Bible in 90 Days

Ang Tubag ni Bildad

8 Unya mitubag si Bildad nga taga-Shua, ² “Kanus-a ka pa ba moundang nianang imong gipanulti? Pagkasaba nimo ug walay pulos ang imong gipamulong! ³ Tuison ba diay sa Makagagahom nga Dios ang hustisya ug katarong? ⁴ Nakasala ang imong mga anak sa Dios, busa angay lang nga iya silang silotan. ⁵ Apan kon modangop ka sa Makagagahom nga Dios ug magpakilooy kaniya, ⁶ ug magkinabuhi nga hinlo ug matarong, bisan karon dayon tabangan ka niya ug iyang ibalik ang imong maayong kahimtang. ⁷ Ug ang bahandi nga ihatag kanimo sa umaabot mas daghan pa kaysa imong nadawatan kaniadto.

⁸ “Pangutan-a ra gud ang unang mga henerasyon. Susiha kon unsay nakat-onan^[a] sa ilang mga katigulangan. ⁹ Kay bata pa kita niining kinabuhia ug diotay pa lang ug nahibaloan. Lumalabay lang kita niining kalibotana sama sa landong nga dili magdugay. ¹⁰ Pamatii sila, kay tudloan ka nila sa ilang nahibaloan.

¹¹ “Ang tanom nga nagatubo diha sa tubig dili mabuhi kon walay tubig. ¹² Mamatay kini dayon samtang nagtubo pa lang ug dili pa angay nga putlon. ¹³ Sama usab niana ang dangatan sa tanang mga tawo nga nagatalikod sa Dios. Walay paglaom ang tawo nga dili diosnon. ¹⁴ Ang tanan nga iyang gisaligan huyang sama sa balay sa lawalawa. ¹⁵ Kon mosandig siya niini, mangabugto dayon; mokapyot siya apan mangatangtang kini. ¹⁶ Kon tan-awon morag maayo ang iyang kahimtang, sama sa tanom nga nabuboan pag-ayo ug nasidlakan sa adlaw. Milabong kini sa tamnanan ¹⁷ ug nanggamot pag-ayo sa kabatoan. ¹⁸ Apan kon maibot kini, wala nay manumbaling niini. ¹⁹ Mao na kanay kataposan sa iyang kinabuhi, ug may mopuli nga tanom sa yuta nga iyang gituboan.

²⁰ “Sa pagkatinuod, dili isalikway sa Dios ang tawong nagakinabuhi sa paagi nga walay ikasaway, ug dili usab siya motabang sa tawong daotan. ²¹ Pakataw-on ka niya pag-usab, ug pasinggiton sa kalipay. ²² Pakaulawan niya ang imong daotang mga kaaway, ug laglagon ang ilang mga panimalay.”

Mitubag si Job

9 Unya mitubag si Job, ² “Oo, tinuod kanang ginaingon mo. Apan unsaon sa tawo pagpamatuod nga inosente siya atubangan sa Dios? ³ Bisan lalison pa niya sa hukmanan ang Dios, wala siyay mahimo, kay dili niya matubag ang bisan usa lang sa libo ka mga pangutana sa Dios. ⁴ Maalam ug gamhanan gayod ang Dios. Kinsa bay mibatok kaniya nga nagmadaogon?

⁵ “Sa walay pagpasidaan, tay-ogon niya ang mga bukid ug mangatiphag kini sa iyang kasuko. ⁶ Palinogon niya ang yuta gikan sa pundasyon niini. ⁷ Sa iyang pagmando, dili mosidlak ang adlaw ug ang mga bitoon. ⁸ Siya lamang ang makabuklad sa kalangitan, ug siya lamang ang makapahunong sa balod. ⁹ Siya ang nagmugna sa mga grupo sa mga bitoon nga gitawag Oso, Orion, Pleyades, ug sa mga bitoon sa habagatan. ¹⁰ Nagahimo siyag katingalahang mga butang ug mga milagro nga dili matugkad ug dili maihap. ¹¹ Kon labyan ako niya, dili ko siya makita ug mamatikdan. ¹² Kon may gusto siyang kuhaon, walay makapugong kaniya. Kinsa bay makareklamo sa iyang ginahimo? ¹³ Dili pugngan sa Dios ang iyang kasuko. Bisan ang mga katabang sa dragon nga si Rahab moluhod sa kahadlok kaniya. ¹⁴ Busa unsaon ko pagpanubag sa Dios? ¹⁵ Bisan pag dili ako sad-an, dili ako makapangatarongan. Ang mahimo ko lang mao ang pagpakilooy sa Dios nga akong Maghuhukom. ¹⁶ Bisan pag hangyoon ko siya nga mag-atubangay kami ug mosugot siya, dili gihapon niya ako pamation. ¹⁷ Kay gipaantos niya ako nga daw sa gihapak ug bagyo, ug gipasamot niya ang akong mga kasakit sa walay hinungdan. ¹⁸ Halos dili na niya ako paginhawaon sa labihan nga kasakit nga gipaantos niya kanako. ¹⁹ Kon sa pakusganay lang, kusgan gayod siya! Ug kon sa akusahay, kinsay makaakusar kaniya? ²⁰ Bisan pag dili ako sad-an, hukman gihapon ako ug silotan tungod sa akong gipanulti sa pagpanalipod sa akong kaugalingon. ²¹ Bisag walay ikasaway sa akong kinabuhi, wala kini bale kanako. Naglagot ako sa akong kinabuhi. ²² Kay mao ra man gihapon; sama ra nga laglagon sa Dios ang matarong ug ang daotan. ²³ Magkatawa ra siya kon kalit mamatay sa katalagman ang matarong. ²⁴ Gitugyan niya ang kalibotan ngadto sa mga daotan. Gibutaan niya ang mata sa mga maghuhukom. Kon dili siya ang naghimo niini, nan, kinsa pa man?

²⁵ “Paspas nga nanglabay ang mga adlaw sa akong kinabuhi; mas paspas pa kaysa magdadagan. Nanglabay kini nga wala gayoy kalipay. ²⁶ Sama ka paspas sa tulin nga sakayan o sa pagsakdap sa agila. ²⁷ Bisan pag dili na ako moreklamo ug undangan ko na ang pagsubo, ug mopahiyom na lang, ²⁸ mahadlok gihapon ako sa mga pag-antos nga moabot kanako. Kay nasayod ako nga dili niya ako isipon nga dili sad-an. ²⁹ Unsa pa may kapuslanan sa pagpaninguha ko nga depensahan ang akong kaugalingon, sanglit ginaisip niya ako karon nga sad-an? ³⁰ Bisan pag sabonan ko ang akong tibuok lawas aron mahimo akong hinlo, ³¹ ituslob niya gihapon ako sa lapokon nga bangag, aron bisan ang akong bisti ngil-aran kanako. ³² Ang Dios dili tawo sama kanako, busa dili ako makalalis kaniya ug makaakusar kaniya sa hukmanan. ³³ Unta may magpatunga kanamo sa paghusay kanamong duha, ³⁴ ug mapaundang niya ang paglatos sa Dios kanako, aron dili na ako mahadlok. ³⁵ Unya makasulti na ako kaniya nga walay kahadlok. Apan sa pagkakaron, dili ko pa kini mahimo.”

10 “Naglagot ko sa akong kinabuhi, busa isulti ko bisan unsay gusto kong isulti. Isulti ko ang kalain sa akong buot. ² Mao kini ang isulti ko sa Dios: ‘Ayaw ako hukmi nga daotan ako, kondili pahibaloa ako kon unsay akusasyon mo batok kanako. ³ Nalipay ka ba sa pagpaantos kanako? Nganong gisalikway mo ako nga imong binuhat, ug gipaboran mo ang plano sa mga daotan? ⁴ Ang pagtan-aw mo ba sama sa pagtan-aw sa tawo? ⁵ Sama lang ba kamubo ang imong kinabuhi sa tawo? ⁶ Nganong nagdali ka gayod sa pagpangitag sayop kanako? ⁷ Nahibaloan mo nga wala akoy sala, apan kinsay makadepensa kanako diha kanimo?

⁸ “ ‘Ikaw ang naghulma ug naghimo kanako, unya karon laglagon mo lang ako? ⁹ Hinumdomi nga gihulma mo ako gikan sa yuta, unya karon ibalik mo na ako sa yuta? ¹⁰ Ikaw ang naghulma kanako sa tiyan sa akong inahan. Gihulma mo ako nga daw gahulma ka ug keso gikan sa gatas. ¹¹ Gihulma mo ang akong kabukogan ug mga kaugatan ug giputos sa unod ug panit. ¹² Gihatagan mo akog kinabuhi ug gipakitaag kaayo, ug gitipigan mo ang akong kinabuhi. ¹³ Apan karon nahibaloan ko nga ang tinuod mong plano kanako ¹⁴ mao nga bantayan mo kon makasala ako, ug unya dili mo ako pasayloon. ¹⁵ Nakasala man ako o wala, makalulooy gihapon ako. Kay naulawan ako pag-ayo ug nagaantos sa hilabihan. ¹⁶ Naningkamot ako sa pagbangon, apan naniid ka sama sa liyon aron paglaglag kanako. Ginapakita mo ang imong gahom batok kanako. ¹⁷ Walay hunong ang imong pag-akusar kanako, ug misamot ang imong kasuko kanako. Walay hunong ang imong pag-ataki kanako.

¹⁸ “ ‘Nganong gitugot mo pa man nga matawo ako? Unta namatay na lang ako sa wala pay nakakita kanako. ¹⁹ Unta wala na lang ako mabuhi. Namatay na lang unta ako sa tiyan pa lang daan sa akong inahan ug diretso gilubong. ²⁰ Diotayng panahon na lang ang nahibilin kanako, busa pasagdi na lang ako aron bisan sa hamubong panahon makahimo ako pagmaya ²¹ sa dili pa ako moadto sa dapit nga masubo ug mangitngit—ug dili na makabalik dinhi. ²² Labihan gayod kangitngit didto; pulos lang gabii ug wala gayoy kahayag, ni kahusay didto.’ ”

Ang Tubag ni Zofar

11 Unya gitubag siya ni Zofar nga taga-Naamat, ² “Kinahanglang matubag kanang imong mga gipanulti. Dili mapamatud-an nga dili ka sad-an pinaagi lang sa pagsigeg tagawtaw. ³ Dili mahimong magpakahilom lang kami sa imong mga gipanulti nga walay pulos. Abi nimog dili ka namo badlongon sa imong pagpasipala? ⁴ Matod mo nga husto ka sa imong gituohan ug hinlo ka atubangan sa Dios. ⁵ Maayo unta ug magsulti ang Dios kanimo ⁶ ug sultihan ka niya sa mga butang nga wala mo pa mahibaloi. May mga butang nga nahibaloan mo na ug may mga butang nga wala pa. Nahibalo ba diay ka nga ang silot sa Dios kanimo kulang pa sa unsay angay unta kanimo? ⁷ Matugkad mo ba ang tanan mahitungod sa Dios? ^8-9 Mas taas pa kini sa kalangitan ug mas lawom pa sa dapit sa mga patay. Mas dako pa kini sa kalibotan ug mas halapad pa sa kadagatan. Nan, maabot ba kini sa imong hunahuna?

¹⁰ “Pananglitan, dakpon ka sa Dios ug dad-on sa hukmanan ug unya prisohon, kinsa may makapugong kaniya? ¹¹ Nahibaloan gayod niya kon kinsay limbongan nga mga tawo ug nakita niya ang ilang kadaotan. ¹² Morag imposible na sa usa ka buang-buang nga magmaalamon, maingon nga imposible alang sa asno nga manganak ug tawo.^[b]

¹³ “Job, kon maghinulsol ka lang ug modangop sa Dios, ¹⁴ ug dili ka na magpakasala ug dili mo tugotan ang imong panimalay sa pagpakasala, ¹⁵ sigurado gayod nga dili ka na maulaw ug magkinabuhi ka nga malig-on ug walay gikahadlokan. ¹⁶ Unya malimtan mo na ang imong mga kasakit, nga daw sa tubig lang kini nga milabay. ¹⁷ Ug ang imong kinabuhi hayag pa kaysa sidlak sa adlaw sa kaudtohon. Ang kangitngit sa imong kinabuhi modan-ag sama sa kabuntagon. ¹⁸ Magkinabuhi ka nga lig-on tungod kay may paglaom ka. Panalipdan ka sa Dios ug magpahulay nga walay gikahadlokan. ¹⁹ Maghigda ka nga walay manghadlok kanimo, ug daghan ang mangayog tabang gikan kanimo. ²⁰ Apan ang mga daotan madismaya, ug wala nay laing kapaingnan pa, ug ang ila lang malaoman mao ang kamatayon.”

Ang Tubag ni Job

12 Unya mitubag si Job, ² “Nagtuo kamo nga kamo ray maalamon, ug kon mamatay kamo, uban kaninyo nga mamatay ang kaalam! ³ Apan maalamon usab ako ug wala kamo makabintaha kanako. Nahibalo ang tanang tawo niining tanan ninyong gipanulti. ⁴ Nahimo akong kataw-anan sa akong mga higala bisag matarong ako ug walay ikasaway sa akong kinabuhi, ug bisan ginatubag sa Dios ang akong pag-ampo kaniadto. ⁵ Ang mga tawo nga sama kanako nga nagaantos ug halos dili na makabarog ginatamay sa mga tawo nga hayahay ug kahimtang. ⁶ Apan ang mga tulisan ug ang mga tawo nga nagapalagot sa Dios nagakinabuhi nga malinawon bisan ug ang ilang abilidad maoy ilang gipakadios.^[c]

^7-8 “Kuhaig leksyon ang lain-laing klase sa mananap—ang mananap nga nagalakaw, ang nagalupad, ang nagakamang, ug ang nagapuyo sa tubig. ⁹ Kay silang tanan nahibalo niining gihimo sa Ginoo. ¹⁰ Anaa sa iyang kamot ang kinabuhi o ang gininhawa sa tanang binuhat, apil na ang sa tawo. ¹¹ Ang dila sa tawo mahibalo sa lami sa pagkaon, ug ang dalunggan mahibalo usab kon maayo ba o dili ang mga pulong. ¹² Ang mga tigulang may kaalam ug panabot, kay samtang nagataas ang ilang kinabuhi, nagkadaghan pa gayod ang ilang kahibalo.

¹³ “Apan anaa sa Dios ang kaalam, gahom, panabot, ug pagtambag. ¹⁴ Walay makatukod pagbalik sa iyang giguba, ug walay makaluwas sa iyang gipriso. ¹⁵ Kon pugngan niya ang ulan, moabot ang hulaw; ug kon buhian niya kini, daoton sa baha ang yuta. ¹⁶ Kusgan siya ug madaogon, ug ilalom sa iyang gahom ang nagapanglimbong ug ang ginalimbongan. ¹⁷ Kuhaan niya sa kaalam ang mga magtatambag, ug himuon niyang mga buang-buang ang mga maghuhukom. ¹⁸ Pakanaogon niya ang mga hari sa ilang trono ug ipabihag. ¹⁹ Tangtangon niya sa ilang katungdanan ang mga pari ug ang mga tawo nga dugay na sa pangagamhanan. ²⁰ Patak-omon niya ang baba niadtong ginatahod nga mga magtatambag, ug kuhaan niya sa hustong panabot ang mga tigulang. ²¹ Ipaubos niya ang mga dungganon ug kuhaan ug gahom ang gamhanan nga mga tawo. ²² Ipadayag niya ang mga tinago, ug lamdagan niya ang kangitngit. ²³ Himuon niyang gamhanan ang mga nasod, ug unya laglagon niya kini. Palapdon niya ang teritoryo niini ug unya isalikway niya kini. ²⁴ Himuon niyang mga buang-buang ang ilang mga pangulo, ug palatagawon niya sila sa disyerto. ²⁵ Magpangapkap sila sa kangitngit ug magsukarap sama sa hubog.”

13 “Nakita ko na ug nadungog kanang tanan ninyong gisulti, ug nakasabot ako niana. ² Nahibalo ako sa inyong nahibaloan; wala kamo makabintaha kanako. ³ Apan buot ko nga makigsulti sa Dios nga Makagagahom ug makighusay kaniya bahin sa akong kaso. ⁴ Kay ginatinguhaan ninyo nga tambalan ako pinaagi sa mga bakak. Nahisama kamong tanan sa doktor nga walay pulos. ⁵ Mas maayo pag magpakahilom na lang kamo. Mao kanay labing maayo ninyong buhaton.

⁶ “Palihog, paminawa ninyo ang akong reklamo; hatagi ninyog pagtagad ang akong mga rason. ⁷ Depensahan ba ninyo ang Dios pinaagi sa inyong pagpamakak ug pagpanglimbong? ⁸ Paboran ba ninyo siya? Kamo bay mobarog alang kaniya sa korte? ⁹ Kon susihon kamo sa Dios, may maayo kaha siyang makita diha kaninyo? Limbongan ba ninyo siya sama sa paglimbong ninyo sa mga tawo? ¹⁰ Sigurado gayod nga badlongon kamo sa Dios bisag gipaboran pa ninyo siya. ¹¹ Wala ba kamo mahadlok sa iyang gahom? ¹² Ang inyong mga panultihon walay pulos sama sa abo; ang inyong mga rason sama kahuyang sa kolon.

¹³ “Paghilom kamo, ug pasultiha ninyo ako. Pasagdi ug unsay mahitabo kanako. ¹⁴ Andam ako nga mosugal sa akong kinabuhi. ¹⁵ Kon patyon ako sa Dios, wala na akoy paglaom.^[d] Apan depensahan ko gihapon ang akong kaugalingon sa iyang atubangan. ¹⁶ Basin pinaagi niini maluwas ako, kay ang tawo nga dili diosnon dili gayod makaduol sa iyang presensya.

¹⁷ “Paminawag maayo ang akong isulti. ¹⁸ Karon giandam ko na ang akong kaso, ug nasayod ako nga ideklarar ako nga inosente. ¹⁹ Kinsay makaakusar kanako? Kon aduna man, magpakahilom na ako ug mamatay.

²⁰ “O Dios, buhata kining duha ka butang alang kanako ug dili ako motago gikan kanimo: ²¹ undangi na ang pagpaantos kanako, ug ayaw na akog hadloka sa imong makahahadlok nga ginahimo kanako. ²² Karon, tawga ako ug tubagon ko ikaw, o ako nga mosulti kanimo ug tubaga ako. ²³ Sultihi ako kon unsay sayop nga akong nahimo. Ipakita kanako ang akong mga kalapasan ug kasal-anan. ²⁴ Nganong naglikay ka man kanako, ug giisip mo ako nga imong kaaway? ²⁵ Nganong gihadlok ug gigukod mo ako? Sama lang ako sa ugang dagami o sa dahon nga gipalid sa hangin. ²⁶ Nagsulat ka ug sakit nga mga akusasyon batok kanako, ug gipabayad mo ako sa mga sala nga nahimo ko niadtong batan-on pa ako. ²⁷ Daw sa gikadenahan mo ang akong mga tiil. Gibantayan mo ang akong mga lakang, ug gisundan mo ang akong mga tunob. ²⁸ Busa nagakadaot ako sama sa gabok nga butang o sa bisti nga gikutkot sa gagmayng mananap.”

14 “Mubo rag kinabuhi ang tawo ug puno kini sa kalisod. ² Sama kini sa bulak nga mobukhad ug malaya ra dayon; sama sa anino nga dali rang mahanaw. ³ Nan, nganong ginabantayan mo man gayod ang tawo, Ginoo? Dad-on mo ba siya^[e] sa imong atubangan aron hukman? ⁴ May tawo bang makakinabuhi nga hinlo gayod? Wala! Kay ang tanan, natawo nga mahugaw. ⁵ Gitakda mo na kon unsa kataas ang kinabuhi sa tawo. Ug dili siya makalapas sa panahon nga gitagal mo kaniya. ⁶ Busa ayaw na lang lisod-lisora ang tawo. Pasagdi na lang siya aron makapahulay sama sa usa ka trabahante inigkahuman niya sa iyang buluhaton.

⁷ “Kon putlon ang usa ka kahoy, may purohan pa nga manalingsing kini ug mananga pag-usab. ⁸ Bisag dugay na ang gamot niini diha sa yuta ug nadunot na ang tuod, ⁹ kon matubigan, manalingsing pa kini sama sa usa ka bag-o nga tanom. ¹⁰ Apan kon ang tawo mamatay, mawala na ang tanan niyang kusog. Pagkabugto sa iyang gininhawa, mao na kana ang iyang kataposan. ¹¹ Sama sa paghunas sa dagat ug paghubas sa suba, ¹² ang tawo mamatay, ug dili na mobangon o makamata pa sa iyang pagkatulog hangtod mahanaw ang kalangitan.

¹³ “Ginoo, hinaut unta nga tagoan mo na lang ako sa dapit sa mga patay hangtod nga mawala ang imong kasuko, ug magtakda ka ug panahon nga hinumdoman mo ako. ¹⁴ Kon mamatay ang tawo mabuhi pa ba siya pag-usab? Kon ingon niana, agwantahon ko ang tibuok nga panahon sa akong pag-antos hangtod moabot ang panahon nga matapos kini. ¹⁵ Sa panahon nga manawag ka kanako, Ginoo, motubag ako. Handomon mo ako nga imong binuhat. ¹⁶ Nianang higayona bantayan mo ang akong mga binuhatan, apan dili mo na hinumdoman pa ang akong sala. ¹⁷ Sama ra nga isulod mo kini sa buyot aron matago ug dili mo na makita pa. ¹⁸ Apan maingon nga mangatumpag ang mga bukid ug mangahulog ang mga bato, ¹⁹ ug maingon usab nga mahilis ang mga bato sa sigeng pag-ilig sa tubig ug makabkab ang yuta tungod sa makusog nga ulan, ginaguba mo ang paglaom sa tawo. ²⁰ Pildihon mo ang tawo kanunay ug mamatay siya, ug usbon mo ang iyang hitsura kon motaliwan na siya. ²¹ Dili na siya masayod kon gipasidunggan ba o gipakaubos ang iyang mga anak. ²² Ang iya lang mabati mao ang iyang kaugalingong kasakit ug kasubo.”

Ang Tubag ni Elifaz

15 Unya mitubag si Elifaz nga taga-Teman, ² “Job, ang maalamon nga tawo dili mosultig mga pulong nga walay pulos. ³ Dili siya mangatarungan ginamit ang mga pulong nga walay hinungdan. ⁴ Apan ang imong gipanulti motukmod sa uban sa dili na pagtahod ug pag-alagad sa Dios. ⁵ Ang imong gipanulti bunga sa imong kadaotan. Ug gilimbongan mo ang uban pinaagi sa imong mga pulong. ⁶ Dili na kinahanglan nga hukman ko pa ikaw. Ang imo mismong gipanulti ang nagasaksi batok kanimo. ⁷ Naghunahuna ka ba nga ikaw ang unang natawo? Natawo ka na ba sa wala pa mamugna ang mga bungtod? ⁸ Nadungog mo na ba ang mga plano sa Dios? Ikaw lang ba ang maalamon? ⁹ Unsa may imong nahibaloan nga wala usab namo mahibaloi? Unsa bay imong nasabtan nga wala usab namo masabti? ¹⁰ Nakakat-on kami gikan sa mga tigulang nga mas tigulang pa kaysa imong amahan! ¹¹ Gisultihan ka namo ug mga pulong nga makapadasig ug makapalipay kanimo nga gikan sa Dios. Kulang pa ba kini? ¹² Nganong nagpadala ka man sa imong pagbati? Unsay nakapabuta kanimo sa kamatuoran ¹³ nga nasuko ka man pag-ayo sa Dios ug nagsulti nianang daotang mga pulong batok kaniya? ¹⁴ Makahimo ba ang tawo sa pagkinabuhi nga hinlo ug matarong? ¹⁵ Wala gani mosalig ang Dios sa iyang mga anghel! Kon kining langitnon nga mga tinuga^[f] dili hinlo sa iyang panan-aw, ¹⁶ ang tawo pa kaha nga daotan ug makasasala, ug uhaw sa paghimo ug daotan?

¹⁷ “Job, paminawa ako. Sultihan ko ikaw ug pasabton sa akong naeksperyensyahan. ¹⁸ Makasulti usab bahin niini ang maalamon nga mga tawo nga nakat-on gikan sa ilang katigulangan. ¹⁹ Mga maalamon kaayo sila, kay sila lang ang nanag-iya sa ilang yuta, ug walay mga taga-laing lugar nga misakop kanila.

²⁰ “Ang tawong daotan mag-antos sa tibuok niyang kinabuhi. ²¹ Kanunay siyang kulbaan. Bisan walay katalagman, kulbaan siya nga tingalig sulongon siya sa mga tulisan. ²² Mahadlok siyang moadto sa ngitngit kay basig patyon siya. ²³ Magkabuang siya sa pagpangitag pagkaon bisan asa.^[g] Nasayod siya nga hapit na siyang mamatay.^{[h] 24} Labihan ang iyang kakulba, sama sa hari nga mosulong sa gira. ²⁵ Nagakahitabo kini kaniya, kay nagrebelde siya^[i] ug misukol sa Dios nga Makagagahom. ²⁶ Daw sa nagbitbit siyag lig-on nga taming ug gusto gayod nga makigbatok sa Dios. ²⁷ Bisan adunahan ug tambok siya karon, ²⁸ magpuyo siya sa guba nga mga lungsod, sa mga balay nga walay nagpuyo ug kalumpagon na. ²⁹ Dili na magpadayon ang iyang pagka-adunahan. Ang iyang bahandi dili molungtad ug dugay, ug ang iyang kabtangan dili modaghan. ³⁰ Dili siya makaikyas sa kalaglagan.^[j] Mahisama siya sa kahoy kansang mga salingsing masunog. Mawala ang tanan niyang kabtangan sa usa lang ka paghuyop sa Dios. ³¹ Dili niya angayng limbongan ang iyang kaugalingon pinaagi sa pagsalig sa mga butang nga walay pulos, kay wala gayod siyay makuha gikan niini. ³² Sa dili pa moabot ang iyang panahon, madawat niya ang iyang silot ug dili na siya mouswag pa.^{[k] 33} Mahisama siya sa ubas nga nangataktak ang bunga nga hilaw pa, o sama sa kahoyng olibo nga nangalarag ang mga bulak. ³⁴ Kay ang mga tawong dili diosnon mamatay nga walay kaliwat. Ug mangasunog ang ilang mga balay nga gitukod gikan sa pagpanguwarta. ³⁵ Naghunahuna sila kanunay sa paghimo ug kasamok, paghimo ug daotan, ug pagpanglimbong.”

Ang Tubag ni Job

16 Unya mitubag si Job, ² “Nadungog ko na kana kaniadto pa. Imbes nga lipayon ninyo ako, gipasubo pa hinuon ninyo ako. ³ Dili na ba kamo moundang sa pagsultig walay pulos? Unsa ba gayoy nakapahasol kaninyo nga nagsige man kamog pakiglalis kanako? ⁴ Kon kamoy ania sa akong sitwasyon ug ako sa inyo, makasulti usab akog sama sa inyong gipanulti kanako. Makadawat usab kamog daghang mga pagsaway gikan kanako, ug magpanglingo usab ako kaninyo. ⁵ Apan dili ko kana buhaton. Mosulti hinuon akog mga pulong nga makapadasig ug makalipay kaninyo. ⁶ Apan sa pagkakaron, nagapadayon ang akong kasakit bisag unsa pay akong isulti. Ug kon mohilom usab ako dili gihapon kini mawala.

⁷ “O Dios, gipaluyahan mo gayod ako. Gilaglag mo ang tibuok kong panimalay. ⁸ Gipaniwang mo ako; bukog ug panit na lang ako. Sumala pa sa uban, nagapamatuod lang kini nga nakasala ako. ⁹ Sa imong kasuko, O Dios, gihasmagan mo ako. Daw mabangis nga mananap ka nga mikunis-kunis sa akong unod. Gipakagotan mo ako sa imong ngipon ug gisimagan nga daw sa imo akong kaaway.

¹⁰ “Gibiaybiay ako ug gikataw-an sa mga tawo. Gisagpa nila ako sa pagtamay kanako. Naghiusa sila batok kanako. ¹¹ Gitugyan ako sa Dios ngadto sa kamot sa mga tawong daotan ug makasasala. ¹² Maayo ang akong kahimtang kaniadto, apan gilaglag niya ako. Daw gituok niya ako ug gidugmok. Gihimo niya akong iyang targetanan. ¹³ Gilibotan ako sa iyang mga tigpana, ug gipana sa walay kalooy. Natuhog ang akong batobato, ug miawas sa yuta ang akong apdo. ¹⁴ Wala niya ako hunongi sa pag-ataki. Mihasmag siya kanako nga daw usa ka sundalo. ¹⁵ Nagabisti akog sako ug nagalingkod sa yuta agig pagsubo. ¹⁶ Namula ang akong nawong ug nanghubag ang akong mga mata sa labihan nga paghilak. ¹⁷ Apan wala gayod akoy nahimo nga sala, ug kinasingkasing ang akong pag-ampo.

¹⁸ “Sama ako sa tawong gipatay, nga nagahangyo sa yuta nga dili tabonan ang iyang dugo sa dili pa maangkon ang hustisya! ¹⁹ Bisan karon ang akong saksi^[l] atua sa langit. Siya ang moingon nga ako walay sala. ²⁰ Gitamay ako sa akong mga higala, apan nagahilak ako nga nangayo ug tabang sa Dios. ²¹ Ang akong saksi mao ang magpakilooy sa Dios alang kanako, sama sa usa ka tawo nga nagapakilooy alang sa iyang higala. ²² Kay sa dili madugay motaliwan na ako ug dili na mobalik.”

17 “Hapit na akong mamatay; daw sa mabugto na ang akong gininhawa. Andam na ang lubnganan alang kanako. ² Gipalibotan ako sa mga mabiay-biayon. Dayag kaayo ang ilang pagtamay kanako. ³ Labani ako, O Dios, kay wala nay laing mobarog sa pagtabang kanako kondili ikaw lang. ⁴ Gisirad-an mo ang panghunahuna sa akong mga higala aron dili sila makasabot. Busa ayaw sila tugoti nga magmadaogon sa ilang pag-akusar kanako. ⁵ Sama sila sa tawo nga nagluib sa iyang mga higala aron makakuwarta, nga mao ang hinungdan nga mag-antos^[m] ang iyang kabataan.

⁶ “Gihimo ako sa Dios nga kataw-anan taliwala sa mga tawo, ug gilud-an nila ako sa nawong. ⁷ Mingitngit na ang akong panan-aw sa kasubo; mora na ug tukog^[n] ang tibuok kong lawas sa kaniwang. ⁸ Ang mga tawo nga miisip sa ilang kaugalingon nga matarong, nangatingala niining nahitabo kanako. Gitunglo nila ako sama sa usa ka dili diosnon nga tawo. ⁹ Alang kanila ang matarong nga tawo lig-on sa iyang pagkinabuhi ug mas magkalig-on pa gayod. ¹⁰ Apan ginaaghat ko sila sa pagsusi pag-usab kanako. Sigurado ako nga walay bisan usa kanila nga nakasabot. ¹¹ Hapit na matapos ang akong mga adlaw. Napakyas ang akong mga plano ug mga tinguha. ¹² Apan nagaingon sila nga basig mamaayo ra usab ang akong kahimtang sa umaabot. Miingon sila, ‘Luyo sa kangitngit may moabot nga kahayag.’ ¹³ Kon molaom man ako, ang akong laoman mao ang pagpuyo sa dapit sa mga patay. Gusto ko nang ipahimutang ang akong higdaanan niining mangitngit nga dapit. ¹⁴ Isipon ko ang lubnganan nga akong amahan, ug ang mga ulod nga mokaon kanako isipon ko nga akong inahan ug mga igsoong babaye. ¹⁵ May paglaom pa ba ako? Kinsay makasulti nga may paglaom pa ako? ¹⁶ Ang akong paglaom mouban kanako sa dapit sa mga patay. Mag-uban kami didto ilalom sa yuta.”

Ang Tubag ni Bildad

18 Unya mitubag si Bildad nga taga-Shua, ² “Job, kanus-a ka pa ba moundang nianang imong gipanulti? Taronga ra gud ang imong gipanulti, ug unya makigsulti kami kanimo. ³ Giisip mo ba kami nga sama sa mga baka nga walay panabot? ⁴ Gisakit mo lang ang imong kaugalingon sa imong kasuko. Naghunahuna ka ba nga tungod lang kanimo pasagdan sa Dios ang kalibotan o balhinon niya ang mga bato gikan sa ilang nahimutangan?

⁵ “Sa pagkatinuod, ang daotan nga tawo sigurado gayod nga mamatay. Sama siya sa suga nga dili na mosiga. ⁶ Mongitngit ang iyang tolda kay mapalong ang suga sa iyang tapad. ⁷ Kaniadto sigurado ang iyang mga lakang, apan karon magkadagma-dagma na siya. Ang iya mismong daotang plano maoy molaglag kaniya. ⁸ Siya mismo ang mipaingon sa lit-ag, ug nalit-agan siya. ⁹ Nabitik siya sa tiil ug dili na makabuhi. ¹⁰ Gibutang kini nga lit-ag sa iyang agianan, ug natago kini sa yuta. ¹¹ Napalibotan siya sa mga butang nga nagapahadlok kaniya ug daw sa nagagukod kini kaniya. ¹² Ang kalamidad daw sa gutom nga tawo nga gustong molamoy kaniya. Ang kalaglagan andam na sa paglaglag kaniya. ¹³ Ang iyang panit gikutkot sa makamatay nga balatian. Nagkadunot ang iyang mga tiil ug kamot. ¹⁴ Gipapahawa siya sa iyang puloy-anan^[o] nga naghatag ug kasigurohan kaniya, ug gidala siya ngadto sa makahahadlok nga hari.^{[p] 15} Mawala ang iyang puloy-anan tungod kay masunog kini sa nagdilaab nga asupre. ¹⁶ Mahisama siya sa kahoy nga mangalaya ang mga gamot ug mga sanga. ¹⁷ Wala nay makahinumdom kaniya dinhi sa kalibotan. Kalimtan na gayod siya. ¹⁸ Abugon siya gikan niining kalibotan nga mahayag paingon sa mangitngit nga dapit sa mga patay. ¹⁹ Wala siyay mga anak o mga kaliwat, ug wala gayoy mahibiling buhi sa iyang pamilya.^{[q] 20} Ang mga tawo sa bisan asang lugar^[r] nangatingala ug nangahadlok sa nahitabo kaniya. ²¹ Mao gayod kanay dangatan sa tawong daotan, nga wala nagaila sa Dios.”

Ang Tubag ni Job

19 Unya mitubag si Job, ² “Hangtod kanus-a pa ninyo ako paantuson ug sakiton sa inyong mga gipanulti? ³ Pila na ka higayon^[s] nga ginainsulto ninyo ako. Wala na kamo maulaw sa inyong pagdaot kanako. ⁴ Kon nakasala man gayod ako, ako na kanang problema. ⁵ Naghunahuna kamo nga matarong kamo kay kanako, ug giisip ninyo nga ang akong pag-antos nagpamatuod nga nakasala ako. ⁶ Apan ang Dios ang naghimo niini kanako. Siyay nagbutang sa lit-ag sa akong palibot.

⁷ “Nanawag ako sa pagpangayo ug tabang, apan walay mitubag kanako. Nangayo akog hustisya, apan walay mihatag niini kanako. ⁸ Gibabagan sa Dios ang akong agianan aron dili ako makaagi. Gitabonan niyag kangitngit ang akong agianan. ⁹ Gikuha niya ang akong kadungganan ug maayong reputasyon. ¹⁰ Gipaantos niya ako bisan asa ako molingi hangtod nga daw ikamatay ko na kini. Sama sa kahoyng giibot, gikuhaan niya akog paglaom. ¹¹ Labihan gayod ang iyang kasuko kanako, ug giisip niya akong usa sa iyang mga kaaway. ¹² Daw sama nga nagpadala siyag mga sundalo sa pagsulong kanako. Gipalibotan nila ang akong tolda.

¹³ “Gipalayo niya gikan kanako ang akong mga paryente.^[t] Ang akong mga higala halayo na kanako. ¹⁴ Wala na ang mga tawo nga duol kanako. Gikalimtan na ako sa akong mga higala. ¹⁵ Giisip ako sa akong mga bisita ug katabang nga mga babaye nga estranghero. Ang pagtan-aw nila kanako taga-laing lugar. ¹⁶ Inigtawag ko sa akong sulugoon, dili siya manumbaling, bisan pag magpakilooy ako kaniya. ¹⁷ Gibahoan sa akong gininhawa ang akong asawa, ug gingilngigan kanako ang akong mga igsoong lalaki. ¹⁸ Bisan ang gagmayng mga bata nagatamay kanako. Kon makita nila ako,^[u] kataw-an nila ako. ¹⁹ Ang tanan kong suod nga mga higala gingil-aran kanako. Gitalikdan ako sa akong mga hinigugma. ²⁰ Bukog na lang ako ug panit, ug daw sa kamatyonon na ako.

²¹ “Kaloy-i ninyo ako, mga higala ko. Kaloy-i ninyo ako, kay gipaantos ako sa Dios. ²² Nganong ginapaantos pa ninyo ako sama sa gihimo sa Dios kanako? Dili pa ba igo ang inyong pagpaantos kanako? ²³ Maayo unta kon ang akong mga gipanulti gisulat sa usa ka libro, ²⁴ o giayo pagkulit sa bato aron dili mapanas hangtod sa kahangtoran.

²⁵ “Apan nasayod ako nga buhi ang akong manlalaban, ug sa kaulahian moabot siya dinhi sa yuta sa paglaban kanako. ²⁶ Human madunot ang akong panit ug mobiya na ako sa akong lawas, makita ko ang Dios.^{[v] 27} Makita ko siya mismo sa akong mga mata, ug dili na siya mahimong estranghero kanako. Labihan gayod ang akong paghandom nga makita siya.

²⁸ “Kon magsige gihapon kamog akusar kanako nga nagaantos ako tungod sa akong sala, ²⁹ modangat gayod kaninyo ang makahahadlok nga silot^[w] sa Dios. Oo, silotan gayod niya kamo tungod sa iyang kasuko. Unya mahibaloan ninyo nga ginahukman kamo sa Dios.”

Ang Tubag ni Zofar

20 Unya mitubag si Zofar nga taga-Naamat, ² “Kinahanglan nga motubag ako kay dili ako mahimutang. ³ Gibadlong mo ako uban ang pagpanginsulto, ug may nagtukmod kanako sa pagtubag kanimo. ⁴ Sigurado gayod nga nasayod ka nga gikan pa sa karaang panahon, sukad nga gibutang ang tawo dinhi sa kalibotan, ⁵ ang kalipay sa tawong daotan lumalabay lang. Oo, dili molungtad ug dugay ang kalipay sa tawo nga dili diosnon. ⁶ Bisag hilabihan ang iyang pagkamapahitas-on, nga daw sangko na kini sa langit o sa panganod, ⁷ mahanaw siya hangtod sa hangtod sama sa iyang tae. Ang mga nakaila kaniya moingon, ‘Hain na siya?’ ⁸ Mahanaw siya sama sa damgo o sa panan-awon sa kagabhion, ug dili na gayod siya makita. ⁹ Dili na siya makita sa nakaila kaniya, ug mahanaw siya sa dapit nga iya kaniadtong gipuy-an. ¹⁰ Ang iyang mga anak maoy magbayad sa iyang gikawat gikan sa mga kabos. ¹¹ Mamatay siya nga batan-on pa ug baskog.

¹² “Ang paghimo ug daotan nahisama sa pagkaon nga tam-is diha sa iyang baba; ¹³ ugomon niya kini ug dugay aron matagamtaman gayod niya ang kalami niini. ¹⁴ Apan pag-abot niini sa iyang tiyan mopait kini ug mahimong hilo nga sama sa lala sa mga bitin. ¹⁵ Isuka niya sama sa pagkaon ang bahandi nga iyang kinawat. Bisan anaa na kini sa iyang tiyan ipasuka kini sa Dios kaniya. ¹⁶ Suyopon niya ang lala sa mga bitin nga mao ang mopatay kaniya. ¹⁷ Dili na niya matagamtaman ang kaabundansya sa lana, keso, ug dugos, nga daw sapa o suba nga magdagayday. ¹⁸ Dili niya madawat ang balos sa iyang hinagoan o magmaya sa iyang bahandi. ¹⁹ Kay gidaog-daog niya ang mga kabos ug gipasagdan niya sila nga maglisod. Giilog niya ang mga balay nga dili iya. ²⁰ Walay katagbawan ang iyang kahakog. Ang bisan unsay iyang magustohan dili niya palabyon. ²¹ Apan wala na siyay makaon, kay ang iyang bahandi mahanaw. ²² Sa iyang kaabundansya, moabot kaniya ang kalisod. Moabot kaniya ang labihan nga pag-antos. ²³ Samtang gitagbaw niya ang iyang kaugalingon, ipatagamtam sa Dios kaniya ang iyang labihan nga kasuko, ug paulanan siya sa silot. ²⁴ Bisag makaikyas siya sa puthaw nga armas, matuhog gihapon siya sa bronsi nga pana. ²⁵ Maigo ang iyang apdo, ug molapos kini sa iyang lawas. Bation niya ang kalisang. ²⁶ Mahanaw ang iyang bahandi diha sa kangitngitan. Sunogon siya ug ang tanan nga nahibilin sa iyang pinuy-anan^[x] sa kalayo nga dili tawo ang nagpasiga. ²⁷ Ipadayag sa langit ang iyang sala ug mosaksi ang yuta batok kaniya. ²⁸ Anuron sa baha ang iyang balay sa adlaw nga ipatagamtam sa Dios ang iyang kasuko. ²⁹ Mao kanay dangatan sa tawong daotan nga gitakda sa Dios alang kaniya.”

Ang Tubag ni Job

21 Unya mitubag si Job, ² “Pamatia ninyo akog maayo aron inyo akong malipay. ³ Pamati kamo samtang nagsulti ako, ug pagkahuman nako ug sulti, tamaya ninyo ako kon buot ninyo. ⁴ Ang akong reklamo dili batok sa tawo kondili batok sa Dios. Mao kini ang rason nganong mubo akog pasensya. ⁵ Tan-awa ra gud ninyo ako ug mahingangha kamo^[y] sa katingala. ⁶ Kon hunahunaon ko ang mga nangahitabo kanako, magkurog ako sa kahadlok.

⁷ “Nganong padayong nagkinabuhi ang daotan? Nangatigulang pa sila ug nagmauswagon. ⁸ Nakita pa nila ang pagdako sa ilang mga anak ug mga apo. ⁹ Nagapuyo pa sila sa ilang mga balay nga walay katalagman ug walay gikahadlokan. Ug wala sila siloti sa Dios. ¹⁰ Walay hunong sa pagpanganak ang ilang mga baka, ug dili kini makuhaan. ¹¹ Ang ilang mga kabataan sama kadaghan sa mga karnero.^[z] Manayaw sila, ¹² manganta, ug magsadya sa tukar sa tamborin, harpa, ug plawta. ¹³ Nagkinabuhi sila nga mauswagon ug nangamatay nga malinawon. ¹⁴ Apan nagaingon sila sa Dios, ‘Pasagdi lang kami! Wala kami naninguha nga mahibaloan ang imong mga pamaagi. ¹⁵ Kinsa ka ba nga gitawag Makagagahom? Nganong angay ka namong alagaron? Ug unsay makuha namo kon moampo kami kanimo?’ ¹⁶ Apan ang tinuod, ang ilang pag-uswag wala maggikan sa ilang kaugalingon nga paghago. Busa kon unsa may itambag niining daotang mga tawo, dili gayod ako mamati.

¹⁷ “Talagsa ray mga tawong daotan nga mangamatay. Usahay ra moabot kanila ang kalisod o ang silot nga ginapadala sa Dios tungod sa iyang kasuko. ¹⁸ Talagsa ra sila abugon nga daw sa dagami o tahop nga gipalid sa makusog nga hangin. ¹⁹ Nagaingon kamo nga kon dili sila silotan sa Dios, ang ilang mga kabataan mao ang iyang silotan. Apan nagaingon ako nga ang nakasala mao ang angay silotan sa Dios, aron maeksperyensyahan nila ²⁰ ug makita mismo nila ang ilang kalaglagan. Pasagdi nga makatilaw sila sa kasuko sa Makagagahom nga Dios. ²¹ Kay kon patay na sila, wala na silay kalibotan sa mangahitabo sa ilang panimalay.

²² “Matudloan ba sa tawo ang Dios, nga siya man ang pinakalabaw nga maghukom? ^23-24 May mga tawo nga nangamatay nga abundansya ug hayahay ang kinabuhi, ug himsog. ²⁵ May mga tawo usab nga nangamatay nga pait ug kahimtang, ug wala gayod makatilaw ug kaharuhay sa kinabuhi. ²⁶ Apan managsama silang ilubong sa yuta ug kaonon sa mga ulod.

²⁷ “Nahibalo ako kon unsay inyong gihunahuna. Nahibalo ako sa inyong plano batok kanako. ²⁸ Gisultihan ninyo ako kabahin sa mga tawong adunahan kansang mga pinuy-anan nangahanaw tungod sa ilang kadaotan. ²⁹ Apan pangutan-a ang mga nagalabay, ug pamatii ang ilang ginaingon. Kay sultihan nila kamo ³⁰ nga ang daotan nga tawo kanunay makalingkawas sa adlaw nga moabot ang katalagman tungod sa kasuko sa Dios. ³¹ Wala gayoy makaako pagbadlong sa tawong daotan. Wala gayoy mobalos sa iyang gihimo. ³² Kon ilubong na siya, may magguwardya pa sa iyang lubnganan. ³³ Daghan ang mohatod kaniya sa paglubong, ug ang yuta maghatag kaniyag kapahulayan.

³⁴ “Busa unsaon ninyo ako paglipay sa inyong gipanulti nga walay pulos? Pulos lang mga bakak ang inyong gipanulti.”

Ang Tubag ni Elifaz

22 Unya mitubag si Elifaz nga taga-Teman, ² “May pulos ba ang tawo ngadto sa Dios? May kaayohan bang ikahatag ang tawong maalamon kaniya? ³ Malipay ba ang Makagagahom nga Dios kon matarong ka? May makuha ba siya kon walay ikasaway sa imong kinabuhi? ⁴ Gibadlong ka sa Dios ug gihukman dili tungod kay nagatahod ka kaniya, ⁵ kondili tungod kay labihan na gayod ang imong kadaotan ug wala nay undang ang imong pagpakasala. ⁶ Sa walay kalooy gikuha mo ang bisti sa imong isigka-tawo isip garantiya sa iyang utang kanimo, ug halos wala na siyay bisti. ⁷ Wala mo hatagig tubig ang giuhaw, ug wala mo usab hatagig pagkaon ang gigutom. ⁸ Gigamit mo ang imong pagkagamhanan ug pagkadungganon sa pag-angkon ug yuta. ⁹ Kon mangayo kanimo ug tabang ang mga biyuda, gipapauli mo sila nga walay dala. Apil ang mga ilo wala mo ayoha pagtagad. ¹⁰ Mao kana ang hinungdan nga nalibotan ka sa mga lit-ag, ug kalit nga moabot kanimo ang kahadlok. ¹¹ Mao kana ang hinungdan kon nganong nangitngitan ka, nabutaan, ug nalapawan sa baha.

¹² “Ang Dios anaa sa kinaibabwan sa langit, labaw pa sa kinalayoan nga mga bitoon. ¹³ Mao kana nga miingon ka, ‘Wala mahibalo ang Dios sa akong ginahimo. Natabonan siya sa bagang dag-om, unsaon man niya paghukom? ¹⁴ Natabonan siya sa bagang panganod, busa dili niya kita makita samtang naglakaw siya ibabaw sa langit.’

¹⁵ “Magpadayon ka ba sa pagsunod sa mga gawi nga dugay nang gisunod sa mga tawong daotan? ¹⁶ Nangamatay sila nga dili pa nila panahon; nahisama sila sa pundasyon sa balay nga gianod sa baha. ¹⁷ Miingon sila sa Makagagahom nga Dios, ‘Pasagdi lang kami! Unsa may mahimo mo kanamo?’ ¹⁸ Apan ang Dios mao ang nagpuno sa ilang mga balay sa maayong mga butang. Busa kon unsa may itambag niining daotang mga tawo, dili gayod ako mamati.

¹⁹ “Kon makita sa matarong ug inosente nga mga tawo ang pagkalaglag sa daotang mga tawo, malipay ug magkatawa sila kanila. ²⁰ Moingon sila, ‘Nalaglag na gayod ang atong mga kaaway, ug gilamoy sa kalayo ang ilang kabtangan.’

²¹ “Job, pagpasakop sa Dios ug pakighusay kaniya aron panalanginan ka niya. ²² Dawata ang iyang mga katudloanan ug tipigi sa imong kasingkasing ang iyang mga pulong. ²³ Kon mobalik ka sa Makagagahom nga Dios, ug kuhaon mo ang kadaotan gikan sa imong panimalay, ibalik niya ang maayo mong kahimtang. ²⁴ Ayaw hatagig bili ang imong mga bulawan; isipa kini nga daw sama lang sa balas o mga bato lang sa suba. ²⁵ Ug ang Makagagahom nga Dios mahimong sama sa bulawan ug mahalong plata alang kanimo. ²⁶ Unya makaplagan mo ang kalipay nga nagagikan sa Makagagahom nga Dios, ug dili ka na maulaw nga moduol kaniya. ²⁷ Mag-ampo ka ngadto kaniya ug pamation ka niya, ug tumanon mo ang imong mga saad kaniya. ²⁸ Unsa man ang imong ginaplano nga pagabuhaton, matuman kini, ug modan-ag ang kahayag sa imong agianan. ²⁹ Kon adunay tawo nga maluya, ug kon moampo ka sa Dios nga lig-onon siya, tabangan niya ang maong tawo. ³⁰ Bisan ang mga tawo nga nakasala luwason niya pinaagi sa imong matarong nga kinabuhi.”

Misulti si Job

23 Unya miingon si Job, ² “Hangtod karon labihan gayod ang akong reklamo. Ginapaantos pa gayod ako sa Dios bisan pa sa akong pag-agulo.^{[aa] 3} Kon nahibalo pa lang unta ako kon asa ko siya makita; kon makaadto pa lang unta ako sa iyang gipuy-an, ⁴ ipresentar ko gayod kaniya ang akong reklamo ug isulti ko ang akong mga katarungan. ⁵ Gusto kong mahibaloan kon unsay itubag niya kanako, ug gusto kong makasabot sa iyang isulti. ⁶ Makiglalis kaha siya kanako ginamit ang iyang gahom? Siyempre dili! Pamation niya ang akong isulti. ⁷ Ang tawong matarong nga sama kanako makapangatarongan atubangan sa Dios nga akong Maghuhukom, ug mopabor siya kanako.

^8-9 “Gipangita ko ang Dios—sa sidlakan, sa kasadpan, sa amihan, ug sa habagatan—apan wala ko siya makita. ¹⁰ Apan nahibaloan niya ang akong ginahimo. Kon sulayan niya ako, makita niya nga putli ako sama sa purong bulawan. ¹¹ Gisunod ko ang iyang mga pamaagi, ug wala gayod ako mosimang niini. ¹² Ginatuman ko kanunay ang iyang tulumanon, ug gitipigan ko kini sa akong kasingkasing.^{[ab] 13} Apan makapagusto ang Dios sa iyang ginabuhat; walay makababag kaniya. Buhaton niya kon unsay iyang gustong buhaton. ¹⁴ Busa buhaton niya ang iyang giplano nga buhaton kanako, ug daghan pa ang iyang giandam alang kanako. ¹⁵ Mao gani nga nahadlok ako kaniya. Kon hunahunaon ko kini, malisang gayod ako. ¹⁶ Gipaluya ug gihadlok ako sa Dios nga Makagagahom. ¹⁷ Apan wala ako moundang sa pagreklamo bisan ug daw sa gitabonan ako sa labihan nga kangitngit.

Nangutana si Job kon Nganong Wala Siloti sa Dios ang mga Tawong Daotan

24 “Nganong wala man magtakda ang Makagagahom nga Dios ug panahon sa paghukom sa mga tawong daotan? Nganong dili man makita sa mga nakaila kaniya kanang panahon sa paghukom? ² Mangilog ug yuta ang mga tawong daotan pinaagi sa pagbalhin sa mga muhon. Mangawat silag mga hayop ug iipon nila kini sa ilang kahayopan. ³ Kawatan nilag asno ang mga ilo, ug kuhaag baka ang biyuda ingon nga garantiya sa utang. ⁴ Gidaog-daog^[ac] nila ang mga kabos, busa napugos sila sa pagtago. ⁵ Nagapangita silag pagkaon sa kamingawan sama sa ihalas nga mga asno. Halos wala na silay laing lugar nga makuhaan ug pagkaon para sa ilang mga anak. ⁶ Manghagdaw sila sa mga abot sa uma ug sa ubasan sa mga tawong daotan. ⁷ Mangatulog sila nga ginatugnaw kon gabii, kay wala silay habol ug kulang silag bisti. ⁸ Mangabasa sila sa ulan sa kabukiran, ug magpasalipod na lang sila sa mga bato tungod kay wala silay kapasilongan.

⁹ “Ginakuha sa mga tawong daotan ang anak sa biyuda ug sa babayeng kabos ingon nga garantiya sa utang. ¹⁰ Manglakaw ang mga kabos nga halos walay bisti; papas-anon sila sa mga inani nga trigo samtang ginagutom sila. ¹¹ Ginapapuga silag olibo ug ubas, apan dili sila makapahimulos niini. ¹² Madungog diha sa lungsod ang pag-agulo sa mga himalatyon ug ang pagpangayog tabang sa mga grabing nasamdan, apan wala lang gayod magpakabana ang Dios niini.

¹³ “May mga tawo nga supak sa kahayag. Wala sila magsubay sa kahayag ug wala nila kini masabti. ¹⁴ Mobangon ug sayo ang mamumuno aron pagpatay sa mga kabos, ug sa gabii mangawat siya. ¹⁵ Ang mananapaw maghulat nga mongitngit aron walay makakita kaniya. Tabonan niya ang iyang nawong aron walay makaila kaniya. ¹⁶ Kon gabii manglungkab ang mga kawatan sa mga balay, apan kon adlaw manarangka sila, kay naglikay sila sa kahayag. ¹⁷ Giisip nilang kahayag ang kangitngit, kay kakunsabo nila ang makahahadlok nga kangitngit.”

Ang Tubag sa Higala ni Job

¹⁸ “Apan sama sa bula sa tubig, dili gayod molungtad ug dugay ang mga tawong daotan. Ang yuta nga ilang gipanag-iyahan tinunglo sa Dios. Busa walay moadto sa ilang ubasan. ¹⁹ Maingon nga ang snow matunaw ug mahanaw sa init sa adlaw, ang mga makasasala mahanaw usab sa kalibotan. ²⁰ Dili na sila hinumdoman pa. Kalimtan na sila bisan sa ilang inahan. Malaglag sila nga daw kahoy nga giputol ug kutkoton sila sa mga ulod. ²¹ Kay wala nila ayoha pagtagad ang mga babayeng baog. Ug wala nila kaloy-i ang mga biyuda.

²² “Pinaagi sa gahom sa Dios gilaglag niya ang mga tawong gamhanan. Bisan lig-on sila, walay kasigurohan ang ilang kinabuhi. ²³ Posible nga tugotan sila sa Dios nga magkinabuhi nga walay katalagman, apan ginabantayan gayod sa Dios ang tanan nilang lihok. ²⁴ Pasidunggan sila sulod sa mubo nga panahon, apan pagkahuman mangawala sila sama sa bulak nga nalaya o sa uhay nga gigalab. ²⁵ Kon dili husto ang akong gisulti, kinsa ang makapamatuod nga nagabakak ako? Kinsa ang makaingon nga sayop ako?”