Revised Common Lectionary (Complementary)

⁵⁹ Nak yo̱queb chixcutbal chi pec, laj Esteban yo̱ chi tijoc ut quixye: ―At Ka̱cuaˈ Jesús, cˈul lin musikˈ.― ⁶⁰ Quixcuikˈib rib, quixjap re chi cau ut quixye: ―At Ka̱cuaˈ, ma̱qˈue li ma̱c aˈin saˈ xbe̱neb.― Ut nak quixye aˈan, quicam.

Laj Saulo xicˈ narileb laj pa̱banel

8  Laj Saulo quixcˈul xchˈo̱l nak queˈxcamsi laj Esteban. Chalen saˈ li cutan aˈan queˈoc xrahobtesinquileb chixjunileb laj pa̱banel aran Jerusalén ut cˈajoˈ li raylal queˈxcˈul. Ut chixjunileb quilajeˈxjeqˈui rib saˈ eb li naˈajej Judea ut Samaria. Caˈaj chic eb li apóstol queˈcana Jerusalén. ² Cuib oxib laj pa̱banel queˈmukuc re laj Esteban ut cˈajoˈ nak queˈrahoˈ xchˈo̱leb xban lix camic. ³ Aban laj Saulo yalyo xkˈe chixrahobtesinquileb laj pa̱banel. Na‑oc saˈ eb li cab ut narisiheb saˈ rochocheb ut naxcˈameb saˈ tzˈalam, joˈ cui̱nk joˈ ixk. ⁴ Ut chixjunileb li queˈxjeqˈui ribeb saˈ jalan naˈajej yo̱queb chixyebal resil li evangelio yalak bar.

Laj Felipe yo̱ chixyebal resil aran Samaria nak li Jesús, aˈan li Cristo

⁵ Laj Felipe co̱ saˈ li tenamit Samaria ut qui‑oc chixchˈolobanquil resil chiruheb li tenamit nak li Cristo, aˈan laj Colonel li yechiˈinbil xban li Dios. ⁶ Ut chixjunileb queˈxqˈue xchˈo̱l chirabinquil li a̱tin li quixye laj Felipe xbaneb li milagro quilajxba̱nu. ⁷ Nabaleb li cuan ma̱us aj musikˈej riqˈuineb queˈqˈuirtesi̱c. Japjo̱queb re li ma̱us aj musikˈej nak nequeˈel riqˈuineb. Ut nabaleb li ye̱k rokeb ut li sic rok rukˈeb quilajeˈqˈuirtesi̱c. ⁸ Ut cˈajoˈ nak queˈsahoˈ saˈ xchˈo̱leb saˈ li tenamit aˈan.