Revised Common Lectionary (Complementary)
Xqˈuebal xnaˈleb laj cˈamol be
5 Ut anakcuan tinye cuib oxibak li a̱tin reheb laj cˈamol be saˈ e̱ya̱nk la̱ex aj pa̱banel. La̱in ajcuiˈ e̱rochben chi cˈamoc be ut quicuil tzˈakal nak li Cristo quixcˈul raylal. La̱in tintzˈako̱nk ajcuiˈ joˈ nak la̱ex textzˈako̱nk saˈ lix nimal xlokˈal li ta̱cˈutbesi̱k. 2 La̱ex laj cˈamol be, tintzˈa̱ma che̱ru nak te̱qˈue e̱chˈo̱l chirilbaleb li ralal xcˈajol li Dios joˈ nak laj ilol xul narileb lix xul chi anchal xchˈo̱l. Te̱qˈue e̱chˈo̱l chixchˈolaninquileb laj pa̱banel li kˈaxtesinbil e̱re xban li Dios chi ma̱cuaˈ minbil e̱ru. Te̱ba̱nu ban chi anchal e̱chˈo̱l. Me̱ba̱nu yal xban xrahinquil ru le̱ tojbal. Cheba̱nu ban xban nak te̱raj cˈanjelac chiru li Dios. 3 Me̱taklaheb saˈ joskˈil li kˈaxtesinbileb e̱re. Te̱taklaheb ban saˈ xya̱lal. Cha̱bilakex chiruheb re nak teˈril le̱ cha̱bilal. 4 Li Jesucristo aˈan tzˈakal laj ilol ke. Cui nakachˈolaniheb chi us li kˈaxtesinbileb ke, li Jesucristo tixqˈue kakˈajca̱munquil nak tol‑e̱lk cuiˈchic. Li kakˈajca̱munquil aˈan incˈaˈ nalaj incˈaˈ na‑osoˈ. Ut totzˈako̱nk ajcuiˈ riqˈuin lix nimal xlokˈal. 5 Ut anakcuan, ex herma̱n, tinye cuib oxibak a̱tin e̱re la̱ex li toj sa̱jex. Chex‑abi̱nk chiruheb li nequeˈcˈamoc be saˈ e̱ya̱nk. Me̱nimobresi e̱rib che̱ribil e̱rib. Chetenkˈa ban e̱rib che̱ribil e̱rib che̱junilex joˈ tzˈi̱banbil saˈ li Santil Hu: Li Dios naxtzˈekta̱naheb li kˈetkˈeteb ut naxba̱nu usilal reheb li nequeˈxcubsi ribeb.
Xrakbal li hu riqˈuin sahil chˈo̱lej
12 Laj Silvano, aˈan jun tzˈakal aj pa̱banel. Aˈan ta̱cˈamok re li hu aˈin xintzˈi̱ba chokˈ e̱re. Moco qˈui ta li a̱tin xintzˈi̱ba e̱re. Riqˈuin li a̱tin aˈin yo̱quin chixqˈuebal e̱naˈleb. Xinchˈolob xya̱lal che̱ru chanru li rusilal li Dios. Aˈin taxak chiqˈuehok xcacuil e̱chˈo̱l. 13 Eb laj pa̱banel li cuanqueb Babilonia nequeˈxtakla xsahil e̱chˈo̱l. Eb aˈan sicˈbil ajcuiˈ ruheb xban li Dios joˈ la̱ex. Naxtakla ajcuiˈ xsahil e̱chˈo̱l laj Marcos, li ninra joˈ cualal. 14 Cheqˈuehak xsahil e̱chˈo̱l che̱ribil e̱rib riqˈuin santil utzˈuc u xban nak nequera e̱rib. Chicua̱nk taxak li tuktu̱quil usilal e̱riqˈuin xban nak la̱ex chic ralal xcˈajol li Cristo. Joˈcan taxak.
Copyright © 2000 by Wycliffe Bible Translators International