M’Cheyne Bible Reading Plan
बिलाम क पहिली भविस्सबाणी
23 बिलाम कहेस, “हिआँ सात ठु वेदी बनावा। अउ मोरे बरे सात ठु बर्धा अउ सात भेड़ा तइयार करा।” 2 बालाक उ सब किहस जउन बिलाम कहेस। तब बिलाम अउ बालाक हर एक वेदी प एक ठु बर्धा अउ एक भेड़ा मारेस।
3 तब बिलाम बालाक स कहेस, “इ वेदी क लगे ठहरा। मइँ दूसर जगह जाब। तब साइद यहोवा मोरे लगे अहहीं अउर बतइहीं कि मइँ का कहउँ।” तब बिलाम एक ऊँचा जगह प गवा।
4 परमेस्सर उ ठउर प बिलाम क लगे आवा। अउर बिलाम कहेस, “मइँ सात ठु वेदी तइयार किहेउँ ह। अउर मइँ हर एक वेदी प एक ठु बर्धा अउ एक भेड़ा मारेउँ ह।”
5 तब यहोवा बिलाम क इ बताएस जउन ओका कहइ चाही। तब यहोवा कहेस, “बालाक क लगे जा अउ इ बातन क कहा जउन मइँ कहइ बरे बताएउँ ह।”
6 एह बरे बिलाम बालाक क लगे लउटा। बालाक तब तलक वेदी क निचके खड़ा रहा। अउर मोआब क सबहिं नेता लोग ओकरे संग खड़ा रहेन। 7 तब बिलाम इ सब बातन क कहेस:
“मोआब क राजा बालाक
मोका अरम स बोलाएस पूरबिया पहाड़न स।
बालाक मोसे कहेस:
‘आवा अउ मोरे बरे याकूब क खिलाफ कहा आवा
अउ इस्राएल क लोगन क खिलाफ कहा।’
8 परमेस्सर ओन मनइयन क खिलाफ नाहीं अहइ,
एह बरे मइँ भी ओनके खिलाफ नाहीं कहि सकत हउँ।
यहोवा ओनका बुरा होइ बरे नाहीं कहेस ह।
एह बरे मइँ भी वइसा नाहीं कइ सकत हउँ।
9 मइँ ओन सबन क पहाड़े स लखत हउँ।
मइँ अइसे मनइयन क लखत हउँ
जउन अकेले रहत हीं।
इ मनइयन कउनो दूसरे रास्ट्र क अंग नाहीं अहइँ।
10 कउन याकूब क मनइयन क गन सकत ह?
उ सबइ बालू क कणे क तरह ढेर क बाटेन।
इस्राएल क मनइयन क एक चउथाई क भी
कउनो गन नाहीं सकत।
मोका एक ठु नीक मनई क तरह मरइ द्या,
मोका ओन मनइयन क तरह मरइ द्या।”
11 बालाक बिलाम स कहेस, “तू हमरे बरे का किहा ह? मइँ तोहका आपन दुस्मनन प सारप देइ बरे बोलाएउँ रहा। तू आपन सबन क आसीर्बाद दिहा ह।”
12 मुला बिलाम जवाब दिहस, “यहोवा मोहसे जउन कहइ क चाहत ह ओका मोका जरुर कहइ चाही।”
13 तब बालाक ओसे कहेस, “तउ मोरे संग कउनो दूसर ठउर प आवा। जहाँ तू ओन लोगन क लखि सकत ह। मुला तू ओनके एक हिंसा क लखि सकत ह, सबहिं क नाहीं लखि सकत ह। अउर उ ठउर स मोरे बरे ओनका सराप दइ सकत ह।” 14 एह बरे बालाक बिलाम क जोफिम क मइदान[a] मँ लइ गवा। इ पिसगा पहाड़े क चोटी प रहा। बालाक उ ठउर प सात वेदी बनाएस। तब बालाक हर एक वेदी प बलि क रूप मँ एक ठु बर्धा अउ एक भेड़ा मारेस।
15 एह बरे बिलाम बालाक स कहेस, “इ वेदी प खड़ा रहा। मइँ उ ठउरे प परमेस्सर स भेंटइ जाब।”
16 तउ यहोवा बिलाम क लगे आवा अउ उ बिलाम क बताएस कि उ का कहइ। तब यहोवा बिलाम क बालाक क लगे लउटि आवइ अउ ओन बातन क कहइ बरे कहेस। 17 एह बरे बिलाम बालाक क लगे गवा। बालाक तब वेदी क लगे खड़ा रहा। मोअँब क नेता ओकरे संग रहेन। बालाक बिलाम क आवत भवा लखेस अउ ओसे पूछेस, “यहोवा का कहेस ह?”
बिलाम क दूसर भविस्सबाणी
18 तब बिलाम इ बातन क कहेस:
“खड़ा ह्वा अउ मोर बात सुना।
सिप्पार क पूत बालाक! मोरउ सुना।
19 परमेस्सर मनई नाहीं;
उ लबार न बोली।
परमेस्सर मनई स पइदा पूत नाहीं,
ओकर फइसला बदली नाहीं।
अगर यहोवा कहत ह कि उ कछू करी
तउ उ ओका जरूर करी।
जदि यहोवा बचन देत ह
तउ आपन बचन क जरूर पूरा करी।
20 यहोवा मोका ओनका आसीर्बाद देइ क हुकुम दिहेस ह।
यहोवा ओनका आसीर्बाद दिहेस ह, एह बरे मइँ ओका नाहीं बदल सकित।
21 परमेस्सर याकूब क मनइयन मँ कउनो दोख नाहीं पाएस।
इस्राएल क लोगन मँ कउनो पाप नाहीं रहा।
यहोवा ओनकइ परमेस्सर अहइ अउ ओनके संग बाटइ।
महाराजा क पुकार ओनके संग अहइ।
22 परमेस्सर ओनका मिस्र स बाहेर लिआवा।
इस्राएल क उ सबइ लोग जंगली साँड़े क तरह बलवान अहइँ।
23 कउनो ताकत नाहीं जउन याकूब क लोगन क हराइ सकइ।
कउनो जादू इस्राएल क लोगन क नाहीं रोकइ सकत ह।
याकूब क बारे मँ अउ इस्राएल क लोगन क बारे मँ भी मनइयन इ बात कहब्या,
‘परमेस्सर जउन महान काम किहे अहइ ओन पइ धियान द्या।’
24 मनई सेर क नाई सक्तीवाला होइहीं।
उ सबइ सेर जइसे लड़िहीं।
अउर इ सेर कबहुँ नाहीं आराम करी, जब तलक उ सिकार क खाइ नाहीं लेअत।
जब तलक उ ओनकइ खून नाहीं पिअत जउन जुद्ध मइँ मारा गवा ह।”
25 तब बालाक बिलाम स कहेस, “तू नाहीं ओका सराप द्या अउर नाहीं ओका आसीर्बाद।”
26 बिलाम जवाब दिहस, “मइँ पहिले तोहसे कहि दिहेउँ ह कि मइँ सिरिफ उहइ करब जउन यहोवा मोका करइ बरे कहत ह।”
27 तब बालाक बिलाम स कहेस, “एह बरे तू मोर संग दूसर ठउर प चला। साइद कि ओनका उ जगह स सराप देइ स परमेस्सर खुस होइ।” 28 एह बरे बालाक बिलाम क पेऑर पहाड़े प लइ गवा। इ पहाड़ रेगिस्तान मँ दिखाँइ देत रहा।
29 बिलाम कहेस, “हिआँ सात वेदी बनावा। तब सात ठु साँड़ अउ सात भेड़ा क वेदी प बलि बरे तइयार करा।” 30 बालाक उहइ किहस जउन बिलाम कहेस। बालाक बलि क रूप मँ हरेक वेदी प एक ठु साँड़ अउ एक भेड़ा भारेस।
संगीत निर्देसक बरे दाऊद क एक ठु भजन।
1 हे परमेस्सर, मोर सुना जइसा मइँ बोलउँ।
आपन दुस्मनन क डर स मोर रच्छा करा।
2 तू मोका मोरे दुस्मनन क गहिर सड्यंत्रन स बचाइ ल्या।
मोका तू ओन दुट्ठ लोगन स छिपाइ ल्या।
3 मोरे बारे मँ उ पचे बहोत बुरा झूठ बोलेन ह।
ओनकर जिभिया तेज तरवार जइसी अउर ओनकर कटु सब्द बाणन जइसे अहइँ।
4 उ पचे निर्दोख व्यक्ति पइ बाणन चलावइ बरे लुकाइ जात हीं।
बिना डर स उ पचे अचानक बाण चलावत ह अउर निर्दोख व्यक्ति कबहुँ नाहीं लख सकत ह कि तीर ओकरे कइंती आवत हीं।
5 उ पचे ओका हरावइ क बुरा काम करत हीं।
उ पचे झूठ बोलतेन अउ आपन जाल फइलावत हीं।
अउर उ पचे इ अच्छी तरह तय किहे अहइँ कि ओनका कउनो नाहीं धरी पकड़ी।
6 लोग बहोत कुटिल होइ सकत हीं।
उ सबइ लोग का सोचत अहइँ?
ऍका समुझ पाउब बड़ा कठिन अहइ।
7 मुला परमेस्सर आपन “बाण” मार सकत ह!
अउर एकरे पहिले कि ओनका पता चलइ, उ सबइ दुट्ठ लोग घायल होइ जात हीं।
8 दुट्ठ जन दूसरन क संग बुरा करइ क जोजना बनावत हीं।
मुला परमेस्सर ओनकर कुचक्रन क चउपट कइ सकत ह।
उ ओन बुरी बातन क खुद ओनके ऊपर खुद घटाइ देत ह।
फुन हर कउनो जउन ओनका लखत अचरजे स भरिके आपन मूँड़ी हिलावत ह।
9 जउन परमेस्सर किहेस ह, लोग ओन बातन क लखिहीं
अउर उ पचे ओन बातन क वर्णन दूसर लोगन स करिहीं,
फुन तउ हर कउनो परमेस्सर क बारे मँ अउर जियादा जानी।
उ पचे ओकर आदर करब अउ डेराब सिखिहीं।
10 तउ सबइ बिस्सासी लोगन क लगे
एक साथ परमेस्सर क स्तुति करइ क कारण होइ।
निर्देसक बरे दाऊद क एक ठू भजन।
1 हे परमेस्सर सिय्योन पर्वत पइ, हम पचे तोहका इ सान्ति पराथना भेंट किहउँ ह
अउर आपन प्रतिग्या क पूरा किहेउँ ह।
2 मइँ तोहरे ओन कामन क बखान करत हउँ, जउन तू किहा ह।
उ तू ही बाटइ जउन पराथनन क उत्तर दिह्या।
एह बरे हर कउनो मनई तोहार लगे मँ आवत हीं।
3 जब हमार पाप हम पइ भारी पड़त हीं, हमसे सहा नाहीं जाइ पावत,
तउ तू हमार ओन पापन्क हरिके लइ जात ह।
4 हे परमेस्सर, जेका तू चुन्या ह
अउर आपन आँगनन मँ बसइ बरे लिआवा ह उ पचे बहोत असीसित होइहीं।
उ पचे तोहार घर,
तोहार पवित्तर मन्दिर क बहोत बढ़ियाँ चिजियन स भरि देइहीं।
5 परमेस्सर मोर उद्धारकर्त्ता,
तू जउने तरह स लोगन क सम्मान दिहा ह इ बहोत नीक बाटइ।
तू अचरज भरा काम करा,
एह बरे दूर रास्ट्रन क लोगन अउर दूर क समुद्दरन तोहार लगे सुरच्छा बरे आइहीं।
6 परमेस्सर आपन महासक्ती क प्रयोग किहस अउ पर्वत रच डाएस।
ओकर सक्ति हम आपन चारिहुँ कइँती लखत अही।
7 परमेस्सर उफनत भवा सागर सांत किहस।
परमेस्सर जगत क सबहिं अनगिनत लोगन क बनाएस।
8 जउन अद्भुत बातन क परमेस्सर करत अहइ, ओनसे धरती क हर मनई डेरात अहइ।
परमेस्सर तू ही हर कहूँ सूरज क उगावत अउ डुबावत ह।
हर जगह लोग तोहार गुणगान करत हीं।
9 भुइँया क सारी रखवारी तू करत ह।
तू ही ऍका सींचत अउ तू ही ऍहसे बहोत सारी वस्तुअन क उपजावत अहा।
हे परमेस्सर, नदियन क पानी स तू ही भरत अहा।
तू ही फसलन क बढ़त करत अहा।
10 तू जोता भए खेतन पइ बर्खा करत अहा।
तू खेतन क जल स लबालब कइ देत ह,
अउर धरती क बर्खा स नरम बनावत ह,
अउर तू फिन पौधन क बढ़त करत ह।
11 तू नवा बरिस क सुरूआत उत्तिम फसलन स करत ह।
तू भरपूर फसलन स गाड़ियन भर देत अहा।
12 बन अउ पर्वत दूब घासे स ढँकि जात हीं।
13 भेड़िन स चरागाहन भर गइन।
फसलन स घाटियन भरपूर होत अहइँ।
हर कउनो गावत अउ आनन्द मँ ऊँचा पुकारत अहइ।
बाबुल क परमेस्सर क दर्सन
13 परमेस्सर क बाबुल क बारे मँ इ सोक संदेस अहइ। इ दर्सन आमोस क पूत यसायाह दुआरा लखा ग रहा। 2 परमेस्सर कहेस:
“इ बंजर पर्वत पइ ध्वज उठावा।
ओन लोगन क गोहरइ
अउर आपन हाथ संकेत क रूप मँ हलाइ के ओन लोगन क बतावा कि
उ पचे सज्जन मनइयन क प्रवेस दुआर पइ अहइँ।
3 “मइँ इ सबइ फउजन क आदेस दिहउँ
जउन जुद्ध बरे आपन आपका समर्पित कइ दिहेस ह।
उ मइ हउँ जउन इ सबइ जोद्धन क बोलाएस ह।
मइँ आपन गुस्सा देखाउब्या।
मइँ उ जोद्धन पइ गर्व करत हउँ जउन मोर सेवा करइ बरे बहोत खुस अहइ।
4 “पहाड़ मँ एक जोरदार सोर भवा ह।
तू उ सोर क सुना।
इ सोर अइसा लागत ह जइसे बहोत ढेर सारे लोगन क।
बहोत सारे देसन क लोग आइके बटुरा अहइँ।
सर्वसक्तिमान यहोवा आपन फउज क एक संग बोलावत अहइ।
5 यहोवा अउर इ सेना कउनो दूर क देस स आवत अहइँ।
इ सबइ लोग छितिज क पार स किरोध परगट करइ आवति अहइँ।
यहोवा इ सेना क उपयोग अइसे करी जइसे कउनो किसी सस्त्र क उपयोग करत ह।
इ फउज सारे देस क बर्बाद कइ देइ।”
6 यहोवा क निआव क खास दिन आवइ क अहइ। एह बरे रोआ। अउ खुद आपन बरे दुःखी ह्वा। समय आवत अहइ जब सत्रु तोहार सम्पत्ति चुराइ लेइ। सर्वसक्तीमान परमेस्सर वइसा करवाइ। 7 लोग आपन हिम्मत छोड़ि देइहीं अउर डर लोगन क दुर्बल बनाइ देइ। 8 हर कउनो भयभीत होइ। डर स लोगन क अइसे दुःखइ लगिहीं जइसे कउनो बच्चा क जन्मइवाली महतारी क पेट दुःखइ लागत ह। ओनकर मुँह लाल होइ जइहीं, जइसे कउनो आगी होइ। लोग अचरजे मँ पड़ि जइहीं काहेकि ओनकर सबहिं पड़ोसियन क मुँहे पइ भी भय देखाई देइ।
बाबुल क खिलाफ परमेस्सर क निआव
9 लखा, यहोवा क खास दिन आवइ क अहइ। उ एक खउफनाक दिन होइ। परमेस्सर महान किरोध मँ देस क बिनास कइ देब। उ पाप क उ भुइँया स निकार देब। 10 आकास करिया पड़ि जइहीं, सूरज अउ चाँद नाहीं चमकिहीं। तारन आपन तारा-मण्डल मँ नाहीं टिमटिमाइ।
11 परमेस्सर कहेस, “मइँ इ दुनियाँ लोगन क उ बुरा चिजियन जउन उ किहेस ह क बरे जिम्मवार ठहरउब। मइँ लोगन क उ सेखी क नस्ट करब जउन दूसर लोगन बरे अरथ होइ। 12 हुवाँ बस थोड़े स लोग ही बचिहीं। जइसे सोना क मिलब दुरलभ अहइ, वइसे ही हुवाँ लोगन का मिलब दुर्लभ होइ जाइ। किन्तु जउन लोग मिलिहीं, उ पचे निखालिस सोना स भी जियादा मूल्यवान होइहीं। 13 आपन किरोध स मइँ आकास क हलाइ देबउँ। धरती आपन धुरी स डिगाइ दीन्ह जाइ।”
इ सब उ समय घटी जब सर्वसक्तीमान यहोवा आपन किरोध दर्साइ। 14 तब बाबुल क निवासी अइसे परइहीं जइसे घायल हिरन परात ह। उ पचे अइसे परइहीं जइसे बगैर गड़रिये क भेड़ी परात ह। हर कउनो मनई पराइके आपन देस अउर आपन लोगन कइँती मुड़ आई। 15 किन्तु बाबुल क लोगन क पाछा ओनकर दुस्मन नाहीं छोड़िहीं अउर जब सत्रु कउनो मनई क धर पकड़ी तउ उ ओका तलवार क घाट उतारि देइ। 16 ओनकर घरे क हर वस्तु चुराइ लीन्ह जाइ। ओनकर पत्नियन क संग कुकरम कीन्ह जाइ अउर ओनकर नान्ह नान्ह गदेलन क लखत पीटि पीटिके मार डावा जाइ।
17 परमेस्सर कहत ह, “लखा, मइँ मादी क फउजन स बाबुल पइ हमला कराउब। मादी क फउजन जदि सोना अउ चाँदी क भुगतान लइ भी लेइहीं तउ भी उ पचे ओन पइ हमला करब बंद नाहीं करिहीं। 18 फउजन बाबुल क नउजवान मनइयन क धनुस क छिन-भिन कइ देब्या। उ पचे नान्ह लरिकन पइ दाया नाहीं देखाँइ या गदेलन तलक भी करूणा नाहीं करिहीं।
19 “तब बाबुल, सबइ समराज्ज मँ सबन त सुन्नर, कसदी क चमत्कारी गर्व क पूरी तरह स बर्बाद कइ दीन्ह जाब। इ उहइ तरह होइ जइसा परमेस्सर सदोम अउर अमोरा क नास किहे रहा! 20 किन्तु बाबुल क सुन्नरपन बना नाहीं रही। भविस्स मँ हुवाँ लोग नाहीं रइहीं। अराबी क लोग हुवाँ आपन तम्बू नाहीं गड़िहीं। गड़रियन चरावइ बरे हुवाँ आपन भेड़िन क नाहीं लिअइहीं। 21 जउन पसु हुवाँ रइहीं उ सबइ बस रेगिस्तान क पसु ही होइहीं। बाबुल मँ आपन घरन मँ लोग नाहीं रहि पइहीं। घरन मँ जंगली कुत्तन अउ बड़के कुकुरन चिल्लइहीं। घरन क भितरे जंगली बोकरन बिहार करिहीं। 22 बाबुल क बिसाल भवनन मँ जंगली कुकुरन अउर सियारन गुर्राइ। बाबुल बर्बाद होइ जाइ। बाबुल क अंत निअरे अहइ अब बाबुल क बिनास मँ अउर जियादा देरी नाहीं होइ।”
1 पतरस कइँती स, जउन ईसू मसीह क प्रेरित अहइ,
परमेस्सर क उ चुने भए लोगन क नाउँ जउन पुन्तुस, गलातिया, कप्पदुकिया, एसिया अउर बिथुनिया क छेत्रन मँ सब कहूँ फैले अहइँ। 2 तू जेनका परमपिता परमेस्सर क पूर्व गियान क हिसाब स चुना गवा अहइ, जउन अपनी आतिमा क पवित्तर करइ जिनका ओनकइ आज्ञाकारी होइ खातिर अउर जेनपइ ईसू मसीह क लहू छिड़काव स पवित्तर कीन्ह जाइ क खातिर चुना गवा रहा तू पचन्क ऊपर परमेस्सर क अनुग्रह अउर सांति ज्यादा स ज्यादा होत रहइ।
सजीव आसा
3 हमरे पर्भू ईसू मसीह क परमपिता परमेस्सर धन्य होइ। मरे भए मँ स ईसू मसीह फिन जिअइ क कारण स ओकर अपार करुणा मँ स सजीव आसा पावइ खातिर उ हमका नवा जनम दिहे अहइ। 4 जेहिसे सरग मँ सुरच्छित ढंग स रखे भए अजर-अमर अउर जेनका नस्ट नाहीं कीन्ह जाइ सकत सरगे मँ तोहरे बरे सुरच्छित अहइ।
5 जे आपन बिसवास दुआरा परमेस्सर स सुरच्छित अहइँ ओनका उ उद्धार जउन समइ क अंतिम कोना मँ प्रकट होइ क हइ, मिल जाइ। 6 एह पइ तू बहुत प्रसन्न अहा। मुला अब तू पचन्क तनिक बरे खातिर तरह तरह क इम्तहान मँ पड़िके दुखी होब जरूरी अहइ। 7 जेहिसे तू पचन्क जउन परखा नासवान भवा बिसवास अहइ, जउन आगी मँ परखा नासवान सोनो स ज्यादा कीमती अहइ, ओहका जब ईसू मसीह परगट होई, परमेस्सर स प्रसंसा महिमा अउर आदर मिलइ चाही।
8 तू पचे ईसू मसीह क देखे नाहीं अहा, मुला तू पचे ओसे पिरेम करत अहा। चाहे तू पचे ओका दइ नाहीं पाए रह्या ह, मुला तबउ ओहमाँ बिसवास रखत अहा अउर एक अइसे आनन्द स भरा भवा अहा जउन कहइ लायक नाहीं अहइ एउर महिमावान अहइ। 9 अउर तू पचे अपने बिसवास क कारण लच्छ तक पहुँच रहे अहा जेहसे आतिमा क तउ उद्धार होइ।
10 इ उद्धार क बारे मँ उ नबियन बड़े मेहनत स पता लगाइन हइ अउर बड़ी हुसयारी स पता खोजेन हइ, जउन तउ प परगट होइवाले अनुग्रह क भविस्सबाणी क दिहे रहेन। 11 उ नबियन मसीह क आतिमा स इ जानिन जउन मसीह प होइवाले दुःखन क बतावत रही अउर उ महिमा जउन दुःखन क बाद परगट होई। इ आतिमा ओनका बतावत रही। इ बातन इ दुनिया मँ कब होइहीं अउर तब इ दुनिया मँ का होइ।
12 ओनका इ देखाइ दीन्ह गवा रहा कि उ बातन क प्रवचन करत भए उ पचे आपन सेवा खुदइ नाही करत रहेन बल्कि तोहार सबन्क करत रहेन। उ बतियन तू सबन्क सरग स पठए गए पवित्तर आतिमा क दुआरा तू पचन क ओन लोगन स जउन सुसमाचार मिला जे तोहरे बरे लिआवत रहेन। अउर उ बातन क जानइ क खातिर सरगदूतन तरसत अहइँ।
पवित्तर जीवन खातिर बुलावा
13 इ खातिर आपन दिमाग काम क बरे तइयार रखा अउर अपने ऊपर नियंत्रण रखा। उ बरदान जउन ईसू मसीह क परगट अहइ प तू पचन्क मिलइवाला अहइ, पूरी असा रखा। 14 आग्या मानइवाले बचवन क नाईं उ समइ क बुरी इच्छन क हिसाब स अपने क न ढाला जउन तू पचन मँ पहिले स रही जब तू पचे अग्यानी रह्या। 15 बल्कि जइसे तू सबन क उ परमेस्सर जउन सबन्क बोलावत अहइ पवित्तर अहइ उहइ क तरह अपने करमन मँ पवित्तर बना। 16 पवित्तर सास्तरन मँ लिखा अहइ: “पवित्तर बना, काहेकि मइँ पवित्तर अहउँ।” (A)
17 अउर अगर तउ प्रत्येक करमन क हिसाब स पच्छपात रहित होइके निआव करइवाले परमेस्सर क हे पिता! कहिके पुकारत अहा तउ उ परमेस्सर सबन क संग बिना भेद-भाव क निआव करत ह। तउ इ परदेसी धरती मँ अपने रहइ वाले दिनन क इज्जत अउर परमेस्सर क डर क संग बितावा। 18 तू इ जानत अहा कि सोना या चाँदी जइसेन वस्तुअन स तू पचे उ व्यर्थ जीवन स छुटकारा नाही पाइ सकत अहा जउन तू पचन क तोहरे पूर्वजन स मिला बाटइ। 19 बल्कि उ तउ तू पचन के निर्दोस अउर कलंक रहित मेमने क समान मसीह क कीमती लहू स तू सबन क मिला सकत ह। 20 इ संसार क बनइ स पहिलेन ओहका चुन लीन्ह गवा रहा मुला तू पचे खातिर अन्तिम दिनन मँ परगट कीन्ह गवा ह। 21 उ मसीह क कारण तू पचे उ परमेस्सर मँ बिस्सास करत रह्या जउन मरे भएन मँ स जियाइ दिहेस अउर महिमा दिहेस। इ तरह परमेस्सर मँ तोहारे आसा अउर बिस्सास स्थिर अहइ।
22 अब तू सत्य क पालन करत भए, नीक भाईचारा अउर पिरेम क प्रदर्सित करइ खातिर अपने आतिमा क पवित्तर क लिहे अहा, पवित्तर हिरदय क साथ परस्पर पिरेम क आपन लच्छ बनाइ ल्या। 23 तू नासमान क बीज स फिन स जीवन प्राप्त नाही किहा ह बल्कि इ उ बीज क परिणाम अहइ जउऩ अमर हइ। तोहार पुनर्जनम परमेस्सर क उ नीक सन्देस स भवा अहइ जउन जिअत अहइ अउर हमेसा अटल रहत ह। 24 काहेकि पवित्तर सास्तर कहत ह,
“प्राणी त सबइ घास बराबर अहइँ,
अउर ओनके सज धज सब घास क फूलन जइसी,
घास सब सूख जात ह
अउर फूल उड़ जात ही।
25 मुला टिका रहत ह परमेस्सर क इ संदेसा सदा हीं।” (B)
इ उहइ नीक संदेसा अहइ जेहका तोहका उपदेस दीन्ह गवा ह।
Awadhi Bible: Easy-to-Read Version. Copyright © 2005 Bible League International.