Revised Common Lectionary (Semicontinuous)
यहोवा क दास दाऊद क एक पद: संगीत निर्देसक बरे। दाऊद इ पद यहोवा क बारे मँ उ अवसर पइ लिखे रहा जब यहोवा दाऊद क ओकर सबइ दुस्मन अउ साऊल स ओकर रच्छा किहे रहा।
1 उ कहेस, “यहोवा मोर सक्ती अहइ,
मइँ तोहसे पिरेम करत हउँ।
2 “यहोवा मोर चट्टान, मोर गढ़, मोर सरणस्थल बाटइ।”
मोर परमेस्सर मोर चट्टान अहइ।
मइँ तोहरी सरण मँ आवा हउँ।
ओकर सक्ती मोका बचावत ह।
यहोवा ऊँचके पहाड़न पइ मोर सरणस्थल अहइ।
3 यहोवा क जउन स्तुति क जोग्य अहइ,
मइँ गोहराउब
अउर मइँ आपन दुस्मनन स बचावा जाब।
4 मोर दुस्मनन मोका मारइ क जतन किहन।
मइँ चारिहुँ कइँती मउत क लसुरी स घिरा अहउँ।
मोका अधर्म क बाढ़ भयभीत कइ दिहस।
5 मोरे चारिहुँ कइँती पाताल क लसुरी रहिन।
अउर मोह पइ मउत क फंदा रहेन।
6 मइँ घेरा भवा रहेउँ अउर यहोवा क मदद बरे गोहराएउँ।
मइँ आपन परमेस्सर क गोहराएउँ।
परमेस्सर पवित्तर मन्दिर मँ बिराजा।
उ मोर पुकार अनकेस अउ मदद किहेस।
43 मोका ओनसे बचाइ ल्या जउन मोसे जुद्ध करत हीं।
मोका ओन जातियन क मुखिया बनाइ द्या,
जेनका मइँ जानत तलक नाहीं हउँ ताकि उ पचे मोर सेवा करिहीं।
44 फिन उ सबइ लोग मोर सुनिहीं अउर मोरे हुकुमन क मनिहीं,
दूसर रास्ट्रन क लोग मोसे डेरइहीं।
45 उ पचे विदेसी लोग मोरे समन्वा निहुरिहीं काहेकि उ पचे मोसे भयमीत होइहीं।
उ पचे भय स थर्रात भए आपन छुपा ठउरन स बाहेर निकारि अइहीं।
46 यहोवा सजीव अहइ!
मइँ आपन चट्टान क जस गीत गावत हउँ।
मोर महान परमेस्सर मोर रच्छा करत ह।
47 धन्न बाटइ, मोर पटक देइवाला परमेस्सर जउन
देस-देस क मनइयन क मोरे बस मँ कइ दिहस ह।
48 यहोवा, तू मोका मोरे दुस्मनन स छोड़ाया ह।
तू मोर मदद किहा ताकि मइँ ओन लोगन क हराइ सकउँ जउन मोरे खिलाफ खड़ा भएन।
तू मोका कठोर मनइयन स बचाया ह।
49 हे यहोवा, इहइ कारण मइँ देसन क बीच तोहार स्तुति करत हउँ।
इहइ कारण मइँ तोहरे नाउँ क भजन गावत हउँ।
50 यहोवा आपन राजा क मदद बहोत स जुद्धन क जीतइ मँ करत ह।
उ आपन सच्चा पिरेम, आपन चुने भए राजा पइ देखाँवत ह।
उ दाऊद अउ ओकरे संताने बरे सदा बिस्सास क जोग्ग रही।
राजा साऊल क मउत
10 पलिस्ती लोग इस्राएल क लोगन क खिलाफ लड़ेन। इस्राएल क लोग पलिस्तियन क समान्वा पराइ गएन। बहोत इस्राएली लोग गिलबो पर्वत पइ मारे गएन। 2 पलिस्ती लोग साऊल अउर ओकरे पूतन क पाछा लगातार करत रहेन। उ पचे ओनका धइ लिहेन अउर ओनक मार डाएन। पलिस्तियन साऊल क पूतन योनातान, अबीनादाब अउर मलकीसू क मार डाएन। 3 साऊल क चारिहुँ कइँती जुद्ध घमासान होइ गवा। धनुर्धारियन साऊल पइ आपन बाण छोड़ेन अउर ओका घायल किहन।
4 तब साऊल अपने कवच वाहक स कहेस, “अपनी तरवार बाहेर हींचा अउर एकर उपयोग मोका मारइ मँ करा। तब उ पचे खतनारहित जब अइहीं तउ न मोका चोट पहोंचइही न ही मोर हँसी उड़इहीं।”
किन्तु साऊल क कवच वाहक ससान रहा। उ साऊल क मारब अस्वीकार किहस। तब साऊल अपनी तरवार क उपयोग खुद क मारइ बरे किहस। उ अपनी तरवार क नोक पइ गिरा। 5 कवचवाहक लखेस कि साऊल मर गवा, तब उ खुद क मार डाएस। उ अपनी तरवार क नोंक पइ गिरा अउर मर गवा। 6 इ तरह साऊल अउर ओकर तीनउँ पूतन मर गएन। साऊल क सारा परिवार एक संग मर गवा।
7 घाटी मँ रहइवाले इस्राएल क सबहिं लोग लखेन कि ओकर आपन फउज भाग गएन। उ पचे लखेन कि साऊल अउर ओकर पूत मर गएन। एह बरे उ पचे अपने नगरन क तजेन अउ पराइ गएन। तब पलिस्ती ओन नगरन मँ आएन जेनका इस्राएलियन तज दिहे रहेन अउर पलिस्ती ओन नगरन मँ रहइ लागेन।
8 अगले दिन, पलिस्ती लोग ल्हासन क बहुमूल्य चिजियन लेइ आएन। उ पचे साऊल क ल्हासन अउर ओकरे पूतन क ल्हासन क गिबोन पर्वत पइ पाएन। 9 पलिस्तियन साऊल क ल्हास स चिजियन उतारेन। उ पचे साऊल क मूँड़ अउर कवच लिहेन। उ पचे आपन पूरे देस मँ अपने लबार देवतन अउ लोगन क सूचना देइ बरे दूत पठएन। 10 पालिस्तियन साऊल क कवच क अपने लबार देवता क मन्दिर मँ धरेन। उ पचे साऊल क मूँड़ि क दागोन क मन्दिर लटकाएन।
11 याबेस गिलाद नगर मँ रहइवाले सब लोग उ हर एक बात सुनेन जउन पलिस्ती लोग साऊल क संग किहे रहेन। 12 याबेस क सबहिं बीर मनई साऊल अउ ओकरे पूतन क ल्हास लेइ गएन। उ पचे ओनका याबेस मँ लइ आएन। ओन बीर मनसेधुअन साऊल अउ ओकरे पूतन क हाड़न क, याबेस मँ एक बिसाल बृच्छ क खाले दफनाएन। तब उ पचे अपना दुःख परगट किहन अउ सात दिन तलक उपवास रखेन।
13 साऊल एह बरे मरा कि उ यहोवा क बरे बिस्सास पात्र नाहीं रहा। साऊल यहोवा क आदेसन क पालन नाहीं किहस। साऊल एक माध्यम क लगे गवा अउर 14 यहोवा क तजिके ओहसे सलाह माँगेस। इहइ कराण अहइ कि यहोवा ओका मार डाएस अउर यिसै क पूत दाऊद क राज्ज दिहस।
ईसू बेरमिया लरिका क चंगा किहेस
(मत्ती 17:14-20; लूका 9:37-43a)
14 अउर जबहिं उ सबइ दूसर चेलन क लगे आएन तउ उ पचे एक भारी भीर क जमघट ओनके चारिहुँ कइँती देखेन कि धरम सास्तियिन ओनसे तहत्तुक करत रहेन। 15 जइसे ही सब मनइयन ओका निहारेन, उ पचे विस्मय मँ पड़ि गएन अउर ओका भेंटइ बरे ओकरे कइँती उ सबइ भागेन।
16 उ ओनसे पूछेस, “तू सबइ ओनसे काहे क बारे मँ विवाद करत ह?”
17 एह पइ एक मनई भिरिया स जबाव दिहस, “गुरु, मइँ आपन बेटवा तोहरे लगे लिआइ अही। ओह पइ एक ठु दुस्ट आतिमा सवारि अहइ, जउन ओका बोलावइ देत नाहीं। 18 जब कबहुँ दुस्ट आतिमा ऍका पकरि लेत ह, उ ऍका फेंकि देत ह अउर ऍकरे मुँहना स झागि निकारइ लगत ह। ओकरे बाद उ दँतवन क पीसत ह अउर उ अकड़ि जात ह। मइँ तोहरे चेलन स कह्यों कि ओका भगावा, मुला उ सबइ करि सकेन नाहीं।”
19 तबहिं ईसू जवाबे मँ ओनसे कहेस, “अरे! बिसवास न करइवाले मनइयो! कब तलक मइँ तोहरे लगे रइहउँ? कब ताई तोहरे लगे सहब? लरिकवा क मोरे लगे लिआवा।”
20 फिन उ सबइ लरिकवा क ओकरे लगे लेवाइ लिआएन। जबहिं दुस्ट आतिमा ईसू क देखेस। फउरन उ लोरिकवा क अइँठ दिहस। लरिकवा भुइँया प गिरि गवा अउर मुँहे स झाग निकारत चारिहुँ ओर लोटइ पोटइ लाग।
21 तब्बइ ईसू लरिका क बाप स पूछेस, “इ अइसा कब स लरिकवा क होत अहइ?”
तब बाप कहेस, “अइसा बचपन स होत आवत अहइ। 22 दुस्ट आतिमा ऍका कइउ दाई आगी मँ अउर कबहुँ पानी मँ मारइ खातिर नाइ देत ही। लेकिन का तू कछू कइ सकत ह? हम पइ दया करा अउर हमार मदद करा।”
23 ईसू ओसे कहेस, “तू कह्या जदि तू कछू कइ सका? जउन बिसवास करी, ओका बरे सब कछू होइ जाई।”
24 तुरंतहीं लरिका क बाप चिचिआन अउर कहेस, “मइँ जरूर बिसवास करत हउँ। तू हमार अबिसवास हटावा।”
25 जब ईसू देखेस कि भारी भीर ओकरे लगे निचकात अहइ, उ दुस्ट आतिमा क ललकारेस अउर ऍका कहेस, “ओ दुस्ट आतिमा! तू इ बचवा क गूँगा बहिरा करइवाली मइँ तोका हुकुम देत अही। ओसे बाहेर आव, ओहमाँ फिन स घुस जिन।”
26 तब उ दुस्ट आतिमा चिचिआन अउर लरिकवा क झपटिके अँइठेसि अउर ओसे बाहेर गइ। अइसन लगा कि लरिकवा मर गवा अहइ। बहुत स लोग कहेन, “उ मर गवा!” 27 फिन ईसू ओकर हाथ पकरि क उठाएस अउर ओका गोड़वन प खड़ा करेस अउ लरिका खड़ा होइ ग।
28 ओकरे पाछे उ घर मँ गवा अउर ओकर चेलन अकेल्ले मँ पूछेन, “काहे क हम दुस्ट आतिमा क भगाइ नाहीं सकेन?”
29 ऍह पइ ईसू जबाव दिहेस, “इ तरह दुस्ट आतिमा बगैर पराथना क बाहेर नाहीं आवत।”
Awadhi Bible: Easy-to-Read Version. Copyright © 2005 Bible League International.