Chronological

³ हे मोर यहोवा परमेस्सर, कउनो पाप करइ क मइँ दोखी नाहीं हउँ मइँ तउ कउनो भी पाप नाहीं किहेउँ।
⁴ मइँ आपन मीतन क संग बुरा नाहीं किहेउँ
    अउर आपन मीत क दुस्मनन क भी मइँ मदद नाहीं किहेउँ।
⁵ मुला एक दुस्मन मोका पाछे खदेरत बाटइ उ मोर हत्या करइ-चाहत ह।
    उ दुस्मन चाहत ह कि मोर जिन्नगी क धरती पइ रउँद डावइ
    अउर मोर आतिमा क धूरि मँ मिलाइ देइ।

⁶ यहोवा उठा, अउर आपन किरोध मोर दुस्मन क बिरुद्ध परगट करा।
    मोरे बरे निआव करा
    जेकर माँग तू हमेसा करत रहा ह।
⁷ हे यहोवा, मनइयन क निआउ करा।
    आपन चारिहुँ कइँती क रास्ट्र क बटोरा अउ मनइयन क निआव करा।
⁸ हे यहोवा, आपन निआव क कुर्सी पइ बइठा।
    आपन निअरे क देसन क इकट्ठा करा अउर ओनका निआव करा
    यहोवा मइँ निर्दोख अहउँ, मोका निआव द्या जेका मइँ हकदार अहउँ।
⁹ दुर्जन क दण्ड द्या अउर सज्जन क मदद करा।
    हे परमेस्सर, तू उत्तिम अहा।
तू अन्तर्जामी अहा।
    तू तउ मनइयन क हिरदइ मँ निहारि सकत अहा।

¹⁰ जेनकर मन सच्चा अहइँ, परमेस्सर ओन मनइयन क मदद करत ह।
    एह बरे उ मोर भी मदद करी।
¹¹ परमेस्सर उत्तिम निआवकर्ता अहइ।
    उ कबहुँ भी आपन किरोध परगट कइ देइ।
¹² परमेस्सर जब कउनो निर्णय लइ लेत ह,
    तउ फिन आपन मन नाहीं फेरत।
¹³ ओहमाँ मनइयन क सजा देइ क छमता बाटइ।
    उ मउत क सब सामान साथे रखे बाटइ।

¹⁴ कछू अइसे लोग होत हीं जउन हमेसा कुकर्मन क जोजना बनावत रहत हीं।
    अइसेन ही लोग गुप्त सड्यन्त्र रचत रहत हीं।
    अउर झूठ बोलत रहत हीं।
¹⁵ उ पचे दूसर लोगन क जालि मँ फाँसइ अउर नोस्कान पहुँचावइ क जतन करत रहत हीं।
    मुला आपने ही जालि मँ फँसिके उ पचे नोस्कान उठइहीं।
¹⁶ उ पचे आपन ही कर्मे क उचित सजा पइहीं।
    उ पचे दूसर लोगन क संग क्रूर रहेन।
    मुला जइसे ओनका चाही वइसेन ही फल पइहीं।

¹⁷ मइँ यहोवा क जस गावत हउँ, काहेकि उ उत्तिम अहइ।
    मइँ यहोवा क सबन त ऊँच नाउँ क बड़कइ करत हउँ।

⁴ मइँ यहोवा स सिरिफ एक बर माँगइ चाहत हउँ,
    “मइँ आपन जिन्नगी भइ यहोवा क मन्दिर मँ बइठा रहउँ,
ताकि मइँ यहोवा क सुन्दरता क लखउँ,
    अउर ओकरे मन्दिर मँ धियान करउँ।”

⁵ जब कबहुँ कउनो बिपत्ति मोका घेरी, यहोवा मोर रच्छा करी।
    उ मोका आपन तम्बू मँ छुपाइ लेइ।
    उ मोका आपन सुरच्छित जगह पइ ऊपर उठाइ लेइ।
⁶ मोका मोर दुस्मनन घेरि रखे अहइँ।
    मुला अब ओनका पराजित करइ मँ यहोवा मोर सहारा होइ।
मइँ ओकरे तम्बू मँ फुन भेंट चढ़ाउब।
    जय जयकार कइके बलियन अर्पित करब।
    मइँ यहोवा क स्तुति बरे भजन गाउब अउर बजाउब।

⁷ हे यहोवा, मोर पुकार सुना, मोका जवाब द्या।
    मोह पइ दयालु रहा।
⁸ मोर हिरदइ कहत ह, “जा, ओकरे दर्सन बरे जा।”
    एह बरे यहोवा मइँ तोहसे बात करउँ बरे तोहार समन्वा आवा हउँ।
⁹ हे यहोवा, किरोध मँ आपन सेवक स जिन मोड़या!
    एक जउन मोर मदद कइ सकत ह उ तू अहा।
    मोका अकेल्ला जिन छोड़्या!
मोका जिन त्यागा।
    परमेस्सर जउन मोका बचाइ सकत ह उ तू अहा!
¹⁰ मोर महतारी अउ मोर बाप मोका तजि दिहन,
    पर यहोवा मोका अंगीकार किहस अउर आपन बनाइ लिहस।
¹¹ हे यहोवा, मोरे दुस्मनन क कारण, मोका आपन मारग देखावा।
    मोका नीक काम क सिच्छा द्या।
¹² मोह पइ मोर दुस्मनन हमला किहे अहइँ।
    उ पचे मोरे बरे झूठ बोलेन ह।
    उ पचे मोका नस्कान पहोंचावइ बरे झूठ बोलेन।
¹³ मोका भरोसा अहइ
    कि मरइ स पहिले मइँ फुरइ यहोवा क धरम भावना क लखउँ।
¹⁴ यहोवा क मदद क बाट जोहत रहा!
    साहसी अउ सुदृढ़ बना रहा
    अउर यहोवा क मदद क प्रतीच्छा करत रहा।

¹⁴ हे यहोवा, मोर भरोसा तोहे पइ अहइ।
    तू मोर परमेस्सर अहा।
¹⁵ मोर जिन्नगी तोहरे हाथन मँ अहइ।
    मोरे दुस्मनन स मोका बचाइ ल्या।
    ओन लोगन स मोर रच्छा करा, जउन मोरे पाछे पड़ा अहइँ।
¹⁶ कृपा कइके आपन दास क अपनाइ ल्या।
    मोह पइ दाया करा अउर मोर रच्छा करा।
¹⁷ हे यहोवा, मइँ तोहार बिनती किहेउँ।
    एह बरे मइँ निरास नाहीं होब।
बुरे मनइयन तउ निरास होइ जइहीं।
    अउर उ पचे कब्र मँ नीरव चला जइहीं।
¹⁸ दुर्जन लोग डींग हाँकत हीं
    अउर सज्जन क बारे मँ झूठ बोलत हीं।
उ सबइ दुर्जन बहोत ही अभिमानी होत हीं।
    मुला ओनके होंठ जउन झूठ बोलत रहत हीं, बिना सब्दन क होइहीं।

¹⁹ हे परमेस्सर, तू आपन भगतन बरे बहोत स अजूबा चीजन क छुपाइके धरे अहा।
    तू सबन्क समन्वा अइसे मनइयन बरे जउन तोहार बिस्सासी अहइँ,
    भला काम करत अहा।
²⁰ दुर्जन लोग सज्जनन क नस्कान पहोंचावइ क बरे जुट जात हीं।
    उ सबइ दुर्जन लड़ाइ भड़कावइ क जतन करत हीं।
    मुला तू सज्जनन क ओनसे छुपाइ लेत अहा, अउर ओनका बचाइ लेत अहा।
    तू सज्जन लोगन क रच्छा आपन सरण मँ करत अहा।
²¹ यहोवा क स्तुति करा।
    जब नगर क दुस्मन लोग घेर लिहे रहेन, तब उ आपन सच्चा पिरेम अजूबी रीति स देखाँएस।
²² मइँ डेरान रहेउँ, अउर मइँ कहे रहेउँ, “मइँ तउ अइसे जगह पइ हउँ जहाँ मोका परमेस्सर नाहीं देख सकत ह।”
    मुला हे परमेस्सर, मइँ तोहार बिनती किहेउँ, अउर तू मोर सहायता क पुकार सुनि लिहा।

²³ परमेस्सर क भगतन, तोहका यहोवा स पिरेम करइ चाही।
    यहोवा ओन लोगन क जउन ओकरे बरे सच्चा अहइँ, रच्छा करत ह।
मुला यहोवा ओनका जउन आपन ताकत क ढोल पीटत हीं।
    ओनका उ वइसा ही दण्ड देत ह, जइसा दण्ड ओनका मिलइ चाही।
²⁴ अरे ओ मनइयो जउन यहोवा क मदद बरे प्रतीच्छा करत अहा,
    सुदृढ अउ हिम्मती बना!

¹⁷ यहोवा स बिनती करा, उ तोहार सुनी।
    उ तू पचन्क तोहरी सबहिं मुसीबतन स बचाइ लेइ।
¹⁸ लोगन पइ मुसीबत आइ सकत हीं अउर उ पचे अभिमानी होब तजि देत हीं।
    यहोवा ओन लोगन क निअरे रहत ह।
    जेनकर टूटा मन अहइँ ओनका उ बचाइ लेइ।
¹⁹ होइ सकत ह सज्जन भी बिपदन मँ घिर जाइँ।
    मुला यहोवा ओन सज्जन लोगन क ओनकर हर समस्या स रच्छा करी।
²⁰ यहोवा ओनकइ सब हाड़न क रच्छा करी।
    ओनकर एक भी हाड़ नाहीं टूटी।
²¹ दुट्ठता दुटठ लोगन बरे मउत लावत ह।
    सज्जन क विरोधी नस्ट होइ जइहीं।
²² यहोवा आपन हर दास क आतिमा बचावत ह।
    जउन लोग ओह पइ भरोसा रखत हीं, उ ओन लोगन क नस्ट नाहीं होइ देइ।

⁴ तोहका अउ तोहरी झूठी जीभ क, लोगन क हानि पहोंचाउब नीक लागत ह।
⁵ तोहका परमेस्सर सदा बरे नस्ट कइ देइ।
    उ तोह पइ झपटी अउर तोहका धरिके घरे से बाहेर करी।
    उ तोहका मारी अउ तोहार कउनो भी संतान नाहीं रही।

⁶ सज्जन लोग ऍका लखिहीं
    अउ परमेस्सर स डेराब अउर ओकर आदर करब सिखिहीं।
उ पचे तोह पइ, जउन घटा ओह पइ हँसिहीं अउर कइहीं,
⁷     “लखा उ मनई क संग का भवा जउन यहोवा पइ निर्भर नाहीं रहा।
    उ मनई सोचेस कि ओकर धन अउर झूठ ऍकर रच्छा करिहीं।”

⁸ मुला मइँ परमेस्सर क मन्दिर मँ एक ठु हरिअर जइतून क बृच्छा जइसा अहउँ।
    मोर परमेस्सर क बिस्सासी पिरेम मँ सदा-सदा बरे भरोसा अहइ।
⁹ हे परमेस्सर, मइँ ओन कामे क बरे जेनका तू किह्या हमेसा स्तुति करब।
    मइँ तोहरे बिस्सासी मनइयन क समन्वा तोहरे नाउँ क घोसना करब।