New Testament in a Year

²⁰ Lot en jiedra enn dee Beroopinj bliewe enn dee hee beroope es.

²¹ Weascht du beroope aus en Sklow? sorg nich doa aewa. Oba wan do kaunst Frie woare, dan bruck daut leewa.

²² Dan waea em Herr beroope es aus en Sklow es daem Herr sien frieha Maun; jrod so waea frie es, es daem Herr sien Sklow.

²³ Jie sent met en deara Pries jekofft, dan lot ju nich aun Mensche fesklowe.

²⁴ Breeda, lot en jiedra doabenne bliewe met Gott, wuarenn hee beroope wea.

²⁵ Nu waeajen dee Oonbefriede ha ekj nich en Jeboot fom Herr, doch jaew ekj junt Rot soo aus eena dee fom Herr Erboarmunk jekjraeaje ha, true to senne.

²⁶ Ekj wudd denke daut fa dise Tiet daut Goot wudd senne, ekj saj dautet Goot es fa en Maun so to senne.

²⁷ Best du aun ne Fru febunge, dan seakj nich loostowoare. Best du fonn ne Fru loos, dan seakj nich ne Fru.

²⁸ Oba wan du die befriehe deist, sindichst du doamet nich; en wan ne Junkfru sikj befriet, sindicht see nich; oba em Fleesch woat see fael Aelend liede; ekj spoa junt.

²⁹ Oba dit saj ekj, Breeda, de Tiet es fekjartet; daut es soo daut dee, dee Fruehes habe, soo sele senne aus wan see nich habe;

³⁰ en dee, dee hiele, aus wan see nich hiele; en dee, dee sikj freihe, aus wan see sikj nich freihe; en dee, dee kjeepe aus wan see nich eajne;

³¹ en dee, dee Jebruck moake fonn dise Welt, aus wan see daut nich fenichte; dan waut dise Welt aunjeheat woat fegone.

³² Oba ekj wensch mie daut jie oone Sorj selle senne. Waea nich befriet es, dee sorjcht fa daut waut daem Herr siene Sach es, woo hee daem Herr jefaule kaun;

³³ Oba waea befriet es, sorjcht aewa dise Welt Sache, woo hee siene Fru jefaule kaun, en es jespoolt.

³⁴ Dee oonbefriede Fru en dee Junkfru sorje omm daem Herr siene Sach, daut see heilich muchte senne beides em Kjarpa uk em Jeist; oba ne befriede Fru sorjcht omm dise Welt Sache, woo see aea Maun jefaule kaun.

³⁵ En ekj saj dit fa jun eajna Jenotte; en nich daut ekj junt fonn waut wel trighoole, oba fa daut wautet baste es, en daut jie daem Herr junt kjenne oonjehindat hanjaewe.

³⁶ Oba wan waea denkt daut hee siene Junkfru nich racht behaundelt, wan see oolt jenuach es, en daut soo mott senne, lot am soo doone aus hee wel; hee sindicht nich - lot an sikj befriehe.

³⁷ Oba waea enn sien Hoat faust besteit, en daut nich needich haft, en aewa sien eajna Wele Macht haft, en haft sikj enn sien Hoat oppjemoakt daut hee siene Junkfru hoole woat, deit uk Goot.

³⁷ Aulso waea siene Junkfru befriet, deit Goot; en dee siene Junkfru nich friet, deit baeta.

³⁹ Ne Fru es aun aea Maun febunge so lang aus hee laeft; oba wan aea Maun stoaft, es see frie sikj to befriehe met waem see wel, so lang ausset em Herr es.

⁴⁰ Oba see es no miene Meeninj baeta auf so to bliewe aus see es: en ekj denk daut ekj uk daem Herr sien Jeist hab.