Revised Common Lectionary (Complementary)

¹² Oba du, O Herr Gott, woascht enn Eewichkjeit duare, un dien Behoole fonn eene Jennerazion no de näakjste Jennerazion.

¹³ Du woascht opstone; ha Erboarme fa Zion; fa dee Tiet Metleet to habe fa ar, jo, de Tiet aunjeteakjent es jekome.

¹⁴ Dan diene Deena näme Fejneaje enn dee Steena, en ha Metleet enn äa Stoff.

¹⁵ Soo selle Natsjoone däm Herr Gott sien Nome ferchte, un aul dee Kjeenije oppe Ead diene Harlichkjeit.

¹⁶ Wan dee Herr Gott Zion oppbuhe woat, dan saul siene Harlichkjeit ferendach kome.

¹⁷ Hee woat sikj dreihe no daut Jebäd fonn dee Felotne, un woat äa Jebäd nich feachte.

¹⁸ Dit saul jeschräwe woare fa dee näakjste Jennerazion; un Felkja dee noch selle jemoakt woare selle däm Herr Gott preise.

¹⁹ Dan Hee haft rauf jekjikjt fonn daut Huaget fonn siene Wonstäd; dee Herr Gott kjikjt rauf fonn dän Himmel no de Ead;

²⁰ omm dee Jefangne äa Stäne to heare, dee Doodes Kjinja frie to moake;

²¹ däm Herr Gott sien Nome bekaunt to moake enn Zion, un sien Preis enn Jerusalem;

²² wan daut Folkj enn dee Kjennichrikje sikj toop fesaumelt habe däm Herr Gott aun to bäde.

²³ Hee neem miene Krauft wajch enn dän Wajch; hee muak miene Doag kjarta.

²⁴ Ekj säd: "O mien Gott, nemm mie nich wajch enn haulf fonn miene Doag; diene Joare sent derjch eene Jennerazion derch dee näakjste Jennerazion.

²⁵ Du hast fonn jee häa dee Ead Grunt jelajcht; un dee Himmels sent daut Woakj fonn diene Henj.

²⁶ Dee selle feschwinje, oba du woascht bliewe; Jo, dee woare aula soo senne aus en Aunzuch, du woascht dän soo endre aus Kjleeda, un dee selle jeendat woare.

²⁷ Oba du best Dee, un diene Joare selle nich jeendat woare.

²⁸ Diene Deena äare Säns selle wone; un äa Some saul fer die bestädicht woare.

⁷ Jesus en siene Jinja feleete, en jinje nom See; oba en groot schoof Mensche fonn Galilaea jinje am hinjaraun, uk fonn Judaea,

⁸ en fonn Jerusalem, en fonn Idumaea, en fonn jant sied daen Jordan, uk fonn Tierus en Siedoon; fael Mensche, dee jeheat haude waut hee jedone haud, en see kjeeme no am.

⁹ En hee saed to siene Jinja daut see sulle en Boot reed ha fa am wiel doa soo fael Mensche weare, daut dee am nich drenge wudde,

¹⁰ dan he haud fael jeheelt, en dee, dee krank weare folle opp am daut hee an aunreare sull.

¹¹ En dee onnreine Jeista folle fer am han wan see am sage, en schreaje: "Du best Gott sien Saen!"

¹² Oba hee raed an strenj aun daut see am nich sulle bekaunt moake.