Revised Common Lectionary (Semicontinuous)

¹² मुला हे यहोवा, तू तउ सदा ही अमर रहब्या।
    तोहार नाउँ सदा अउ सदा ही बना रही।
¹³ तोहार उत्थान होइ अउ तू सिय्योन क चइन देब्या।
    उ समइ आवत अहइ, जब तू सिय्योन पइ कृपालु होब्या।
¹⁴ तोहार सेवकन सिय्योन क पाथरन स पिरेम करत हीं।
    उ पचे ओकरे धूरि स भी पिरेम करत हीं।
¹⁵ रास्ट्रन यहोवा क नाउँ क आराधना करिहीं।
    हे यहोवा, धरती क सबहिं राजा तोहार आदर करिहीं।
¹⁶ जब यहोवा फुन स सिय्योन क बनाई।
    तउ उ आपन पूरी महिमा मँ परगट होइ।
¹⁷ जउन लोगन जिअत अहइ, उ ओनकर पराथना सुनीहीं।
    उ ओनकर पराथनन क नज़र अंदाज़ नाहीं करी।
¹⁸ ओन बातन क लिखा ताकि भविस्स क पीढ़ी पढ़इ।
    ताकि जउन लोग अवइ वाला समइ मँ पइदा होइहीं यहोवा क स्तुति करिहीं।
¹⁹ यहोवा आपन ऊँच पवित्तर ठउर स खाले निहारी
    यहोवा सरण स खाले धरती पइ निहारी।
²⁰ उ कैदी लोगन क पराथना सुनी।
    उ ओन मनइयन क मुक्त करी जेनका राजा स मउत दीन्ह गइ रही।
²¹ फुन सिय्योन मँ लोग यहोवा क बखान करिहीं।
    यरूसलेम मँ लोग यहोवा क गुण गइहीं।
²² अइसा तब होइ जब यहोवा लोगन क फिन बटोरी,
    अइसा तब होइ जब राज्ज यहोवा क सेवा करिहीं।

² “मोरे पीरा अउ दुःख क
    तराजु मँ तउलइ दया।
³ मोर व्यथा समुद्दर क समूची रेत स भी जियादा भारी होइ।
    एह बरे मइँ गँवार जइसा बात किहेउँ ह।
⁴ सर्वसक्तीमान परमेस्सर क बाण मोह माँ घुसा अहइँ
    अउर मोर प्राण ओन बाणन क विख क पिअत रहत ह।
परमेस्सर क उ सबइ भयानक सस्त्र मोरे खिलाफ एक संग रखा भवा अहइँ।
⁵ तोहार सब्दन कहइ बरे सहज अहइ जब कछू भी बुरा नाहीं भएन ह।
    हिआँ तलक कि जंगली गदहा भी नाहीं रेकंत अगर ओकरे लगे खाइ क रहइ।
    इहइ तरह कउनो भी गइया तब तलक नाहीं रँभात जब तलक ओकरे लगे चइर क चारा अहइ।
⁶ बे नमक क भोजन बिना स्वाद क होत ह।
    अउर अण्डा क सफेदी मँ भी स्वाद नाहीं होत ह।
⁷ मोरे बरे तोहार सब्द ठीक उहइ तरह अहइ।
    इ भोजन क छुअइ स मइँ इन्कार करत हउँ।
    इ तरह क भोजन मोका सड़ा भवा लागत ह।