Beginning

9  Haxa yet yokˈtzen naj ishoˈ ángel istrompeta, wilnihan yaycˈayti huneˈ txˈumel satcan̈, yakˈlax islahwehal huneˈ niman xab tet txˈumel tuˈ. ² Ishajni huneˈ txˈumel tuˈ istiˈ huneˈ niman xab tuˈ, yichico yahti topton n̈ub yeb jakˈekˈ yul, hacaˈ yelti n̈ub yul hunu horno, iskˈejholilo yul sat yiban̈kˈinal tiˈ. ³ Xol n̈ub tuˈ xin ahilo huntekˈan no nokˈ hacaˈ noˈ kˈul, ispujnato noˈ yul sat yiban̈kˈinal tiˈ. Yakˈlax yip noˈ ischiwa yin̈ anma; hacaˈ istzawal noˈ cˈolotx, hac tuˈ istzawal noˈ. ⁴ Yallax tet noˈ ta mach chetato noˈ teˈ telaj ay sat txˈo txˈotxˈ yebej yaxla tzˈunub, yebej te teˈ. Cachann̈e anma machi yechel Comam Dios yin̈ ispalan̈, haˈ cheta noˈ. ⁵ Yajaˈ hallax tet noˈ ta mach makˈbil ispotxˈni noˈ anma, to ton̈e chˈakˈlax ecˈoyaˈ yanma anma yulbal howeb ixahaw; haˈ xin isyaˈil chichiwa noˈ lahan isyaˈil hacaˈ bay chitzahwa noˈ cˈolotx. ⁶ Yin̈ huneˈ tiempohal tuˈ chissay anma yin̈ tzet chu iscami, yajaˈ matxa naj camical, yeb waxan̈ca caw choche anma chicami yajaˈ matxaticˈa chicami.

⁷ Huntekˈan noˈ kˈul tuˈ, lahan jilni noˈ hacaˈ noˈ cheh istoxa yin̈ howal, ayahto hunun corona naba oro yin̈ iswiˈ noˈ, lahan xin jilni sat noˈ yeb anma. ⁸ Haxa xil iswiˈ noˈ lahan jilni hacaˈ xil iswiˈ ebix ix, haxa yeh noˈ lahan hacaˈ yeh noˈ balam. ⁹ Ayco huntekˈan chˈen chˈen naba hierro yet howal yin̈ istxam iscˈul noˈ. Hacaˈ xin isn̈irn̈on txˈiˈal teˈ caret ikˈbil yu noˈ cheh yet chito noˈ yin̈ howal, hac tuˈ isbili isxicˈ noˈ. ¹⁰ Wal isn̈e noˈ lahan jilni hacaˈ isn̈e noˈ cˈolotx, nohnaco istzahwal noˈ yin̈. Haˈ xin isn̈e noˈ tuˈ ay yip yakˈni ecˈoyaˈ yanma anma yulbal howeb ixahaw. ¹¹ Haˈ naj ayco yahawilo yin̈ huneˈ niman xab tuˈ, haˈ naj yahawilpaxo yin̈ huntekˈan no nokˈ tuˈ. Abadón isbi naj yin̈ abxubal hebreo, haxa yin̈ abxubal griego Apolión isbi naj.

¹² Ecˈto huneˈ babel isyaˈtajil, yajaˈ ayto cabebxa.

¹³ Hayet yokˈtzen naj iswaj ángel istrompeta, wabenan yahwi xolbal can̈eb yucˈaˈ huneˈ meẍa naba oro ayco sata Comam Dios. ¹⁴ Yalni huneˈ yul nukˈe tet naj iswaj ángel yokˈtze istrompeta tuˈ:

―As puhilo ebnaj can̈wan̈ ángel cˈalan bey istiˈ haˈ Eufrates, ẍi. ¹⁵ Ispuhlaxilo ebnaj can̈wan̈ ángel tuˈ yun̈e istan̈tzenilo ebnaj hanicˈxan̈e mach yictajo anma ay yul sat yiban̈kˈinal tiˈ. Tˈin̈anxaticˈa ye ebnaj iswatxˈen huneˈ tuˈ yin̈ huneˈ hora tuˈ, yin̈ huneˈ tzˈayic tuˈ, yin̈ huneˈ ixahaw tuˈ, yeb yin̈ huneˈ habilal tuˈ. ¹⁶ Wabenan yallaxi tato cab cien millón isbisil ebnaj akˈom howal ayahto yiban̈ cheh.

¹⁷ Wilnihan noˈ cheh tuˈ. Haˈ xin ebnaj ayahto yiban̈ noˈ ayco huntekˈan chˈen xilkˈape yet howal yin̈ istxam iscˈul ebnaj. Haˈ chˈen tuˈ caj jilni chˈen hacaˈ kˈa kˈaˈ, yaxmutzˈmun̈e jilnipaxo chˈen hacaˈ chˈen azufre, kˈan jilnipaxo chˈen hacaˈ chˈen bronce. Wal noˈ cheh tuˈ, lahan jilni iswiˈ noˈ hacaˈ iswiˈ noˈ balam, chi‑xin‑elti kˈa kˈaˈ yeb n̈ub yeb azufre yul istiˈ noˈ. ¹⁸ Caw xin huneˈ yox majan anma camilo yul sat yiban̈kˈinal tiˈ yu oxeb isyaˈtajil tiˈ, haˈ ton kˈa kˈaˈ, yeb n̈ub, yeb azufre chielti yul istiˈ noˈ cheh. ¹⁹ Yuto yin̈ istiˈ noˈ yeb yin̈ isn̈e noˈ akˈbil yip, yuto isn̈e noˈ ay iswiˈ hacaˈ iswiˈ laba, haˈ xin isn̈e noˈ chiakˈni ecˈoyaˈ yanma anma.

²⁰ Yajaˈ huntekˈan anma mach cam yu huntekˈan isyaˈtajil tuˈ, maẍticˈa isbejcano istxˈojal, yeb maẍticˈa xin isbej yinayo isba tet ischejab naj matzwalil, yeb tetej tioẍ watxˈebil yin̈ chˈen oro, chˈen plata, chˈen bronce, yeb yin̈ej chˈen chˈen yeb yin̈ te teˈ. Huntekˈan tioẍ tuˈ mach chu yilni, mach chabe, yeb mach chu yeqˈui. ²¹ Maẍticˈa xin isbejpaxcano anma ispotxˈwahi, iscunli, yixli yeb iswinajli, yeb xin yelkˈawi.

Naj ángel ikˈn̈e huneˈ teˈ nichˈan hum

10  Lahwi tuˈ, wilnihan huneˈ naj ángel caw ay yip, tit yul satcan̈ xol moyan, aycan̈ xin huneˈ noˈ chˈer yiban̈ iswiˈ naj. Caw xin chitzejla sat naj hacaˈ istzejla tzˈayic, haxa yoj naj xin hacaˈ xaj kˈa kˈaˈ chiah joplahi, hac tuˈ jilni. ² Ay xin huneˈ teˈ nichˈan hum ikˈbil yu naj, leyanto teˈ; yanayo naj huneˈ yoj yin̈ iswatxˈkˈab yiban̈ haˈ mar, haxa hunxa yoj naj yin̈ ismeckˈab yayo yiban̈ txˈo txˈotxˈ. ³ Yawi naj yin̈ caw ip hacaˈ yel yaw noˈ balam. Hayet yawi naj isn̈irla hujeb cˈuh, yalni tzotiˈ. ⁴ Hayet lahwi istzotel hujeb cˈuh tuˈ, wocan intzˈibn̈enojan walnihan. Yajaˈ wabenan huneˈ yul nukˈe satcan̈ halni hacaˈ tiˈ:

―Ton̈e chacˈubacano huntekˈan maxawabe tiˈ, mach chatzˈibn̈ecanoj, ẍi wetan.

⁵ Naj ángel ayayo yoj yiban̈ haˈ mar yeb yiban̈ txˈo txˈotxˈ wiltuˈan, yican̈ naj iswatxˈkˈab satcan̈, ⁶ yanico naj Comam testigohal, Comam itzitzn̈eticˈa yin̈ sunilbal tzˈayic, Comam watxˈen̈e satcan̈ yeb sunil tzet ay satcan̈, Comam watxˈen̈e txˈo txˈotxˈ yeb sunil tzet ay sat txˈotxˈ, Comam watxˈen̈e haˈ mar yeb sunil tzet ay xol haˈ, yalni naj hacaˈ tiˈ:

―Tinan̈ matxa chiecˈ tiempo, ⁷ yuto hayet chˈokˈtzeno naj ishuj ángel istrompeta cat yijnocano isba tzet ewan yehi, huntekˈan nabilticˈa yu Comam Dios, hacaˈticˈa yu yalni Comam tet ebnaj ischejab yet payat, ẍi naj.

⁸ Huneˈ yul nukˈe wabeticˈahan yul satcan̈, tzotelpaxayti wetan, yalni hacaˈ tiˈ:

―As ilo huneˈ nichˈan hum leyanayo yul iskˈab naj ángel lin̈ancan̈ yiban̈ haˈ mar yeb yiban̈ txˈo txˈotxˈ, ẍi wetan.

⁹ Intohan inkˈannolojan huneˈ nichˈan hum tuˈ tet naj, istakˈwi naj wetan:

―Ay teˈ lah, loto teˈ, hayet chalono teˈ caw chiˈ chieloco yul hatiˈ yu teˈ, hacaˈ ischiˈal noˈ cab, wal yul hacˈul xin caw cˈah chielicoj, ẍi naj wetan.

¹⁰ Inchahnilojan teˈ tet naj ángel tuˈ, inlonitojan teˈ, caw xin chiˈ elico yul intiˈan yu teˈ, wal yul incˈulan xin caw cˈah elicoj yet lahwi inlonihan teˈ. ¹¹ Lahwi tuˈ yallaxpaxo wetan:

―Caw yilal hawalni hunelxa yin̈ tzet chute yalni Comam Dios yin̈ txˈiˈalej niẍte con̈ob yeb nimeta con̈ob, yeb txˈiˈal abxubal yeb yin̈ ebnaj rey, ẍi wetan.

Ebnaj cawan̈ yakˈ isba yalni Istzotiˈ Comam Dios

11  Lahwi tuˈ yakˈlax huneˈ malbal wetan, hacaˈ teˈ ah. Yallax wetan hacaˈ tiˈ:

―Ahan̈wanoj cat hawoc hamalen yatut Comam Dios yebpaxo meẍa yet xahanbal, cat habisni hanta mac ayicto yinoyo isba tet Comam. ² Yajaˈ wal yamakˈil yeb yin̈la ishoyanil mach chamale yuto chiakˈlax tet ebnaj nan con̈obal, cat isxan̈nayo ebnaj iscon̈ob Comam Dios yulbal cuarenta y dos ixahaw. ³ Chiwatijan cawan̈ inchejaban chakˈ isba yalnilo intzotiˈan yulbal mil doscientos sesenta tzˈayic. Ayco huntekˈan xilkˈape yet biscˈulal yin̈ ebnaj, ẍi wetan.

⁴ Yechel ebnaj cawan̈ tiˈ ye teˈ cabeb yoj olivo yeb chˈen cabeb candelero bay chiahto cantil ayco sata Comam Dios, Comam yahaw txˈo txˈotxˈ. ⁵ Ta ay mac choche chioc etloco yin̈ ebnaj cawan̈ tiˈ chielti kˈaˈ yul istiˈ ebnaj, cat isn̈usnicanto ebnaj mac chichiwa iscˈul yin̈ ebnaj. Hac tuˈ chu iscamcanilo macta chiwatxˈen istxˈojal yin̈ ebnaj. ⁶ Aypaxo yip ebnaj ismajchen satcan̈ yun̈e matxa chakˈ haˈ n̈ab yulbal tzˈayic bay chal ebnaj Istzotiˈ Comam. Aypaxo yip ebnaj yanico ha haˈ chicˈal, yebpaxo xin ay yip ebnaj yakˈni ecˈoyaˈ yanma anma ay sat txˈo txˈotxˈ yu ej isyaˈtajil, hantaticˈa el choche iscˈul ebnaj.

⁷ Hayet chilahwi yalnicˈo ebnaj cawan̈ tuˈ Istzotiˈ Comam Dios, ay huneˈ naj Nokˈ isbi chiahilo yul huneˈ niman xab; chaco naj howal yin̈ ebnaj cawan̈ tuˈ cat iskˈoji naj yin̈ ebnaj, cat ispotxˈlax ebnaj yu naj Nokˈ isbi tuˈ. Yanico naj Nokˈ isbi howal yin̈ ebnaj, chiahilo yul huneˈ niman xab. Chikˈoji naj yin̈ ebnaj cawan̈ tuˈ ⁸ Chicancano pacˈno isnimanil ebnaj yul iscallehal huneˈ niman con̈ob bay alaxcan̈ Comam Jesucristo yin̈ teˈ culus, Comam Yahawil ebnaj. Huneˈ con̈ob tuˈ challax Sodoma yeb Egipto yin̈, haˈ chalniloj ta txˈoj tzet chiswatxˈe. ⁹ Sunil anma nananta con̈obal, nananta anmahil, nananta yabxubal, nananta nime con̈obal chiilni isnimanil ebnaj yulbal yicta iscan̈ tzˈayic; mach chisje anma ta chimujlax ebnaj. ¹⁰ Yuxin sunil anma yul sat yiban̈kˈinal tiˈ caw oc yin̈ tzalahilal yu iscamical ebnaj. Yakˈni anma sabehal tet hunun yu tzalahilal, yuto ebnaj cawan̈ ischejab Comam tuˈ caw yakˈ ebnaj ecˈoyaˈ yanma anma.

¹¹ Lahwin̈e yicta iscan̈ tzˈayic tuˈ, yulcan̈ iscˈul ebnaj cawan̈ tuˈ yu Comam Dios, yahwano ebnaj. Haˈ xin sunil anma ilni huneˈ tuˈ caw occano xiwquilal yin̈. ¹² Yaben ebnaj cawan̈ tuˈ huneˈ yul nukˈe awi yin̈ caw ip yul satcan̈, yalni hacaˈ tiˈ:

―Ahan̈weti bey tiˈ, ẍi tet ebnaj.

Isto ebnaj satcan̈ xol huneˈ moyan, sunil ebnaj ayco ishowal yin̈ ebnaj ilni huneˈ tuˈ. ¹³ Yin̈ena tuˈ yecˈ huneˈ niman chixcab istan̈ilo huneˈ islahon̈eb majan teˈ n̈a yul huneˈ niman con̈ob tuˈ, hujeb mil anma cam yu huneˈ chixcab tuˈ. Wal anma mach cami caw xiwi, yanico ismay Comam Dios ay yul satcan̈.

¹⁴ Hac tuˈ yu yecˈto iscab isyaˈtajil, tinan̈ xin yichixapaxico huneˈ isyox isyaˈtajil.

Yet yokˈtzelax chˈen ishuj trompeta

¹⁹ Lahwi tuˈ, ishajni isba yatut Comam Dios yul satcan̈, chi‑xin‑jilicto huneˈ caẍa yet istrato Comam ayicto yul yatut tuˈ. Yichico isjepla cˈuh, iskˈan̈i satcan̈, isn̈irlapaxoj, yecˈ huneˈ chixcab, yakˈnipaxo huneˈ niman sajbat.

Huneˈ ix ix yeb huneˈ mac hacaˈ noˈ dragón

12  Lahwi tuˈ xin, isyeni isba huneˈ niman yechel yul satcan̈. Wilnihan huneˈ ix ix hoyanico iskˈakˈal tzˈayic yin̈ hacaˈ xilkˈape, ayayo ixahaw yalan̈ yoj ix, ayco xin cablahon̈eb txˈumel iscoronaho ix yin̈ iswiˈ. ² Huneˈ ix tuˈ ayxa tzet ye ix, caw xin chiawi ix yu isyaˈil yuto iswatxˈixa iscˈul ix. ³ Isyenipaxocan̈ isba huneˈxa yechel yul satcan̈, wilnihan huneˈ mac hacaˈ noˈ nimeta dragón cajin̈, hujeb iswiˈ yeb xin lahon̈eb yucˈaˈ, ayahto xin corona yin̈ hunun iswiˈ noˈ. ⁴ Huneˈ xin isyox majan txˈumel isn̈icˈti noˈ yu isn̈e, iskˈojnayti noˈ sat txˈo txˈotxˈ tiˈ. Islin̈bacan̈ isba noˈ sata ix iswatxˈixa iscˈul tuˈ yun̈e iscˈuxnayto noˈ nichˈan unin tuˈ yet chipitzcˈahi. ⁵ Lahwi tuˈ ispitzcˈa nichˈan iswinaj unin ix. Haˈ naj tuˈ xin chioc yahawilo sunilej con̈ob, ayco xin huneˈ isvara naj naba hierro yul iskˈab, yaj ilaxilo nichˈan yunin ix tuˈ, yilaxto tet Comam Dios bay ay istzˈon̈obal. ⁶ Wal ix tuˈ elcan̈ ix, isto ix bey txˈotxˈ desierto. Haˈ bey tuˈ cˈulxa ye huneˈ yehobal ix yu Comam, yakˈlax tzet chislo ix yulbal mil doscientos sesenta tzˈayic.

⁷ Lahwi tuˈ yoc huneˈ niman howal yul satcan̈. Naj ángel Miguel yeb ebnaj yángel tzujan yintaj, yakˈle ebnaj howal yeb noˈ dragón yeb yángel noˈ. ⁸ Yajaˈ xin mach kˈoji noˈ dragón tuˈ yeb yángel, matxa xin hamanil tet noˈ yeb yángel yul satcan̈. ⁹ Hac tuˈ xin yu yilaxilti noˈ dragón tuˈ yul satcan̈. Haˈ ton huneˈ mac tuˈ yuteco isba labahil yet payat, chihallax diablohal yeb Satanás, haˈ xin chˈakˈni subchaho anma ay yul sat yiban̈kˈinal tiˈ. Kˈojlaxayti noˈ dragón tuˈ yeb yángel sat txˈo txˈotxˈ.

¹³ Hayet yilni noˈ dragón tuˈ ta kˈojlaxayti noˈ sat txˈotxˈ, yoc noˈ istzumbenocˈo ix pitzcˈa nichˈan iswinaj unin tuˈ. ¹⁴ Yajaˈ xin akˈlax cabeb isxicˈ ix caw nimej hacaˈ xicˈ noˈ tˈiw, yah ix satcan̈, isto ix bey txˈotxˈ desierto bay ay huneˈ yehobal ix yu Comam, yun̈e nahat chielcano ix tet noˈ dragón tuˈ. Haˈ tuˈ xin akˈlax tzet chislo ix yulbal yicta iscan̈ habil. ¹⁵ Wal noˈ dragón tuˈ yalti noˈ huneˈ niman haˈ yul istiˈ yun̈e yijlaxto ix yu haˈ niman haˈ tuˈ. ¹⁶ Yajaˈ xin colwa txˈo txˈotxˈ yin̈ ix, yuto yucˈto txˈotxˈ haˈ yalti noˈ yul istiˈ. ¹⁷ Caw tit ishowal noˈ dragón tuˈ yin̈ ix, isto noˈ yanoco howal yin̈ huntekˈan yunin ix, haˈ ton mac chiyijen ischejbanil Comam Dios yeb ebnaj chibeybaln̈e iscuybanil Comam Jesucristo.