Revised Common Lectionary (Semicontinuous)

Dee 149 Psalm

¹ Preis däm Herr Gott! Sinjt to däm Herr Gott en niehet Leet, sien Preis enn dee Heilje äare Fesaumlunk.

² Lot Iesrael sikj enn Am freihe dee am jemoakt haft; lot dee Zion Säns froo senne enn äa Kjeenijch.

³ Lot an sien Nome Preise enn dän Dauns; lot dän to Am Preis sinje met Hoap en Jittoa.

⁴ Dan dee Herr Gott haft Fejneaje enn sien Folkj; Hee moakt dee Make straum met dee Radunk.

⁵ Lot dee Heilje sikj freihe enn Harlijchkjeit, lot an lud sinje opp äa Bad;

⁶ Un lot Gott siene Ea enn äa Hauls senne, un en Schweat fonn Miele enn äare Haunt,

⁷ Rach to eewe opp dee Nazione, Strof opp dee Felkja;

⁸ äare Kjeenijchs to binje met Kjäde, un äare Odelmensche met iesane Bande;

⁹ opp an daut Jerejcht to brinje daut beschräwe es: dit es ne Ea fa aul siene Heilje. Preis däm Herr Gott!

⁸ Siet kjeenem waut Schuldich, buta eena daem aundra Leef to habe, dan waea leeft haft daut Jesats erfelt.

⁹ Dan dit: "Du saust nich Eehabraeakje; du saust nich morde, du saust nich staele, du saust die nich jeleste lote", en wan doa irjent en aundret Jeboot es, eset aules enn dit ennjeschlote: "Du saust dien Noba soo leef ha aus die selfst".

¹⁰ De Leew deit nusscht Beeset jaejen sien Noba, doaromm es daut Jesats enne Leew erfelt.

¹¹ En wie weete dautet nu aul huach Tiet es daut wie ut onns Schlop oppwakje - dan onnse Radung es nu noda auset wea aus wie tom Gloowe kjeeme.

¹² De Nacht es meist febie, en de Dach es meist hia. Doaromm wel wie nu dan de Woakje de Diestanes auntsied schmiete, en onns bekjleede met daut waut Licht aunjeheat.

¹³ Dan wel wie waundle so auset met Licht stemme wudd, nich enn wilet Laewe oda Suparie, nich enn fleeschelosst en aewedriewe, nich enn Striet oda Aufgonst,

¹⁴ oba bekjleet junt met daem Herr Jesus Christus, en jaeft daut Fleesch nich ne Jelaejenheit de Losst to erfelle.

¹⁵ Nu wan dien Brooda sikj jaeajen die feschuldicht haft, dan go en hool am daut faea tweschen die en am auleen. Wan hee no die horcht, dan hast du dien Brooda jewonne;

¹⁶ Oba wan hee nich no die horcht, dan nem eent oda twee meeha met die, soo daut derch twee oda dree Zeij aules kaun bestaedicht woare.

¹⁷ Oba wan hee nich no daen horcht, dan saj dee Jemeent daut, en wan hee sogoa nich no dee Jemeent horcht, dan lot am soo aus en Heid oda en Takskollakjta to die senne.

¹⁸ Enn Woarheit saj ekj junt, wautemma jie oppe Ead binje, woat em Himel uk jebunge senne, en waut jie oppe Ead loosleese, woat em Himel uk jeleest senne.

¹⁹ Enn Woarheit saj ekj junt wada, wan twee fonn junt opp dise Ead sikj eenich woare em Jebaed no waut to froage, daut woat an fonn mien Foda em Himel jejaeft woare.

²⁰ Dan wua twee oda dree sikj fesaumelt ha enn mien Nome, doa sie ekj mede mank an."