Revised Common Lectionary (Semicontinuous)
3 Wan su mutzaktuk ne tuyeknawatilis, mutzaktuk ijtik ne puliwit, 4 ika ne Teut ipal ini taltikpak kichijtuk ka pupuyut ne intamatilis ne te tayulmatit, pal kiane te yawi kintawilua ne itawilyu ipal ne yeknawatilis ipal ne Mawaltijtuk tzitzinaka, ká ne itachialis ne Teut.
5 Ika te titanajnawatiat ka tumaku sute ka imaku Yeshu Mawaltijtuk tutajtzin, wan tejemet tianmutejtekitini itech Yeshu. 6 Ika ne Teut ijtik takumi inak ma tatawi wan tatawij tik tuyujyulu pal kitawilua ne itaishmatilis ne Teut tik iishkalyu Yeshu Mawaltijtuk.
Ne weykapatalis
2 Wan kwak panuket chikwasen tunal, Yeshu kinwika Pedro wan Yakob wan Yojan, wan tejkuket ijpak se kojtik tepet ka insel, wan muweykapatak ishpan yejemet, 3 wan ne ikwajkwach pejket tajtawiat wan istakisket ken te tatka weli istakisa ijtik ne taltikpak. 4 Nusan kiski inhishpan Eliya wan Moshe, wan tajtaketzket iwan Yeshu. 5 Wan ne Pedro kilwij Yeshu:
—Tajtzin, yek ma tinemikan nikan, tikchiwakan yey tawipanti, se mupal, se ipal Moshe wan se ipal Eliya.
6 Ika te kimati tay ina, ika sujsul majmawket. 7 Wan muchiwki se mishti wan ne mishti kinkimilua, wan ijtik ne mishti mukakik:
—Ini nutelpuch yektasujtatuk, shikakikan!
8 Wan kwak tajtachiaket te nemituya aka; sema Yeshu kitaket inwan. 9 Wan kwak temuket yajket katani, kintuktij ma te kineshtilikan aka tay kitztiwit sute hasta kwak ne Itelpuch ne Takat miktuk wan muyulkwijtuk.
Ne Bibliaj Tik Nawat · © 2008, 2012 Jan Morrow