M’Cheyne Bible Reading Plan

4 Господари, постапувајте чесно и правично со своите робови. Не заборавајте дека и над вас има Господар на небото!

Поттик на молитва и мудро однесување

² Посветете се на молитва, будно и со благодарност. ³ Молете се и за нас, Бог да ни отвори патишта, па Неговата порака да се шири и да се објаснува тајната за Христос. Токму заради тоа сега јас сум в затвор. ⁴ Молете се пораката да ја објаснувам разбирливо, онака како што треба.

⁵ Однесувајте се мудро спрема оние што не се христијани и користете ја секоја можност. ⁶ Зборувајте љубезно, умесно и концизно; давајте му умешен одговор на секој што ќе ви постави прашање.

Завршни упатства и поздрави

⁷ Мојот драг пријател Тихик, кој верно работи со нас и Му служи на Господ, ќе ви раскаже се што ве интересира за мене. ⁸ Го праќам токму заради тоа, да ви каже како сме и да ве охрабри. ⁹ Со него ќе дојде и вашиот земјак Онисим, кој е наш верен и многу мил брат по вера. Тие ќе ви раскажат за се што се случува овде.

¹⁰ Ве поздравува Аристарх. И тој е в затвор со мене. Ве поздравува и Марко, братучедот на Барнаба. Ако дојде кај вас, прифатете го, како што веќе ви пишавме.

¹¹ Ве поздравува и Исус, меѓу нас познат како Јуст. Овие тројца се единствените христијани од Евреите што работат со мене за Божјото царство. Тие се големо охрабрување за мене.

¹² Ве поздравува и вашиот сограѓанин Епафрас, кој сега е во служба на Исус Христос. Тој ревносно се моли за вас, да бидете цврсти, да станете зрели христијани, уверени во целата Божја волја. ¹³ Јас лично сум сведок колку ревносно се залага тој за вас, како и за христијаните во Лаодикеја и во Хиераполис.

¹⁴ Ве поздравуваат нашиот драг лекар Лука и Димас.

¹⁵ Поздравете ги сите христијани во Лаодикеја, а посебно Нимфа^[a] и членовите на црквата што се собираат во нејзиниот дом.

¹⁶ Кога ќе го прочитате ова писмо кај вас, погрижете се да стигне и во Лаодикејската црква, за да го прочитаат и тие, а и вие треба да го прочитате писмото што им го упатив ним.

¹⁷ Потсетете го Архип внимателно да ја извршува работата што му ја довери Господ.

¹⁸ Сега своерачно ви пишувам: Поздрав од Павле!

Не заборавајте дека сум в затвор.

Бог нека ви биде благонаклонет.