New Testament in a Year

7 Nu dee Sache fonn dee jie mie schreewe, daut es goot fa en Maun wan hee sikj nich met ne Fru aufjeft.

² Doch, waeajen Huararie, lot en jieda Maun sien eajne Fru habe, en jiede Fru aea eajne Maun.

³ De Maun saul de Fru daut jaewe waut aea Rajcht es, en jrod so saul de Fru daem Maun jaewe waut sien Rajcht es.

⁴ De Fru haft kjeene Macht aewa aea eajne Kjarpa oone daen Maun, en jrod so haft de Maun kjeene Macht aewa sien eajne Kjarpa oone de Fru.

⁵ Hoolt junt nich eena fomm aundre trig, buta jie junt eenich sent doaenn fa ne Tiet, daut jie Tiet naemen tom baede, en dan wada toop kome, daut Soton junt nich feseakje kaun doarenn daut jie nich aufsaje kjenne.

⁶ Oba ekj saj dit derch Erlaubniss en nich aus en Befael.

⁷ Ekj wensch aulamaun wea soo aus ekj sie; oba en jieda haft siene Gow fonn Gott, eena dit, en dee aundra daut.

⁸ Nu saj ekj to dee, dee nich befriet sent en dee Waetfruehes, dautet Goot es fa an soo to bliewe aus ekj sie.

⁹ Oba wan see sikj nich selfst beharsche kjenne, lot an sikj befriehe; dan daut es baeta befriehe aus enn Lost to brenne.

¹⁰ En to dee befriede befael ekj, en doch nich ekj, oba de Herr, lot de Fru sikj nich fonn aea Maun scheede;

¹¹ oba wan see utaneen es, lot aea oonbefriet bliewe, oda met aea Maun sikj wada fe-eenje: en de Maun saul siene Fru nich felote.

¹² En to dee aundre saj ekj, nich de Herr, wan en Broode ne Fru haft dee nich jleeft, en see welich es met am to wone, lot am aea nich felote.

¹³ En dee Fru dee en onnjleewende Maun haft, en hee welich es met aea to wone, lot aea am nich felote.

¹⁴ Dan dee onnjleewende Maun es derch dee Fru jeheilicht; en dee onnjleewende Fru es derch aea Maun jeheilicht: aundasch wudde june Kjinja onnrein senne, oba nu sent dee heilich.

¹⁵ Oba wan dee Onnjleewendea felat, dan lotem felote; de Brooda oda Sesta es en soone Sach nich feskloft; oba Gott haft junt enn Fraed beroope.

¹⁶ Woo weetst du, Fru, auf du dien Maun rade woascht? en du Maun, woo weetst du auf du diene Fru rade woascht?

¹⁷ So aus de Herr en jiedrem haft tojedeelt, so aus Gott en jiedrem beroope haft, so lot am waundle. So befael ekj enn aule Jemeente.

¹⁸ Es waea beroope aus en beschnaedna? Lot am nich oonbeschnaede woare. Es waea beroope aus en oonbeschnaedna? Lot am sikj nich beschniede lote.

¹⁹ De Beschniedunk es nuscht, en daut oonbeschnaede senne es nuscht, bloos Gott siene Jeboote hoole talt waut.