M’Cheyne Bible Reading Plan

3 Enn dee Doag kjeem Jehaun dee Taufa enn praedjd enne Wiltnes enn Judaea,

² en saed: "Doot buesse, dan daut Himelsrikj es dicht bie jekome".

³ Dan dit es dee fonn daem dee Profeet Jesaja raed, en saed: "Ne Stem fonn eenem dee enne Wiltnes schricht: "Moakt daem Herr sien Wajch reed, moakt sien Stich jlikj."

⁴ Nu Jehaun siene Kjleeda weare fonn Kameelhoa jemoakt, en hee haud ne ladane Gort omme Lint, en sien Aete wea Heischrakje en wila Honnich.

⁵ Donn kjeeme Jerusalen en aul dee fonn Judaea en dee Jaeajent romm daen Jordan, no am,

⁶ en bekjande aeare sind en leete sikj fonn am taufe em Fluss Jordan.

⁷ Oba aus hee sach fael fonn dee Farisaea en Sadutsaea no dee Taufe kome, saed hee to an: "Jie jeftje Schlangebrood, waea haft junt jewoarnt fonn daut komende Jerecht wajch to ranne?

⁸ Doaromm bewiest Frucht daut de Buesse bedeenstfoll es;

⁹ en raeakjent nich mank junt selfst to saje, 'Wie ha Obraum aus onns Foda,' dan ekj saj junt daut Gott ut dise Steena kaun Kjinje faeabrinje fa Obraum.

¹⁰ Dee Akjs es nu aul bie dee Beem aune Wartel jelajcht; doaromm en jeeda Boom dee nich goodet Frucht brinjt woat dol jeschnaede woare, en em Fia jeschmaete.

¹¹ Ekj doo junt enn Wota taufe to de Buesse, oba doa es eena dee no mie kjemt, dee stoakja es aus ekj, en ekj sie nich weat siene Schoo to droage. Dee woat junt em Heilje Jeist, en Fia taufe.

¹² Siene Worfscheffel es enn siene Haunt, en hee woat siene Draschflua fonn Grunnt rein moake, en woat daen Weit enn sien Spikje enenn brinje, oba daut sprie woat hee met Fia febrenne daut nich utolasche jeit.

¹³ Donn kjeem Jesus fonn Galilaea nom Jordan no Jehaun omm sikj fonn am taufe to lote.

¹⁴ Oba Jehaun wull daut nich, en saed: "Ekj sull mie fonn die taufe lote, en du kjemst no mie?"

¹⁵ Oba Jesus auntwuad am en saed: "Lot senne, dan daut es soo pausent fa onns aule Jerachtichkjeit to erfelle." Donn leet hee daut too.

¹⁶ Aus Jesus jetauft wea, kjeem hee fuats utem Wota rut, en kjikj! de Himel muak sikj op, en hee sach Gott sien Jeist rauf kome soo aus ne Duw, dee sikj opp am sad;

¹⁷ En see, ne Stem kjeem utem Himel, dee saed: "Dit es mien leefsta Saen, met daem ekj seeha tofraed sie".

3 Nu klok dree no Medach jinje Peeta en Jehaun nom Tempel auset Tiet wea tom Jebaed.

² En doa wea en Maun dee fonn Jeburt lom wea, daem see druage, en jieda Dach bie daem Tempelpuat daen see daut 'Scheene' nande, han laede so daut hee kunn fa waut prachre fonn daen dee emm Tempel enenn jinje.

³ Aus hee sach daut Peeta en Jehaun em Tempel wulle enenn gone, prachad hee an no Jelt.

⁴ En Peete kjikjt am niel aun, Jehaun uk, en saed to am: "Kjikj onns aun!"

⁵ Hee kjikjt an aun en raeakjend daut see am waut wudde jaewe.

⁶ En Peeta saed: "Selwa en Gollt ha ekj nich; oba waut ekj ha, daut jaew ekj die. Enn Jesus Christus fonn Natsaret sien Nome, sto opp en go!"

⁷ Hee foot am aune rachte haunt en recht am opp, en platslich kjreaje siene Feet en Jelenkj Knoakes Krauft,

⁸ en hee huppst opp en stunt, en jinkj met an em Tempel enenn, jinkj en huppst en lowd Gott.

⁹ En aule Mensche sage am gone en Gott lowe.

¹⁰ En see kjande am, daut dise dee wea, dee biem scheene Tempelpuat jesaete haud en no Jelt jeprachet, en see weare erstaunt, en febleft aewa waut met am paseat wea.

¹¹ En aus dee Jeheelda Peeta en Jehaun faust hilt, rande dee Mensche aule toop no an enn Salamo siene Faealeew, en fewunndade sikj seeha.

¹² Aus Peeta daut sach, auntwuad hee dee Mensche: "Mana, Iesraeliete, wuaromm wunndat junt daut soo, en wuaromm kjikj jie onns so aun aus wan wie derch onnse eajne Krauft oda Frommheit disem jeholpe ha tom gone?

¹³ Obraum, Iesak en Joakopp aea Gott, onnse Fodasch aea Gott, haft sien Deena Jesus feharlicht, daem jie hanjeewe en fer Pielatus aufsaede aus dee sikj eenich wea am loos tolote.

¹⁴ Oba jie muake junt loos fonn daem Heilje en Jerachte, en fruage doano daut en Merda junt sull jejaeft woare;

¹⁵ en daem, dee Laewa jeft, muak jie Doot, daem Gott nu fom Doot oppjewakjt haft, fonn woont wie Zieg sent.

¹⁶ Enn daem sien Nomne, derch Gloowe enn sien Nome, es dis Maun, daem jie hia nu seene, stoakj jemoakt enn june Jaeajenwoat.

¹⁷ En nu, Breeda, ekj weet daut jie daut deede enn Onnwissenheit, so aus uk june Harscha.

¹⁸ Oba Gott, dee ferhaea derch siene Profeeta daut haud weete lote daut dee Christus liede musst, haft daut nu soo erfelt.

¹⁹ Doaromm doot Buesse en bekjeat junt nu, daut junt de Sinde fejaeft woare, en daut ne befreschende Tiet kome kaun fonn daem Herr siene Jaeajenwoat,

²⁰ en hee Jesus Christus schekje woat, dee junt ferhaea jepraedicht wort,

²¹ daem de Himel oppnaeme mott bott Gott aules tracht stalle woat, so aus Gott derch aul siene heilje Profeete jeraet haft fonn Aunfank de Welt.

²² Mooses saed sogoa: 'De Herr Gott woat ut june Breeda en Profeet fa junt hanstalle so aus ekj; daem sel jie jehorche en doone, wautemma hee junt saje woat.

²³ En jiede Seel dee nich no am horche woat, saul gaunsentgoa fonn ut daut Follkj fetilcht woare.

²⁴ En aul dee Profeete fonn Samuel aun, en aul dee, dee no am kjeeme, ha uk fonn dise Tiet jeraet.

²⁵ Jie sent dee Profeete aeare Kjinja, en daen Bunnt daen Gott met onnse Fodasch muak, en saed to Obraum: 'Derch diene Nokome sele aule Famieljes oppe Ead jesaeajent woare.'

²⁶ Aus Gott sien Deena Jesus oppwuak fom Doot, schekjt hee am eascht nu junt, daen Saeajen to jaewe daut en jieda sikj fonn sien Beeset bekjeare sull."