Revised Common Lectionary (Semicontinuous)

¹³ Wan neka tejemet nusan te timuketzat tinat panpadiush ika kwak antakakket ne palabraj wan ankikwijket tutech, ne Teut kiajkaw ma shikwikan te se tay inaket takamet sute, ken yaja tejkia, ipalabraj Teut ká nusan tekiti ijtik anmejemet ká tayulmatit. ¹⁴ Anmejemet, nukniwan, muchijket ken ne sejsennemit ipal ne Teut ne nemit tik Yudaya ipal ne Mawaltijtuk Yeshu; ika nusan anmejemet tajselijtiwit itech ne chanejket ipal ne anmutal kenha ken yejemetsan itech ne Yudayujmet, ¹⁵ ká ne kimiktijket Yeshu wan ne taketzanimet wan nusan kichijket ka titajselijket; yejemet te kipaktiat nian ne Teut nian muchi takamet; ¹⁶ te techajkawket tiknutzat ne tejtechan pal mupalewiat, pal kiane ma temikan iwan intajtateyekchijtuk senpa. Tamik ajsi inhijpak ne kwalan!

¹⁷ Tejemet, nukniwan, techwikatiwit achi wejka; melka tea annemit tik tutachialis, ijtik tuyulu ijkia. Sea timutatemuilijtiwit pal tiajsit timetzinhitat ika tikelewiat. ¹⁸ Neka tiknektuskiat tiajsit anmutech, naja nusan, Pawlo; seujseujti nikejekuj wan ne Tenewani kichijki ka nishtunak, ¹⁹ ika tay ne tutejchialis? Wan tupajpakilis? Wan tuyawal pal timuweymatit? Sute anmejemet, iishpan ne tutajtzin Yeshu kwak ajsi witz, ²⁰ ika anmejemetsan ne tutzitzinakalis wan tupakilis.