Revised Common Lectionary (Semicontinuous)

¹ यहोवा क गुणगान करा।
    मोर मनवा, यहोवा क बड़कई करा।
² मइँ आपन जिन्नगी भइ यहोवा क गुण गाउब।
    मइँ जब तलक जिअब आपन परमेस्सर बरे संगीत बजावत रहब।
³ आपन प्रमुखन क भरोसे जिन रहा।
    मदद पावइ बरे मनई क भरोसे जिन रहा, काहेकि तोहका मनई बचाइ नाहीं सकत ह।
⁴ लोग मर जात हीं अउर दफनाइ दीन्ह जात हीं।
    फुन ओनकर मदद देइ क सबहिं जोजना यूँ ही चली जात हीं।
⁵ ओनका धन्य होइ जउन याकूब क परमेस्सर क आपन सहायक क रूप मँ राखेस ह।
    ओनका धन्य होइ जउन यहोवा आपन परमेस्सर क भरोसे रहा करत हीं।
⁶ उ सरग अउ धरती क बनाएस ह।
    उ सागर अउर ओहमाँ क हर चिजियन क बनाएस ह।
उ हमेसा बिस्सासी रही।
⁷ उ सताया भवा लोगन क संग उचित बेउहार करत ह।
    उ भुखान लोगन क भोजन देत ह।
यहोवा बन्दी लोगन क छोड़ाइ दिया करत ह।
⁸     यहोवा आँधर क आँखियन क खोलि दिहेस।
यहोवा ओन लोगन क सहारा देत ह जउन ठोकर खाएन हीं।
    यहोवा सच्चे लोगन स पिरेम करत ह।
⁹ यहोवा हमरे देस मँ रहइवालन बिदेसियन क रच्छा करत ह।
    यहोवा अनाथन अउ राँड़ मेहररूअन क धियान रखत ह।
    किन्तु दुर्जनन क मकसदन क विफल करत ह
¹⁰ यहोवा सदा राजा क रूप मँ सासन करत रहइ।
    हे सिय्योन तोहार परमेस्सर पीढ़ी दर पीढ़ी राज करत रहइ।

यहोवा क गुणगान करा।

¹⁷ “फिलहाल तोहरे पास ताँबा अहइ
    परन्तु एकरी नगह मइँ तोहका सोना देब।
अबहिं तउ तोहरे लगे लोहा अहइ,
    पर ओकर जगह तोहका चाँदी देब।
तोहार लकड़ी क जगह मइँ तोहका ताँबा देबउँ।
    तोहार पाथरन क जगह तोहका लोहा देबउँ
अउर तोहका दण्ड देइ क जगह मइँ तोहका सुख चैन देबउँ।
    जउन लोग अबहिं तोहका दुःख देत हीं उ सबइ ही लोग तोहरे बरे अइसा काम करिहीं जउन तोहका सुख देइहीं।
¹⁸ तोहरे देस मँ हिंसा अउर तोहरी सबइ सीमा मँ तबाही अउर बरबादी कबहुँ नाहीं सुनाई पड़ी।
    तोहरे देस मँ लोग फुन कबहुँ तोहार वस्तुअन नाहीं चोरइहीं।
तू आपन परकोटन क नाउँ ‘उद्धार’ रखब्या
    अउर तू आपन दुआरन क नाउँ ‘स्तुति’ रखब्या।

¹⁹ “दिन क समय मँ तोहरे बरे सूरज क प्रकास नाहीं होइ
    अउर रात क समय मँ चाँद क प्रकास तोहार रोसनी नाहीं होइ।
काहेकि यहोवा ही सदैव तोहरे बरे प्रकास होइ।
    तोहार परमेस्सर तोहार महिमा बनी।
²⁰ तोहार ‘सूरज’ फुन कबहुँ भी नाहीं छुपी।
    तोहार ‘चाँद’ कबहुँ भी करिआ नाहीं पड़ी।
काहेकि यहोवा क प्रकास सदा सर्वदा तोहरे बरे होइ
    अउर तोहार दुःख क समय खतम होइ जाइ।

²¹ “तोहार सबहिं लोग उत्तिम बनिहीं।
    ओनका सदा बरे धरती मिलि जाइ।
मइँ ओन लोगन क रचा ह।
    उ सबइ अद्भुत पउधन
    मोर आपन ही हाथन स लगाए भए अहइँ।
²² छोटा स छोटा भी बिसाल घराना बन जाइ।
    छोटा स छोटा भी एक सक्तीसाली रास्ट्र बन जाइ।
जब उचित समय आइ,
    मइँ यहोवा हाली ही आइ जाब
    अउर मइँ इ सबइ बातन घटित कइ देबउँ।”