Revised Common Lectionary (Semicontinuous)

¹ यहोवा क धन्यवाद करा, ओकरे नाउँ क पुकारा।
    रास्ट्रन क ओकरे अदभुत कारजन क बारे मँ बतावा।
² यहोवा बरे तू गावा, तू ओकर बड़कई क गीत गावा।
    ओन सबहिं अचरज स भरी बातन कर वर्णन करा जेनका उ करत ह।
³ यहोवा क पवित्तर नाउँ पइ गर्व करा।
    ओ सबहिं लोगो जउन यहोवा क उपासक अहा, तू पचे खुस होइ जा।
⁴ सामरथ पावइ क तू यहोवा क लगे जा।
    सहारा पावइ क तू ओकरे लगे जा।
⁵ ओन अद्भुत बातन क सुमिरा जेनका यहोवा करत ह।
    ओकरे अचरज कर्म अउर ओकर विवेक स भरा फइसला क याद राखा।
⁶ तू परमेस्सर क सेवक इब्राहीम क संतान अहा।
    तू याकूब क संतान अहा, उ मनई जेका परमेस्सर चुने रहा।
⁷ यहोवा ही हमार परमेस्सर अहइ।
    सारे संसार पइ यहोवा क सासन अहइ।
⁸ उ आपन करार क सदा याद रखत ह।
    उ आपन आदेसन क हजार पीढ़ियन तलक याद रखत ह।
⁹ इब्राहीम क संग परमेस्सर करार बाँधे रहा।
    परमेस्सर इसहाक क वचन दिहे रहा।
¹⁰ उ याकूब क आपन करार क कानून क रूप मँ दिहे रहा।
    परमेस्सर इस्राएल क संग करार किहस।
    इ सदा सदा ही बना रही।
¹¹ परमेस्सर कहे रहा, “मइँ कनान क भुइँया क
    तोहका आपन सम्पत्ति क रूप देब।”

⁴² उ आपन पवित्तर वचन सुमिरेस
    जउन उ आपन दास इब्राहीम क संग किहे रहा।
⁴³ परमेस्सर आपन खास क मिस्र स बाहेर निकारि लिआवा।
    लोग खुसी क गीत गावत भए अउर खुसियन मनावत भए बाहेर आइ गएन।
⁴⁴ फिन परमेस्सर निज भगतन क उ देस दिहस जहाँ अउर लोग रहत रहेन।
    परमेस्सर क भगतन उ सबइ चिजियन क पाइ लिहन जेनके बरे अउर लोग मेहनत किहे रहेन।
⁴⁵ परमेस्सर अइसा एह बरे किहस ताकि लोग ओकर व्यवस्था मानइँ।
    परमेस्सर अइसा एह बरे किहस ताकि उ पचे ओकरी सिच्छा पइ चलइँ।

यहोवा क गुण गावा।

¹² यहोवा कहत ह,
“इस्राएल अउर यहूदा क तू लोगन क एक घाव अहइ जउन नीक नाहीं कीन्ह जाइ सकत।
    तोहका एक चोट अहइ जउन नीक नाहीं होइ सकत।
¹³ तोहरे घावत क ठीक करइवाला कउनो मनई नाहीं अहइ।
    एह बरे तू तन्दुरूस्त नाहीं होइ सकत्या।
¹⁴ तू अनेक रास्ट्रन क मीत बना अहा,
    किन्तु उ पचे रास्ट्र तोहार परवाह नाहीं करतेन।
    तोहार ‘मीत’ तोहका बिसरि गवा अहइँ।
मइँ तोहका दुस्मन जइसी चोट पहोंचाएउँ।
    मइँ तोहका कठोर सजा दिहेउँ।
    मइँ इ तोहरे बड़के अपराध बरे किहेउँ।
¹⁵ इस्राएल अउर यहूदा तू आपन घाव क बरे मँ काहे चिल्लात अहा?
    तोहार घाव कस्ट देइवाला अहइ अउर एकर कउनो उपचार नाहीं अहइ।
मइँ, यहोवा तोहार बड़के अपराधन क कारण तोहका इ सबइ किहेउँ।
    मइँ इ सबइ कछू तोहार अनेक पापन क कारण किहेउँ।
¹⁶ ओन रास्ट्र तोहका नस्ट किहन।
    किन्तु अब उ सबइ नस्ट कीन्ह जइहीं।
    इस्राएल अउर यहूदा तोहार सत्रु बन्दी होइहीं।
ओन लोग तोहार चिजियन चोराएन।
    किन्तु दूसर लोग ओनकर चिजियन चुराइहीं।
ओन लोग तोहार चिजियन जुद्ध मँ लिहेन।
    किन्तु दूसर लोग ओनसे चिजियन जुद्ध मँ लेइहीं।
¹⁷ मइँ तोहरी तन्दुरूस्ती क लउटाउब अउर मइँ तोहरे घावन क भरब।”
    इ सँदेसा यहोवा क अहइ।
“काहेकि दूसर लोग कहेन कि तू जाति-बहिस्कृत अहा।
    ओन लोग कहेन, ‘कउनो भी सिय्योन क परवाह नाहीं करत।’”
¹⁸ यहोवा कहत ह:
“याकूब क लोग अब बन्दी अहइँ।
    किन्तु उ पचे वापस अइहीं।
    अउर मइँ याकूब क परिवारन पइ दाया करब।
सहर अब बर्बाद इमारतन स ढका एक पहाड़ी सिरिफ अहइ।
    किन्तु इ नगर फुन बनी
    अउर राजा क महल भी हुआँ फुन बनी जहाँ एका होइ चाही।
¹⁹ ओन ठउरन पइ लोग स्तुतिगान करिहीं।
    हुआँ हँसी ठठा भी सुनाइ पड़ी।
मइँ ओनका बहोत सी सन्तानन देब।
    इस्राएल अउ यहूदा नान्ह नाहीं रहिहीं।
मइँ ओनका सम्मान देब।
    कउनो मनई ओनकर अनादर नाहीं करी।
²⁰ याकूब क परिवार प्राचीनकाल क परिवारन सा होइ।
    मइँ इस्राएल अउर यहूदा क लोगन क सक्तिसाली
    बनाउब अउर मइँ ओन लोगन क सजा देब जउन ओन पइ चोट करिहीं।
²¹ ओनहीं मँ स एक ओनकर अगुवा होइ।
उ सासक मोरे लोगन मँ स होइ।
    उ मोरे निचके तबइ आइ
जब मइँ ओनसे अइसा करइ क कहब।
    एह बरे मइँ अगुवा क आपन लगे बोलाउब
    अउर उ मोरे निअरे होइ।
²² तू पचे मोर लोग होब्या
    अउर मइँ तोहार पचन्क परमेस्सर होब।”