Revised Common Lectionary (Semicontinuous)

Katanungan tungkol sa Muling Pagkabuhay^(A)

²³ Nang ^(B) araw ding iyon ay lumapit kay Jesus ^(C) ang mga Saduceo. Sa paniniwala nilang walang muling pagkabuhay, ²⁴ sinabi nila, “Guro, sinabi ni Moises, ‘Kung mamatay ang isang lalaking walang anak, dapat pakasalan ng kanyang kapatid na lalaki ang kanyang asawa, at magkaroon ng mga anak para sa kanyang kapatid na lalaki.’ ²⁵ ‘Mayroon sa aming pitong magkakapatid na lalaki. Nag-asawa ang panganay at siya'y namatay. At dahil hindi siya nagkaroon ng anak ay naiwan niya ang kanyang asawa sa kanyang kapatid na lalaki. ²⁶ Ganoon din ang nangyari sa ikalawa at sa ikatlo, hanggang sa ikapito. ²⁷ At pagkamatay nilang lahat, namatay ang babae. ²⁸ Sa muling pagkabuhay, sino kaya sa pito ang magiging asawa ng babae, gayong siya'y naging asawa nilang lahat?” ²⁹ Sumagot si Jesus sa kanila, “Nagkakamali kayo, sapagkat hindi ninyo nauunawaan ang mga Kasulatan, o ang kapangyarihan ng Diyos. ³⁰ Sapagkat sa muling pagkabuhay, ang mga tao ay hindi na mag-aasawa o pag-aasawahin pa kundi sila'y magiging katulad ng mga anghel sa langit. ³¹ At tungkol sa muling pagkabuhay ng mga patay, hindi pa ba ninyo nababasa ang sinabi sa inyo ng Diyos? Sabi niya, ³² ‘Ako ^(D) ang Diyos ni Abraham, at ang Diyos ni Isaac, at ang Diyos ni Jacob.’ Siya ay hindi Diyos ng mga patay, kundi ng mga buháy.” ³³ Nang marinig ito ng maraming tao, sila'y namangha sa kanyang itinuturo.