Readings for Lent and Easter

¹¹ Heroodes en siene Soldote fe-achte am en fespotte am, en trokke am straume Kjleeda aun en schekjte am trig no Pielatus.

¹² Daen selwja Dach worde Heroodes en Pielatus Frind, dan fer daem weare see sikj jaeajenaewa fientlich jewast.

¹³ Don roopt Pielatus dee Huagapriesta en Aelteste fom Follkj toop

¹⁴ en saed to an: "Jie ha dis Maun no mie jebrocht aus eena dee daut Follkj fefeat, en kjikjt! ekj ha enn june jaeajenwoat am unjasocht, en finj enn am nusscht fonn sowaut wuawaeajen jie am fekloage.

¹⁵ Uk nich Heroodes, dan hee haft am trig no onns jeschekjt, en kjikjt; hee haft nusscht jedone daut daen Doot fedeene wudd.

¹⁶ Doaromm woa ekj am strofe, en am looslote."

¹⁷ (Dan hee musst oppem Fast eenem no jewanheit no, looslote.)

¹⁸ Oba see schreaje aule tojlikj en saede: "Wajch met disem, en jef onns Barabas loos!"

¹⁹ Dee wea waeajen Opprua enne Staut, enn waeajen Mort, em Jefenknes jestopt.

²⁰ Oba Pielatus roopt an wada aun wiel hee Jesus jearen looslote wull.

²¹ Oba see schreaje en saede: "Doo am krietsje, doo am krietsje!"

²² Oba hee saed daut dreddemol to an: "Wuaromm? Waut fa beeset haft dis Maun jedone? Ekj finj kjeene Uasoak toom Doot enn am. Ekj woa am strofe en lote am loos."

²³ Oba see bleewe biem lud schriehe en felangde daut hee sull jekrietsicht woare, en aea, en dee Huagapriesta aea Jeschrecht neem aeawahaunt.

²⁴ En Pielatus enschloot sikj daut aea felange sull jedone woare;

²⁵ en hee leet daem loos dee waeajen Opprua en Mort em Jefenknes wea; oba Jesus aeawajeef hee no aea Wele.