Revised Common Lectionary (Semicontinuous)
Kalaki tik Yerushalem
11 Wan kwak tzinkisket Yerushalem wan ajsiket Bet-Page wan Bet-Anya inakastan ne Olivajtepet, yaja kintuktia ume pal ne mumachtianimet 2 wan kinhilwia:
—Shumet uni techan nemi anmumelawka, wan kwak tamit anhajsit né anyawit ankiajsit se burrojchin ilpituk ne inteuk mutalij aka ijpak: shiksutumakan wan shalwikakan. 3 Wan su aka metzintajtanilia taika ankichiwat ijkiuni, shinakan:
"Ne itekuyu muneki, nemanha yawi kikwepa."
4 Wan yajket wan kiajsiket se burrojchin ilpituk itech se tentzakka né kan munamikit ne ujujti, wan kisutumat. 5 Wan nemituyat sejse ka né wan kinhilwijket:
—Tay ankichiwat? Taika ankisutumat ne burrojchin?
6 Yejemet kinhilwijket ijkiunisan ken inatuya ne Yeshu, wan kinhajkawket, 7 wan kalwikaket ne burrojchin kanka nemituya Yeshu, wan kitaliat inkwajkwach ijpak wan kitalijket ne Yeshu muetztuk ijpak. 8 Wan miak kichayawket ne inkwajkwach pak ne ujti, wan sejseuk kitekaket ijiswat ne kikutuntiwit tik ne kojtan, 9 wan ne yawit iishpan wan iipan tzajtziket yajket:
—Hosha-na! Teutasujtatuk ne witz tik itukay Tutajwan! 10 Teutasujtatuk ne tatekimakalis witz ipal ne tuteku Dawid! Hosha-na tik ne wejwejkapan!
11 Wan kalak tik Yerushalem. Yajki ne teupan, wan tajtachiak nujme. Kwak teutaka, kiski wan yajki Bet-Anya iwan ne majtakti-ume.
12 Ne ukse tunal, miak ká ajsitiwit tik ne ilwit, kwak takakket ka ajsi ne Yeshu ka Yerushalem, 13 kikwijket imajmajtzal palmaj wan kisket kinamikit, wan kitzajtzalijket:
—Hosha-na! Teutasujtatuk ne witz tik itukay Tutajwan, ne kitekimaka Israel!
14 Ne Yeshu kiajsik se burrojchin wan mutalij ka ijpak, ijkiunisan ken nemi ijkwilujtuk:
15 "Maka shimajmawi, isiwapil Tzion:
uni witz ne metztekimaka
muetztuk ijpak se burrojkunet."
16 Kwak pejki, ne mumachtianimet inte kimatket. Wan kwak mumatki ka wey ne Yeshu, kwakuni kielnamikket ka ijkiuni muijkwilujtuk wan ijkiuni kichiwilijket.
5 Shimumatikan ijtik anmejemet, tay ne nusan ijtik Mawaltijtuk Yeshu, 6 ká:
Kwak tik iweyka Teut
te kitak ken se pal kitzkia
ma kenha ken Teut,
7 sute yaja kikwij iweyka
se tekitini te tatka ipatiw,
muchijki ken se takat
kipia muchi tay kipia takat;
8 mutemultij, muchijki tetakamatini
hasta mikilis, mikilis ijpak cruz.
9 Neka hasta ne Teut kiajkukij
wan kitakulij se itukay
ijpak muchi ne tutujtukay,
10 pal ma mutankwaketzakan muchi
ka ilwikak wan pak tal wan tik miktan,
11 wan ma inakan ka tejkia
ka Yeshu Mawaltijtuk tutajtzin
pal tzitzinaka Teut ne tuteku.
Musenputzujket pal kitat ken welit kimiktiat Yeshu
14 Kwak kinekiuk ume tunal pal ne ilwit itukay Paskwaj kan te mukwa ne tay kipia shukutishti, ne weypalejmet wan ne tajkwiluanimet tatejtemuat katka ken welituyat kichiwat pal kishijshikuat Yeshu pal kitzkiat wan kimiktiat, 2 ika inat katka:
—Inte tik ne ilwit, ma inte mukumunti ne techan.
Se siwat kimaka pajtipuputuka
3 Wan kwak yaja nemituya tik Bet-Anya, ichan Shimon ne shinpiani, kan takwa ajsik se siwat kipiatuya se botellaj iwan ushit yek sujsul wey ipatiw, wan kitapan wan kikushinij ijpak ne itzuntekun. 4 Sejse kwalanket, inat tik inyujyulu:
"Taipal ankinekit kitzunpuluat ijkiuni ne ushit? 5 Ini ushit weliskia munamaka tik ne tiankis ka mas que yey tzunti tumin wan welit tikinmakat ne munekit!"
Yeshu kiajajwaket. 6 Inak:
—Shikajkawakan! Taika ankijilwiat? Nemi yek tay kichiwki nupal, 7 ika senpa ankipiasket anmuwan sejse ká munekit; welit ankipalewiat kwak ankinekit. Naja inte, te annechpiasket senpa. 8 Yaja kichiwki tay welik: walaj peyna kitalilia pajtipuputuka ne nuweyka pal kiekchiwa pal kitalpachuat. 9 Kia nimetzinhilwia: nujme kan yawi munajnawatia ne yeknawatilis tik ne taltikpak, yawit taketzat ipanpa tay kichiwki ini siwat pal muelnamiki.
Yuda Ishkaryot
10 Yuda Ishkaryot, se pal ne majtakti-ume, yajki itech ne weypalejmet pal temaka. 11 Kwak takakket pakiket wan inaket ka yawit kimakat tumin. Wan pejki tatejtemua ne horaj yek pal temaka.
Ne tipan Paskwaj
12 Wan tik ne achtu tunal pal ne ilwit kwak te mukwa shukutishti wan mumiktia katka ne ichkakunet ipal Paskwaj, ne mumachtianimet kilwijket:
—Kan tikneki ma titaekchiwakan pal tikwa ne Paskwaj?
13 Wan yaja kituktia ume pal ne mumachtianimet wan kinhilwia:
—Shumet ne techan wan yawi metzinnamiki se takat kisajsaka se tzutzukul iwan at. Shumet iwan, 14 wan kan ne kalaki shikilwikan ne itekuyu ne kal ka ne tamachtiani ina:
"Kan nemi ne takutun ipal ne kal kan ne niaw nikwa ne Paskwaj iwan ne numujmumachtiani?"
15 Wan yajuni yawi metzinhilwitia se wey ka ikajku ajshitijtuk, shikekchiwakan ikuni tupal.
16 Wan kisket ne mumachtianimet wan yajket ne techan wan kiajsiket ken yaja kinhilwij, wan kiekchiwket ne Paskwaj.
17 Wan kwak tayuakik walaj iwan ne majtakti-ume, 18 wan kwak musentalijket wan nemituyat takwat, ne Yeshu inak:
—Kia nimetzinhilwia: se anmejemet yawi nechtemaka, wan ashan sentakwa nuwan.
19 Pejket mutechtiat. Se wan ukse pejket kitajtanit:
—Naja ne?
20 Yaja kinhilwij:
—Yaja se pal ne majtakti-ume ne tajwilia nemi nuwan tik ne yayu! 21 Ika tejkia ka yawia ne Itelpuch ne Takat, ijkiunisan ken nemi ijkwilujtuk. Melka uni, ay! uni takat ká temaka ne Itelpuch ne Takat! Mas yek su te nestuskia yajuni!
22 Wan kwak nemituyat takwat, kikwij se tamal wan kiteuchiwki wan kipitzakuj wan kinmakak wan inak:
—Shikwikan: ini ne nuweyka.
23 Wan kikwij se atiluni wan inak panpadiush wan kinmakak, wan muchi atiket, 24 wan kinhilwij:
—Ini ne nuesyu ipal ne sentaketzat, ne mushinia pal muchi. 25 Kia nimetzinhilwia: intea niaw nikuni iayu shukumekat senpa hasta ma nikuni ne yankwik tik uni tunal ijtik ne itatekimakalis ne Teut.
26 Wan takwikaket, wan mukwepket Olivajtepet.
Gat-Shemani
27 Wan ne Yeshu kinhilwia:
—Muchi anmejemet yawit mutekukujmatit, ika nemi tajkwilujtuk:
Nikchalus ne tajpiani wan ne takwalmet musentalusket.
28 Kwak tami nimuyulkwi, niasneki Galilaya anmuishpan.
29 Ne Pedro kilwij:
—Melka mutekukujmatit muchi, naja inte!
30 Wan ne Yeshu kilwia:
—Kia nimetzilwia ka taja ashan tayua, achtu ka takwika ukpa ne ukichtijlan, tiaw tina yeshpa ka inte tinechishmati.
31 Yaja ina katka uksenpa:
—Melka nemi pal nimiki muwan tesu niaw nina ka te ninemi muwan!
Wan muchi yejemet nusan inaket kenha.
32 Wan yajket hasta kan itukay Gat-Shemani, wan kinhilwia ne mumachtianimet:
—Shimutalikan ka nikan. Naja niaw niknutza ne Teut.
33 Wan kikwij iwan Pedro wan Yakob wan Yojan, wan pejki ishpuyawi wan tajselia, 34 wan kinhilwia:
—Nechkukua nualmaj hasta nimiki. Shinakakan nikansan taishpelwiat.
35 Wan yajki achi iishpan wan wetzki talchi kinutza ne Teut pal kitajtani ma te kiseli uni horaj su weli muishtilia, 36 ina:
—Nutata, taja tinuteku wan tiweli muchi, shinechishtili ini atiluni. Melka uni, inte ken naja nikneki asunte ken taja tina.
37 Wan ajsi wan kita ka kuchit. Wan kilwia ne Pedro:
—Shimon, tikuchi? Inte welik tinaka tikishpelwia nian se horaj? 38 Shikishpelwikan wan shiktajtanikan ne Teut ma inte shikalakikan ijtik taejekulis. Melka kineki ne tuyulu, ne tuweyka inte weli.
39 Wan yajki senpa wan tanutzki kenha. 40 Wan mukwepki wan kitak senpa ka kuchit ika ne inhijish etekistiwit wan te kimatit tay nankiliskiat. 41 Yajki wan walaj senpa wan kinhilwia:
—Shikuchikan tel wan shimusewikan. Ajsik ne horaj! Yawia mutemaka ne Itelpuch ne Takat tik ijimey ne tateyekchiwat! 42 Shimuketzakan, tiawita! Nemia nikan ne nechtemaka!
43 Wan nemanha, kwak yaja nemituya taketza, walaj Yuda, ne se pal ne majtakti-ume, wan miak walajket iwan kiwikat majmachej wan kwajkwawit itzalan ne weypalejmet wan ne tajkwiluanimet wan ne nojnoymet. 44 Kinmakatuya yajuni ká temaka se pal mumati, inatuya:
—Ká ne niaw niktennamiki, yaja ne, shikitzkikan wan shikwikakan tzaktuk.
45 Wan walaj wan nemanha ajsik itech wan kilwia:
—Tajtzin!
Wan kitejtennamik. 46 Kitzkijket tik inmejmey wan kikwijket. 47 Se pal ne nemituyat ka né kiajkewki iespadaj wan kichaluj ne itekitini ne weypalej wan kikutun ne inakas. 48 Wan ne Yeshu kinhilwij:
—Anwalkisket nechitzkiat ken ankikwit se techteki, iwan majmachej wan kwajkwawit? 49 Ninentuk anmuwan mujmusta nitamachtia ka teupan, wan te anwalajket annechkwit! Nemi pal yekawi tay nemi ijkwilujtuk.
50 Wan muchi kiajkawket wan chulujket. 51 Wan senyawi katka iwan se takapiltzin kiwika semaya se ikwenyu; 52 kiajkawilij ne ikwenyu wan yaja chuluj petznaj.
Yeshu ilpituk
53 Wan kiwikaket ne Yeshu itech ne weypalej, wan musentepewat muchi ne weypalejmet wan ne noymet wan ne tajkwiluanimet ka né. 54 Wan Pedro yajki iipan wan nejnenki wejka hasta ichan ne weypalej, wan mutalij tik ne tenkal kan nemituyat ne tekitinimet mututuniat tentit.
55 Ne weypalejmet wan muchi ne kalpuli tatejtemuat katka pal kiajsit ká inaskia tay kichiwtuk ne Yeshu pal welit kimiktiat, wan te kiajsit tatka, 56 ika miak inat katka ka muchiwki tay te muchiwki, wan tay ina katka ne se te kenha ken tay ina ne seuk. 57 Wan muketzket sejse sankataketzat, inat:
58 —Tejemet tikakket ina: "Ne ijimey sejse kichiwket ini teupan wan naja niaw niktajkali wan ijtik yey tunal niaw niketza ukseuk sin que nikwi nujnumey."
59 Wan nian ijkiuni kenha katka tay inatuya ne se wan ne seuk ipanpa. 60 Wan ne weypalej muketzki tatajku wan kitajtanilij Yeshu:
—Tesu tina tatka? Tay ini yejemet inat ka tikchiwki?
61 Yaja nemik takaktuk wan te inak tatka, wan ne weypalej kitajtanilij senpa:
—Taja ne Mawaltijtuk, ne itelpuch ne Yektenejtuk?
62 Yeshu inak:
—Naja ne, wan san ankitasket ne Itelpuch ne Takat muetztuk ka imayekkan ne Weli Wey walejku pak ne mijmishti ipal ne ilwikak.
63 Ne weypalej kitapanki ne iwipil, wan ina:
—Intea muneki ma aka ina tatka! 64 Ankikakket tay kukujtaketzki. Tay anhinat?
Wan muchi inaket ma kimiktikan. 65 Wan sejse pejket tachijchat ijpak, wan kishtzakwat iwan se kwachti wan pejket kimakat, wan kilwiat:
—Shitanutza ken se taketzani!
Wan ne tekitinimet kichalujket iwan inmajmatashkal.
Pedro ina ka inte kishmati
66 Wan ajsi se pal ne siwapipil ne tekitit tik ne ikal ne weypalej kan nakak Pedro tik ne tenkal, 67 wan kitak ne Pedro mututunia tentit, tachiak wan ina:
—Taja nusan tinemik iwan Yeshu pal Nazaret!
68 Yaja inak:
—Tesu! Te nikishmati, wan te nikmati tay tina!
Wan kiski ne tenkal, 69 wan ne siwapil kitak wan pejki kinhilwia ne nemituyat inawak senpa:
—Uni se pal yejemet!
70 Ne Pedro ina senpa ka tesu. Panuk chiupichin wan ne nemituyat inawak kilwijket ne Pedro senpa:
—Ijkia, taja se pal yejemet, ika nusan tiwitz Galilaya!
71 Yaja pejki kichiwa maldictar wan kichiwa jurar ka:
—Te nikishmati ini takat ká anhinat.
72 Wan nemanha takwikak ne ukichtijlan ukpa, wan Pedro kielnamik tay kilwijtuya ne Yeshu:
"Achtu ka takwika ukpa ne ukichtijlan, tiaw tina yeshpa ka inte tinechishmati."
Kishketzki wan pejki chuka.
Ishpan Pilatus
15 Wan nemanha, ka tapuyawa, sentajtaketzket ne weypalejmet iwan ne noymet, ne tajkwiluanimet wan muchi ne kalpuli pal kitat tay yawit kichiwat, wan kiwikaket ilpituk pal temakat iwan Pilatus. 2 Wan ne Pilatus kitajtanilij:
—Taja ne tatuktiani ipal ne Yudayujmet?
Wan kilwia:
—Taja tina!
3 Wan ne weypalejmet inaket miak tay kichiwtuk. 4 Pilatus kitajtanilia senpa, ina:
—Tesu tina tatka? Shikita keski inat ka tikchiwtuk!
5 Ne Yeshu te inak tatka, hasta ishpuyawik ne Pilatus.
6 Ikman kwak nemi katka se ilwit, ne tatuktiani kichulultia katka se ilpituk ká kitajtanit, 7 wan ijtik muchi ne ijilpituk nemituya se itukay Bar-Aba; yaja wan sejse ikunpa tasuntuyat wan tamiktijtuyat tik ne techan. 8 Wan waltejkuket wan pejket tajtanit ken senpa, 9 wan Pilatus kinhilwij:
—Ankinekit ma nikchululti ne tatuktiani ipal ne Yudayujmet?
10 Ika yaja kimati ka ne weypalejmet temakatiwit ne Yeshu ipanpa envidiaj. 11 Ne weypalejmet ne kikumuntijket ne takamet wan siwatket pal kilwiat ma kichululti ne Bar-Aba. 12 Ne Pilatus kinhilwij ukseujti:
—Tay niaw nikchiwa tel iwan yajini ká ankinutzat ne tatuktiani ipal ne Yudayujmet?
13 Yejemet tzajtziket senpa:
—Shikcruzpilu!
14 Ne Pilatus kinhilwij:
—Tay kichiwki?
Tzajtziket uksenpa:
—Shikcruzpilu!
15 Pilatus kitak yek ma muchiwa ken kielewia ne miaktal. Yajika, kichulultij ne Bar-Aba. Tatuktij ma kiwitekikan ne Yeshu wan ma kiwikakan pal kicruzpiluat.
Yeshu cruzpilujtuk
16 Ne tasumanimet kikalaktijket ijtik ne weykal itukay Praytorioj, wan kalnutzat muchi ne tasumanimet, 17 wan kitalilijket kwajkwachti galantzin, wan kipikit se yawal pal wijwitzti wan kitzunyawalujket, 18 wan pejket kitajpaluat wan kipakiliat, inat: "Oj! Tatuktiani pal ne Yudayujmet!" 19 wan kitasat ne itzuntekun iwan se uat, wan tachijchat ijpak, wan temut mutankwaketzat iishpan. 20 Wan kwak tamiket kipajpakiliat, kishtilijket ne ikwajkwach galantzin wan mukwepket kitaliliat ne ikwajkwach wan kishtiat pal kicruzpiluat.
21 Wan kituktijket se takat itukay Shimon pal Kurene, ne inteku Aleksandro wan Rufus. Yaja witz ne kojtan wan panu ka né, wan kituktijket kiwika ne icruz ne Yeshu, 22 wan kiwikat hasta ajsit kan itukay Golgota (tik Nawat kineki ina "kan nemi ne tzuntekumat"). 23 Kimakaket kushushaj chichik, pero yaja te kiunik tatka, 24 wan kipiluat tik ne cruz wan kitakutuntijket ne ikwajkwach wan kitamutaket chivos pal kitat ká ipal muchi. 25 Ka chiknawi horaj kicruzpilujket, 26 wan ka ijpak itzuntekun nemituya tawawasujtuk ne taika, wan ina: "Ne intatuktiani ne Yudayujmet." 27 Nusan kincruzpilujket ume techtekini inawak, ne se ka iyekkan wan ne se ka ukse ladoj. (28) . 29 Ne panut itech kukujtaketzat katka wan muishkekelutzat, inat:
—Ja! Taja, ne weli tiktajkali ne teupan wan tiketza senpa ijtik yey tunal, 30 ashan shimupalewi! Shaltemu tik mucruz!
31 Ijkiasan ne weypalejmet wetzkat muilwiat iwan ne tajkwiluanimet:
—Kinpalewij sejseuk, wan yajasan te weli mupalewia! 32 Ne Mawaltijtuk, ne tatuktiani ipal Israel, ashan ma waltemu tik ne cruz pal kiane tiawit tikitat wan tikmatit!
Nusan ne mucruzpilujtiwit inawak kijilwiat katka.
33 Wan ajsik tajkutunal wan kunyuakiski nujme ne tal hasta yey horaj ka teutak, 34 wan ka yey horaj ne Yeshu tzajtzik:
—Elohi Elohi, lema shebaktani?
ne kineki ina tik Nawat: Nuteut Nuteut, taika tinechajkaw? 35 Wan sejse pal ne nemituyat inawak kikakket wan inat:
—Shikita, kinutza Eliya!
36 Kiski mutalua ajaka kitema se esponjaj iwan yayushukuk wan kisaluj tik se uat wan pejki kimaka pal ati, wan ina:
—Tiawit tikitat asu witz Eliya kitemultia!
37 Ne Yeshu tzajtzik wey, wan sewik. 38 Wan tzayanik itajku ne kwachtzakka tik ne teupantzin. 39 Ne sentzuntuktiani ne nemituya inawak, kwak kitak ka sewik, inak:
—Tejkia ka ini takat Itelpuch ne Teut!
40 Unisan nemituyat sijsiwatket tajtachiat nusan. Ijtik yejemet nemituya Maryam ne ipal Magdala, wan Maryam ne innan Yakob Chikitik wan Yose, wan Shalome — 41 yejemet katka ne senyajtiwit kwak yaja nemik tik Galilaya wan kitekipanuat katka — wan sejseuk ká tejkutiwit iwan hasta Yerushalem.
Ne shaput
42 Nemituyat ne tunal ipal tajshitilis achtu ka pewa ne sewilis, wan kwak tayuakik 43 walaj Yosep pal Ramatay, se yek takat ipal ne kalpuli ká nusan tejchia ma wiki ne itatekimakalis ne Teut. Yaja yajki kita Pilatus pal kitajtani ne mikini. 44 Pilatus ishpuyawik ka yaja miktuka wan kalnutzki ne sentzuntuktiani pal kitajtanilia su tejkia ka miktuya, 45 wan kimatki itech ne sentzuntuktiani ka kiane, wan temakak ne mikini iwan Yosep. 46 Wan kikujki se ikwenyu pal kikimilua wan kikutemultij ne Yeshu wan kitakentij wan kitalij ijtik se shaput ne muwawantuk tik ne tesual, wan kimimiluj se tet wan kalkwij ne iten ne shaput. 47 Ne Maryam pal Magdala wan Maryam ne inan Yose nakaket tachiat kan nemituya tekatuk.
Ishpan Pilatus
15 Wan nemanha, ka tapuyawa, sentajtaketzket ne weypalejmet iwan ne noymet, ne tajkwiluanimet wan muchi ne kalpuli pal kitat tay yawit kichiwat, wan kiwikaket ilpituk pal temakat iwan Pilatus. 2 Wan ne Pilatus kitajtanilij:
—Taja ne tatuktiani ipal ne Yudayujmet?
Wan kilwia:
—Taja tina!
3 Wan ne weypalejmet inaket miak tay kichiwtuk. 4 Pilatus kitajtanilia senpa, ina:
—Tesu tina tatka? Shikita keski inat ka tikchiwtuk!
5 Ne Yeshu te inak tatka, hasta ishpuyawik ne Pilatus.
6 Ikman kwak nemi katka se ilwit, ne tatuktiani kichulultia katka se ilpituk ká kitajtanit, 7 wan ijtik muchi ne ijilpituk nemituya se itukay Bar-Aba; yaja wan sejse ikunpa tasuntuyat wan tamiktijtuyat tik ne techan. 8 Wan waltejkuket wan pejket tajtanit ken senpa, 9 wan Pilatus kinhilwij:
—Ankinekit ma nikchululti ne tatuktiani ipal ne Yudayujmet?
10 Ika yaja kimati ka ne weypalejmet temakatiwit ne Yeshu ipanpa envidiaj. 11 Ne weypalejmet ne kikumuntijket ne takamet wan siwatket pal kilwiat ma kichululti ne Bar-Aba. 12 Ne Pilatus kinhilwij ukseujti:
—Tay niaw nikchiwa tel iwan yajini ká ankinutzat ne tatuktiani ipal ne Yudayujmet?
13 Yejemet tzajtziket senpa:
—Shikcruzpilu!
14 Ne Pilatus kinhilwij:
—Tay kichiwki?
Tzajtziket uksenpa:
—Shikcruzpilu!
15 Pilatus kitak yek ma muchiwa ken kielewia ne miaktal. Yajika, kichulultij ne Bar-Aba. Tatuktij ma kiwitekikan ne Yeshu wan ma kiwikakan pal kicruzpiluat.
Yeshu cruzpilujtuk
16 Ne tasumanimet kikalaktijket ijtik ne weykal itukay Praytorioj, wan kalnutzat muchi ne tasumanimet, 17 wan kitalilijket kwajkwachti galantzin, wan kipikit se yawal pal wijwitzti wan kitzunyawalujket, 18 wan pejket kitajpaluat wan kipakiliat, inat: "Oj! Tatuktiani pal ne Yudayujmet!" 19 wan kitasat ne itzuntekun iwan se uat, wan tachijchat ijpak, wan temut mutankwaketzat iishpan. 20 Wan kwak tamiket kipajpakiliat, kishtilijket ne ikwajkwach galantzin wan mukwepket kitaliliat ne ikwajkwach wan kishtiat pal kicruzpiluat.
21 Wan kituktijket se takat itukay Shimon pal Kurene, ne inteku Aleksandro wan Rufus. Yaja witz ne kojtan wan panu ka né, wan kituktijket kiwika ne icruz ne Yeshu, 22 wan kiwikat hasta ajsit kan itukay Golgota (tik Nawat kineki ina "kan nemi ne tzuntekumat"). 23 Kimakaket kushushaj chichik, pero yaja te kiunik tatka, 24 wan kipiluat tik ne cruz wan kitakutuntijket ne ikwajkwach wan kitamutaket chivos pal kitat ká ipal muchi. 25 Ka chiknawi horaj kicruzpilujket, 26 wan ka ijpak itzuntekun nemituya tawawasujtuk ne taika, wan ina: "Ne intatuktiani ne Yudayujmet." 27 Nusan kincruzpilujket ume techtekini inawak, ne se ka iyekkan wan ne se ka ukse ladoj. (28) . 29 Ne panut itech kukujtaketzat katka wan muishkekelutzat, inat:
—Ja! Taja, ne weli tiktajkali ne teupan wan tiketza senpa ijtik yey tunal, 30 ashan shimupalewi! Shaltemu tik mucruz!
31 Ijkiasan ne weypalejmet wetzkat muilwiat iwan ne tajkwiluanimet:
—Kinpalewij sejseuk, wan yajasan te weli mupalewia! 32 Ne Mawaltijtuk, ne tatuktiani ipal Israel, ashan ma waltemu tik ne cruz pal kiane tiawit tikitat wan tikmatit!
Nusan ne mucruzpilujtiwit inawak kijilwiat katka.
33 Wan ajsik tajkutunal wan kunyuakiski nujme ne tal hasta yey horaj ka teutak, 34 wan ka yey horaj ne Yeshu tzajtzik:
—Elohi Elohi, lema shebaktani?
ne kineki ina tik Nawat: Nuteut Nuteut, taika tinechajkaw? 35 Wan sejse pal ne nemituyat inawak kikakket wan inat:
—Shikita, kinutza Eliya!
36 Kiski mutalua ajaka kitema se esponjaj iwan yayushukuk wan kisaluj tik se uat wan pejki kimaka pal ati, wan ina:
—Tiawit tikitat asu witz Eliya kitemultia!
37 Ne Yeshu tzajtzik wey, wan sewik. 38 Wan tzayanik itajku ne kwachtzakka tik ne teupantzin. 39 Ne sentzuntuktiani ne nemituya inawak, kwak kitak ka sewik, inak:
—Tejkia ka ini takat Itelpuch ne Teut!
40 Unisan nemituyat sijsiwatket tajtachiat nusan. Ijtik yejemet nemituya Maryam ne ipal Magdala, wan Maryam ne innan Yakob Chikitik wan Yose, wan Shalome — 41 yejemet katka ne senyajtiwit kwak yaja nemik tik Galilaya wan kitekipanuat katka — wan sejseuk ká tejkutiwit iwan hasta Yerushalem.
Ne shaput
42 Nemituyat ne tunal ipal tajshitilis achtu ka pewa ne sewilis, wan kwak tayuakik 43 walaj Yosep pal Ramatay, se yek takat ipal ne kalpuli ká nusan tejchia ma wiki ne itatekimakalis ne Teut. Yaja yajki kita Pilatus pal kitajtani ne mikini. 44 Pilatus ishpuyawik ka yaja miktuka wan kalnutzki ne sentzuntuktiani pal kitajtanilia su tejkia ka miktuya, 45 wan kimatki itech ne sentzuntuktiani ka kiane, wan temakak ne mikini iwan Yosep. 46 Wan kikujki se ikwenyu pal kikimilua wan kikutemultij ne Yeshu wan kitakentij wan kitalij ijtik se shaput ne muwawantuk tik ne tesual, wan kimimiluj se tet wan kalkwij ne iten ne shaput. 47 Ne Maryam pal Magdala wan Maryam ne inan Yose nakaket tachiat kan nemituya tekatuk.
Ne Bibliaj Tik Nawat · © 2008, 2012 Jan Morrow