Revised Common Lectionary (Semicontinuous)

Abraham wan ne Mawaltijtuk

¹⁵ Nukniwan, ken takat nina, kenha ken se sentaketzat ipal se, kwak inatuk ka yek, te aka weli kielkawa nian weli kitalilia tatka. ¹⁶ Ne projpromesaj, ne Teut kilwij ne Abraham wan ne ishinach. Te ina: "ne ishijshinach", ken ipanpa miak, sute ken ipanpa sesan: "...wan ne mushinach"; kineki ina ne Mawaltijtuk. ¹⁷ Ini tay nina: se sentaketzat ne achtu inak ne Teut ka yek, kwak panutiwit nawtzunti wan senpual-majtakti shiwit ka yaja muchijtuk tajtuli, yaja te ina ka te tatka ipatiw wan ma puliwi ne promesaj, ¹⁸ ika su ne herenciaj ipal tajtuli, intea ipal promesaj, wan ne Teut kimakak ne Abraham ken promesaj.

¹⁹ Taika ne tajtuli tel? Mutalilij ipanpa tay ne muchiwa teyek, hasta ma wiki ne shinachti ká ne ipal muchijki prometer, tuktijtuk itech tanawatianimet tik ijimey se tajkutaketzani. ²⁰ Ne tajkutaketzani ipal sesan inte kanaj, wan ne Teut sesan!

²¹ Anka kineki ina ka ne tajtuli inte senyawi iwan ne ipromesaj ne Teut? Intesu, ika su muchijtuskia se tajtuli ne weli tayulkwepa, ijkia kisaskia ne tamelakchiwalis itech ne tajtuli. ²² Pero ne tay nemi ijkwilujtuk kitzaktuk muchi itan ne tateyekchijtuk pal kiane ne tayulmatit yawit kikwit ne promesaj ipanpa itayulmatilis Yeshu Mawaltijtuk.