Old/New Testament

Judasmi Jesusta huañuchingapaj japichina tucushca

22 Levadura illaj tandata micuna Pascua nishca punllami ña chayamucurca. ² Pushaj curacunapish, Mandashcata yachachijcunapish gentecunata manchashpami, Jesusta ima shina pacalla huañuchinata parlanacurcacuna.

³ Paicuna chashna yuyacujpica, Iscariote nishca Judaspaj shungupimi Satanasca yaicurca. Paica, Jesuspaj chunga ishqui yachacujpurallatajmi carca. ⁴ Chai runami pushaj curacunamanpish, cuidaj soldadocunata mandajmanpish, Jesusta ima shina japichinata parlagrirca. ⁵ Chaimantami paicunaca achcata cushicushpa, Judasmanca cullquita cuna tucurcacuna. ⁶ Paipish ña cullquita japina tucushpami, Jesustaca pi mana yachajllapi, allilla japichinata yuyarishpa puricurca.

Jesusca pai huañushcata yuyachij micunatami callarichishca

⁷ Ñami levadura illajlla tandata micuna punlla chayamurca. Chai punllami, Pascuapi micungapaj huata malta ovejatapish huañuchijcuna carca. ⁸ Chaimantami Jesusca Pedrotapish, Juantapish:

–Richij, Pascuapi ñucanchij micunata allichigrichij– nirca.

⁹ Shina nijpica:

–¿Maipitaj allichigrichun ningui?– nircacunami.

¹⁰ Shina nijpica, Jesusca cashnami nirca:

–Puebloman ña yaicugricushpaca, yacu puñuta aparishca shuj runahuanmi tupanguichij. Chai runa mai huasiman yaicungacama, paita catishpa ringuichijlla. ¹¹ Chai huasiyujtaca: “ ‘Ñucanchij Yachachijca, ¿maipitaj Ñuca yachacujcunahuan Pascuapi micunataca micushun?’ ninmi” ninguichij. ¹² Chashna nijpi huasiyujca, ña allichishca shuj jatun ucutami altibajopi ricuchinga. Chaipi allichinguichijlla– nircami.

¹³ Yachacujcuna rishpaca, Jesús nishca shinallataj japishpami, Pascuapi micunata allichircacuna.

¹⁴ Ña micuna horas pajtajpica Jesusca, huillagrichun Pai mingashcacunandijmi tiyarirca. ¹⁵ Paicunatami Jesusca, cashna nirca:

–Ñucaca manaraj llaquita apashpa, Pascuapi cashna cancunahuan micunataca achcatami munarcani. ¹⁶ Cancunaman huillanimi: Cai micunataca, Taita Dios mandacunpi micungacama, cutinca mana micushachu– nircami.

¹⁷ Chashna nishpa vino vasota japishpami Jesusca, Diosta pagui nishpa cashna nirca:

–Jaicachij, tucuicuna asha asha ubyaichij. ¹⁸ Cancunaman huillanimi: Cunanmantaca uvas vinotaca, Taita Dios mandacunpi ubyangacama cutinca mana ubyashachu– nircami.

¹⁹ Shinallataj tandatapish japishpami, Diosta pagui nirca. Chai q'uipaca, chaupishpa chaupishpa yachacujcunaman cushpami:

–Cai copami, Ñuca yahuarhuan mushujta rurangapaj ari ninacushcata ricuchin. Mashna cutin caita ubyashpaca, Ñucata yuyarishpa chashna ruracuichij– nircami.

²⁰ Ña micushca q'uipaca, vaso vinotapish japishpami cashna nirca:

–Cai vaso vinoca, Ñuca yahuarta cancunamanta jichashpa, shujtaj mushuj ruranata callarishcata ricuchijmi. ²¹ Ñucata japichijca, Ñucallahuantajmi caipi tiyacun. ²² Runa Aichayuj Ñucaca, ima shina tucuchun Dios munashca shinallatajmi tucusha. Shina cajpipish Ñucata japichij runaca, ¡ai, imachari tucunga!– nircami.

²³ Jesús chashna nijpica:

–¿Maijanshi Paita japichigrinchij?– nishpami, caishuj chaishuj tapunacurcacuna.

²⁴ Chai q'uipami yachacujcunapurallataj:

–¿Maijanshi tucuita yalli jatun nishcaca canchij?– nishpa rimanacurcacuna.

²⁵ Ashtahuanpish Jesusca, cashnami nirca:

–Llajtacunata jatun mandajcunallamari tucuita mandashpa charincuna. Paicunapaj jahuapi caj mandajcunatapish, allita ruraj nincunami. ²⁶ Ashtahuanpish cancunaca, mana chashnachu cana canguichij. Cancunapurapi maijan jatun nishca cajca, q'uipa huiñailla shinami cana canguichij. Shinallataj maijan pushacuj cashpaca, servicuj cashcatami yuyana canguichij. ²⁷ ¿Maijantaj jatun canga? ¿Micuj tiyarijchu, mana cashpaca micunata carajchu jatun canga imashi? Micuj tiyarijmari yalli jatunca. Chashna cajpipish, Ñucaca cancunata servij shinallatajmi cani. ²⁸ Cancunamari ima llaquicunahuan cajpipish, Ñucahuan carcanguichij. ²⁹ Chaimantami Ñuca Yaya Ñucaman mandanata cushca shinallataj, cancunatapish mandanata cuni. ³⁰ Chashna rurajpimi cancunaca Ñuca mandacunpica, Ñucahuan micunguichij, ubyanguichij. Shinallataj mandangapaj tiyarinapi tiyarishpami, chunga ishqui aillu israelcunata mandanguichij– nircami.