Chronological

⁶ हे यहोवा, सारी रात मइँ तोहका पुकारत रहत हउँ।
    मोर बिछउना मोरे आँसुअन स भीज गवा ह।
मोरे बिछउना स आँसू टपकत रहत हीं।
    तोहरे बरे मइँ रोवत भवा छीन होइ गवा हउँ।
⁷ मोर दुस्मनन मोका बहुतेरा दुःख दिहन।
    इ मोका सोक मँ डाइके अउर बहोत दुःखी कइ डाएन अउर अब मोर अँखियन बिलखइ स थकी भइ हारी अउर दुर्बल अहइँ।

⁸ अरे ओ दुर्जन लोगो, तू मोसे दूर हटा।
    काहेकि यहोवा मोका रोवत भवा सुनि लिहस ह।
⁹ मोर बिनती यहोवा क काने तलक पहोंच चुकी बाटइ
अउर मोरी पराथना क सुनिके यहोवा जवाब दइ दिहस ह।

¹⁰ मोर सबहिं दुस्मनन डर जाईं अउ निरास होइहीं।
    कछू अचानक ही घटित होइ अउर उ फुन स अपमानित कीन्ह जाइहीं।

² लरिकन अउ नान्ह गदेलन क मुँहन स, तोहरी बड़कइ क गीत गावा जात हीं।
    तू आपन दुस्मनन क चुप करावइ मँ अइसा करत ह।

³ हे यहोवा, जब मोर निगाह अकासे पइ पड़त ह, जेका तू आपन हाथे स रच्या ह।
    अउर जब मइँ चाँद तारन क लखत हउँ जउन तोहार रचना बाटइ, तउ मइँ अचम्भा स भरि जात हउँ।
⁴ मनइयन तोहरे बरे काहे ऍतना महत्वपूर्ण होइ गएन?
    तू ओनका काहे बरे सुमिरत अहा?
मनई क पूत तोहरे बरे काहे महत्वपूर्ण बाटइ?
    काहे तू ओन पइ धियान तलक देत अहा?

⁵ मुला तोहरे बरे मनई महत्वपूर्ण अहइ!
    तू मनई क देवता क प्रतिरूप बनाया ह, अउ ओनके मूँड़े पइ महिमा अउ सम्मान क मुकुट धरे अहा।
⁶ तू आपन सृस्टि क जउन कछू भी रच्या ह
    मनइयन क ओकर हकदार बनाया ह।
⁷ मनई भेड़िन पइ, गोरू धने पइ अउ जंगल क सबहिं हिंसक जन्तुअन पइ राज्ज करत ह।
⁸ उ अकासे मँ पंछियन पइ
    अउ समुद्दर मँ तैरत भए जलचरन पइ राज्ज करत ह।
⁹ हे यहोवा, हमार सुआमी, सारी धरती पइ तोहार नाउँ बहोतइ अद्भुत अहइ।

⁴ तू सच्च निआव करवइया अहा।
    तू आपन सिंहासन पइ निआव करवइया क रूप मँ बिराजा।
    तू मोरे मुकदमा क सुनवाई किह्या अउर मोर निआव किहा।
⁵ हे यहोवा, तू ओन दुस्मनन क कठोर झिड़की दिहा अउ हे यहोवा,
    तू ओन दुस्टन क नास किहा।
    ओनकइ नाउँ तू जिअत मनइयन क सूची स हमेसा हमेसा बरे मेट दिहा।
⁶ दुस्मन नस्ट होइ गवा ह!
    हे यहोवा, तू ओनकर नगर मेट दिहा ह।
    ओनकर भवन अब सिरिफ खण्डहर होइ गवा अहइँ
    ओन बुरे मनइयन क हम पचन्क सुमरन तलक दिआवइ क कछू भी नाहीं बचा बाटइ।

⁷ मुला यहोवा, तोहार सासन अविनासी अहइ।
    यहोवा आपन राज्ज क सक्तीसाली बनाएस।
    उ दुनिया मँ निआव लिआवइ बरे इ किहस।
⁸ यहोवा धरती क सबहिं मनइयन क निस्पच्छ होइके निआव करत ह।
    यहोवा सबहिं जातियन क बे पच्छपात क निआव करत ह।
⁹ यहोवा दलित अउ सोसितन क
    सरण क ठउर अहइ।
विपत्ति क समइ
    उ एक सुदृढ़ किला अहइ।

¹⁰ जउन तोहे पइ भरोसा राखत हीं,
    तोहार नाउँ जानत हीं।
हे यहोवा, अगर कउनो तोहरे दुआरे पइ आइ जाइ
    तउ बिना मदद पाए लउटत नाहीं।

¹¹ अरे ओ सिय्योन क निवासी लोगो यहोवा क गीत गावा जउन सिय्योन मँ विराजत अहइ।
    सबहिं जातियन क ओन बातन क विसय मँ बतावा जउन बड़की बातन यहोवा कहेस ह।
¹² यहोवा हत्यारन क सज़ा देत ह
    अउर ओनका याद रखत ह जउन ओकरे लगे मदद बरे जात ह।
उ दीन लोगन क नाहीं भूलत
    जउन ओकरे लगे सहायता बरे रोवत अहइँ।

¹³ यहोवा क स्तुति मइँ गाएउँ ह: “हे यहोवा, मोहे पइ दाया करा।
    लखा, कउने तरह मोरे सत्रु मोका दुःख देत हीं।
    ‘मउत क दुआर’ स तू मोका बचाइ ल्या।
¹⁴ जेहसे यहोवा यरूसलेम क फाटक पइ मइँ तोहार स्तुति क गीत गाइ सकउँ।
    मइँ बहोतइ प्रसन्न होब काहेकि तू मोका बचाइ लिहा।”

¹⁵ दूसर जातियन गड़हा खोदेन जेहसे लोग ओनमाँ भहराइ जाइँ मुला उ पचे आपन ही खने भए गड़हन मँ खुद बिलाइ जइहीं।
    दुट्ठ लोग जालि छुपाइ छुपाइके बिछाएन, जेहसे उ पचे ओहमाँ दूसर लोगन क फाँसि लेइँ।
    मुला ओनमाँ ओनकर ही गोड़ धँसि गएन।
¹⁶ यहोवा जउन निआव किहस उ ओहसे पहिचाना गवा कि जउन बुरा करम करत हीं।
    उ पचे आपन ही हाथन स कीन्ह भए करम स जाँलि मँ फँस गएन। (हिग्गायोन, सेला)

¹⁷ उ पचे दुर्जन होत हीं, जउन परमेस्सर क बिसरत हीं।
    अइसे लोग मउत क देस जइहीं।
¹⁸ कबहुँ कबहुँ लागत ह जइसे परमेस्सर दुखियन क पीरा मँ बिसरि जात ह।
    इ अइसा लागत ह जइसे दीन लोग बिना आसा क अहइँ।
    मुला परमेस्सर दीन लोगन क हमेसा हमेसा बरे कबहुँ नाहीं बिसरत।

¹⁹ हे यहोवा, उठा अउ रास्ट्रन क निआव करा।
    कहूँ उ पचे इ सोच न बइठइँ उ पचे प्रबल अउ सक्तीसाली बाटेन।
²⁰ मनइयन क पाठ सिखाइ द्या,
    जेहसे उ पचे जान जाइँ कि उ पचे बस सिरिफ मनई अहइँ।

¹ हे यहोवा, तू ऍतना दूर काहे खड़ा रहत ह?
    कि संकट मँ पड़ा लोग तोहका निहारि नाहीं पउतेन।
² अहंकारी दुट्ठ जन दुर्बल क दुःख देत हीं।
    उ पचे आपन सड़यन्त्र क रचत रहत हीं।
³ दुट्ठ जन ओन चिजियन पइ घमण्ड करत हीं, जेनकर ओनका गहरी इच्छा अहइ
अउ लालची मनई परमेस्सर क कोसत रहत हीं।
    इ तरह दुट्ठ देखाँवत हीं कि उ पचे यहोवा स घिना करत रहत हीं।
⁴ दुट्ठ लोग ऍतना घमण्डी होत हीं कि उ पचे परमेस्सर क पाछे नाहीं चल सकतेन।
    उ पचे खराब खराब जोजना रचत हीं।
    उ पचे अइसा करम करत हीं, जइसे परमेस्सर क कउनो अस्तित्व ही न बाटइ।
⁵ दुट्ठ जन सदा कुटिल करम करत हीं।
    उ पचे परमेस्सर क विवेक स पूरी व्यवस्था अउ सिच्छन पइ धियान नाहीं देतेन।
    हे परमेस्सर, तोहार सबहिं दुस्मन तोहरे उपदेसन क उपेच्छा करत हीं।
⁶ उ पचे सोचत हीं, जइसेन कउनो बुरी बात ओनके संग नाहीं घटि जाइ।
    उ पचे कहत रहत हीं, “हम पचे मउज मँ रहब अउ कबहुँ भी दण्डित नाहीं होब।”
⁷ अइसेन दुट्ठ क मुँह सदा साप देत रहत ह।
    उ पचे दूसर जन क निन्दा करत हीं अउर काम मँ लिआवइ क सदा ही बुरी बुरी जोजना रचत रहत हीं।
⁸ अइसे लोग गुप्त ठउरन मँ लुकान रहत हीं,
    अउर लोगन क फँसावइ क प्रतीच्छा करत हीं।
    उ पचे लोगन क नस्कान पहुँचावइ खातिर लुकान रहत हीं अउ निरपराधी लोगन क हत्या करत हीं।
⁹ दुट्ठ जन सिंह क नाई होत हीं जउन ओन गोरूअन क धरइ क घात मँ रहत हीं।
    जेनका उ पचे खाइ जइहीं।
दुट्ठ जन दीन लोगन पइ मार करत हीं
    ओनकर बनाए भए जालि मँ बेसहारा दीन फँसि जात हीं।
¹⁰ दुट्ठ जन बार-बार दीनन पइ घात करत
    अउ ओनका दुःख देत ह।
¹¹ एह बरे दीन जन सोचइ लागत हीं, “परमेस्सर हमका बिसराइ ही दिहस।
    हमसे तउ परमेस्सर सदा-सदा बरे दूर होइ गवा बाटइ।
    उन कछू भी मोरे संग घटत अहइ, ओहसे परमेस्सर दृस्टि फेरि लिहस ह!”

¹² हे यहोवा, उठा अउर कछू तउ करा!
    हे परमेस्सर, ओन दुट्ठ जनन क आपन हाथ उठाइके सजा द्या!
    अउर ऍन दीन दुःखियन क जिन बिसरा।

¹³ दुट्ठ जन काहे परमेस्सर क खिलाफ होत हीं?
    काहेकि उ पचे सोचत हीं कि परमेस्सर ओनका कबहुँ नाहीं दण्डित करी।
¹⁴ हे यहोवा, तू ही अहइ जउन बुरे लोगन दुआरा कीन्ह भावा अत्याचार अउर बुरे कामन क कउनो स भी जियादा लखत ह।
    तू एकर बारे मँ कछू कदम उठा।
दुःखन स घिरा लोग मदद माँगइ तोहरे लगे आवत हीं।
    हे यहोवा, सिरिफ तू ही अनाथ लोगन क सहायक अहा, एह बरे ओनकर रच्छा करा।

¹⁵ हे यहोवा, दुट्ठ जनन क तू नस्ट कइ द्या।
¹⁶ तू ओनका आपन धरती स
    ढकेलिके बाहेर करा!
¹⁷ हे यहोवा, दीन दुःखी लोग जउन चाहत हीं उ तू सुनि लिहा।
    ओनकर पराथना सुना अउर ओनका पूरा करा जेनका उ पचे माँगत हीं।
¹⁸ हे यहोवा, अनाथ गदेलन क तू रच्छा करा।
    दुःखी लोगन क अउर जियादा दुःख जिन पावइ द्या।
    दुट्ठ लोगन क तू ऍतना भयभीत कइ द्या कि उ पचे हिआँ न टिक पावइँ।

² यहोवा अकासे स मनइयन क लखत ह,
    कि कउनो बुद्धिमान मनई ओका मिलि जाइ।
    बुद्धिमान मनई परमेस्सर कइँती मदद पावइ बरे मुड़ि जात ह।
³ मुला परमेस्सर स मुड़िके सबहिं दूर होइ ग अहइँ।
    आपुस मँ मिलिके सबहिं लोग पापी होइ ग अहइँ।
कउनो भी मनई नीक काम
    नाहीं करत अहइ।

⁴ मोरे मनइयन क दुष्ट लोग नस्ट कइ दिहन।
उ सबइ दुर्जन परमेस्सर क नाहीं जनतेन।
    दुस्टन क लगे खाइ बरे भरपूर भोजन बाटइ।
    इ सबइ लोग यहोवा क उपासना तलक भी नाहीं करतेन।
^5-6 इ सबइ दुस्ट मनई निर्धन क राय सुनइ नाहीं चाहतेन।
    अइसा काहे अहइ? काहेकि दीन लोग तउ परमेस्सर पइ निर्भर अहइँ।
मुला दुट्ठ लोगन पइ भय छाइ गवा अहइ।
    काहेकि परमेस्सर खरे लोगन क संग अहइ।

⁷ सिय्योन पइ कउन जउन इस्राएल क बचावत ह? उ तउ यहोवा अहइ,
    जउन इस्राएल क रच्छा करत ह!
यहोवा क मनइयन क दूर लइ गवा जवा अउर ओनका दबाव डाइके बन्दी बनावा गवा।
    मुला यहोवा आपन मनइयन क वापिस छुड़ाइ लिआइ।
    तब याकूब बहोतइ खुस होइ।

⁴ मुला जउन दूसर देवतन क पाछे ओनकर पूजा बरे परात हीं, उ पचे दुःख उठइहीं।
    ओन मूरतियन क जउन रकत अर्पण कीन्ह गवा, ओनकर ओन बलियन मँ मइँ हीसां नाहीं लेब।
    मइँ ओन मूरतियन क नाउँ तलक नाहीं लेब।
⁵ नाहीं, बस मोर हींसा यहोवा मँ अहइ।
    बस यहोवा स ही मोर अंस अउर मोर पात्र आवत ह।
    हे यहोवा मोका सहारा द्या अउर मोर हींसा द्या।
⁶ मोर हींसा बहोतइ अद्भुत अहइ।
    असल मँ मोरे लगे बहोत स सुन्नर उत्तराधिकार अहइ।
⁷ मइँ यहोवा क गुण गावत हउँ काहेकि उ मोका गियान दिहस।
    मोरे अन्तर्मन स राति मँ सिच्छन निकरिके आवत हीं।

⁸ मइँ यहोवा क सदा ही आपन सम्मुख राखत हउँ।
    मइँ ओकर दाहिने छोर
    कबहुँ नाहीं छोड़ब।^[a]
9 इहइ स मोर मन अउर मोर आतिमा बहोतइ आनन्दित होइ
    अउर मोरी देह तलक सुरच्छित रही।
¹⁰ काहेकि, यहोवा, तू मोर प्राण कबहुँ भी मउत क जगह मँ न तजी।
    तू आपन वफ़दार क कब्र मँ सड़इ नाहीं देब्या।
¹¹ तू मोका जिन्नगी क राह देखउब्या
    जउन मोका तोहार मौजूदगी मँ पूरा आनन्द देत ह।
    तोहार दाहिन कइँती होब मोका सदा सदा ही आनन्द देइ।

ओनमाँ उ सूरज बरे एक घर जइसा तय्यार किहस ह।
⁵     सूरज नवखिल दुल्हा क नाई आपन सयन कच्छ स निकरत ह।
सूरज आपन राहे पइ अकास क पार करइ निकरि पड़त ह,
    जइसे कउनो खिलाड़ी आपन दउड़ पूरी करइ बरे तइयार होइ।
⁶ अकासे क एक छोर स सूरज चल पड़त ह अउर ओह पार पहोंचइ क, उ सारी राह दउड़त रहत ह।
    अइसी कउनो वस्तु नाहीं जउन आपन क ओकरी गर्मी स छुपाइ लेइ।
    यहोवा क उपदेस भी अइसेन ही होत हीं।

⁷ यहोवा क सिच्छन सम्पूर्ण होत हीं,
    इ सबइ भक्त जनन क सक्ती देत हीं।
यहोवा क करार पइ भरोसा कीन्ह जाइ सकत ह।
    जेनके लगे बुद्धि नाहीं अहइ इ ओनका सुबुद्धि देत ह।
⁸ यहोवा क नेम निआव स पूरा होत हीं,
    उ सबइ लोगन्क खुसी स भरि देत हीं।
यहोवा क आदेस उत्तिम अहइँ,
    उ सबइ मनइयन क जिअइ क नई राह देखाँवत हीं।

⁹ यहोवा क आराधना प्रकास जइसी होत ह,
    इ तउ सदा सर्वदा जोति स भरी रही।
यहोवा क निआव निस्पच्छ होत हीं,
    उ सबइ पूरी तरह निआव स पूरा होत हीं।
¹⁰ यहोवा क उपदेस उत्तिम सुबरन अउ कुन्दन स भी बढ़िके मनोहर अहइँ,
    उ सबइ उत्तिम सहद स भी जियादा मधुर अहइँ, जउन सोझ सहद क छत्ता स टपक आवत ह।
¹¹ हे यहोवा, तोहार उपदेस तोहरे सेवक क आगाह करत हीं।
    अउर जउन ओनकइ पालन करत हीं ओनका तउ बरदान मिलत ह।

¹² हे यहोवा, आपन सबहिं दोसन क कउनो नाहीं लख पावत।
    एह बरे तू मोका ओन पापन्स बचावा जउन एकान्त मँ छुपिके कीन्ह जात हीं।
¹³ हे यहोवा, मोका ओन पापन्क करइ स बचावा जेनका मइँ करइ चाहत हउँ।
    ओन पापन्क मोह पइ सासन न करइ द्या।
अगर तू मोका बचावत ह तउ मइँ इमानदारी स भरि भवा होइ सकत हउँ
    अउ बहोत सारा पापन्स मुक्त होइ सकत हउँ।
¹⁴ मोका आसा अहइ कि, मोर वचन अउ चिंतन तोहका प्रसन्न करिहीं।
    हे यहोवा, तू मोर चट्टान, अउर मोर बचावइवाला अहा।

³ हे यहोवा, सचमुच तू बहोत आसीस राजा क दिह्या।
    ओकरे मूँड़े पइ तू सुवर्ण क मुकुट धइ दिह्या।
⁴ उ तोहसे जिन्नगी क भीख माँगेस अउर तू ओका इ दइ दिह्या।
    परमेस्सर, तू सदा सर्वदा बरे राजा क अमर जीवन दिह्या।
⁵ तू रच्छा किहा तउ राजा क महा वैभव मिल गवा।
    तू ओका आदर अउ प्रसंसा दिहा।
⁶ हे परमेस्सर, सचमुच तू राजा क सदा सर्वदा बरे, आसीर्वाद दिहा।
    जब राजा क तोहार दर्सन मिलत ह, तउ उ बहोत खुस होत ह।
⁷ राजा क सचमुच यहोवा पइ भरोसा अहइ,
    तउ परमेस्सर ओका निरास नाहीं करी।
⁸ हे परमेस्सर! तू देखाँइ द्या आपन सबहिं दुस्मनन क कि तू खूब मजबूत अउ सक्तीसाली अहा।
    जउन तोहसे घिना करत हीं तोहार सक्ती ओनका हराइ देइ।
⁹ हे यहोवा, जब तू राजा क साथ होत अहा
    तउ उ भभकत भार जइसा होइ जात ह,
जउन सब कछू भसम करत ह।
    ओकर किरोध क आगी आपन सबहिं दुस्मनन क भसम कइ देत ह।
¹⁰ परमेस्सर क दुस्मनन क बंस नस्ट होइ जइहीं,
    धरती क ऊपर स उ सब मिटिहीं।
¹¹ अइसा काहे भवा? काहेकि यहोवा, तोहरे खिलाफ ओन मनइयन सड़यन्त्र रचे रहेन।
    उ पचे बुरा करइ क जोजना रचे रहेन, मुला उ पचे ओहमाँ सफल नाहीं भएन।
¹² यहोवा जब तू ओन लोगन पइ आपन तीर स निसाना साध्या,
    तउ तू ओनका पीछे घुमाई दिहा अउर भगाइ दिहा।^[a]

¹³ यहोवा क अउर ओकर सक्ती क गुण गावा आवा हम पचे गाई
    अउर ओकरे गीतन क बजाई जउन ओकर गरिमा स जुर ग अहइँ।