Revised Common Lectionary (Semicontinuous)

Dee 6 Psalm

To dän haupt Musikaunt opp Neginot opp Scheminit, en Psalm fonn Doft.

¹ O Herr Gott, doo mie nijch dodle enn dien Oaja; un doo mie uk nijch strofe enn dee Hett fonn dien Rach;

² Doo die äwa mie erboarme, O Herr Gott, dan ekj sie schwack; heel mie O Herr Gott, dan miene Knoakes sent enn Trubbel.

³ Miene Seel es uk emm deepe jetrubbelt - en Du, O Herr Gott, woo lang?

⁴ O Herr Gott, komm trigj, rad miene Seel, rad mie omm dien Erboarme haulwe.

⁵ Dan enn dän Doot es doa kjeen Aunjedenkj aun die; wäa woat die danke fonn utem Grauf?

⁶ Ekj sie meed enn mien Stäne; mien Bad schwamt derjch dee gaunse Nacht; miene Rubenk schmelt met miene Trone.

⁷ Mien Uag es Dunkel wäajen mien Trua, daut woat moaga wäajen aul miene Fiend.

⁸ Wajch fonn mie, aul jie dee Gottloosijchkjeit oabeide, dan dee Herr Gott haft dee Stem fonn mien Hiele jeheat.

⁹ Dee Herr Gott haft mien Jeschrejcht jeheat, dee Herr Gott woat mien Jebäd aun näme.

¹⁰  Lot aul miene Fiend sikj schäme un emm deepe jetrubbelt senne; dee sele trig dreihe, un sikj schäme enn eene Moment.

²⁸ Aus dee daut heade, weare see foll Oajaness en schreaje: "Groot es dee Efeesa aeare Arteemes!"

²⁹ En dee gaunse Staut wea enn en Opprua, en see stormde met een Senn en daem Teeauta enenn, en neeme Aristarchus en Gajus ut Matsedoonean faust, dee met Paul reisde.

³⁰ Aus Paul mank dee Mensche gone wull, leete dee Jinja daut nich.

³¹ Uk walkje fonn dee faeaschte enn Asean dee siene Frind weare, schekjte am Norecht daut hee nich sull nom Teeauta gone.

³² Eenje fonn dee Mensche schreaje eenalei, en aundre waut aundret; dee Fesaumlunk wea enn en Wirwoa, en dee measchte wiste nich wuaromm see toop jekome weare.

³³ Oba walkje fonn daut Follkj saede Auleksaunda faea waut hee saje sull, en dee Jude stalde am faea; en Auleksaunda bewaeajd siene Haunt, en wull sikj feauntwuate fer daut Follkj.

³⁴ Oba aus see enn worde daut hee en Jud wea, schreaje see aula met eene Stem fa aewa twee Stund: "Groot es dee Efeesea aeare Arteemas".

³⁵ Aus dee Stauts Schriewa daut Follkj beruijcht haud, saed hee: "Jie Mana fonn Efeesus; waea es doa dan mank Mensche dee nich weet daut dee Staut Efeesus de Tempelwajchta es fa dee groote Arteemas, en dee Jestault dee fomm Himel foll?

³⁶ Wiel dit nu nich to festriede jeit, es daut needich daut jie stel sent, en nusscht onnbesonne to doone.

³⁷ Dan jie ha dise Mana jebrocht dee nich Tempelreiba sent, en ha uk nich jelastat jaeajen june Jettin.

³⁸ Wan Demeetrius en siene Metoabeide dan waut jaeajen waem ha, daut Jerecht es doa, en doa sent Rechta, lot an sikj doa unjarenaunda fekloage.

³⁹ Wan jie noch meeha seakje, daut woat enn en jesatslije Fesaumlunk bestemt woare.

⁴⁰ Dan wie sent enn Jefoa waeajen dis fonndoagsche Opprua fekloagt to woare, en wie woare nich kjenne Raeakjning jaewe fa dis Opprua."

⁴¹ Aus hee dit jesajcht haud, leet hee dee Fesaumlunk gone.