Revised Common Lectionary (Semicontinuous)

¹ हे परमेस्सर, मोर रच्छा करा, काहेकि मइँ तोहे पइ निर्भर अहउँ।
² मोर यहोवा स निवेदन अहइ, “यहोवा, तू मोर सुआमी अहा।
    मोरे लगे जउन कछू उत्तिम अहइ
    उ सबइ तोहसे ही अहइ।”
³ यहोवा आपन लोगन क धरती पइ अद्भूत काम करत ह।
    यहोवा इ देखाँवत ह कि
    उ फुरइ ओनसे पिरेम करत ह।

⁸ मइँ आपन प्रियतम क अवाज अनकत हउँ।
    इ पहाड़न स उछरत भइ
    अउर पहाड़ियन स कूदत भइ आवत ह।
⁹ मोर प्रियतम कुरंग या जवान हरिन जइसा सुन्नर अहइ।
    लखा, उ हमरी देवारे क पीछे खड़ा अहइ,
    खिरकी स लखत अहइ, पर्दा क छेद स झाँकत अहइ।
¹⁰ मोर प्रियतम मोसे बोलत ह:
“हे मोर प्रिये, उठा, हे मोर सुन्नरी,
    आवा कहूँ चली।
¹¹ लखा, सीत-रितु बीत गइ अहइ।
    बर्खा खतम होइ गइ अउ चली गइ अहइ।
¹² धरती पइ फूल खिले भए अहइँ।
    चिरइयन क गावइ क समइ आइ ग अहइ।
    धरती पइ कबूतरे क अवाज गूँजत अहइ।
¹³ अंजीर क बृच्छन पइ अंजीर, पकइ लागेन हँ।
    अंगूरे क बेल फूलत अहइँ अउर ओनकर भीती गन्ध फइलत अहइ।
मोर प्रिय उठा, हे मोर सुन्नर,
    आवा कहूँ दूर चली।”

¹⁴ हे मोर कबूतर, जउन ऊँच चट्टानन क सबइ गुफा मँ अउर पहाड़न मँ लुकान अहा,
    मोका आपन मुँह देखावा
मोका आपन आवाज सुनावा काहेकि तोहार आवाज मीठ
    अउ तोहार मुँह सुन्नर अहइ।

¹⁵ जउन नान्ह लोखरियन दाख क बगियन क बिगाड़त ही
    हमरे बरे ओनका धरा।
    हमार अंगूर क बगियन अब फूलत अहइँ।