Revised Common Lectionary (Semicontinuous)

38 கர்த்தாவே, நீர் கோபத்திலே என்னைக் கடிந்துகொள்ளாதேயும்.
    என்னை ஒழுங்குபடுத்துகையில் கோபமடையாதேயும்.
² கர்த்தாவே, நீர் என்னைத் துன்புறுத்துகிறீர்.
    உமது அம்புகள் என்னை ஆழமாகத் தாக்கியுள்ளன.
³ நீர் என்னைத் தண்டித்தீர்.
    இப்போது என் உடல் முழுவதும் புண்களாயிருக்கின்றன.
நான் பாவம் செய்ததினால், நீர் என்னைத் தண்டித்தீர்.
    என் எலும்புகள் எல்லாம் வலிக்கின்றன.
⁴ தீய காரியங்களைச் செய்ததினால் நான் குற்ற வாளியானேன்.
    என் தோளில் அக்குற்றங்கள் பாரமாக உள்ளன.
⁵ நான் அறிவில்லாத காரியமொன்றைச் செய்தேன்.
    இப்போது ஆறாத காயங்கள் என்னில் உள்ளன.
⁶ நான் குனிந்து வளைந்தேன்.
    நாள் முழுவதும் நான் வருத்தமடைந்திருக்கிறேன்.
⁷ காய்ச்சலினாலும் வலியினாலும்
    என் உடல் முழுவதும் துன்புறுகிறது.
⁸ நான் பெரிதும் தளர்ந்து போகிறேன்.
    வலியினால் முனகவும், அலறவும் செய்கிறேன்.
⁹ என் ஆண்டவரே, என் அலறலின் சத்தத்தைக் கேட்டீர்.
    என் பெருமூச்சு உமக்கு மறைவாயிருக்கவில்லை.
¹⁰ என் காய்ச்சலினால் என் பெலன் மறைந்தது.
    என் பார்வை பெரிதும் மங்கிப் போயிற்று.
¹¹ என் நோயினிமித்தம் என் நண்பர்களும், அயலகத்தாரும் என்னைச் சந்திப்பதில்லை.
    என் குடும்பத்தாரும் என்னை நெருங்குவதில்லை.
¹² என் பகைவர்கள் என்னைக் குறித்துத் தீய காரியங்களைச் சொல்கிறார்கள்.
    பொய்யையும், வதந்திகளையும் அவர்கள் பரப்புகிறார்கள்.
    என்னைக் குறித்து எப்போதும் பேசுகிறார்கள்.
¹³ நான் கேட்கமுடியாத செவிடனைப் போலானேன்.
    நான் பேசமுடியாத ஊமையைப் போலானேன்.
¹⁴ நான், ஒருவனைக் குறித்தும் பிறர் கூறுபவற்றைக் கேட்க முடியாத மனிதனைப் போலானேன்.
    என் பகைவர்கள் தவறு செய்கிறார்கள் என்பதை நிரூபிக்க என்னால் இயலவில்லை.
¹⁵ கர்த்தாவே எனக்கு ஆதரவளியும்.
    எனது தேவனாகிய ஆண்டவரே, நீர் எனக்காகப் பேச வேண்டும்.
¹⁶ நான் ஏதேனும் பேசினால், என் பகைவர்கள் என்னைப் பார்த்து நகைப்பார்கள்.
    நான் நோயுற்றிருப்பதை அவர்கள் காண்பார்கள்.
    செய்த தவற்றிற்கு நான் தண்டனை அனுபவிப்பதாக அவர்கள் கூறுவார்கள்.
¹⁷ தீயக் காரியங்களைச் செய்த குற்றவாளி நான் என்பதை அறிவேன்.
    என் நோவை என்னால் மறக்க இயலாது.
¹⁸ கர்த்தாவே, நான் செய்த தீயக் காரியங்களைக் குறித்து உம்மிடம் பேசினேன்.
    என் பாவங்களுக்காகக் கவலையடைகிறேன்.
¹⁹ என் பகைவர்கள் உயிரோடும் ஆரோக்கியத்தோடும் இருக்கிறார்கள்.
    அவர்கள் பல பல பொய்களைக் கூறியுள்ளார்கள்.
²⁰ என் பகைவர்கள் எனக்குத் தீயக் காரியங்களைச் செய்தனர்.
    ஆனால் நான் அவர்களுக்கு நல்லவற்றையே செய்தேன்.
    நான் நல்லவற்றை மட்டுமே செய்ய முயன்றேன், ஆனால் அந்த ஜனங்கள் எனக்கெதிராகத் திரும்பினார்கள்.
²¹ கர்த்தாவே, என்னை விட்டு விலகாதேயும்.
    என் தேவனே, என் அருகே தங்கியிரும்.
²² விரைந்து வந்து எனக்கு உதவும்!
    என் தேவனே, என்னை மீட்டருளும்.

5 கர்த்தாவே, எங்களுக்கு என்ன நடந்தது என்று எண்ணிப்பாரும்.
    எங்களது அவமானத்தை நோக்கிப்பாரும்!
² எங்கள் நாடு அந்நியர்களுக்கு உரியதான சொத்தாக மாறிற்று.
    எங்கள் வீடுகள் அயல் நாட்டுக்காரர்களுக்குக் கொடுக்கப்பட்டிருக்கிறது.
³ நாங்கள் அநாதைகளாயிருக்கிறோம்.
    எங்களுக்குத் தந்தை இல்லை.
    எங்கள் தாய்மார்கள் விதவைகளைப்போன்று ஆனார்கள்.
⁴ நாங்கள் குடிக்கிற தண்ணீரையும் விலைக்கு வாங்க வேண்டியதிருக்கிறது.
    நாங்கள் பயன்படுத்துகிற விறகுக்கும் விலை கொடுக்க வேண்டியதிருக்கிறது.
⁵ எங்கள் கழுத்துகளில் நுகத்தைப் பூட்டிக்கொள்ள வற்புறுத்தப்படுகிறோம்.
    நாங்கள் களைத்துப்போகிறோம். எங்களுக்கு ஓய்வில்லை.
⁶ நாங்கள் எகிப்தோடு ஒரு ஒப்பந்தம் செய்திருக்கிறோம்.
    நாங்கள் போதுமான அப்பங்களைப் பெற அசீரியாவோடு ஒப்பந்தம் செய்திருக்கிறோம்.
⁷ எங்கள் முற்பிதாக்கள் உமக்கு எதிராகப் பாவம் செய்தனர்.
இப்போது அவர்கள் மரித்துப்போனார்கள்.
    இப்பொழுது நாங்கள் அவர்கள் செய்த பாவத்துக்காகத் துன்பப்படுகிறோம்.
⁸ அடிமைகள் எங்களது ஆள்வோர்களாக ஆகியிருக்கின்றனர்.
    அவர்களிடமிருந்து எவராலும் எங்களைக் காப்பாற்ற முடியவில்லை.
⁹ நாங்கள் உணவைப்பெற வாழ்க்கையில் அபாயத்தை எதிர்கொள்கிறோம்.
    வனாந்திரத்தில் மனிதர்கள் வாள்களோடு நின்றுக்கொண்டிருக்கின்றனர்.
¹⁰ எங்கள் தோல் வறுக்கும் சட்டியைப்போன்று சூடாக உள்ளது.
    எங்களுக்கு பசியினால் அதிகமாய் காய்ச்சல் உள்ளது.
¹¹ பகைவர்கள் சீயோன் பெண்களை கற்பழித்தனர்.
    யூதாவின் நகரங்களில் அவர்கள் பெண்களை கற்பழித்தனர்.
¹² பகைவர்கள் எங்கள் இளவரசர்களை தூக்கிலிட்டனர்.
    எங்கள் மூப்பர்களை அவர்கள் கௌரவிக்கவில்லை.
¹³ பகைவர்கள் எங்கள் இளைஞர்களை
    எந்திர ஆலைகளில் தானியத்தை அரைக்கும்படிச் செய்தனர்.
எங்கள் இளைஞர்கள் மரத்தடிகளின் சுமையால்
    கீழே இடறி விழுந்தார்கள்.
¹⁴ மூப்பர்கள் இனி நகரவாசல்களில் உட்காருவதில்லை.
    இளைஞர்கள் இனி இசை எழுப்புவதில்லை.
¹⁵ எங்கள் இதயத்தில் இனி மகிழ்ச்சியே இல்லை.
    எங்கள் நடனம் மரித்தவர்களுக்கான ஒப்பாரியாக மாறிவிட்டது.
¹⁶ எங்கள் தலையிலிருந்து கிரீடம் கீழே விழுந்துவிட்டது.
    எங்களுக்கு எங்கள் பாவங்களால் நிலைமை மோசமாகிக்கொண்டிருக்கிறது.
¹⁷ இவற்றால் எங்கள் இதயம் நோயுற்றிருக்கிறது.
    எங்கள் கண்களால் தெளிவாகப் பார்க்கமுடியவில்லை.
¹⁸ சீயோன் மலை வெறு நிலமாகிவிட்டது.
    சீயோன் மலையைச் சுற்றி நரிகள் ஓடித் திரிகின்றன.
¹⁹ ஆனால் கர்த்தாவே, நீர் என்றென்றும் ஆளுகிறீர்,
    உமது இராஜ சிங்காசனம் என்றென்றும் நிலைத்து நிற்கும்.
²⁰ கர்த்தாவே, நீர் என்றென்றைக்கும் எங்களை மறந்துவிட்டது போன்று இருக்கின்றீர்.
    எங்களை நெடுங்காலமாக தனியே விட்டுவிட்டதுபோன்று இருக்கின்றீர்.
²¹ கர்த்தாவே, உம்மிடம் மீண்டும் எங்களைக் கொண்டுவாரும்.
    நாங்கள் மகிழ்ச்சியோடு உம்மிடம் திரும்பி வருவோம்.
    எங்கள் வாழ்க்கையை முன்பு இருந்ததுபோன்று ஆக்கும்.
²² நீர் எங்கள் பேரில் கடுங்கோபமாக இருந்தீரே.
    எங்களை நீர் முழுமையாக நிராகரித்துவிட்டீரா?