New Testament in a Year

8 En Saul weljd doamet enn daut see am doot muake. Enn dee Doag wea doa ne groote Fefoljunk jaeajen dee Jemeent enn Jerusalem. En aule weare fesprenjt derch dee Jaeajende fonn Judaea en Samarean, buta dee Apostel.

² En gottesferchtje Mana kjreaje Stefanus sien Lief en stalde en grootet Trua aun.

³ Oba Saul festead dee Jemeent seeha, en jinkj fonn Hus to Hus en schlapt beides Mana en Fruehes, en aewajeef daen nom Jefenknes.

⁴ En dee, dee festreit weare jinge aulawaeaje en praedjde daut Wuat.

⁵ Oba Filip jinkj rauf no dee Staut Samarean en praedjd daen Christus.

⁶ En met een Senn jeef daut Follkj acht opp daut waut Filip saed, aus see heade en sage dee Teakjens dee hee deed.

⁷ Dan faele fonn dee, dee onnreine Jeista haude, schreaje met ne lude Stem en kjeeme rut; en fael dee jelaemt en lom weare worde jeheelt.

⁸ En doa wea ne groote Freid enn dee Staut.

⁹ Doa wea en jewessa Maun dee Siemoon heet, dee fer daem enn dee Staut Tsauberie je-eeft haud, en haud daut samarieteschet Follkj erstaunt, en jeef faea waut Grootet to senne.

¹⁰ Daem horchte see aula too, fom Jeringste bottem Jratsta, en saede: "Disa es dee groote Gotteskrauft!"

¹¹ See kjikjte aula opp am wiel hee an aul so lang haud met siene Tsaubarie erstaunt.

¹² Oba aus see jleewde waut Filip pradjd fonn Gott sien Rikj, en daen Nome Jesus Christus, leete see sikj taufe, beides Mana uk Fruehes.

¹³ En Siemoon selfst jleewd uk, en leet sikj taufe, en hilt sikj met Filip, en fawunndad sikj aus hee dee Teakjens en kraftje Wunnda sach dee paseade.

¹⁴ En aus dee Apostel enn Jerusalm heade daut dee enn Samarean Gott sien Wuat aunjenome haude, schekjte see Peeta en Jehaun no an.

¹⁵ En aus see hankjeeme, baede see fa an daut see daem Heilje Jeist kjriehe muchte;

¹⁶ dan dee wea noch nich opp irjent eene fonn an jekome, dan see weare bloos enn daem Herr Jesus sien Nome jetauft.

¹⁷ Donn laede see aeare Henj opp an, en see kjrieje daem Heilje Jeist.

¹⁸ Aus Siemoon sach daut dee Heilje Jeist derch dee Apostel aeare Henj oppleije jejaeft wort, boot hee an Jelt aun, en saed:

¹⁹ "Jaeft mie uk dise Follmacht, daut, wan ekj opp waem miene Henj opplaj, dee dan uk daem heilje Jeist kjriehe."

²⁰ Oba Peeta saed to am: "Mucht dien Jelt met die toop enne Fedoawness enenn foare, wiel du dochst daut Gott siene Gow kunn met Jelt jekofft woare!

²¹ Du hast kjeen Poat oda Aundeel enn dise Sach; dan dien Hoat es nich racht fer Gott.

²² Doaromm lot die daut leet senne aewa dise diene Gottloosichkjeit, en pracha daem Herr daut diene Hoate Jedanke muchte fejaeft woare;

²³ dan ekj see daut du enne Gaul fonn Bettaness en Onnjerachtichkjeit best."

²⁴ Donn auntwuad Siemoon enn saed: "Doo fa mie baede tom Herr, daut nusscht fonn dit aewa mie kjemt fonn waut du jesajcht hast."

²⁵ En aus see opp earenst jezeicht haude en Gott sien Wuat to an jeraet haude, reisde see trig no Jerusalem, en praedjde daut Evanjeelium enn fael Samarietesche Darpa.