Revised Common Lectionary (Complementary)

^3 (C)Mukama mukulu, wa kitiibwa, era asaanira okutenderezebwanga ennyo,
    n’obukulu bwe tebwogerekeka.
^4 (D)Buli mulembe gunaatenderanga gunnaagwo ebikolwa byo,
    era gunaatendanga emirimu gyo egy’amaanyi.
^5 (E)Nnaatendanga obukulu n’obulungi bw’ekitiibwa kyo,
    era nnaafumiitirizanga ku bikolwa byo ebyewuunyisa.
^6 (F)Abantu banaatendanga amaanyi g’ebikolwa byo eby’ekitalo,
    nange nnaatendanga obukulu bwo obw’ekitiibwa.
^7 (G)Banaayogeranga ku bulungi bwo obw’ekitalo nga bajaguza;
    era banaayimbanga olw’obutuukirivu bwo.

^8 (H)Mukama wa kisa, ajudde okusaasira,
    alwawo okusunguwala era ajudde okwagala okutaggwaawo.

^3 (A)Engabo z’eggye erikutabadde zonna myufu
    n’engoye ze bambadde nazo bwe zityo.
Amagaali g’ebyuuma gamasamasa
    ku lunaku lwe gategekebwa,
    era n’amafumu gagalulwa mu ngeri ey’entiisa!
^4 (B)Amagaali g’abalwanyi gatayira mu nguudo,
    gadda eno n’eri,
galabika ng’emimuli egyaka,
    gamyansa ng’eggulu.

^5 (C)Omuduumizi bw’ayita abalwanyi be
    bajja bagwirana.
Badduka mbiro ku bbugwe w’ekibuga
    we beetegekera okwerwanako.
^6 (D)Enzigi ez’omugga zigguddwawo,
    amazzi ne gasaanyaawo olubiri.
^7 (E)Etteeka lyayisibwa ku kibuga
    nti kiriwaŋŋangusibwa,
abaddu abakazi bakungubaga ng’amayiba,
    nga bwe beekuba mu bifuba.
⁸ Ab’omu Nineeve bafaanana ng’ekidiba
    eky’amazzi agakalira.
Wadde nga babakoowoola nti, “Muyimirire, muyimirire!”
    bo beeyongerayo bweyongezi.
⁹ Ffeeza yaakyo temugirekaawo,
    ne zaabu nayo mugitwalire ddala,
omunyago teguggwaayo,
    eby’obugagga byakyo ebitabalika ebirungi ddala.
^10 (F)Ekibuga kisigadde kyangaala!
    Abantu bonna emitima gibeewanise, emibiri gibakankana,
    amaviivi gabakubagana, basiiwuuse ne mu maaso.

^11 (G)Eri ludda wa empuku y’empologoma,
    ekifo we ziriisiza empologoma zaazo ento,
empologoma ensajja, n’enkazi,
    n’ento we zaatambuliranga nga tewali kizikanga?
^12 (H)Empologoma ensajja yayigganga ennyama y’abaana ebamala,
    n’enkazi n’ezittira eyaazo,
n’ejjuza empuku n’omuyiggo,
    ne mu bisulo ne mujjula ennyama.

^13 (I)“Laba nze Mukama ow’Eggye
    nkwolekedde,
era ndyokya amagaali go gonna ne ganyooka,
    n’ekitala kirizikiriza empologoma zo ento.
    Era tolifuna munyago mulala nate ku nsi,
n’eddoboozi ly’ababaka bo
    teririddayo kuwulirwa.”