Revised Common Lectionary (Semicontinuous)

Ang Babala tungkol sa mga Tagapagturo ng Kautusan^(A)

⁴⁵ Habang nakikinig ang lahat ay sinabi ni Jesus sa kanyang mga alagad, ⁴⁶ “Mag-ingat kayo sa mga tagapagturo ng Kautusan na mahilig maglakad na suot ang mahabang damit at gustung-gusto nilang pagpugayan sila sa mga pamilihan. Gustung-gusto rin nila ang mga pangunahing upuan sa sinagoga at mga upuang pandangal sa mga piging. ⁴⁷ Kinakamkam nila ang mga tahanan ng mga babaing balo at kunwari'y nananalangin nang mahahaba. Mas matinding parusa ang tatanggapin ng mga taong iyan.”

Ang Handog ng Babaing Balo^(B)

21 Nang tumingala siya, nakita niya ang mayayaman na naglalagay ng kanilang handog sa kabang-yaman ng templo. ² Nakita rin niya ang isang mahirap na babaing balo na nag-alay ng dalawang kusing, ³ kaya't sinabi niya, “Totoo ang sinasabi ko sa inyo: ang mahirap na babaing balong iyon ang nag-alay ng higit sa ihinandog ng lahat. ⁴ Sapagkat lahat sila'y naghandog mula sa kanilang kasaganaan, ngunit ang babaing ito, kahit sa kanyang kahirapan ay nag-alay ng buo niyang ikinabubuhay.”