Chronological

Ang mga Anak nga Lalaki ni David

3 Mao kini ang mga anak nga lalaki ni David nga nangatawo sa Hebron: Ang kamagulangan mao si Amnon nga anak niya kang Ahinoam nga taga-Jezreel. Ang ikaduha mao si Daniel nga ang inahan mao si Abigail nga taga-Carmel. ² Ang ikatulo mao si Absalom nga ang inahan mao si Maaca nga anak nga babaye sa hari sa Geshur nga si Talmai. Ang ikaupat mao si Adonia nga ang inahan mao si Hagit. ³ Ang ikalima mao si Shefatia nga ang inahan mao si Abital. Ug ang ikaunom mao si Itream nga ang inahan mao si Egla. ⁴ Kining unom natawo sa Hebron, diin naghari si David sulod sa pito ka tuig ug unom ka bulan.

Naghari si David sa Jerusalem sulod sa 33 ka tuig. ⁵ Ug mao kini ang iyang mga anak nga lalaki nga natawo didto: si Shimea, Shobab, Natan, ug Solomon. Kini silang upat anak niya sa iyang asawa nga si Batsheba nga anak ni Amiel. ⁶ May siyam pa gayod siya ka mga anak nga lalaki nga mao sila si Ibhar, Elishua,^[a] Elifelet, ⁷ Noga, Nefeg, Jafia, ⁸ Elishama, Eliada, ug Elifelet. ⁹ Mao kini sila ang mga anak nga lalaki ni David, gawas sa uban pa niyang mga anak nga lalaki sa uban pa niya nga mga asawa. May anak usab si David nga babaye nga mao si Tamar.

Ang mga Hari sa Juda

¹⁰ Mao kini ang mga kaliwat ni Solomon nga nahimong hari: sila si Rehoboam, Abia, Asa, Jehoshafat, ¹¹ Jehoram,^[b] Ahazia, Joas, ¹² Amazia, Azaria,^[c] Jotam, ¹³ Ahaz, Hezekia, Manase, ¹⁴ Amon, ug Josia.

¹⁵ Mao kini ang mga anak ni Josia: ang kamagulangan mao si Johanan, ang ikaduha si Jehoyakim, ang ikatulo si Zedekia, ug ang ikaupat si Shalum. ¹⁶ Ang mipuli kang Jehoyakim ingon nga hari mao si Jehoyakin nga iyang anak. Ug ang mipuli kang Jehoyakin mao si Zedekia nga iyang uyoan.^[d]

Ang mga Kaliwat ni Jehoyakin

¹⁷ Mao kini ang mga anak ni Jehoyakin, ang hari nga gibihag ngadto sa Babilonia: sila si Shealtiel, ¹⁸ Malkiram, Pedaya, Shenazar, Jekamia, Hoshama, ug si Nedabia. ¹⁹ Ang mga anak ni Pedaya mao si Zerubabel ug si Shimei. Ang mga anak ni Zerubabel mao si Meshulam ug si Hanania. Ang ilang igsoon nga babaye mao si Shelomit. ²⁰ May lima pa ka anak si Zerubabel nga mao sila si Hashuba, Ohel, Berekia, Hasadia, ug Jushab Hesed. ²¹ Ang mga anak ni Hanania mao sila si Pelatia ug si Jeshaya. Si Jeshaya amahan ni Refaya, si Refaya amahan ni Arnan, si Arnan amahan ni Obadia, ug si Obadia amahan ni Shecania. ²² Ang mga kaliwat ni Shecania mao si Shemaya ug ang mga anak niini nga sila si Hatush, Igal, Baria, Nearia, ug Shafat—unom silang tanan. ²³ Ang mga anak ni Nearia mao sila si Elioenai, Hizkia, ug Azrikam—tulo silang tanan. ²⁴ Ang mga anak ni Elioenai mao sila si Hodavia, Eliashib, Pelaya, Akub, Johanan, Delaya, ug Anani—pito silang tanan.

Ang Uban pang mga Kaliwat ni Juda

4 Mao kini ang uban pang mga kaliwat ni Juda: sila si Perez, Hezron, Carmi, Hur, ug Shobal. ² Ang anak ni Shobal nga si Reaya mao ang amahan ni Jahat. Si Jahat mao ang amahan ni Ahumai ug ni Lahad. Sila ang mga katigulangan sa mga Zorahanon.

³ Mao kini ang mga anak^[e] ni Etam: sila si Jezreel, Ishma, ug Idbash. Ang ilang igsoong babaye mao si Hazelelponi.

⁴ Si Penuel amahan ni Gedor, ug si Ezer amahan ni Husha. Kini sila mga kaliwat ni Hur, ang kamagulangang anak ni Efrata. Si Hur mao ang katigulangan sa mga taga-Betlehem.

⁵ Si Ashur nga amahan ni Tekoa may duha ka asawa, si Hela ug si Naara. ⁶ Mao kini ang iyang mga anak kang Naara: sila si Ahuzam, Hefer, Temeni, ug Haahashtari. ⁷ Ang iyang mga anak kang Hela mao sila si Zeret, Izhar,^[f] Etnan, ⁸ ug Koz. Kini si Koz amahan ni Anub ug ni Zobeba, ug siya ang katigulangan sa pamilya ni Aharhel nga anak ni Harum.

⁹ May usa ka tawo nga ginganlag Jabez. Mas tinahod siya kaysa iyang mga igsoong lalaki. Ginganlan siya sa iyang inahan ug Jabez,^[g] kay ingon sa iyang inahan, “Naglisod gayod ako sa pagpanganak kaniya.” ¹⁰ Nagaampo si Jabez sa Dios sa Israel: “Hinaut nga panalanginan mo ako ug palapdon mo ang akong teritoryo. Ubani ako ug ilikay sa mga katalagman aron dili ako masakitan.” Ug gitubag sa Dios ang iyang hangyo.

¹¹ Si Kelub nga igsoon ni Susa amahan ni Mehir. Si Mehir amahan ni Eshton, ug ¹² si Eshton amahan nila ni Bet Rafa, Pasea, ug ni Tehina. Si Tehina amahan ni Ir Nahash.^[h] Sila ang mga kaliwat ni Reca.^[i]

¹³ Ang mga anak ni Kenaz mao si Otniel ug si Seraya. Ang mga anak ni Otniel mao si Hatat ug si Meonotai.^{[j] 14} Si Meonotai amahan ni Ofra. Si Seraya amahan ni Joab. Si Joab ang nagpundar sa Kapatagan sa mga Panday.^[k] Gitawag kini nga Kapatagan sa mga Panday tungod kay didto nagpuyo ang daghang mga panday.

¹⁵ Mao kini ang mga anak ni Caleb nga anak ni Jefune: sila si Iru, Elah, ug Naam. Ang anak ni Elah mao si Kenaz.

¹⁶ Ang mga anak ni Jehalelel mao sila si Zif, Zifa, Tiria, ug Asarel.

^17-18 Ang mga anak ni Ezra mao sila si Jeter, Mered, Efer, ug Jalon. Si Mered may asawa nga si Bitia nga anak sa hari sa Ehipto.^[l] May mga anak sila nga si Miriam, Shamai, ug Ishba. Si Ishba amahan ni Eshtemoa. May asawa usab si Mered nga taga-Juda ug may anak sila nga si Jered (nga amahan ni Gedor), Heber (nga amahan ni Soco), ug si Jekutiel (nga amahan ni Zanoa). ¹⁹ Gipangasawa ni Hodia ang igsoon ni Naham. Ang usa sa ilang mga anak mao ang amahan ni Keila nga Garminhon, ug ang usa mao ang amahan ni Eshtemoa nga Maacatnon.

²⁰ Ang mga anak ni Shimon mao sila si Amnon, Rina, Ben Hanan, ug Tilon.

Ang mga kaliwat ni Ishi mao si Zohet ug si Ben Zohet.

²¹ Mao kini ang mga kaliwat ni Shela nga anak ni Juda: si Er (nga amahan ni Leca), si Laada (nga amahan ni Maresha), ang mga pamilya sa mga trabahante sa buhatanan ug linen sa Bet Ashbea, ²² si Jokim, ang katawhan sa Cozeba, si Joas, ug si Saraf nga nagdumala sa Moab ug Jashubi Lehem. (Kini nga lista gikan sa karaang mga dokumento.) ²³ Sila ang mga magkukolon nga nagpuyo sa Netaim ug Gedera. Nagatrabaho sila alang sa hari.

Ang mga Kaliwat ni Simeon

²⁴ Ang mga anak ni Simeon mao sila si Nemuel, Jamin, Jarib, Zera, ug Shaul. ²⁵ Si Shaul amahan ni Shalum, si Shalum amahan ni Mibsam, ug si Mibsam amahan ni Mishma. ²⁶ Si Mishma amahan ni Hamuel, si Hamuel amahan ni Zacur, ug si Zacur amahan ni Shimei. ²⁷ May 16 ka mga anak nga lalaki si Shimei ug unom ka mga anak nga babaye. Apan gamay ra ang mga anak sa iyang mga igsoon, busa ang ilang tribo dili sama kadaghan sa katawhan sa Juda. ²⁸ Nagpuyo sila sa Beersheba, Molada, Hazar Shual, ²⁹ Bilha, Ezem, Tolad, ³⁰ Betuel, Horma, Ziklag, ³¹ Bet Markabot, Hazar Susim, Bet Biri, ug Shaaraim. Mao kini ang ilang mga lungsod hangtod sa paghari ni David. ³² Nagpuyo usab sila sa lima ka lungsod sa Etam, Ain, Rimon, Token, ug Ashan, ³³ ug lakip usab sa mga baryo sa palibot niini nga mga lungsod hangtod sa Baalat.^[m] Mao kini ang mga dapit nga ilang gipuy-an, ug aduna silay gitipigang listahan sa ilang mga kaliwat.

Mao kini ang uban pa nga mga kaliwat ni Simeon: ³⁴ sila si Meshobab, Jamlec, Josha (nga anak ni Amazia), ³⁵ Joel, Jehu (nga anak ni Joshibia ug apo ni Seraya, ug apo sa tuhod ni Aziel), ³⁶ Elioenai, Jaakoba, Jeshohaya, Asaya, Adiel, Jesimiel, Benaya, ³⁷ ug Ziza (nga anak ni Shifi ug apo ni Alon, ug apo sa tuhod ni Jedaya. Kini si Jedaya anak ni Shimri ug apo ni Shemaya). ³⁸ Kini sila mga pangulo sa ilang mga pamilya. Midaghan pag-ayo ang ilang mga kaliwat, ³⁹ busa nakaabot sila hangtod sa Gedor, ngadto sa sidlakang bahin sa kapatagan, aron sa pagpangitag sabsabanan sa ilang mga karnero. ⁴⁰ Nakakita sila didto ug labong ug maayo nga sabsabanan. Halapad kini nga dapit ug malinawon. Didto nagpuyo kaniadto ang ubang mga kaliwat ni Ham. ⁴¹ Apan niadtong panahon nga si Hezekia ang hari sa Juda, gisulong sila sa mga kaliwat ni Simeon kansang mga ngalan nahisgotan sa ibabaw. Giapil pagsulong sa mga kaliwat ni Simeon ang mga Meunhon nga didto usab namuyo, ug gilaglag sa hingpit.^[n] Unya mipuli pagpuyo sa maong dapit ang mga kaliwat ni Simeon, tungod kay may sabsabanan didto alang sa ilang mga karnero. ⁴² Misulong ang 500 kanila sa kabungtoran sa Seir. Gipangulohan sila ni Pelatia, Neria, Refaya, ug Uziel, nga mga anak ni Ishi. ⁴³ Gipatay nila ang nahibiling mga Amalekanhon didto, ug sila nay nagpuyo didto hangtod karon.

Ang mga Kaliwat ni Reuben

5 Si Reuben mao ang kamagulangan nga anak ni Israel.^[o] Apan tungod kay nakighilawas si Reuben sa usa sa mga asawa sa iyang amahan, ang iyang katungod isip kamagulangan gihatag ngadto sa mga anak sa iyang igsoon nga si Jose. Busa wala ilista si Reuben sa listahan sa ilang mga kaliwat ingon nga kamagulangan nga anak. ² Ug bisag gamhanan si Juda kaysa iyang mga igsoon ug ang pangulo naggikan sa iyang tribo, ang katungod isip kamagulangan gihatag ngadto kang Jose. ³ Mao kini ang mga anak ni Reuben, ang kamagulangang anak ni Israel: sila si Hanoc, Palu, Hezron, ug Carmi.

⁴ Mao kini ang mga kaliwat ni Joel: sila si Shemaya, Gog, Shimei, ⁵ Micas, Reaya, Baal, ⁶ ug Beera. Si Beera ang pangulo sa mga kaliwat ni Reuben sa dihang gibihag sila ni Tiglat Pileser nga hari sa Asiria. ⁷ Mao kini ang mga paryente ni Beera nga nalista sa listahan sa ilang mga kaliwat. Gilista sila sumala sa ilang tribo: si Jeil (ang pangulo), si Zacarias, ⁸ ug si Bela nga anak ni Azaz. Kini si Azaz anak ni Shema ug apo ni Joel. Kini nga mga kaliwat ni Reuben nagpuyo sa mga dapit sa Aroer hangtod sa Nebo ug Baal Meon. ⁹ Ug tungod kay midaghan ang ilang kahayopan didto sa Gilead, nakaabot sila hangtod sa sidlakan, sa utlanan sa disyerto paingon sa Suba sa Eufrates. ¹⁰ Sa panahon ni Haring Saul, nakiggira sila sa mga Hagarnon ug gipildi nila kini. Gisakop nila ang mga dapit sa mga Hagarnon sa tibuok sidlakang bahin sa Gilead.

Ang mga Kaliwat ni Gad

¹¹ Nagpuyo ang mga kaliwat ni Gad sa kayutaan sa Basan hangtod sa Saleca. Kasikbit kini sa kayutaan sa mga kaliwat ni Reuben. ¹² Mao kini ang mga kaliwat ni Gad: si Joel, nga mao ang pangulo sa Basan, ang sunod kaniya mao si Shafam, unya si Janai ug si Shafat. ¹³ Ang ilang mga paryente sumala sa tagsa-tagsa nila ka pamilya mao sila si Micael, Meshulam, Sheba, Jorai, Jacan, Zia, ug Eber—pito silang tanan. ¹⁴ Sila ang mga kaliwat ni Abihail nga anak ni Huri. Si Huri anak ni Jaroa ug apo ni Gilead, ug apo sa tuhod ni Micael. Kini si Micael anak ni Jeshishai ug apo ni Jado, ug apo sa tuhod ni Buz. ¹⁵ Si Ahi nga anak ni Abdiel ug apo ni Guni mao ang pangulo sa ilang mga pamilya. ¹⁶ Nagpuyo sila sa Gilead, didto sa Basan, ug sa mga baryo sa palibot niini, ug sa tibuok sabsabanan sa Sharon. ¹⁷ Kini silang tanan nalista sa listahan sa mga kaliwat niadtong panahon sa paghari ni Jotam sa Juda ug ni Jeroboam sa Israel.

¹⁸ May 44,760 ka mga sundalo sa tribo ni Reuben, Gad, ug sa katunga sa tribo ni Manase. Gibansay sila alang sa gira ug hanas silang mogamit ug mga taming, espada, ug pana. ¹⁹ Nakiggira sila sa mga Hagarnon, Jeturnon, Nafishnon, ug Nodabnon. ²⁰ Nangayo sila ug tabang sa Dios sa dihang nakiggira sila, ug gitubag sa Dios ang ilang pag-ampo tungod kay misalig sila kaniya. Busa gipadaog sila sa Dios batok sa mga Hagarnon ug sa tanang mga kaabin niini. ²¹ Gipanguha nila ang kahayopan sa mga Hagarnon: 50,000 ka mga kamelyo, 250,000 ka mga karnero, ug 2,000 ka mga asno. Gibihag usab nila ang 100,000 ka mga tawo, ²² ug daghan ang ilang napatay tungod kay gitabangan sila sa Dios sa pagpakiggira. Ug mipuyo sila sa mga dapit sa mga Hagarnon hangtod nga gibihag sila ngadto sa Asiria.

Ang Katunga sa Tribo ni Manase

²³ Ang katunga sa tribo ni Manase nagpuyo sa kayutaan gikan sa Basan paingon sa Baal Hermon, sa Senir, ug sa Bukid sa Hermon. Daghan kaayo sila. ²⁴ Mao kini ang mga pangulo sa ilang mga pamilya: sila si Efer, Ishi, Eliel, Azriel, Jeremias, Hodavia, ug Jadiel. Mga maisog sila nga mga sundalo ug bantogan nga mga pangulo sa ilang mga pamilya. ²⁵ Apan wala sila magmatinumanon sa Dios sa ilang mga katigulangan. Misimba hinuon sila sa mga dios sa mga katawhan niadtong yutaa nga gilaglag sa Dios. ²⁶ Busa gisugo sa Dios sa Israel nga sulongon sila ni Pul (gitawag usab ug Tiglat Pileser) nga hari sa Asiria. Gibihag ni Pul ang mga tribo ni Reuben, Gad, ug ang katunga sa tribo ni Manase, ug gidala sa Hala, Habor, Hara, ug sa Suba sa Gozan, diin atua sila hangtod karon.