New Testament in a Year

10 Nu wea doa en jewessa Maun enn Sisaraea dee Korneelius heet, dee en Hauptmaun wea enn ne ietaljeenisha militaerisha Schoa.

² Hee wea en gottesferchta Maun met siene gaunse Famielje, en holp fael Oame met, en baed emma to Gott.

³ Onnjefaea klok dree no Medach sach hee kloa en Jesecht, en Enjel bie am enenn kome, dee saed to am: "Korneelius!"

⁴ Hee kjikjt am niel aun enn Angst en saed: "Herr! waut es?" Hee saed to am: "Diene Jebaed en diene Gowe sent fer Gott jekome tom Aunjedenk.

⁵ En nu, schekj Mana no Joppe en kroag Siemoon met hinjanome Peeta;

⁶ disa blift nu bie Siemoon dee Ladajoawa daem sien Hus biem Maea es".

⁷ Aus dee Enjel dee to am raed eascht wajch wea, roopt hee twee fonn siene Hus Sklowe, uk en fromma Soldot dee am deend,

⁸ en fetald daen aules daut paseat wea en schekjt an no Joppe.

⁹ Dee reisde de naeakjste Morje, en aus see dicht bie dee Staut kjeeme, onnjefaea bie Medach jinkj Peeta oppem Dak ennop to baede.

¹⁰ Am funk seeha aun to hungre, en wudd jearen je-aete habe; oba waerent see Aete reed muake fa am, foll hee enn groote Freid enenn en sach en Jesecht.

¹¹ Hee sach daem Himel opstone, en waut soo leet aus en grootet Jefaes so aus en Loake kjeem rauf, aun aule feeha Akje toop jebunge, daut bott oppe Ead erauf jelote wort.

¹² Doa weare aulahaunt feehabeensche Tiere fonn oppe Ead, krupende Kjraete, en Faeajel dee unjarem Himel fleaje.

¹³ En doa kjeem ne Stem no am: "Sto opp, Peeta, schlacht en doo aete!"

¹⁴ Oba Peeta saed: "Oba nae, Herr! wiel ekj ha niemols waut Jemeenet oda waut Onnreinet je-aete!"

¹⁵ Dee Stem kjeem tom tweedemol no am: "Doo daut waut Gott rein jemoakt haft, nich fa onnrein achte!"

¹⁶ Dit pasead dree mol, en platslich wort daut Jefaes em Himel enenn jenome.

¹⁷ Nu aus Peeta wunndad waut daut Jesecht daut hee jeseene haud meene kunn, kjikj! dee Mana dee Korneelius jeschekjt haud, stunnde enne Faealeew en fruage auf dit Siemoon sien Hus wea,

¹⁸ en roopte en fruage auf Siemoon, uk Peeta jenannt, doa bleef.

¹⁹ Aus Peeta sikj aewa daut Jesecht nodocht, saed dee Jeist to am: "Kjikj! twee Mana seakje die;

²⁰ Sto opp en go rauf, en go met an met, en twiewel nich, dan ekj ha an jeschekjt."

²¹ Don jinkj Peeta rauf en saed to dee Mana: "Kjikjt! ekj sie dee no daem jie seakje. Waut es dee Uasoak daut jie hia sent?"

²² See saede to am: "Korneelius, en Hauptmaun, dee en opprechtja en Gottesferchtja Maun es, dee en goodet Zeichnes haft fonn dee gaunse jude Natsjoon, wort fonn en Enjel befole daut hee sull die no sien Hus foddre, omm to heare waut du to saje hast."

²³ He roopt an enenn, en see bleewe doa de Nacht. De naeakjste Morje kjeem hee no Sisaraea; en Korneelius luad aul fa am, en haud aul sien Frintschofft en siene Frind toop jeroopt.