कामन स आनन्दित करत ह।
    हम आनन्द स भरिके ओन गीतन क गाइत ह, जउन काम तू किहा ह।
⁵हे यहोवा, तू महान कारज किहा ह।
    तोहार सोच-बिचार हमरे बरे समुझि पावइ आसान नाहीं अहइँ।
⁶लोग मूरख गोरुअन क जइसे अहइँ।
    मूरख जइसे तोहार सोच-बिचार क नाहीं समुझ पाइत।
⁷दुट्ठ जन घास क नाई पनपत हीं।
    उ पचन्क दुआरा कीन्ह भवा सबइ बेकार अबहीं फलत-फूलत हीं,
    किन्तु सदा-सदा बरे खतम होइ जइहीं।
⁸मुला हे यहोवा, अनन्त काल तलक तोहार आदर रही।

⁹हे यहोवा, तोहार दुस्मनन बर्बाद कइ दीन्ह जइहीं।
    उ सबहिं मनई जउन बुरा काम करत हीं, तितर-बितर कइ दीन्ह जइहीं।
¹⁰मुला तू मोका जंगली बर्धा क नाईं मज़बूत बनाया ह।
    हम बरियार भेड़ा स बन जाब जेकर कर्रे सींग होत हीं तू मोह पइ खास तेल उड़ेर्या ह जउन ठंडापन देत ह।
¹¹मइँ लखेउँ ह कि मोर दुस्मन मोका लखत हीं;
    मइँ सुनेउँ ह कि दुट्ठ लोग मोह पइ हमला करइ बरे तइयार बाटेन।

¹²नीक मनइयन लबानोन क बड़वार देवदार बृच्छ क तरह अहइँ
    जउन यहोवा क मन्दिर मँ रोपा ग अहइँ।
¹³नीक मनइयन बाढ़त भए ताड़ क बृच्छ क नाई अहइँ,
    जउन हमार परमेस्सर क मन्दिर क आँगन मँ फलदार होत अहइँ।
¹⁴उ पचे जब तलक बुढ़वा होइहीं तब तलक उ पचे फल देत रइहीं।
    उ पचे हरे भरे मोटा बृच्छ जइसे होइहीं।
¹⁵उ पचे हर कउनो क इ देखाँवइ बरे हुआँ अहइँ कि यहोवा बिस्सास योग्य अहइ।
    उ मोर चट्टान अहइ।
    ओहमाँ कछू बुराइ नाहीं बाटइ।

निआवाधीसन 9:1-16

अबीमेलेक राजा बना

9 अबीमेलेक यरूब्बाल क पूत रहा। अबीमेलेक आपन ओन मामा लोगन क लगे गवा जउन सकेम नगर मँ रहत रहेन। उ आपन मामा लोगन अउ महतारी क परिवार स कहेस, ²“सकेम नगर क प्रमुख लोगन स इ सवाल पूछा: ‘यरूब्बाल का सत्तर पूतन स आप लोगन क सासित होब तोहार बरे नीक अहइ या कउनो एक मनई स सासित होब? याद राखा, मइँ तोहार सम्बंधी हउँ।’”

³अबीमेलेक क मामा लोग सकेम क प्रमुख लोग स बात किहेन अउर ओनेस इ सवाल किहेन। सकेम क प्रमुख लोग अबीमेलेक क अनुसरण करइ क निहचइ किहेन। उ पचे कहेन, “आखिरकार उ हमार सम्बंधी अहइ।” ⁴एह बरे सकेम क प्रमुख लोग अबीमेलेक क सत्तर चाँदी क टूकन दिहेन। उ चाँदी बालबरीत देवता क मन्दिर क रही। अबीमेलेक चाँदी क उपयोग कछू मनइयन क काम पइ लगावइ बरे किहेन। इ सबई मनई लापरवाह अउ बेकार रहेन। उ सबइ अबीमेलेक क पाछे, जहाँ कहूँ उ गवा, चलत रहेन।

⁵अबीमेलेक ओप्रा नगर क गवा। ओप्रा ओकरे पिता क निवास स्थान रहा। उ नगर मँ अबीमेलेक आपन सत्तर भाइयन क कतल कइ दिहेस। उ सबइ सत्तर भाई अबीमेलेक क बाप यरूब्बाल क पूत रहेन। उ सबहिं क एक पथरे पइ मारेस किन्तु यरूब्बाल क सब स नान्ह पूत अबीमेलेक स छुप गवा अउर पराइ निकरा। सब स नान्ह पूत क नाउँ योताम रहा।

⁶तब सकेम नगर क सबहिं प्रमुख अउर बेतमिल्लो क महल क निअम्बर एक संग आएन। उ सबइ सबहिं उ पाथर-खम्भा क निअरे क बड़का बृच्छ क लगे बटुर गएन जउन सकेम नगर मँ रहा अउर उ पचे अबीमेलेक क आपन राजा बनाएन।

योताम क कथा

⁷योताम सुनेस कि सकेम क प्रमुख लोग अबीमेलेक क राजा बनाइ दिहेन ह। जब उ सुनेस तउ उ गवा अउर गरिज्जीम पर्वत क चोटी पइ खड़ा भवा। योताम लोगन क इ कथा चिचियाइके सुनाएस।

“सकेम क लोग, मोर बात सुना अउ तब आप क बात परमेस्सर सुनी।

⁸“एक दिन बृच्छ आपन ऊपर हुकूमत करइ बरे एक ठु राजा चुनइ क निर्णय किहन। बृच्छन जइतून क बृच्छ स कहेन, ‘तू हमरे ऊपर राजा बना।’

⁹“मुला जइतून क बृच्छ कहेस, ‘मनई अउ देवता मोर बड़कई मोरे तेल बरे करत ही। का मइँ जाइके सिरिफ दूसर बृच्छन पइ हुकूमत करइ क बरे आपन तेल बनाउब बन्द कइ देउँ?’

¹⁰“तब बृच्छन अंजीर क बृच्छ स कहेन, ‘आवा अउर हमार राजा बना।’

¹¹“मुला अंजीर क बृच्छ जवाब दिहस, ‘का मइँ सिरिफ जाइके दूसर बृच्छन पइ हुकूमत करइ बरे आपन मीठ अउ नीक फल पइदा करब बन्द कइ देब?’

¹²“तब बृच्छन अंगूर क बेल स कहेन, ‘आवा अउ हमार राजा बना।’

¹³“मुला अंगूर क बेल जवाब दिहस, ‘मोर दाखरस मनईयन अउ राजा लोगन क खुस करत ह। का मोका सिरिफ जाइके अउर बृच्छन पइ सासन करइ बरे आपन दाखरस पइदा करब बन्द कइ देइ चाही।’

¹⁴“आखीर मँ सबइ बृच्छन कँटेरी झाड़ी स कहेन, ‘आवा अउ हमार राजा बना।’

¹⁵“किन्तु कँटेरी झाड़ी बृच्छन स कहेस, ‘जदि तू फुरइ मोका अपने ऊपर राजा बनावइ चाहत ह तउ आवा अउर मोर छाया मँ आपन सरण बनावा। जदि तू अइसा करइ नाहीं चाहत ह तउ इ कँटेरी झाड़ी स आगी निकरइ द्या, अउर उ आगी क लबानोन, क चीड़ क बृच्छन क भी जराइ देइ द्या।’

¹⁶“अब जदि आप अबीमेलेक क आपन राजा बनाइके ठीक करत हीं। अउर जदि आप ओका राजा बनाइके यरूब्बाल अउर ओकर परिवार बरे निआव संगत अहइँ, अउर आप यरूब्बाल क संग उहई बर्ताव करत ह जेका उ हकदार अहइ, तउ इ ठीक अहइ!

निआवाधीसन 9:19-21

¹⁹एह बरे जदि आज आप लोग यरूब्बाल अउ ओकरे परिवार क बरे ठीक किहेस ह, तब अबीमेलेक क आपन राजा मानिके आप क खुस होइ चाही अउर ओका भी तोहार संग खुस होइ चाही। ²⁰मुला जदि आप उचित नाही किहेन ह तउ, अबीमेलेक सकेम अउर मिल्लो सहर क सबइ प्रमुखन क नस्ट कइ डाएन। अउर सकेम नगर क अउर मिल्लो नगर क प्रमुखन भी अबीमेलेक क नस्ट कइ डाएन।”

²¹योताम इ सब कहइ क पाछे भाग खड़ा भवा। उ पराइके बेर नगर मँ पहोंचा। योताम उ नगर मँ रहत रहा, काहेकि उ आपन भाई अबीमेलेक स डेरात रहा।

प्रेरितन क काम 4:13-31

¹³उ पचे जब पतरस अउर यूहन्ना क निडर होब निहारेन अउर इ समुझेन कि पतरस अउर यूहन्ना अनपढ़ अउर साधारण मनइ रहेन तउ ओनका बहोत अचरज भवा। फिन उ पचे जान गएन कि इ सबइ ईसू क संग रहि चुका बाटेन। ¹⁴अउर काहेकि उ पचे उ मनई क जउन चंगा भ रहा, ओनकइ संग खड़ा भवा लखत रहेन। तउ ओनकइ लगे तनिकउ बोलइ क कछू नाहीं रहा।

¹⁵उ पचे ओनसे यहूदी महासभा स निकर जाइ क कहेन अउर फिन उ सबइ इ कहत भए आपुस मँ बिचार करइ लागेन कि, ¹⁶“इ पचन्क संग कइसा बिवहार कीन्ह जाइ? काहेकि यरूसलेम मँ बसइया हर कउनो जानत ह कि ऍनके जरिये एक ठु अजरज क काम कीन्ह गवा ह अउर हम ओका मना नाहीं कइ सकित। ¹⁷मुला हम ऍनका चिताउनी दइ देइ कि उ सबइ इ नाउँ क बात कउनो अउर मनई स जिन करइँ काहेकि मनइयन म इ बात क संचरइ क अउर फैलि जाइ स रोक जाइ सकइ।”

¹⁸तउ पचे ओनका भीतर बोलाएन अउर हुकुम दिहेन कि उ पचे ईसू क नाउँ पन तउ कउनो स कछू बात करइँ अउर न ही उपदेस देइँ। ¹⁹मुला पतरस अउर यूहन्ना ओनका जवाब दिहेन, “तू पचे ही फरियावा, क परमेस्सर क समन्वा हमरे बरे इ नीक होइ कि परमेस्सर न सुनिके हम तोहार सुनी? ²⁰हम, जउन कछू हम पचे लखा ह अउर सुना ह, ओका कहे क आलावा अउर कछू नाहिं कर सकित।”

^21-22फिन उ पचे ओनका धमकाए क पाछे छोड़ दिहन। ओनका सजा देइ क कउनो रस्ता नाहीं मिलि सका काहेकि जउन कछू भवा रहा, ओकरे बरे सबहिं मनइयन परमेस्सर क स्तुति करत रहेन। जउने मनई क नीक करइ क इ काम कीन्ह गवा रहा, ओकर उमिर चालीस बरिस स जिआदा रही।

पतरस अउर यूहन्ना क लउटब

²³जब ओनका छोड़ दीन्ह गवा तउ आपन ही मनइयन क लगे आइ गएन अउर ओनसे जउन कछू मुख्ययाजक अउर बुजुर्ग यहूदी नेतन कहेन, उ सब ओनका कहिके सुनावा गवा। ²⁴जब उ पचे इ सुनेन तउ मिलिके उँची आवाज मँ परमेस्सर क गोहरावत भवा बोलेन, “स्वामी, तू ही अकास, धरती, समुद्दर अउर ओकरे अंदर जउन कछू अहइ, ओका बनाया ह। ²⁵तू ही पवित्तर आतिमा क जरिये आपन सेवक, हमरे पूर्वज दाऊद क मुँहना स कहे रहा:

‘देखाएन इ जानित आपन अहंकार काहे?
मनइयन वृथा ही कुचाल काहे किहेन?

²⁶इ धरती क राजा लोग आपन क तइयार किहेन ओनके खिलाफ जुद्ध बरे।
अउर राजा बटुर गएन पर्भू अउर ओकरे मसीह क खिलाफत मँ।’ ^(A)

²⁷हाँ, हेरोदेस अउर पुन्तियूस पिलातुस भी इ सहर मँ गैर यहूदियन अउर इस्त्राएलियन क संग मिलिके तोहरे पवित्तर सेवक ईसू क खिलाफ, जेकर तू मसीह रूप मँ अभिसेक किहे ह, सचमुच उ पचे एक अउट ग रहेन। ²⁸उ पचे बटुर गएन काहेकि तोहार सक्ती अउर इच्छा क अनुसार जउन कछू पहिले ही तय होइ चुका रहा उ पूरा होइ। ²⁹अउर अबहिं हे पर्भू, ओनकइ धमकिन प धियान द्या अउर आपन सेवक लोगन क निडर होइके ‘तोहार बचन’ सुनावइ क सक्ती द्या। ³⁰जब कि चंगा किहे क पाछे आपन हाथ बढ़ाया अउर अद्भुत चीन्हन अउर अद्भुत कारजन तोहरे पवित्तर सेवकन क जरिये ईसू क नाउँ प कीन्ह जात रहत हीं।”

³¹जब उ पचे पराथना कइ चुकेन तउ जउने ठउरे प उ सबइ बटुरा रहेन, उ हल गवा अउर ओन सब मँ “पवित्तर आतिमा” समाइ गवा। अउर उ पचे निडर होइके परमेस्सर क बचन बोलइ लागेन।

यूहन्ना 2:1-12

काना मँ बियाह

2 गलील क काना मँ तीसरे दिन कउनो क घरे मँ बियाह रहा। ईसू क महतारी हुवाँ मौजूद रही। ²बियाहे मँ ईसू क अउर ओनके चेलन क बोलउवा आइ रहा। ³हुवाँ जब दाखरस खतम होइ गवा तउ ईसू क महतारी कहेस, “ओनके पास अब दाखरस नाहीं अहइ, सब खतम होइ ग।”

⁴ईसू ओसे कहेस, “इ तू मोसे काहे बतावत अहा? अबहीं मोर समइ नाहीं आवा अहइ।”

⁵फिन ओकर महतारी ऩउकरन स कहेस, “तू पचे उहइ करा जउन इ तोहसे करइ बरे कहइ।”

⁶हुवाँ पानी भरइ बरे पाथर क छ: मटका धरा रहेन। इ मटकन क यहूदियन पवित्तर स्नान क बरे इस्तेमाल करत रहेन। हर मटका मँ लगभग बीस स तीस गैलन पानी आवत रहा।

⁷ईसू नउकरन स कहेस, “मटकन क पानी स भर द्या।” नउकरन मटकन क लबालब भरि दिहेन।

⁸फिन उ ओनसे कहेस, “अब थोड़ा पानी बाहेर निकाला, अउर दावत क इन्तजाम करइवाला मुखिया क पास लइ जा।”

अउर उ पचे थोर क पानी मुखिया क पास लइ गएन। ⁹फिन दावत क इन्तजाम करइवाला मुखिया उ पानी क थोरा स चखेस तउ उ पाएस कि इ पानी तउ दाखरस बनि गवा रहा। उ जानि नाहीं पाएस कि दाखरस कहाँ स आइ गवा। मुला ओन नउकरन क तउ पता रहा, जउन पानी निकारे रहेन। ¹⁰फिन दावत क मुखिया दुल्हा क बोलाएस अउर ओसे कहेस, “सब मनई पहिले अच्छी दाखरस परोसत हीं अउर जब मेहमानन क मन भरि जात ह तउ घटिया दाखरस देइ लागत हीं। मुला तउ सबसे बढ़िया वाली दाखरस अबहीं तक बचाए रखे अहा।”

¹¹ईसू गलील क काना मँ आपन पहिला अदुभुत कारज कइके आपन महिमा परगट किहेस। जेहसे ओकर चेलन ओहमाँ बिसवास करेन्ह।

¹²ओकरे पाछे फिन ईसू आपन महतारी, भाइयन अउर चेलन क साथे कफरनहूम चला गवा, जहाँ प उ पचे कछू दिन ठहरेन्ह।

Awadhi Bible: Easy-to-Read Version (ERV-AWA)