Revised Common Lectionary (Semicontinuous)

Jezi pale sou lanmò li

²⁷ Kounye a, m santi lespri m twouble. Ki sa m ta di? Papa, delivre m non anba tan soufrans sa a. Men, se pou sa menm mwen te vini. ²⁸ Papa, fè wè glwa w non!”

Lè sa a, yon vwa soti nan syèl la, li di: “Mwen fè wè glwa m deja, epi m ap fè wè glwa m ankò.”

²⁹ Foul moun ki te la yo te tande. Gen nan yo ki di se yon kout loray, gen lòt ki di se yon anj ki pale avè l.

³⁰ Jezi reponn epi li di: “Se pa pou mwen menm vwa sa a pale, se poutèt nou menm. ³¹ Kounye a lè jijman lemonn rive, lè a rive pou chèf k ap domine sou lemonn nan tonbe. ³² Epi mwen menm, lè yo va leve m anwo^[a] tè a, m ap rale tout moun vin jwenn mwen.” ³³ Li te di sa pou l fè konprann kijan l ap mouri.

³⁴ Foul la te reponn li: “Nou etidye nan Lalwa, lè Kris la vini l ap viv pou tout tan, kijan ou fè di fòk Pitit Lòm nan leve anwo latè a?^[b] Ki moun Pitit Lòm nan ye?”

³⁵ Jezi di yo: “Limyè^[c] a avèk nou pou yon ti tan ankò. Mache toutotan limyè a la, pou fènwa pa kenbe nou. Paske moun k ap mache nan fènwa pa wè kote l prale. ³⁶ Pandan nou genyen limyè a, se pou n kwè nan limyè a, konsa nou va tounen pitit limyè.” Apre Jezi fin pale konsa ak yo, li pati l al kache.