Revised Common Lectionary (Complementary)

Dee 122 Psalm

En leet fonn nehejcht gone.

¹ Ekj freid mie aus see to mie säde: "Well wie no däm Herr Gott sien Hus gone."

² Onnse Feet selle enn diene Paute stone, O Jerusalem.

³ Jerusalem es ne Staut dee soo jebuet es daut dee toop paust ;

⁴ Wua dee Jeschlajchte han gone, däm Herr Gott siene Jeschlajchte; fa daut Iesrael Zeijchnis; Dank to jäwe to däm Herr Gott sien Nome.

⁵ Dan dee Jerejcht Troone sent doa bestädijcht, Doft sien Hus siene Troone.

⁶ Doot bäde fa Fräd fa Jerusalem; dee die Leef habe selle Woolhabent senne.

⁷ Mucht Fräd enn diene Wenj senne, Woolhabent enn diene Torme.

⁸ Omm miene Breeda un Komrode äare haulwe woa ekj nu sjae: Fräd met junt,

⁹ Ekj woa dien Goots seakje wäajen däm Herr Gott, onns Gott, sien Hus.

11 Nu, de Gloowe es ne Werklichkjeit fonn daut waut maun hopt, en Bewiess fonn daut waut nich to seene es.

² Dan derch dit kjreaje dee to oole Tiede aea Zeichness.

³ Derchem Gloowe festo wie daut Welte derch Gott sien Wuat toojerecht worde, so daut waut nu to seene es, nich fonn daut haeajekome es daut rom onns to seene es.

⁴ Derchem Gloowe oppfad Abel en baetret Opfa aus Kain, derch woont he Zeichness kjreach daut hee jeracht wea, enndaem daut Gott Zeichness jeef waeajen siene Gow, en doaderch raet hee noch, wan hee uk Doot es.

⁵ Derchem Gloowe wort Heenoch wajch jenome daut hee daen Doot nich sach, en wea nich to finje wiel Gott am wajch jenome haud. Dan eeha hee wajch jenome wort, haud hee Zeichness jekjraeaje daut Gott en Jefaule haud aun am.

⁶ Oba oone Gloowe eset ommaeajlich Gott to jefaule: dan waea sikj no Gott nodat, mott jleewe daut Gott es, en daut hee daen beloont dee am ut seakje.

⁷ Derchem Gloowe, aus Gott am woarnd fonn soont waut noch nich to seene wea, wiel hee From wea, bud Nooha en Schep siene Famielje to rade, en doaderch fadaumd hee de Welt, en oawd dee Jerachtichkjet dee derchem Gloowe kjemt.