Revised Common Lectionary (Semicontinuous)
13 Tikpiat ini tayulmatilis ken ne tay mujkwilujtuk:
"Nitayulmatki, neka nitanutzki."
Tejemet nusan titayulmatit; neka titanutzat. 14 Tikmatit ka ne ká kiyulkwepki ne tajtzin Yeshu nusan yawi techyulkwepa iwan Yeshu, wan techtalis anmuwan. 15 Ika muchi ka anmumaku, pal kiane yawi tepewi ne tetasujtalis ika miak inat panpadiush pal inat ka wey ne Teut.
16 Neka te tikutiat, ika melka kwalu ne tuweyka, ne ká tikpiat kalijtik yankwikisa mujmusta; 17 ika ini tukimil ajkatik ne ashan tikpiat nemi pal ma tikpiakan se tukimil sujsul etek ipal wey tzitzinakalis ne yawi naka pal senpa; 18 ika te titachiat pal tikitat tay ne muita sute tay ne te muita; ika tay ne muita panu, tay ne te muita naka pal senpa.
5 Ika tikmatit ka su ini tawipanti tay tikpiat ijpak ne taltikpak mutajkali, ne Teut techmaka se kal ne te tikchijtiwit iwan ne tujtumey, ne welit tikpiat pal senpa tik ne ilwikak,
Yeshu wan Bal-Zebul
20 Wan mukwepki ichan. Wan musentepewa ne miaktal ukseujti, wan nian welit takwat, 21 wan takakket ne ikunpawan wan kisket kalkwit, ika inat ka yaja ishpuyawik.
22 Wan ne tajkwiluanimet ne walajtiwit tik Yerushalem inat katka ka yaja kipia Bal-Zebul, wan ka kikwi ne tatuktiani pal ne nawalmet pal kinhishtia nawalmet. 23 Wan yaja kinnutzki wan kinhilwij cajcasoj, ina:
—Ken weliskia ne Tenewani kishtia ne Tenewani? 24 Asu se techan mutajkutijtuk, te weli naka ejkatuk uni techan! 25 Wan asu se kal mutajkutijtuk, te welis naka ejkatuk uni kal! 26 Wan asu ne Tenewani musuntuk isel wan mutajkutijtuk, te weli naka ejkatuk, wan tami!
27 Te aka weli kalaki tik ne ikal se hombron kitzkia ipalwan, su te kilpia uni hombron achtu, wan kwakuni yawi techteki.
28 Kia nimetzinhilwia ka muchi tay kichiwat wan kukujtaketzat ne ipilawan ne takamet weli mutapupulwia; 29 asu aka kukujtaketza iwan ne Ijiutzin, uni te yawi mutapupulwia wan yawit inat ka tateyekchiwki pal senpa.
30 Ika inat katka ka yaja kipiatuya se nawal teyek.
Ne inan wan ne iikawan Yeshu
31 Wan ajsit ne inan wan ne iikawan, wan yejemet nemituyat tatenpan wan tatuktijket kilwiat. 32 Wan muchi ne miaktal nemituya inawak, wan kilwijket:
—Né tatenpan ne munan wan muikawan wan mueltiwan metztemuat.
33 Wan kinhilwij:
—Ká ne nunan wan ne nuikawan?
34 Wan kinhitak muchi ne muejmuetztuk inakastan wan inak:
—Nikansan nemit ne nunan wan ne nuikawan! 35 Ika ká ne kichiwa tay kineki ne Teut, yajuni nuikaw, wan nueltiw, wan nunan!
Ne Bibliaj Tik Nawat · © 2008, 2012 Jan Morrow