Revised Common Lectionary (Complementary)

Dee 81 Psalm

To dän Haupt Musikaunt opp Gittit. Von Asaf.

¹ Sinjt äawalud to Gott onnse Macht; moakt en frooet Jelud to Joakopp sien Gott.

² Brinjt en Leet, un jäft dän Timbrel häa, dee scheene Jittoa met de Hoap.

³ Blost dee Trompeet enn dän niehe Mon, bie dee folle Mon opp dän eansta Fast Dach.

⁴ Dan dit wea en Aunkommendeare fa Iesrael, en Jesats von Joakopp sien Gott.

⁵ Dit deed Hee jrinde enn Joosef aus en Zeijchnes, aus Hee rut jinkj äwa daut Iejipte Launt; ekj head ne Sproak dee ekj nich festunt.

⁶ Ekj naum dee Laust fonn siene Schulre wajch; siene Henj weare fonn dän Korf jeleest.

⁷ Du deetst mie enn dien Trubbel aunroope, un ekj deed die rade; Ekj deed die auntwuate enn dee jeheeme Städ fonn dän Rummel; ekj deed die utproowe enn dee Meriba Wotasch. Selah.

⁸ O mien Folkj, horjcht, un ekj woa to junt Zeije: O Iesrael, wan jie no mie horjche woare;

⁹ doa saul kjeen Framda Gott mank junt senne; un jie sele uk nijch en framde Gott aunbäde.

¹⁰ Ekj sie dee Herr Gott jun Gott, dee junt ut Iejipte rut brocht; moakt jun Mul groot op, un ekj woa daut felle.

⁵ Dan wie praedje nich onns selfst, oba Jesus Christus aus Herr, en daut wie june siene Sklowe sent omm Jesus sien haulwe.

⁶ Dan Gott, dee daut Licht ut Diestaness foddad, haft dee Erkjantnes fonn Gott siene Harlichkjeit enn onnse Hoate enenn jeschient enn Christus.

⁷ En wie ha dis Schats en irdische Jefaesa, daut dee butajeweenlije Krauft fonn Gott mucht senne, en nich fonn onns selfst.

⁸ Enn aule Waeaj sent wie bedrenjt, oba nich beschrenkjt; enn Schwearichkjeite, oba jaewe nich opp;

⁹ woare fefoljcht, oba nich felote; dol jeschmaete, oba sent nich fenicht;

¹⁰ droage emma enn onns Kjarpa daem Herr Jesus sien stoawe, soo daut Jesus sien Laewe mucht enn onns Kjarpa jeoppenboat woare.

¹¹ Dan wie, dee wie laewe, sent emma daem Doot aewajaeft omm Jesus sien haulwe, soo daut Jesus sien Laewe kaun enn onns stoawlija Lief jeoppenboat woare.

¹² Aulsoo deit dee Doot enn onns wirkje, oba Laewe enn junt.

²³ Nu pasead daut aun en Saubat daut hee derch en Kornflekj jinkj, en siene Jinja funge aun dee Oare to plekje.

²⁴ En dee Farisaea saede to am: "Kjikj! wuaromm doone diene Jinja aum Saubat waut nich erlaubt es?"

²⁵ Hee saed to an: "Ha jie niemols jelaest waut Doft deed aus hee Mangel haud, en am hungad?

²⁶ woo hee enn daut Gotteshus ennen jinkj aus Abiatar Huagapriesta wea, en see daut Broot aute daut Gott jeweit wea, daut nich erlaubt wea fa irjent waem to aete buta dee Priesta, en jeef daen uk dee met am weare? "

²⁷ En hee saed to an: "Dee Saubat es omm dee Mensche aea haulwe, en nich Mensche omm daen Saubat haulwe;

²⁸ aulsoo es dee Menschesaen uk Herr aewa daen Saubat."

3 Hee jinkj wada enn ne Sienagoog enenn. Doa wea en Maun met ne fedreajde Haunt;

² en see be-oobachte am, en puasste opp tom seene auf hee uk aum Saubat heele wudd, daut see am beschuljde kunne.

³ En hee saed to daem Maun met dee fedreajde Haunt: "Sto opp, en komm hia enne Med."

⁴ En hee saed to an: "Esset erlaubt aum Saubat Goodet to doone, oda Schlajchtet? Laewe rade, oda doot moake?" oba see weare gauns stel.

⁵ Hee kjikjt runt omm enn Oaja, en wea seeha truarich doaewa daut see soone hoade Hoate haude, en saed to daem Maun: "Strakj diene Haunt ut!" Hee strakjt daen ut, en siene Haunt wea gauns jesunnt.

⁶ Platslich jinje dee Farisaea rut en hilde Rot jaeajen am met daen Heroodes siene Deena, woo see am kunne ommbrinje