Old/New Testament

Dugang Kamahinungdanon sa Kaalam

3 Anak, ayaw gayod kalimti ang gitudlo ko kanimo; tipigi sa imong kasingkasing ang akong mga sugo, ² kay makapauswag ug makapataas kini sa imong kinabuhi. ³ Pabiling maayo ug matinud-anon. Ayaw kini walaa, hinuon tipigi gayod kini sa imong kasingkasing.^{[a] 4} Kon himuon mo kini, kahimut-an ka sa Dios ug sa mga tawo, ug maayo ilang pagtan-aw kanimo.

⁵ Salig sa Ginoo sa tibuok mong kasingkasing, ug ayaw pagsalig sa imong kaugalingong kaalam. ⁶ Hinumdomi ang Ginoo sa tanan mong ginabuhat, ug tultolan ka niya sa hustong dalan. ⁷ Ayaw paghunahuna nga maalamon ka na gayod. Tahora hinuon ang Ginoo ug ayaw paghimog daotan. ⁸ Kay makapabaskog kini sa imong lawas. ⁹ Pasidunggi ang Ginoo pinaagi sa paghalad kaniya sa unang bahin sa tanan mong abot. ¹⁰ Kon himuon mo kini, manghinobra ang mga abot diha sa imong mga bodega ug ang duga sa ubas sa imong mga pug-anan.

¹¹ Anak, ayaw ipakadaotan ang pagdisiplina sa Ginoo kanimo.^[b] Ayaw ikasakit kon badlongon ka niya. ¹² Kay disiplinahon sa Ginoo ang iyang pinangga, sama sa ginahimo sa usa ka amahan ngadto sa anak nga iyang gikahimut-an.

¹³ Bulahan ang tawo nga nakaangkon sa kaalam ug pagsabot. ¹⁴ Kay mas mapuslanon pa kini kaysa pilak ug bulawan, ¹⁵ ug mas bililhon pa sa mga alahas. Wala gayoy butang nga imong ginapangandoy nga makatupong niini. ¹⁶ Magpauswag ug magpataas kini sa imong kinabuhi, ug maghatag kadungganan kanimo. ¹⁷ Makatabang kini sa imong kinabuhi ug maghatag kanimog maayong kahimtang. ¹⁸ Bulahan ang tawong padayong nagmaalamon; ang kaalam maghatag kaayohan ug magpataas sa iyang kinabuhi.^[c]

^19-20 Pinaagi sa kaalam ug kahibalo, gimugna sa Ginoo ang kalibotan ug ang kalangitan, ug mibugwak ang mga tuboran ug naghatag ang mga panganod ug ulan.

²¹ Anak, tipigi gayod ang kaalam ug kahibalo sa pagdesisyon kon unsay ensakto. Ayaw tugoti nga mawala kini kanimo, ²² kay makahatag kini kanimog taas ug matahom nga kinabuhi. ²³ Ug magkinabuhi ka nga luwas sa katalagman ug dili ka maunsa. ²⁴ Makatulog ka ug mahinanok nga walay gikahadlokan. ²⁵ Busa dili ka angayng mahadlok kon kalit nga moabot ang makalilisang nga panghitabo o laglagon ang mga daotan, ²⁶ kay makasalig ka nga bantayan ka sa Ginoo; ilikay ka niya sa katalagman.

²⁷ Tabangi ang angayng tabangan kutob sa imong mahimo. ²⁸ Ayaw na paugmai ang pagtabang sa imong isigka-tawo, kon mahimo mo ang pagtabang kaniya karon.

²⁹ Ayaw pagplano ug daotan sa imong isigka-tawo nga nagsalig kanimo nga iyang isigka-ingon.

³⁰ Ayaw pakiglalis sa imong isigka-tawo sa walay hinungdan kon wala siyay nahimong daotan kanimo.

³¹ Ayaw kasina sa tawong bangis ni mosunod sa iyang mga binuhatan. ³² Kay ngil-aran ang Ginoo sa mga walay puangod, apan saligan niya ang nagakinabuhing matarong.

³³ Tinunglo sa Ginoo ang panimalay sa mga daotan, apan panalanginan niya ang panimalay sa mga matarong.

³⁴ Ginatamay niya ang mga nagapangtamay, apan ginakaloy-an niya ang mga mapainubsanon.

³⁵ Ang mga maalamon pasidunggan, apan ang mga buang-buang pakaulawan.

4 Mga anak, pamatia ninyo pag-ayo ang pagtul-id sa inyong amahan sa inyong pamatasan, aron makakat-on kamo. ² Maayo ang akong ginatudlo, busa ayaw ninyo kini ipakawalay-bili. ³ Sa bata pa ako ug anaa pa sa poder sa akong amahan, paborito^[d] ako sa akong inahan. ⁴ Ginatudloan ako sa akong amahan. Miingon siya kanako, “Tipigi sa imong kasingkasing ang gipanudlo ko kanimo. Tumana ang mga sugo ko aron padayon kang magkinabuhi. ⁵ Paninguhaa nga makaangkon kag kaalam ug pagsabot. Ayawg kalimti ang akong mga gipang-estorya kanimo, ug ayawg biya niini. ⁶ Ayaw isalikway ang kaalam, hatagi hinuon kinig importansya, kay mao kini ang motipig kanimo. ⁷ Ang kaalam ug pagsabot maoy labing mahinungdanon sa tanan, busa paninguhaa gayod nga maangkon mo kini bisan pag mahurot ang tanan mong kabtangan.^{[e] 8} Higugmaa ug tipigi ang kaalam, kay makahatag kini kanimog kadungganan. ⁹ Sama kini sa korona nga bulak nga makahatag ug katahom kanimo.”

¹⁰ Anak, pamatia ug tumana ang gipanulti ko kanimo aron motaas ang imong kinabuhi. ¹¹ Nagtudlo na ako kanimog kaalam, kon unsaon pagkinabuhig ensakto. ¹² Busa kon sundon mo kini, walay kahasol sa imong pagkinabuhi, ug dili ka matarog. ¹³ Ayaw gayod kalimti ang gihimo kong pagtul-id sa imong pamatasan; tipigi kini sa imong kasingkasing kay imo kanang ikinabuhi.

¹⁴ Ayaw sunda ang binuhatan sa mga daotan. ¹⁵ Likayi gayod kini ug padayon sa imong pagkinabuhing matarong. ¹⁶ Kay dili sila makatulog kon dili sila makahimog daotan o wala silay malaglag. ¹⁷ Ang kadaotan ug ang kabangis daw maoy ilang kinaon ug ilimnon.

¹⁸ Ang pagkinabuhi sa mga matarong daw sama sa nagsubang nga adlaw nga mosamot kasidlak sa kaudtohon. ¹⁹ Apan ang pagkinabuhi sa mga daotan daw sama sa kangitngit, ug wala sila masayod kon unsa ang hinungdan sa ilang pagkalaglag.

²⁰ Anak, pamatia pag-ayo ang gipangtudlo ko kanimo; ²¹ ayaw gayod kini kalimti, hinuon tipigi kini sa imong kasingkasing. ²² Kay maghatag kinig maayong panglawas ug taas nga kinabuhi sa nagabaton niini.

²³ Bantayi pag-ayo ang imong hunahuna, kay kon unsay anaa sa imong hunahuna mao usab ang imong ikinabuhi. ²⁴ Ayaw pangilad o pamakak. ²⁵ Isentro ang imong panghunahuna sa mga butang nga maayo. ²⁶ Balansiha pag-ayo ang tanan mong pagahimuon aron maayo ang mahimong resulta niini. ²⁷ Pagtinarong; likayi ang paghimo ug daotan.

Pahimangno Kabahin sa Pagpanapaw

5 Anak, paminawa kining mga maalamong pulong nga akong isulti, ² aron makahibalo ka magdesisyon sa ensakto ug manulti nga may kaalam. ³ Ang pulong sa babayeng daotan sama katam-is sa dugos, ug lami tagamtamon sama sa lana sa olibo. ⁴ Apan sa kaulahian ang kapait ug kasakit ray imong dangatan. ⁵ Kon mosunod ka kaniya, dad-on ka niya sa dapit sa mga patay; ang dalan nga iyang gilakwan padulong sa kamatayon. ⁶ Wala siya magtagad sa dalan sa kinabuhi. Dili tul-id ang dalan nga iyang ginasubay ug wala gani siya makaamgo niini.

⁷ Busa mga anak, pamatia ninyo ako ug tumana. ⁸ Palayo kamo sa babayeng sama niana. Ayaw kamo pagduol sa iyang balay. ⁹ Kay kon himuon ninyo kana, mawad-an kamog dungog ug maangkon kini sa uban, ug mamatay kamo sa kamot sa mga tawong bangis. ¹⁰ Ang tanan ninyong bahandi ug uban pang hinagoan kuhaon lang ug pahimuslan sa ubang mga tawo. ¹¹ Mag-agulo kamo kon magtinga na kamo, nga labihan na kaayo kaniwang. ¹² Unya moingon kamo, “Anugon wala ko gihatagan ug pagtagad ang mga pagbadlong sa akong pamatasan. ¹³ Wala ako mamati sa akong mga magtutudlo. ¹⁴ Busa karon, nagaungaw na ako sa baba sa kamatayon atubangan sa katilingban.”

¹⁵ Sa imong asawa ka lang angay makighilawas. Kon tubig pa kini, sa imong kaugalingong atabay ka lang magkuhag imong imnon. ¹⁶ Kay basig magluib usab ang imong asawa.^{[f] 17} Kinahanglan nga imo lang siya; dili siya makighilawas sa ubang lalaki. ¹⁸ Magpakalipay ka diha sa imong asawa, ug hinaut nga panalanginan siya sa Dios. ¹⁹ Matahom siya ug maanindot sama sa lagsaw, busa hinaut nga mawili ka kaniya^[g] ug mabihag kanunay sa iyang gugma.

²⁰ Anak, ayaw pagpadani sa babayeng daotan o pagpakigrelasyon kaniya. ²¹ Kay nakita sa Ginoo ang tanan mong binuhatan; nagatan-aw siya bisan asa ka paingon. ²² Ang binuhatan sa tawong daotan sama sa lit-ag nga mounay kaniya. ²³ Mahisalaag siya tungod sa iyang kabuang, ug mamatay siya tungod kay dili siya magpatul-id sa iyang pamatasan.

1 Ako si Pablo nga nahimong apostol^[a] ni Cristo Jesus tungod sa kabubut-on sa Dios. Ako ug ang atong igsoon nga si Timoteo nangumusta kaninyo nga mga tumutuo sa Dios^[b] diha sa Corinto, ug sa tanang mga katawhan sa Dios diha sa tibuok probinsya sa Acaya.

² Hinaut nga madawat ninyo ang grasya ug kalinaw gikan sa Dios nga atong Amahan ug kang Ginoong Jesu-Cristo.

Pagpasalamat sa Dios

³ Dalaygon gayod ang Dios ug Amahan ni Jesu-Cristo nga atong Ginoo. Maluloy-on siya nga Amahan, ug Dios siya nga kanunayng nagadasig kanato. ⁴ Gidasig niya kita sa tanan natong mga kalisdanan, aron nga pinaagi sa pagdasig niya kanato madasig usab nato ang uban nga anaa sa kalisdanan. ⁵ Kay bisan pa ug daghan ang atong naambitan nga mga pag-antos ni Cristo, daghan man usab nga mga pagdasig ang atong nadawat pinaagi kaniya. ⁶ Kon nagaantos man kami, kini alang sa pagdasig kaninyo ug sa inyong kaluwasan. Ug kon gidasig kami, kini alang usab sa paghatag ug kadasig kaninyo aron maantos ninyo ang mga kalisdanan nga sama sa among giantos. ⁷ Busa dako ang among paglaom diha kaninyo, tungod kay nasayod kami nga sa inyong pag-ambit sa among mga pag-antos, makaambit usab kamo sa pagdasig sa Dios kanamo.

⁸ Mga igsoon diha kang Cristo, gusto namo nga masayod kamo nga lisod kaayo ang among nasinati didto sa probinsya sa Asia. Kay morag dili na gayod kami makaantos niadtong panahona, ug daw ikamatay na namo. ⁹ Gipakaingon namo nga mao na kadto ang among kataposan. Apan nahitabo diay kadto aron makatuon kami nga dili magsalig sa among kaugalingon, kondili sa Dios nga mao ang nagbanhaw sa mga patay. ¹⁰ Giluwas niya kami sa katalagman sa kamatayon, ug luwason pa gayod niya kami. Siya lang gayod ang among ginasaligan nga magpadayon sa pagluwas kanamo ¹¹ samtang gitabangan ninyo kami pinaagi sa inyong mga pag-ampo. Ug tungod sa mga panalangin nga among madawat gikan sa Dios ingon nga tubag niya sa pag-ampo sa daghang mga tawo, daghan usab ang magapasalamat kaniya.

Ang Pag-usab ni Pablo sa Iyang Plano

¹² Mao kini ang among ikapasigarbo: nagkinabuhi kami nga matarong ug wala gayoy ikasaway sa among pagtagad ngadto sa mga tawo, ug labi na gayod kaninyo. Nahimo namo kini tungod sa tabang sa Dios ug dili sa among kaugalingon nga kaalam. Gipamatud-an sa among konsensya nga tinuod gayod kining among gipasigarbo. ^13-14 Wala kami magsulat kaninyo sa dili ninyo mabasa ug masabtan. Bisan kon dili ninyo kaayo kami masabtan karon, nagalaom ako nga moabot ra ang panahon nga masabtan gayod ninyo kami, aron nga sa pag-abot sa atong Ginoong Jesus ikapasigarbo ninyo kami ug kamo ikapasigarbo usab namo.

¹⁵ Tungod niining akong pagsalig, nagplano ako kaniadto nga mobisita una kaninyo aron nga sa ikaduha nga higayon makatabang kamo. ¹⁶ Nagplano ako nga mohapit una diha kaninyo kon moadto na ako sa Macedonia, ug sa akong pagbalik gikan sa Macedonia mohapit ako pag-usab diha aron matabangan na usab ninyo ako sa akong pag-adto sa Judea. ¹⁷ Mao unta kadto ang akong plano. Apan tungod kay wala kami makadayon, nagkahulogan ba kini nga dili masaligan ang akong gisulti? Basin makaingon kamo nga sama usab ako sa uban nga mga tawo dinhi sa kalibotan nga nagaplano ug naghuna-huna alang lang gayod sa ilang kaugalingong kaayohan. Nagaingon sila “Oo,” apan kadto nagkahulogan diay nga “Dili.” ¹⁸ Apan ang tinuod mao kini: ingon nga ang Dios kasaligan, masaligan usab ninyo ang among gisulti kaninyo. ¹⁹ Kami ni Silas ug ni Timoteo nagwali kaninyo mahitungod sa Anak sa Dios nga si Jesu-Cristo. Ug nasayran ninyo nga si Cristo masaligan sa iyang gisulti. Dili mahimo nga dili niya buhaton ang iyang gisaad. ²⁰ Pinaagi kaniya ang tanang gisaad sa Dios natuman. Busa makaingon kamo nga kasaligan gayod ang Dios, ug pinaagi niini madayeg siya. ²¹ Ang Dios mao ang nagpalig-on kanato sa atong pagpakig-uban kang Cristo. Gipili niya kita nga mag-alagad kaniya. ²² Gimarkahan niya kita ingon nga iya pinaagi sa pagpapuyo niya sa Espiritu Santo diha sa atong kasingkasing, nga mao usab ang kalig-onan nga madawat nato ang iyang mga saad.

²³ Nasayod ang Dios nga nagasulti ako sa tinuod. Ang hinungdan kon nganong wala ako nakadayon sa pag-anha diha kaninyo sa Corinto mao nga dili ko gusto nga malain ang inyong buot kanako. ²⁴ Wala kami magmando kaninyo mahitungod sa inyong pagtuo, kay lig-on na man kamo. Gusto lang unta namo kamong tabangan aron magmalipayon kamo.