Revised Common Lectionary (Semicontinuous)
Ne siwat pal Kanaan
21 Wan Yeshu yajki ka senkak wan ajsik ne tajtal pal Tzor wan Tzidon, 22 wan né nemik se siwat pal Kanaan nepa chanej, wan tzajtzik walaj wan inak:
—Shinechpalewi, Tajtzin, itelpuch Dawid! Nusiwakunew kukuya iwan se nawal.
23 Yaja tesu nankilij tatka, wan ne mumachtianimet ajsiket kitajtanit, inat:
—Shikilwi ma yawi, ka tzajtzi witz tuipan.
24 Yaja inak:
—Sema nechtitanijket itech ne ichkamet pulijtiwit pal Israel.
25 Ne siwat walmutankwaketza, wan ina:
—Tajtzin, shinechpalewi!
26 Yaja inak:
—Inte yek ma tikwikan ne intamal ne kukunet pal tiktamutiliat ne pejpelutzitzinmet.
27 Ne siwat inak:
—Kiane Tajtzin; melka uni, ne pejpelutzitzinmet kikwat ne mumushu ne wetzi talchi kan mutaliat takwat intekuyu!
28 Kwakuni Yeshu kilwij:
—Siwat, wey ne mutayulmatilis! Muchijtuk tay tikneki.
Wan mupajtij ne isiwapiltzin.
Yeshu kitakwaltia se miaktal
29 Wan Yeshu kiski wan walmukwepki ne weyat pal Galilaya. Wan tejkuk pak se tapetat wan mutalij ikuni. 30 Wan ajsiket miak kalinwikat metzkelumet, pupuyumet, makutumet, sejse te welit taketzat, wan sejseuk; wan kintalijket itech ijikshi wan yaja kinpajtij. 31 Muchi ishpuyawiket kwak kitaket taketzat ká ne te welit katka taketzat, yejyek ne majmakutu wan nejnemit ne mejmetzkelu wan tachiat ne pujpupuyumet. Wan inaket ka wey ne Teut pal Israel.
Ne Bibliaj Tik Nawat · © 2008, 2012 Jan Morrow