Readings for Lent and Easter

15 Platslich de naeakjste Morje tiedich, fesaumelde dee Huagapriesta en Eltesta en Schreftjeleade daen gaunse Rot, en aus see Jesus jebunje haude, leide see am wajch en brochte am no Pielatus.

² En Pielatus fruach Jesus: "Best du dee Jude aea Kjeenich?" En Jesus auntwuad am en saed: "Du sajchst!"

³ En dee Huagapriesta beschulljde am met fael Dinje.

⁴ Oba Pielatus fruach am wada en saed: "Jefst du kjeene Auntwuat? Kjikj met woo fael dee die beschulldje!"

⁵ Oba Jesus saed nusscht meeha, soo daut Pielatus sikj seeha fewunndad.

⁶ Nu oppem Fast leet hee an jeweenlich een Jefangne loos, waememma see wulle.

⁷ Nu haude see doa eena dee Barabas heet, dee met aundre jefange jenome wea; en haud enn en Opprua Mort begone.

⁸ En daut Follkj kjeem no Pielatus, omm doano to froage daut hee soo doone wudd aus hee jewant wea.

⁹ Oba Pielatus auntwuad an en saed: "Wel jie daut ekj junt daen Judekjeenich loos jaew?"

¹⁰ Dan hee wist daut dee Huagapriesta am haude waeajen Aufgonst aewajaeft.

¹¹ Oba dee Huagapriesta reitste daut Follkj opp daut hee an leewa sull Barabas loos jaewe.

¹² Donn fruach Pielatus an wada, en saed: "Waut saul ekj dan met daem doone daen jie de Judekjeenich nane?"

¹³ See schreaje wada: "Doo am kjrietsje!"

¹⁴ Oba Pielatus saed to an: "Werklich! Waut haft hee beeset jedone?" Oba see schreaje bloos soo fael dolla: "Doo am kjrietsje!"