M’Cheyne Bible Reading Plan

1 Paul, Jesus Christus sien Apostel derch Gott sien Wele, en Timotaeaus onns Brooda, aun Gott siene Jemeent dee enn Korint es, uk aul dee Heilje enn Achaja;

² Jnod met junt, en Fraed fonn Gott onns Foda, en onns Herr Jesus Christus.

³ Jesaeajent es onns Herr Jesus Christus sien Gott en Foda, de Foda fonn waem aulet Erboarme kjemt, en Gott, fonn waem aula Troost kjemt,

⁴ dee onns treeste deit enn aul onns Aelend, soo daut wie daen treeste kjene dee enn Aelend sent, met daen Troost daen wie fonn Gott jekjraeaje ha.

⁵ Dan soo aus Christus sien Liede rikjlich enn onns es, soo es Troost uk rikjlich enn onns derch Christus.

⁶ Nu, wan wie enn Aelend sent, soo eset fa jun Troost en Heil; oda wan wie jetreest woare, eset junt uk tom troost, daut wirkjt doaderch daut jie jeduldich liede enn daut naemlijet waut wie liede.

⁷ Onnse Hopninj fa junt steit faust, dan wie weete daut, soo aus jie aundeel ha aun daut Liede, soo woa jie uk aun daen Troost.

⁸ Dan Breeda, wie wele nich daut jie nich weete sele fonn daen Triebsaul daen wie haude enn Asean, daut wie bute Mote bedreckt weare, daut wie soogoa aewa onns Laewe fetsoacht weare.

⁹ Wie ha daut Doodesuadeel enn onns jehaut, soo daut wie nich wudde fetruehe enn onns selfst ha, oba enn Gott, dee de Doodes oppwoakt;

¹⁰ dee onns fonn soon groota Doot jerat haft, en woat onns rade, enn daem wie hope daut hee onns uk noch secha wada rade woat;

¹¹ enn daem daut jie met onns oabeide em Jebaed, soo daut fael kjenne dankboa senne aewa onns fa dee Gow dee onns jejaeft es derch fael aere Jebaed.

¹² Dan onns puche es dit: daut Zeichnes fonn onns Jewesse, daut enn Heilichkjeit en met Gottesearenst, nich enn weltliche Weisheit, oba derch Gott siene Jnod ha wie onns enne Welt oppjefeat, en besondasch bie junt.

¹³ Wie schriewe junt nusscht aundret aus waut jie laese, oda festone kjenne, en ekj hop daut jie daut bottem Enj festone woare,

¹⁴ soo aus jie onns uk waenst enn Poat festone ha, daut wie jun Puche sent, soo aus jie uk onns Puche sent enn daem Herr Jesus Christus sien Dach.

¹⁵ Enn dit Toofetruehe wull ekj aul ferhaea no junt kome, daut jie ne tweede Jnod kunne habe,

¹⁶ en bie junt derch to reise no Matsedoonean, en fonn Matsedoonean wada no junt, en fonn junt oppe Reis jeholpe woare no Judaea.

¹⁷ Aus ekj mie daut soo faeaneem, wea ekj jlikjeltich doamet? oda neem ekj mie daut faea derchem Fleesch, daut bie mie wudd Yo! Yo! en Nay! Nay! senne?

¹⁸ Oba soo aus Gott Tru es, onns Wuat aun junt wea Yo en Nay.

¹⁹ Dan Jesus Christus, Gott sien Saen, dee mank junt jepraedicht wea fonn mie en Silwanus en Timotaeaus, wea nich Yo en Nay, oba es enn am Yo jewast.

²⁰ Dan soo fael Fespraeakjunne aus Gott jejaeft haft, sent enn am Yo, en doaromm derch am uk Amen, to Gott siene Harlijchkjeit derch onns.

²¹ Oba dee, dee onns bestaedijcht met junt enn Christus, en onns ennjesaeajent haft, es Gott;

²² dee onns uk jestampelt haft, en haft onns daem Jeist enn onnse Hoate jejaeft aus Earenstjelt.

²³ Nu roop ekj Gott aun aus en Zeij aewa miene Laewe, daut, omm junt to schoone, ekj nich wada no Korint kjeem.

²⁴ Nich daut wie aewa jun Gloowe harsche, oba Metoabeide met june Freid, dan jie stone derch Gloowe.

Dee 56 Psalm

To dän Haupt Musikaunt, daut met dee stelle Duw to doone haft – dee wiet auf; fonn Doft; en jeheemet Schats – aus dee Filiste am enn neeme.

¹ Sie mie jnädijch, O Gott, dan dee Mensche wele mie oppschlucke; kjrieje met mie un bedrekje mie.

² Miene Wajchta sochte mie dän dachäwa, dan fäl doone stollt äwa mie jachte.

³ Wanemma ekj Angst ha, woa ekj enn die fetruehe.

⁴ Enn Gott woa ekj sien Wuat preise; ekj ha en Gott fetruet; ekj woa mie nijch engste, waut kaun daut Fleesch mie aundoone?

⁵ Dee doone miene Wead dän Dachäwa fedreihe; aul äare Jedankje sent fa Beeset jäajen mie.

⁶ Dee reare Striet aun; see festäakje sikj; see beoobacht miene Staupe un luare fa miene Seel.

⁷ Doone see derjch Gottloosijchkjeit utretse? Doo dee Mensche enn dien Oaja dol schlone, O Gott.

⁸ Du hast mien Waundre jetalt; O doo miene Trone enn diene Buddel laje, sent dee nijch enn dien Buak?

⁹ Dan woare miene Fiend trigj dreihe, enn dän Dach woa ekj roope; dit weet ekj, dan Gott es fa mie.

¹⁰ En Gott woa ekj sien Wuat preise; enn daem Herr Gott woa ekj sien Wuat preise.

¹¹ Ekj ha enn Gott fetruet; ekj woa mie nijch ferjchte, waut kaun dee Mensch mie aundoone?

¹² Dien Bunnt es opp mie; ekj woa die Dankopfa brinje.

¹³ Dan du hast miene Seel fonn dän Doot jerat. Deist du nijch miene Feet bewoare fonn jleppe soo daut ekj mucht fer Gott waundle enn daut Lijcht fonn dee Laewndje?

Dee 57 Psalm

To dän Haupt Musikaunt. Doo nijch fenijchte. En jeheemne Schats fonn Doft, aus hee fonn Saul flijchte deed enn ne Heel.

¹ Sie erboarment to mie, O Gott, sie erboarment to mie, dan miene Seel deit enn die fetruehe, jo enn daut Schaute fonn diene Flijchte es miene Festäakjestäd, bott dee groote Fenijchtunj febie es.

² Ekj woa däm aulahejchsta Gott aunroope, to Gott dee fa mie wirkjt.

³ Hee woat fomm Himel schekje un mie rade, hee woat dän to schaunde moake dee mie fekjneddre deit. Selah. Gott woat sien Erboarme un siene Woarheit schekje.

⁴ Miene Seel es mank dee Leiw; ekj ligj mank dän dee aun Fia aunjtesekjt sent, dee Menschesäns, dän äare Täne Spiese un Fiele sent, un äare Tunj es en schoapet Schweat.

⁵ Sie jepreist hejcha aus dee Himels, O Gott; lot diene Harlijchkjeit äwa dee gaunse Ead senne.

⁶ Dee ha en Nat reed jemoakt fa miene Staupe, miene Seel es dol jeboage; dee ha ne Kul jegroft fa mie, dee sent doa enenn jefolle. Selah.

⁷ Mien Hoat es faust opp eene Städ, O Gott, mien Hoat es faust opp eene Städ; ekj woa sinje en Preis jäwe.

⁸ Wakj miene Harlijchkjeit opp!. Wakj opp, Hoap en Jittoa! Ekj woa dän Morjeroot oppwakje met Preis.

⁹ Ekj woa die mank dee Felkja preise, O Herr, ekj woa to die sinje mank dee Natsjoone.

¹⁰ Dan dien Erboarme es groot bott dee Himels, un diene Woarheit bott dee Wolkje.

¹¹ Sie oppjehowe bowe dee Himels, O Gott; diene Harlijchkjeit äwa dee gaunse Ead.