Revised Common Lectionary (Semicontinuous)

¹ उ जउन कउनो सर्वोच्च परमेस्सर क सरण मँ रहत ह,
    तउ उ सर्वसक्तिमान परमेस्सर क सुरच्छा मँ रहत ह।
² मइँ यहोवा स कहत हउँ, “तू मोर सुरच्छा स्थल अहा मोर गढ़।
    हे परमेस्सर, मइँ तोहरे भरोसे हउँ।”
³ यहोवा तोहका सबहिं छिपे भए खतरा स बचाइ।
    उ तोहका सब खउफनाक विपत्तियन स बचाइ।
⁴ तू परमेस्सर क सरण मँ संरच्छण पावइ बरे जाइ सकत ह।
    उ तोहार अइसे रच्छा करी जइसे एक ठु पंछी आपन पखना फइलाइके आपन बच्चन क रच्छा करत ह।
    परमेस्सर क बिस्सास एक बिसाल ढाल क नाईं अहइ जउन चारिहुँ कइँती स रच्छा करत ह।
⁵ राति मँ तोहका कउनो क भय नाहीं होइ,
    अउ दुस्मन क बाणन स तू दिन मँ डेराब्या नाहीं।
⁶ तोहका अँधियारे मँ आवइवालन रोगन
    अउ उ खउफनाक रोग स जउन दुपहर मँ आवत हीं डर नाहीं होइ।

¹³ “मइँ सोमरोन क नबियन क कछू बुरा करत लखेउँ।
    मइँ ओन नबियन क लबार बाल देवता क नाउँ भविस्सवाणी करत लखेउँ।
    ओन नबियन इस्राएल क लोगन स दूर भटकाएन।
¹⁴ मइँ यहूदा क नबियन क यरूसलेम मँ बहोत भयानक करम करत लखेउँ।
    एन नबियन बिभिचार करइ क पाप किहन।
उ पचे झूठी सिच्छन पइ बिस्सास किहन,
    अउर ओन लबार उपदेसन क कबूल किहन।
उ पचे दुट्ठ लोगन क पाप करत रहइ क बरे उत्साहित किहन।
    एह बरे लोग पाप करब नाहीं तजेन।
उ पचे सबहिं लोग एदोप नगर क तरह अहइँ।
    यरूसलेम क लोग मोरे बरे अमोरा नगर क तरह अहइ।”

¹⁵ एह बरे सर्वसक्तिमान यहोवा नबियन क बारे मँ इ बातन कहत ह,
“मइँ आव नबियन क दण्ड देब।
    उ सजा बिख स भरा भोजन पानी खाइ पिअइ जइसा होइ।
नबियन आध्यात्मिक बीमारी पइदा किहन अउर उ बीमारी पूरे देस मँ फइल गइ।
    एह बरे मइँ ओन नबियन क सजा देब।
    उ बीमारी यरूसलेम मँ नबियन स आइ।”

¹⁶ सर्वसक्तिमान इ सब कहत ह:
“उ पचे नबी तू पचन स जउन कहइँ ओकर अनसुनी करा।
    उ पचे तू पचन्क मूरख बनावइ क जतन करत अहइँ।
उ पचे नबी अन्तदर्सन करइ क बात करत हीं।
    किन्तु उ पचे आपन अन्त दर्सन मोहसे नाहीं पाउतेन।
    ओनकर अन्तदर्सन ओनकर मन क उपज अहइ।
¹⁷ कछू लोग यहोवा क सच्चे सँदेसा स घिना करत हीं।
    एह बरे उ सबइ नबी ओन लोगन स अलग-अलग कहत हीं।
    उ पचे कहत हीं, ‘तू सान्ति स रहब्या।’
कछू लोग बहोत हठी अहइँ।
    उ पचे उहइ करत हीं जउन उ पचे करइ चाहत हीं।
एह बरे उ सबइ नबी कहत हीं,
    ‘तोहार पचन्क कछू भी बुरा नाहीं होइ।’
¹⁸ किन्तु एन नबियन मँ स कउनो भी स्वर्गीय परिषद मँ सामिल नाहीं भवा ह।
    ओनमाँ स कउनो भी यहोवा क सँदेसा क न लखेस ह न ही सुनेस ह।
    ओनका स कउनो भी यहोवा क सँदेसा पइ गंभीरता स धियान नाहीं दिहेस ह।
¹⁹ अब यहोवा क हिआँ स सजा आँधी क तरह आइ।
    यहोवा क किरोध बौंड़र क तरह होइ।
    इ ओन दुट्ठ लोगन क मूँड़न क कुचरत भवा आइ।
²⁰ यहोवा क किरोध तब तलक नाहीं रूकी
    जब तलक उ पचे जउन करइ चाहत हीं, पूरा न कइ लेइँ।
जब उ दिन चला जाइ
    तब तू पचे एका ठीक ठीक समुझब्या।
²¹ मइँ ओन नबियन क नाहीं पठएउँ।
    किन्तु उ पचे आपन सँदेसा देइ दउड़ पड़ेन।
मइँ ओनसे बातन नाहीं किहेउँ।
    किन्तु उ पचे मोर नाउँ क उपदेस दिहन।
²² जदि उ पचे मोर स्वर्गीय परिषद मँ सामिल भए होतेन
    तउ उ पचे यहूदा क लोगन क मोर सँदेसा दिए होतेन।
उ पचे लोगन क बुरे करम करइ स रोक दिए होतेन।
    उ पचे लोगन क पाप करम करइ स रोक दिए होतेन।”