Revised Common Lectionary (Semicontinuous)

¹ यहोवा क बड़कई करा।
हे यहोवा क सेवको,
    यहोवा क नाउँ क बड़कई करा।
² तू लोग मन्दिर मँ खड़ा अहा।
    यहोवा क नाउँ क बड़कई करा।
तू लोग मन्दिर क आँगन मँ खड़ा ह्वा।
    ओकरे नाउँ क बड़कई करा।
³ यहोवा क बड़कई करा काहेकि उ खरा अहइ।
    ओकरे नाउँ क गुण गावा काहेकि उ आन्नदायक अहइ।

⁴ यहोवा याकूब क चुने रहा।
    इस्राएल परमेस्सर क अहइ।
⁵ मइँ जानत हउँ, यहोवा महान अहइ।
    हमार सुआमी दूसर देवन स महान अहइ।
⁶ यहोवा जउन कछू चाहत ह सरग मँ, अउर धरती पइ,
    समुद्दर मँ या गहिर महासागरन मँ, करत ह।
⁷ यहोवा धरती पइ सब कहूँ बादरन क रचत ह।
    उ बिजुरी अउ बर्खा क रचत ह।
    उ हवा क ओकर जगह स निकारत ह।
⁸ परमेस्सर मिस्र मँ मनइयन अउ गोरुअन क सबहिं पहिलउटी बच्चन क नास कइ दिहस।
⁹ यहोवा मिस्र मँ बहोत स अद्भुत अउर अचरज भरे कामन किहस।
    उ फिरौन अउ ओकरे सब अधिकारियन क खिलाफ अद्भुत बातन क दिखाएस।
¹⁰ परमेस्सर बहोत स देसन क हराएस।
    परमेस्सर बलवान राजा लोगन क मारेस।
¹¹ यहोवा एमोरियन क राजा सीहोन क हराइ दिहस।
    उ बासान क राजा ओग क हराएस।
    उ कनान क सारी राज्जन क हराएस।
¹² यहोवा ओनका ओनकर धरती क अधिकार क रूप मँ दिहेस, उ इस्राएल क स्थाई रूप स लेइ बरे दिहेस।

¹³ हे यहोवा, तू सदा बरे प्रसिद्ध होब्या।
    हे यहोवा, लोग तोहका सदा सर्वदा याद करत रइहीं।
¹⁴ काहेकि यहोवा आपन लोगन बरे निआव लावत ह
    अउर उ आपन सेवकन प तरस खात ह।
¹⁵ दूसर रास्ट्रन क लोग बस सोना अउर चाँदी क देवता बनावत रहेन।
    ओनकर देवता मात्र लोगन क जरिये बनाए भए पुतलन रहेन।
¹⁶ पुतलन क मुँइ अहइँ, पर बोल नाहीं सकतेन।
    पुतलन क आँखी अहइँ, पर लखि नाहीं सकतेन।
¹⁷ पुतलन क कान अहइँ, पर ओनका सुनाई नाहीं देत।
    पुतलन क नाक अहइँ, पर उ पचे साँस नाहीं लेइ सकतेन।
¹⁸ उ सबइ लोग जउन ऍन पुतलन क बनाएन, ओन पुतलन क समान होइ जइहीं।
    काहेकि उ सबइ लोग ओन पइ बिस्सास किहेन ह।

¹⁹ इस्राएल क संतानन, यहोवा क बड़कई करा।
    हारून क संतानन, यहोवा क बड़कई करा।
²⁰ हे लेवी क संतानन, यहोवा क बड़कई करा।
    तू जउन यहोवा क सम्मान दिहा, यहोवा क बड़कई करा।
²¹ यहोवा यरूसलेम मँ बास करत ह,
    सिय्योन स ओकर स्तुति होइ।

⁴ एह बरे सदा ही यहोवा पइ बिस्सास करा।
    काहेकि “यहोवा याह” ही तोहार हमेसा सर्वदा बरे सरण क ठउर होइ।
⁵ किन्तु अभिमानी नगर क यहोवा निहुराएस ह
    अउर हुवाँ क निवासियन क उ सजा दिहेस ह।
यहोवा उ ऊँच बसी नगरी क धरती पइ गिराएस।
    उ एका धूरि मँ मिलावइ गिराएस ह।
⁶ तब दीन अउ नम्र लोग नगरी क खण्डहरन क आपन गोड़े तले रौंदि देइहीं।

⁷ खरापन खरे लोगन क जिअइ क ढंग अहइ।
    खरे लोग उ राहे पइ चलत हीं जउन सोझ अउ सच्ची होत ह।
परमेस्सर, तू उ राहे क चलइ बरे सुखद
    व सहल बनावत ह।
⁸ किन्तु हे परमेस्सर! हम तोहरे निआव क मारग क बाट जोहत अही।
    हमार मन तोहका अउर तोहरे नाउँ क सुमिरन करइ चाहत ह।
⁹ मोर मत राति भर तोहरे साथ रहइ चाहत ह
    अउर मोरे अन्दर क आतिमा हर नए दिन क सबेरे तोहरे साथ रहइ चाहत ह।
जब धरती पइ तोहार निआउ आइ,
    लोग खरी जिन्नगी जिअइ सीख जइहीं।
¹⁰ जदि तू सिरिफ दुट्ठ पइ दाया देखावत रह्या
    तउ उ कबहुँ भी अच्छे करम करब नाहीं सीखी।
दुट्ठ जन चाहे भले लोगन क बीच मँ रहइ मुला तब उ भी बुरे करम करत रही।
    उ दुट्ठ कबहुँ भी यहोवा क बड़प्पन नाहीं देख पाइ।
¹¹ हे यहोवा तू ओनका सजा देइ क तत्पर अहा
    किन्तु उ पचे एका नाहीं लखतेन।
हे यहोवा तू आपन लोगन पइ आपन असीम पिरेम देखॉवत अहा
    जेका लखिके दुट्ठ जन लज्जित होइ जात हीं।
    तोहार दुस्मन आपन ही पापे क आगी मँ जरिके भसम होइ जइहीं।
¹² हे यहोवा, हमका कामयाबी तोहरे ही कारण मिली ह।
    तउ कृपा कइके हमका सान्ति द्या।