Revised Common Lectionary (Semicontinuous)
7 Kenha ken tik muchi antepewit: tik tayulmatilis wan taketzalis wan taishmatilis wan muchi taelewilis, wan tik ne anmutetasujtalis ne kistuk tutech, ma shitepewikan tik uni nusan; 8 tesu nina ken tatuktilis sute ma nikejeku ne anmutetasujtalis yekkaya ken sejseuk kitamachiwat.
9 Ankishmatit ne itetasujtalis ne tutajtzin Yeshu Mawaltijtuk wan ken ka anmumaku muchijki se te kipia, kwak yaja kipiatuya, pal anmejemet kipiat wey ika yajane te kipia. 10 Tik ini nimetzinhilwia tay nikmati, ika yek anmupal: ika anmejemet te sema ashan pejtiwit kichiwat, ne shiwit panutuk nusan anpejket kinekit kichiwat ijkiuni. 11 Ashan tel shitamikan ankichiwat, pal kiane ken ankinektiwit nusan anyawit kitamiat iwan tay ne ankipiat, 12 ika su ne taelewilis nemi, mukwi yek wey o chiupi ken tay ne kipia se, tesu ken tay ne te kipia se; 13 ika tesu nemi pal tiktakuliat ne sejseuk ma yejemet kipiakan wan ma anmejemet shimupitzinikan, sute pal muchi nemit kenhat. 14 Tay ne ashan anmupal tepewi, ma nemi pal ne tay yejemet munekit, pal kiane su se tunal tepewi inpal ma nemi pal ne tay anmejemet munekit, pal annakat kenhat, 15 ken muijkwilujtuk:
"Ipal ká ne kianki wey inte tepewik, wan ipal ká ne chiupi inte munekik."
Ne isiwapil Yair wan se siwat eskisa
21 Wan kwak ne Yeshu mukwepki sentapal ne at tik ne barcoj, kinamikket miak ká musentepewtiwit kan yaja nemituya iten ne at. 22 Wan witz se ne tatuktianimet pal ne Sennemit, itukay Yair, wan kwak kitak mutamutak itech ne ijikshi 23 wan sujsul mutajtawelia, ina:
—Ne nusiwapiltzin yawi miki. Shiwi shiktali ijpak ne mujmumey pal mupajtia, pal te miki!
24 Wan yajki iwan, wan miak kimalachujket yajket ka iipan. 25 Wan se siwat kipiatuya majtakti-ume shiwit ka eskisa 26 wan miak tapajtiani kishijshikujtuyat, kitzunpulujtuk muchi itumin wan te kipalewket, mas yek kichiwket ka yaja mas kukuya. 27 Wan yaja takaktuk ká yaja wan tzinkiski iteputzta ne Yeshu wan kimatukak ne ikwajkwach, 28 ika inak tik iyulu, "Su niweli nikmatuka ne ikwajkwach, niaw niyektia". 29 Wan nemanha muketzki ne iesyu, tea eskiski wan ne siwat kimatki tik iweyka ka mupajtij ne ikukulisyu. 30 Wan Yeshu nemanha mumatki kisa ne itajpal itech iweyka, wan muishkwepki tachia wan ina:
—Ká kimatukak ne nukwajkwach?
31 Wan ne mumachtianimet kilwiat:
—Tikita keski nemit metzmalachuat, wan kenhayuk titajtani "Ká nechmatukak?"
32 Wan yaja nakak tachia wan kitak ká ne kichiwki, 33 wan ne siwat pejki ijtzilika iwan mawi ika kimati tay kichiwtuk, wan yajki mutamuta talchi iishpan, wan kilwij ne tejkia. 34 Yeshu kilwij:
—Siwat, ne mutayulmatilis metzpalewtuk. Shiawa wan shinemi yek! Tamik ne mukukulisyu.
35 Kwak taketzayuk, ajsit sejse pal ichan ne tatuktiani ipal ne sennemit, wan inat:
—Ne musiwakunew mikik. Taika tiaw tikakasua ne tamachtiani?
36 Ne Yeshu te kinchiwilij casoj wan kilwij ne sennemituktiani:
—Maka shimajmawi, sema shitayulmati.
37 Wan te kiajkaw ma wiki iwan aka, semaya Pedro, Yakob wan Yojan ne iikaw Yakob, 38 wan ajsit ichan ne sennemituktiani wan kita wey kumunilis wan muchi chukat wan mutajtaweliat, 39 wan yaja kalaki wan kinhilwia:
—Ken ka anmukumuntiat wan anchukat? Te mikik ini chikitik, semaya kuchi.
40 Yejemet ajkawetzkat, wan yaja kinhishtij muchi. Kalkwij ne iteku wan ne inan ne kunet wan ne senyawit iwan yajasan, wan panu kalijtik kan nemituya ne kunet, 41 wan kipachuj ne imey ne kunet wan kilwia:
—Talita, kum!
Kineki ina: Siwapiltzin, shimuketza! 42 Wan muketzki ne siwapiltzin nemanha wan pejki nejnemi, ika kipiaya majtakti-ume shiwit; wan tetekia sea ishpuyawket. 43 Wan kintuktij ka te aka nemi pal kimati ini; wan kinhilwij ma kimakakan takwal ne siwapil.
Ne Bibliaj Tik Nawat · © 2008, 2012 Jan Morrow