Old/New Testament

6 Nu pasead daut aun en Saubat daut hee derch en Jetraeajdflek jinkj, en siene Jinja plocke Oare en rubbelde dee met aere Henj ut en aute.

² En jewesse fonn dee Farisaea saede: "Wuaromm doo jie daut waut nich aum Saubat erlaubt es?"

³ En Jesus auntwuad en saed to an: "Ha jie daut nich jelaest waut Doft deed, aus hee en dee, dee met am weare, hungrich weare?

⁴ Woo see em Gotteshus enenn jinje en aute daut Broot daut Gott jeweit wea, en jeef daen dee met am weare? daut kjeena erlaubt wea to aete buta dee Priesta?"

⁵ En hee saed to an: "De Menschesaen es uk Herr aewa daen Saubat."

⁶ Nu pasead daut aun en aundre Saubat daut hee enn ne Sieagoog enenn jinkj en deed unjarechte; en doa wea en Maun dee haud ne fedreajde Haunt.

⁷ En de Schreftjeleade en Farisaea beoobachte am jeneiw tom seene auf hee aum Saubat wudd heele, daut see ne Uasoak wudde ha am to beschuldje.

⁸ Oba hee wist aera Jedanke en saed to daem Maun met de fedreajde Haunt: "Sto opp en komm hia enne Med." En hee stunnt opp en kjeem.

⁹ En Jesus saed to an: "Ekj froag ju, auf et rajcht es aum Saubat goots to doone, oda beeset? laewe to rade oda fenichte?"

¹⁰ Hee kjikjt an aule aun en saed to daem Maun: "Strakj diene Haunt ut!" En hee deed, en siene Haunt wea jeheelt en wea soo aus dee aundre.

¹¹ Oba see waeare foll Oaja en beraede sikj unjarenaunda waut see Jesus kunne aundoone.

¹² Een Dach jinkj Jesus no en Boajch omm doa to baede, en bleef doa de Nacht aewa emm Jebaed to Gott.

¹³ auset Tsemorjents wea roopt hee siene Jinja no sikj, en waeld Twalf, en nand daen Apostel:

¹⁴ Siemoon daem hee uk Peeta nand; en sien Brooda Aundrees; Joakopp en Jehaun; Filip en Bartolomaeus;

¹⁵ Mattaeus en Toomas; Joakopp, daen Alfaeus sien Saen; en Siemoon dee uk Sielotes jenant wea;

¹⁶ en Judas daen Joakopp sien Saen; en Judas Iesharijot, dee nohaea de Feroda wort.

¹⁷ En hee kjeem rauf met an en stunt opp ne jlikje Staed met en Schoof fonn siene Jinje, en uk en groot deel Mensche fonn gauns Judaea en Jerusalem, en uk fom Eewa Ommjaejent bie Siedoon

¹⁸ dee jekome weare am to heare en jeheelt to woare fonn aeare Krankheite, en dee, dee met onnreine Jeista jeploagt weare, en dee worde aule jeheelt.

¹⁹ En aulamaun fesocht am auntosheare, dan doa jinkj ne Krauft fonn am en heeld aulem.

²⁰ Hee kjikjt siene Jinja aun en saed: "Seelich sent jie Oame, dan junt jeheat Gott sien Rikj.

²¹ Seelich sent jie, dee nu hungre, dan jie woare saut en tofraed senne. Seelich sent jie dee nu hiele, dan jie woare lache.

²² Seelich sent jie wan de Mensche ju hause, en junt festeete, en junt schempe, en jun Nome rut schmiete aus wan et Bees wea, omm daem Menschesaen sien haulwe.

²³ Freit junt aun daen Dach en huppst fa Freid, dan kjikjt! jun Loon es Groot em Himel; dan daut es krakjt daut waut june Fodasch aun dee Profeete deede.

²⁴ Oba wee ju dee jie Rikj sent, wiel jie ha jun Troost!

²⁵ Wee ju dee jie nu foll sent! dan jie woare hungre. Wee ju dee jie nu lache! dan jie woare truere enn jaumreare.

²⁶ Wee ju, wan aulamaun feins fonn ju raet! dan daut es waut june Fodasch to dee Faulsche Profeete deede.