Old/New Testament

13 Aus hee utem Tempel rut jinkj, saed eena fonn siene Jinja to am: "Kjikj, wautfonne groote Steena en Jebieda!"

² En Jesus saed to am: "Sitst du aul dise groote Jebieda? Opp kjeen wajch woat hia een Steen oppem aundra bliewe, daut nich woat doljeschmaete woare."

³ Aus hee oppem Eeljboajch saut jaeajenaewa fomm Tempel, kjeeme Peeta en Jakoobus en Jehaun en Aundrees enn Priewaut no am, en fruage:

⁴ "Saj onns, waneeha woat dit senne, en waut es daut Teakjen wan dit aula paseare woat?"

⁵ En Jesus funk aun to an to saje: "Seet doano daut kjeena junt feleide woat.

⁶ Fael woare enn mien Nome kome, en saje: 'Ekj sie dee,' en woare fael feleide.

⁷ Oba wan jie fonn Kjrich en Kjrichsjeschrecht heare, siet nich oppjeraeacht, dan soont mott paseare, oba daut es noch nich daut Enj.

⁸ Dan Natsjoon woat jaeajen Natsjoon oppstone, en Kjeenichrikj jaeajen Kjeenichrikj. Doa woare Eadbaebe senne opp feschiedenste Staede, en woat Hungaschnoot senne; dit es aules daut Aunfank fonn grootet Noot.

⁹ Oba seet junt faea! Dee woare junt daut Jerecht aewajaewe, en enne Sienagooge woare see junt feheiwe, en jie woare fer Harscha en Kjeenije stone motta omm mienet haulwe, aus en Zeichnes fa an.

¹⁰ Oba dit Evanjeelium mott eascht enn aule Natsjoona jepraedicht woare.

¹¹ En wan see junt wajch leide, en ferem Jerecht naeme, doot nich ferhaea sorje aewa waut jie saje sele, oba sajcht daut waut junt enn dee Stunnd jejaeft woat; dan jie raede nich selfst, oba dee Heilje Jeist woat.

¹² Een Brooda woat sien Brooda tom Doot ferode, en de Foda sien Kjint, en Kjinja woare jaeajen de Elre oppstone en daen doot moake;

¹³ en jie woare fonn aulamaun jehaust woare omm mien Nome haulwe; oba waea uthelt bottem Enj, woat Seelich woare.

¹⁴ Oba wan jie daut Aekjel fonn Fedoawness stone seene wua daut nich sull senne - waea last, lot am festone - dan lot dee enn Judaea no dee Boaj rane,

¹⁵ en waea oppem Husdak es, lot am nich rauf kome en em Hus enenn gone irjentwaut rut to hole.

¹⁶ En waea oppe Stap es, lot am nich trig gone no waut hee hinjalote haft omm siene Kjleeda to hole.

¹⁷ En wee dee Fruehes dee met Kjint sent, en soone dee en Kjint aune Brosst ha.

¹⁸ Oba baet dautet nich mucht em Winta senne,

¹⁹ dan enn dee Doag woat Triebsaul senne, soo aus noch nie es jewast fonn Aunfank aus Gott aules erschaufe haft bott nu, en uk opp kjeen wajch wada kome woat.

²⁰ En wan de Herr dee Doag nich fekjartre wudd, wudd kjeena jerat woare. Oba waeajen dee Uterwaelde, daen hee uterwaelt haft, woare dee Doag fekjartet woare.